سەرەکی » ئاراستە » دكتۆر هادی‌ ملوانه‌كه‌یه‌ك به‌ گه‌ردنی‌ خاڵخاڵاندا

ونناوەکانی شۆڕش

دكتۆر هادی‌ ملوانه‌كه‌یه‌ك به‌ گه‌ردنی‌ خاڵخاڵاندا

ئازاد سه‌راوی

له‌ بناری‌ خاڵخاڵاندا مۆرخوارده‌ ده‌توت په‌رچه‌می‌ زێی‌ بچوكه‌، به‌ ده‌م ورده‌ شه‌پۆله‌وه‌ خۆی‌ ڕاده‌دا، هێلانه‌ی‌ باڵنده‌یه‌كی‌ ئێسك سووك و سوور ده‌نووكه‌، هێنده‌ ئارام له‌ ژێر باڵی‌ شه‌وی‌ تارا، به‌ هێمنی‌ ڕاكشاوه‌ له‌ ناو باوه‌شی‌ شه‌وگارا، هه‌تا ڕۆژێك به‌عس بێره‌شدا تێپه‌ڕی‌ ئێره‌شی‌ كرده‌ تارمایی‌، مۆرخوارده‌ش بووه‌ پێده‌شتێك له‌ ڕه‌شایی‌.

دكتۆر هادی‌ مه‌رهه‌می‌ برین و زامی‌ ئه‌و پێده‌شتانه‌ی‌ كه‌ركوك بوو، له‌ گه‌رمیاندا برینپێچی‌ برینه‌كانی‌ پێشمه‌رگه‌و دكتۆری‌ گه‌وره‌و بچوك بوو، له‌گه‌ڵ ناڵه‌و ئازاری‌ هه‌ر برینێكدا ئه‌میش پڕ ده‌بوو له‌ ئازار، ئازاری‌ زامی‌ پێشمه‌رگه‌ و نیشتمانێكی‌ پڕ هاوار.

كۆمیته‌ی‌ ئاگر ئاگری‌ گڕه‌و هه‌ناسه‌ی‌ كه‌ركوك بوو، به‌ر ببووه‌ پووش و په‌ڵاشی‌ داگیركه‌ر، ئاگرێك گڕوو بڵێسه‌ی‌ بابه‌گوڕگوڕ تینوو تاوی‌ هه‌ناوی‌ بوو، دكتۆر هادی‌ گورزی‌ تۆڵه‌ی‌ سه‌ندراوی‌ بوو.

له‌و پێده‌شته‌ كرك و سركانه‌ی‌ كه‌ركوكدا هه‌ڵۆی‌ هه‌ڵمه‌ت و داستان بوو، په‌نجه‌ی‌ به‌له‌پیتكه‌ی‌ تفه‌نگ، له‌ گه‌ڵ هه‌گبه‌یه‌كی‌ بچووك، ده‌رزییه‌كی‌ ئازار شكێن، خۆی‌ دكتۆری‌ زامه‌كان بوو، له‌ یه‌ك كاتدا كه‌شكۆڵ له‌ كۆڵ، پێشمه‌رگه‌ی‌ هه‌ردوو چیا و چۆڵ، كه‌شكۆڵێك هه‌ندێك ده‌رمان و له‌فافێكی‌ برین پێچیان، له‌ گه‌ڵ تاقم و تفه‌نگه‌كه‌ی‌ ده‌یكردنه‌ شان، هه‌ندێك جاریش نۆره‌ی‌ ده‌كرد، ئه‌میانی‌ ده‌كرده‌ ئه‌و لاو ئه‌ویانی‌ ده‌كرده‌ ئه‌مشان.
تا ئێستاكه‌ش جێگه‌ی‌ برین ده‌ست و په‌نجه‌ی‌ دكتۆر هادی‌ ده‌نه‌خشێنێ‌، ته‌ماشاكه‌ن جه‌سته‌ی‌ هیلاك و شه‌كه‌تی‌ برینداره‌كانی‌ دوێنێ‌، ده‌ست و په‌نجه‌ی‌ دكتۆر هادی‌ ده‌یاندوێنێ‌، به‌ سه‌ر زامی‌ جه‌سته‌ی‌ حه‌مه‌ سوردا بڕۆ ته‌قه‌ڵ ته‌قه‌ڵ جێپه‌نجه‌ی‌ دكتۆر هادیه‌ و زامه‌كانی‌ ڕاده‌ژێنێ‌، ئێستاكه‌شی‌ له‌ گه‌ڵدا بێ‌ كاتێك برین ده‌كولێته‌وه‌ به‌ هێمنی‌ ناوی‌ دكتۆر هادی‌ دێنێ‌، ده‌ست ده‌بات بۆ كه‌شكۆڵه‌كه‌ی‌ ئازار شكێنێ‌ ده‌ردێنێ‌، تا ئێستاكه‌ش زۆر برین هه‌ن هه‌ر دكتۆر هادی‌ ده‌توانێ‌ ئازاره‌كانیان بشكێنێ‌.

