سەرەکی » ئاراستە » مارف به‌رزنجی هێشتا وەک (شەهید) ئەژمار نەکراوە

مارف به‌رزنجی هێشتا وەک (شەهید) ئەژمار نەکراوە

ساڵح بێچار

هەمیشە لەگەڵ بینینی وێنە و بیستنی ناوی (شێخ مارف بەرزنجی) دا، مرۆڤ ئاخێک بە ناخیدا و کسپەیەک بە هەست و ویژدانی دەگات ..مرۆڤێک لە تاریکترین سەردەمەکانی حوکمی عێراقدا، توانی ببێتە (پشکۆ) یەکی گەشی هەناوی ئەنگوستەچاوی شەوەزەنگی زەبروزەنگ.

شێخ مارف وەک کوڕە شێخێکی خاوەن نفوس و تەکییە و تەریقەت، هەر زوو یاخی بوو لە فەرهەنگ و دابونەریتی خێزانیی و کۆمەڵایەتی و تەریقەتێکی دیکەی بۆ خۆی دۆزییەوە کە بریتی بوو لە بڕوابوون بە یەکسانی خەڵک و دادپەروەریی کۆمەڵایەتی و چون یەک ژیان.

وەک خۆی دەڵێ: « گه‌ڕامه‌وه‌ بۆ كه‌ركوك، ده‌ستم كرده‌وه‌ به‌ پارێزەریی. باش پێشكه‌وتم، ده‌ره‌به‌گه‌ زله‌كانم ترساند بوو، چونكه‌ ده‌عوای جوتیارە‌كانم ئه‌گرت و زۆر به‌ ئازایانه‌ تێئه‌كۆشام لە دژیان و له‌ گه‌لێک ده‌عوا سه‌ركه‌وتم به‌رامبه‌ریان، زۆرتر به‌وه‌ جوتیارەكانم هانئه‌دا كه سکاڵا ‌و مه‌زبه‌ته‌ی زۆر بكه‌نه‌وه‌ له‌دژی ئه‌و حاكمانه‌ی كه‌ لایه‌نگری ئه‌و شێخ و ئاغایانەن».

دەکرێت توانا و تێکۆشانی شێخ مارف لە زۆر ڕووەوە، لەگەڵ مامۆستا ئیبراهیم ئەحمەد بەراورد بکرێت، وەک کارکردنی سەرکەوتووانە لە بوارەکانی کاری سیاسی و حزبی، ڕاوەدونان و زیندانی کردن، ڕۆژنامەوانیی، نووسینی شیعر، چیرۆک، ڕۆمان و وەرگێڕان لە ئینگلیزیی عەرەبی و تورکییەوە. دوا جاریش پارێزەریی و لایەنگریی جوتیاران و ماف زەوتکراوان. تەنانەت لە هەڵبژاردنەکانی ساڵی 1954 ی عێراقدا، لەگەڵ مامۆستا ئیبراهیم ئەحمەد، دوو کاندیدی سەرەکی بەرەی نیشتمانیی یەکگرتوو بوون لە ناوچەی سلێمانی.

شەهید شێخ مارف ئەگەرچی بە تۆمەتی شیوعی بوون، دوای نزیکەی چوار ساڵ مانەوەی لە زیندان، ڕۆژی 23-6-1963 لەگەڵ پارێزەر شێخ حسێنی برای و (27) کەسی دیکەدا لە سێدارە درا، بەڵام ئەوەی جێگەی پرسیار و گومان و داخە، دوای (57) ساڵ لە شەهید بوونی، ئەو نووسەر و شاعیر و ڕۆژنامەنووس و پارێزەرە، هێشتا نە لە لایەن حکومەتی عێراقی و نە لە لایەن حکومەتی هەرێمی کوردستانەوە، وەک (شەهید) ئەژمار نەکراوە،

هەر وەکو کاک سامان مارف بەرزنجی، کوڕی دەڵێ: «ئێمە وەک بنەماڵەی مارف بەرزنجی، شەهید، دەتوانم بڵێم لەبری بنەماڵەی هەموو ئەوانەی کە لەگەڵ باوکم شەهید کراون، داواکارین لە حکومەتی هەرێمی کوردستان، بە ڕەسمیی داوا لە حکومەتی عێراقی ناوند، بکات کە ئەو کەسانەی کە لە ڕووداوەکانی 1959 لە هەردوو نەتەوەکە کە تیاچوون و شەهید بوون، مافە مەدەنییەکانمان بۆ بگێڕدرێتەوە و بە شەهید ئەژمار بکرێن، بۆئەوەی نەوەکانیان بتوانن سوود لە گەڕانەوەی ئەو مافە مەدەنییە ببینن».

print

 135 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*