سەرەکی » ئاراستە » شه‌هید شێخ جه‌مالی گه‌رمیان و داستانی زینانه‌

شه‌هید شێخ جه‌مالی گه‌رمیان و داستانی زینانه‌

بێستون زوبێر

لای هه‌مووان ئاشكرایه‌ كه‌شۆڕشه‌ یه‌ك له‌دوای یه‌كه‌كانی كوردستان له‌سه‌رده‌می شێخ مه‌حموودی حه‌فیده‌وه‌ تا شۆڕشی ئه‌یلول و دواتریش شۆڕشی نوێ به‌ڕابه‌رایه‌تی هه‌ڤال (مام جه‌لال) تێكۆشان بووه‌ له‌پێناو دۆزی ره‌وای گه‌لی كورد به‌ ئامانجی به‌ده‌ستهێنانی مافه‌ ڕه‌واكانی گه‌لی كورد، به‌ڵام شۆڕشی نوێ جیاواز له‌ ته‌واوی شۆڕشه‌كانی پێش خۆی تاكه‌ شۆڕش بووه‌ كه‌ ئامانجی پێكاوه‌ و بووه‌ته‌ هۆی ڕاودونانی دوژمنانی گه‌لی كوردو دروستبوونی كیانی سیاسی و دواتریش دروست بونی په‌ڕله‌مان و حكومه‌تی هه‌رێمی كوردستان، دیاره‌ ئه‌م هه‌موو ئامانجه‌ گه‌وره‌ی هه‌ر وابه‌ ئاسانی به‌ده‌ست نه‌هاتوون، هێزی پێشمه‌رگه‌ كوردستان شۆڕشی نوێ به‌ به‌خشینی خوێنی هه‌زاره‌ها بێچوه‌ شێر و به‌شداریی تێكۆشه‌ران هه‌ر له‌ خانه‌قینه‌وه‌ هه‌تا زاخۆ و به‌ پشتیوانی گوندنشینان و ته‌واوی خه‌ڵكی دڵسۆزی كوردستان له‌ پێناو رزگار كردنی خاكی پیرۆزی كوردستان.

له‌م رووه‌شه‌وه‌ یه‌كێتیی نیشتمانیی كوردستان له‌ هه‌ر رۆژێكی ساڵدا یادی تێكۆشه‌رێكی ده‌كاته‌وه‌.

یه‌كێك له‌و تێكۆشه‌رو كه‌سایه‌تییه‌ شۆڕشگێڕه‌ دیارانه‌ی كه‌ جێگه‌ی خۆیه‌تی زیاتر باس بكرێت و جیلی نوێی پێ ئاشنا بكرێت، شه‌هیدی فه‌رمانده‌ شێخ جه‌مال شێخ به‌هادینه‌ كه‌ ناسراوه‌ به‌ شێخ جه‌مالی گه‌رمیان.

داستانی مه‌زنی زینانه‌، ساڵی 1985 به‌ ده‌ست و تفه‌نگی 16 پێشمه‌رگه‌ و به‌خشینی چوار شه‌هید و چه‌ند بریندارێك تۆماركرا، ته‌نهاچه‌كی قورس و كاریگه‌ریشیان بریتی بوو له‌ (دوو بیكه‌یسی و یه‌ك ئاڕبیچی)، ئه‌مه‌ له‌كاتێكدابوو دوژمن له‌وپه‌ڕی به‌هێزیدا بوو، خاوه‌نی جۆره‌ها چه‌كی پێشكه‌وتوو و فڕۆكه‌ی جه‌نگی بوو، به‌ڵام گه‌نجه‌ به‌ده‌ست و قامه‌كانی گه‌رمیان له‌ دڵسۆزی و خۆشه‌ویستیی خاكی كوردستان توانیان رووبه‌ڕووی هێزی زه‌به‌لاحی دوژمن ببنه‌وه‌ كه‌ خۆی له‌ 10 هه‌زار سه‌رباز و جاش و ئه‌من و ئستخبارات ده‌بینییه‌وه‌، له‌ ئه‌نجامدا دوژمنیان تێكشاندو سه‌ركه‌وتنێكی گه‌وره‌یان تۆماركرد.

ئه‌وی ڕۆژێ كه‌سانێك هه‌بوون كه‌ خۆشی ژیان و سه‌روه‌ت و سامانیان هه‌ڵبژاردبوو، به‌ڵام به‌وره‌كانی گه‌رمیان له‌ژێر سایه‌ی یه‌كێتیی نیشتمانیی كوردستاندا توانیان داستانێكی كه‌م وێنه‌و نه‌بیستراو تۆمار بكه‌ن، كه‌ به‌ ئه‌قڵی كه‌م كه‌سدا ده‌هات ژماره‌یه‌كی كه‌می پێشمه‌رگه‌ له‌به‌رامبه‌ر هێزێكی گه‌وره‌و بێشووماری ده‌وڵه‌تێكی دڕنده‌ی وه‌ك عیراق، ئه‌و سه‌ركه‌وتنه‌ مه‌زنه‌ تۆماربكه‌ن.

سه‌یری هه‌ر رۆژێكی شۆڕشی نوێ بكه‌ین بۆ خۆی داستانێكی نه‌بیستراوه‌ و پڕیه‌تی له‌ نه‌به‌ردی و گیانفیدایی، مێژووش شاهیدی پاكی و دڵسۆزی پێشمه‌رگه‌و تێكۆشه‌رانی یه‌كێتیی ده‌دات.

ئه‌گه‌رچی جێگای داخه‌ ناو ناوه‌ هه‌ولی له‌رزۆك هه‌یه‌ بۆ نا شیرینكردنی شۆڕشه‌ یه‌ك له‌دوای یه‌كه‌كان و به‌تایبه‌تیش شۆڕشی نوێ، لێرو له‌وێ ده‌بیسترێت و ده‌بینرێت بۆ ئامانجێكی دیاریكراو هه‌وڵی ناشرینكردنی ئه‌م شۆڕشه‌ ده‌درێت تا سه‌ر له‌ جیلی نوێ بشێوێنن و بێ ئاگایان بكه‌ن له‌ ڕاستییه‌كان، كه‌ بێگومان ئه‌مه‌ خزمه‌ت به‌ دۆزی ره‌وای گه‌له‌كه‌مان ناكات، له‌ دواجاردا بۆشیان ناچێته‌ سه‌ر، چونكه‌ مێژوو گه‌واهیده‌ری ه‌موو ئه‌و راستیانه‌یه‌.

من پێم وایه‌ ئه‌م هه‌موو سه‌روه‌ری و داستانانه‌ به‌ تایبه‌ت داستانی (زینانه‌) له‌ هه‌ر وڵاتێكی تردابوایه‌ چه‌نده‌ها فیلم و ڕۆمانی له‌سه‌ر ده‌نووسرا، چه‌ندین خه‌ڵاتی له‌سه‌ر به‌ده‌ست ده‌هات و ده‌بووه‌ كه‌ناڵێكی به‌هێز بۆ زیاتر ناساندنی دۆزی كورد به‌ دنیای ده‌ره‌وه‌.

بۆیه‌ من لێره‌وه‌ داوام وایه‌ كه‌ ئێمه‌ وه‌كو كورد و به‌تایبه‌تیش لایه‌نه‌ سیاسییه‌كان هه‌وڵبده‌ن ئه‌م رابردووه‌ جوان و پڕشانازیی و دره‌وشاوه‌یه‌ ته‌سنیف بكرێت و جیلی نوێی لێ ئاگادار بكرێته‌وه‌، كه‌ خاوه‌نی ئه‌م رابردووه‌ پاكه‌ین و دوژمنمان زۆره‌، زۆركراوه‌ و زۆریشی ماوه‌ بۆ گه‌یشتن به‌ته‌واوی مافه‌ ڕه‌وا كانمان.

لێره‌شه‌وه‌ ستۆپێك بێت بۆ ته‌واوی ئه‌و هه‌وڵه‌ له‌رزۆكانه‌ش كه‌ بۆ ئامانجێكی دیاریكراو هه‌وڵی به‌لا ڕێدابردنی ڕاستییه‌كان ده‌ده‌ن.

 294 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*