خورجە

كورد و كازمی

1
دواجار بازەكە لەسەر شانی كازمی نیشتەوە، ئەم بازە چەند دەبێتە مایەی دەسكەوت و ناوبانگ و ناوداری، دوو هێندەش مایەی ترس و نەهامەتیە، گەر نەزانی چۆن و بە چ شێوازێك یاساو رێساكان رێكبخەیت، عیراق، عیراقی نیفاق و بێ‌ ئیتیفاقە، چەند لە ناوەخۆدا ناكۆك و ناجۆر و دڕدۆنگن بە یەكتر هەندەش لە دەرەوە، لە دەر و دراوسێوە چاویان لەسەرەو هەن بێ‌ بڕیاری دەرو دراوسێ‌ دەست ناكەن بە ئاودا، بارودۆخی ئاوا ژیری و بیر فراوانی دەوێت، چۆن دەكرێت هاوسەنگی رابگیرێت و هەمووان وەك یەك ببینرێن، تەنانەت لەوەشدا كە ناكرێ‌ ئەم وڵاتە ئەو هەموو خەڵكە بەلەنگازو برسی و بەد بەختەی تیا بێت .
جێی خۆیەتی دێڕێكی قانعی شاعیر بیر كازمە بخەمەوە كە مەلائیكەی رۆزی بە خودا دەڵێت :

پیاوەتیت ناكەم نەڵێی مەلەكە
ئەبم بە بەردەست كەریم ئەلەكە

دوور لە چواندن، دەبێت كازمی هێندە وریا بێت نەهێڵێ‌ كەس لە ریزەكە دەربچێت.

2
كورد لە عیراقدا هەمیشە خۆیان بە ستەملێكراو زانیووە، لە سایەی رژێمە یەك لە دوا یەكەكانی عیراقدا هەرگیز نەحەساونەتەوە و هەردەم وەك مرۆڤی پلە دوو خوارتر سەیریان كراوە، ئەمەش وای كردووە نەعیراق ئارام بێت، نەكوردیش رۆژێك بە خۆشی ژیا بێت، ئەمە كێشەی نەبوونی دادگەری و بوونی ستەم و نادادیە، ئاخۆ رۆژێك دێت ئەو هەموو ستەمە بكەوێتە پشتمانەوەو ئیتر عەرەبیش كەمێك لە بەردەم پەیكەرەكەی گۆراندا بوەستێ‌ و داوای لێبوردن بكات لە شاعیرێك كە دەیگووت :

لە یەك کاسە تاڵی نۆشین
برایی كردین بە هەنگوین

من بم لە بری كازمی ئەو شیعرەی گۆران بە گەورەیی و بە عەرەبی لە تەلاری ئەنجومەنی وەزیران هەڵدەواسم .

3
بۆ ئەوەی ستەم دووبارە نەبێتەوە دەبێت برینەكان ساڕێژ بكەین، واز لەوە بێنن كێ‌ خەتابارە و كێ‌ خەتا بار نیە، ئەگەر سبەینێی كازمیش هەر لە ئەمڕۆ بچێت كەواتە هیچ نەكراوە و هیچ ناكرێت، خۆ گەر سبەینێ‌ لە ئەمڕۆ باشتر بوو، بە دڵنیاییەوە نەك ئێمە و مانان تەنانەت و ئەبی نەواس و جەواهیریش لە گۆڕەكانیاندا دەحەسێنەوە .
سیاسیەكان چی بە یەك دەكەن كەیفی خۆیانە، بەڵام ناكرێت شەڕی سیاسیەكان بگوازرێتەوە بۆ سەر خوانی میللەت، كازمی دەتوانێت وێنەیەكی تر نیشان بدات گەر بیەوێت، گەر نا ئەوە ریسەكە دەبێتەوە خوری و دەگەڕێینەوە خاڵی سەرەتا.

print

 219 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*