سەرەکی » ئەدەب - سێبەر و سایە » خەوی مەحمود زامدار لەبەغداوە تا هەولێر

دەروازە بۆ ساڵکۆچی زامدار-ی رەنگاورەنگ لەنووسین:

خەوی مەحمود زامدار لەبەغداوە تا هەولێر

نازم دڵبەند

سبەینێیەکی ساڵی 1981 بوو بە تەنها لە هەولێرەوە ئۆتۆمۆبێلم لێخوڕی چێشتانێ گەیشتمە بەغدا و ئیشوکارەکانم تەواو کرد. دەبوایە بگەڕێمەوە، بەڵام گۆتم با (زامدار) و برادەران ببینم چاییەکیان لەگەڵ بخۆمەوە و ئینجا ووردە ووردە بەڕێکەوم، چونکە ئێمەش گەنجی خوێن گەرمی نووسەربووین و بە ئاواتەوە بوین زوو بگەینە چایخانەی (پەرلەمان) لە شەقامی (رەشید) بەرامبەر مزگەوتی (حەیدەرخانە) تا بچینە مەجلیسی نووسەرانی وەک (مەحمود زامدار و سەڵاح شوان و سەلام مەحەمەد……) .

کە گەیشتمە چایخانەکە (مەحمود زامدار) بەخۆی و بەجانتاکەی کە سەری هاروماری تێدابوو لە دەرگاکە دەچووە ژوورێ کە چاوی بەمن کەوت لە باوەشێی گرتم و ماچی کردم و گۆتی «هەڵلا هەڵلا بۆنی هەولێرێت لێدێ».

دواتر چووینە ژوورێ و هەرزوو گۆتی شەو بۆخۆمان پێکەوەدەبین و دەچینە مەیخانەی (جونەینە)، دوای چاخواردنەوە و مانەوەمان لەگەڵ برادەران هەڵساین بەرەو مەیخانەکە چووین تا درەنگی شەو ئەوەی مایەوە (من و سەڵاح شوان و مەحمود زامدار) بووین. پاشان کەهەڵساین بەخەیاڵی مەستی بڕیارماندا بچینە (کەبەرێ) لەوێش (زامدار) قسوری لە خواردنەوە نەکرد، بەڵام هەموو شتێکی لە بیربکردایە (جانتا)کەی لەبیرنەدەکرد دەتگوت (سەندوقی رەشی ژیانی خۆیتی) سەعات یەکی شەو بوو هەڵساین (سەڵاح شوان) م بردەوە (بەغداد جدیدە)و گەڕامەوە تا (زامدار)ی بگەیەنمەوە ماڵ وابزانم ماڵیان لە (راغبە خاتون)بوو، بەم نیوە شەوە هەموو ئەو شوێنە گەڕاین، چونکە (زامدار) بە تەواوی کوژابۆوە بەماڵەکەی خۆیان نەکەوتەوە …

دواجار من ناچاربووم بڕیارمدا بەرەو هەولێر بگەڕێمەوە، چونکە کە بەیانی زوو لە هەولێر هاتم هەروا بڕیارمدابوو بگەڕێمەوە….لێمخوڕی و (زامدار) کەوتە خەوێکی زۆر قوڵ جادە چۆڵ بوو سەعات (7 )ی بەیانی گەیشتمە بەردەم چایخانەی (عەبۆ)ی و گۆتم:«هەستە هەستە (زامدار)….»، هەستایەوە و گۆتی:«گەیشتینە ماڵ»، گۆتم:«ماڵی چ ئێرە هەولێرە وەرەخوارێ بابچینە لای (عوسمان تەشریبچی) تەشریبی بخۆین»، هەندێ چاوی زیاتر کردەوە گۆتی:«کوڕە وەڵا راستدەکەی ئەوە قەڵاتە .. ئەتوو بەڵای کوڕە ئەمن دەبی ئەوڕۆ مەوادی مجەلەی (بەیان) ببەمە چاپخانە مەوعیدی خۆیتی…دەزوو زوو باتەشریبەکە بخۆین و بمگەینە نەقلیاتی»، چوینە لای عوسمان-ی جارێ نیو سەعات لەگەڵی باسی هەولێر و هەولێریانی کرد. بەهەرحاڵ نانمان خوارد و بردمە نەقلیاتی بەغدا (ئەڵلا قۆیسەن زامدار دەڕواتەوە بەغدا) جێم هێشت و من زۆر هیلاکبووم ماڵمان لەگەڕەکی (عارەبان) بوو هەرخۆم و داکم بووین چووم لێی نووستم تا مەغریب کە هەڵسام دوای خۆ گۆڕین چومە (یانەی مۆزەفین) دەبینم (زامدار) سەری مێزی گرتیە و خیتاب دەدا لەسەر (شیعری کۆنکرێتی و ئەڵێۆت و مەعقول و نا مەعقول و ئیتر…) لێی چومە پێشەوە هەموو جەماعەت دایانە قاقای پێکەنین تومەز مەسەلەی خەوەکەی بەغدای تا هەولێری بۆ گێڕابونەوە گۆتم:«دنیات لەسەر من خراپ کرد لۆ مجەلەی (بەیان) ئەدی ئەمن ئەتوم نەبردە نەقلیات بچیەوە بەغدا؟»،سەیرێکی کردم و گۆتی:

«بەخوای بێ عەقڵی (مەحمود زامدار) پێی لەهەولێرێ گیربی بەهەوەنتە دەڕواتەوە، ئەوجا ئەگەر حەزدەکەی لە بەغداێ منت نواند لە هەولێرێ هەڵمتساند ئەوجارە با لەهەولێرێ بێ هەتا بەغداێ….».

print

 135 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*