دكتۆر هادی‌، ملوانكه‌یه‌كی‌ خوێناوی‌ به‌ گه‌ردنی‌ خاڵخاڵاندا شۆڕ بووه‌ته‌وه‌، هه‌ر ده‌ڵێی‌ كڵپه‌و بڵێسه‌ی‌ تینی‌ ئاگری‌ نه‌ورۆزه‌ ئه‌و بناره‌ سوور چووه‌ته‌وه‌، ئاگری‌ نه‌ورۆزی‌ ساڵی‌ له‌ سه‌ر سنگی‌ بابه‌ گوڕ گوڕ كردۆته‌وه‌، ملوانكه‌یه‌ك به‌ گه‌ردنی‌ خاڵخاڵاندا، هێنده‌ ڕه‌ونه‌قی‌ به‌خشیوه‌ به‌و بناره‌، بووه‌ته‌ چراو بووه‌ته‌ فتیله‌ی‌ هه‌ڵواسراو به‌ قه‌د دیواری‌ ماڵاندا، مه‌گه‌ر په‌ڕه‌كانی‌ مێژوو بتوانێ‌ بینووسێته‌وه‌، كۆستی‌ خێزانێك له‌ كه‌ركوك، له‌ ته‌شی‌ و ده‌زوی‌ خوێناوی‌ بهاڵێ‌ و بیڕێسێته‌وه‌، كۆستی‌ خێزانێك كه‌ خوێنی‌ حه‌وت كوڕو باوك و حه‌وت برا به‌ گه‌ردنی‌ خاڵخاڵاندا بوونه‌ ملوانكه‌ی‌ مرواری‌، بوونه‌ زامی‌ له‌ بیر نه‌چووی‌ سه‌رانسه‌ری‌ نیشتمان و ماڵ به‌ ماڵی‌ كورده‌واری‌.

مه‌حبوبه‌خان ، دایكێك به‌ وێنه‌ی‌ نیشتمان جه‌رگ سووتاو، وێنه‌ی‌ ده‌شته‌كانی‌ گه‌رمیان له‌ به‌ر شاڵاوی‌ ئه‌نفالدا ڕه‌ش هه‌ڵگه‌ڕاو، له‌ ژێر باڵی‌ خه‌می‌ قورسی‌ له‌ ده‌ستدانی‌ حه‌وت ڕۆڵه‌دا وه‌ك فتیله‌ی‌ به‌ر هه‌یوانی‌ هاوینی‌ دێ‌ ڕه‌ش داگیرساو، دایكێك له‌ ساڵاوی‌ زووخاو بۆ حه‌وت كوڕی‌ به‌ ناهه‌ق شه‌هید كراوو بێ‌ گۆڕو ناو، دایكێك به‌و هه‌موو كۆسته‌وه‌ هێشتا هه‌ناسه‌ی‌ نه‌دابوو كه‌ هه‌واڵی‌ كۆستێكی‌ تر ڕایچڵه‌كان، هێنده‌ی‌ تر گه‌ڵای‌ ته‌مه‌نی‌ وشك و زه‌رد كرد له‌ ناخه‌وه‌ هه‌ڵیوه‌راند.

شانه‌خسێ‌ بووه‌ هه‌وارو ده‌وارو ڕه‌شماڵی‌ ئێوه‌، ئه‌و ده‌مانه‌ی‌ ڕه‌شه‌بای‌ ئه‌نفال هه‌ڵیكرد وێرانیكرد ماڵ و حاڵ و زێدی‌ ئێوه‌، له‌ شانه‌خسێ‌ گیرسانه‌وه‌ تا له‌وێوه‌ كۆبنه‌وه‌، هێزو بازوو ڕێكخه‌نه‌وه‌ جارێكیتر له‌ سه‌ر مۆڵگه‌ی‌ داگیركه‌ران دا بكه‌ن و ببنه‌ زریان و كڕێوه‌، به‌ڵام ئه‌فسووس ژه‌هرو ڕه‌شه‌بای‌ كیمیایی‌ هه‌ڵیكردوو هیواو ئومێدی‌ ئێوه‌ی‌ برد، بوویته‌ گوڵاڵه‌ سوره‌یه‌ك به‌ قه‌دپاڵ و به‌ لاپاڵی‌ شانه‌خسێوه‌.

print

 213 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*