سەرەکی » وتار » ئازاد ئیبراهیم ‌ » میدیا و بۆشایی گوندەكان

وتەی ئەمجارە

میدیا و بۆشایی گوندەكان

40

چەندانجار لەسەر پرسی میدیا و ئیشكردن لەسەر گوندەكان و پیشاندانی موعانات و ئازار و پێویستی و هەواڵەكانی گوند قسەمان كردووە و وتارمان نوسیووە، ئەگەر میدیای كوردی بەمشێوە خراپ و دوورەپەرێزییە لە گوندەكان و پرسە زۆر و پەراوێزخراوەكانی گوندەكان ئیش بكات، ئەوا نەك تەنها جارێكیتر بەڵكو دەیان و زۆرترین جاریتریش دێینەوە سەر ئەم بابەتە و ڕاو سەرنج و قسەی ڕۆژنامەنووسی خۆمانی لەسەر دەكەین، چونكە بە دوو پێوەر دەزانین لەلایەك خۆم كاری ڕۆژنامەنوسی دەكەم و لەلایەكیتریشەوە كە خۆم دانیشتووی گوندم دەزانم ئەم خاڵە بەهێزەی كۆمەڵگای كوردی چۆن پشتگوێخراوە و دەستی میدیای ناگاتێ.

لەو بارەیەوە كە دەزانم میدیای كوردی ناچێتە گوندەكان و هەواڵە گەرم و كوتوپڕەكانی ناو ژینگەی گوند و گوندنشین و واقیعی گوند ناگوازێتەوە، یان لانی كەم هەواڵێكی ساردی كۆن وەردەگرێت!، دەتوانم بڵێم هەم میدیای ئێمە فرە لق و تموحكار نییە بۆ هەواڵ و زانیاری نەبیسراو و نوێ هەم گوندنشینانیش ناتوانن و پێیان قورسە لینكێك لەگەڵ میدیاكان بدۆزنەوە و بە هەر ڕێگا و شێوازێك بێت ئەو هەواڵانەی لە گوندەكاندا هەیە بگاتە دەستی میدیاكان و خوێنەرو بینەر و بیسەری كورد. میدیای كوردی بەگشتی میدیایەكی سستە لەگەڵ هەواڵ و زانیاری و ئەو ڕووداوانەدا كە دەكەونە ناوچە دوورە دەست و دوورە پەرێزەكانەوە بە خودی گوندەكانیشەوە.

ئەمەوێت لەم نوسینەدا نمونەی میدیایەكی وەك بی بی سی و ئەلعەرەبیە و ئەلجەزیرە و سكای نیوز و ئاڕتەی ڕوسی‌و …. هتد بهێنمەوە كە چۆن دەستیان دەگاتە ئەو هەواڵ و زانیاری و وێنە هەواڵانانەی لە ناوچە و شوێنە دوورەكاندا ڕوودەدەن و هەواڵنێر و میدیاكارەكانیان لەوێ نین بیگوازنەوە و كاری لەسەر بكەن، ئەم كەناڵانە هاتون لە ڕێگەی نوسینگەكانیانەوە ڕێخۆشكەرییان بۆ تەواوی ئەو كەسانە كردووە كە ئارەزووی كاری ڕۆژنامەنوسی دەكەن، بەجۆرێك هەر كارێك و هەواڵ و ڕوداوێكیان بینی وێنەی بگرن و ڕاپۆرت و هەواڵی لەسەر بكەن و بینێرن بۆ كەناڵەكەیان، لە بەرامبەر ئەمەشدا موكافەئەی ئەو كەسانە دەكرێت، ئەمەش لەلایەك هانی هاوڵاتیان دەدات كە بەدوای زانیاری و هەواڵی جیاواز جیاوازدا بچن و هاوڵاتیان هەوڵ بدەن لەهەر كوێیەك زانیارییەك و هەواڵێكیان دەستكەوت بینێرن و تێكەڵی كاری ڕاگەیاندن و پەیامنێری ببن، لەلایەیتریشەوە ئەم كەناڵانە زۆرترین و جیاوازترین هەواڵەكانی جیهانیان دەستدەكەوێت، بەم شێوەیە ئەو كەناڵانە كە زۆر دوورن لەهەواڵە جیهانییەكانەوە بە ئاسانی و لەكەمترین ماوەدا زۆرترین هەواڵیان پێدەگات و لە هەندێك حاڵەتیشدا دەبنە سەرچاوەی هەواڵ بۆ تەواوی میدیا جیهانییەكان.

میدیای كوردی لە باشووری كوردستان لانی كەم بەم پێوەرە ئیشی نەكردووە و بیرۆكەیەكی لەم شێوەیەی نەخستۆتە بەردەستی هاوڵاتی گوندەكان و ئارەزوومەندانی بواری میدیا و ڕۆژنامەگەری تاكو بتوانن لە بەرامبەر موكافەئەیەكی كەم و بەردەوامدا زۆرترین هەواڵ و زانیاری لەسەر گوندەكان بگوازنەوە. كاركردن بەم شێوەیە لەلایەك ماندووبوونی ڕۆژنامەنووس و تیمەكانی میدیای ناوێت بچنە گوندەكان و شوێنە دوورە دەستەكان لەلایەكیتریشەوە ئەو كەسانەی هەواڵەكان دەنێرن نزیكی شوێنی هەواