سەرەکی » وتار » هونه‌ر ره‌سوڵ ئه‌حمه‌د » ماڵئاوا هەڤاڵ هونەر ماڵئاوا گۆشەی روونتر

ڕوونتر

ماڵئاوا هەڤاڵ هونەر ماڵئاوا گۆشەی روونتر

بە داخێكی زۆرەوە، بەهۆی كۆچی ناوادەی هەڤاڵ ‌و نووسەر ‌و راگەیاندنكار (هونەر رەسوڵ)، لەمڕۆوە ئەم گۆشەیە بەردەوام نابێت.

بە دوا سەفەری ماڵئاوایی كاكە هونەر، جگە لە جگەرگۆشەكەی، گۆشەی (روونتر)یشی، هەتیو كرد ‌و چیدی لەگەڵمان نابێت، تاكو رووداوەكان بەشێوەیەكی كوردانە و یەكێتییانەوە روونتر بكاتەوە ‌و پەنجە بخاتە سەر كێشەكان ‌و پێشنیازیش بۆ چارەسەركردنیان، بكات.

هەڤاڵ هونەر وەكو یەكێك لە خوێندكارانی رێبازی چەپكەگوڵەكە، لە نووسینەكانیدا هەمیشە كێشەكانی بەشێوەیەكی كوردانە ‌و یەكێتییانە شرۆڤە دەكرد ‌و ئاشتی ‌و ئارامی ‌و خۆشگوزەرانیی كۆمەڵانی خەڵكی كوردستان ببووە خەمی گەورەی ‌و لەو پێناوەشدا وەكو كادرێكی دڵسۆز ‌و بە توانا كاری دەكرد ‌و وەكو نووسەرێكیش لەبارەیەوە دەینووسی ‌و وەكو راگەیاندنكار ‌و پەیامنێرێكیش كێشە و خەمەكانی دەگەیاندە دەسەڵاتداران.

كاكە هونەر هێندە بە دڵ و گیان كارەكەی خۆی خۆشدەویست، كە لە هەر كاتێكدا هەر شتێكی پێ بسپێردرایە، بە دڵفراوانییەوە رایدەپەڕاند ‌و هەوڵی دەدا بە باشترین شێوە بیگەیەنێتە شوێنی خۆی، ئەگەر هەندێ جاریش لەبەر نەبوونی كات، یان بە هەر هۆیەكی ترەوە نەیتوانیبێ بە دڵی خۆی كارەكە بكات ‌و ئەوەی مەبەستێتی بیپێكێ، داوای لێبووردنی دەكرد، تەنانەت جارێكیان لە نامەیەكیدا نووسیبووی، لە كەم و كورتیم ببوورن، بە رێگاوە نووسیومە.

زۆر بە داخەوە بۆ لەدەستدانی قەڵەمێكی هێمن ‌و دڵسۆز، زۆر بەداخەوە بۆ لەدەستدانی دەنگێكی لەسەرخۆ ‌و ئازا، زۆر بە داخەوە بۆ لەدەستدانی ویژدانێكی كوردانە و یەكێتییانە.

رۆحت شاد ‌و ئاسوودە بێت

هەڤاڵ هونەر

 454 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*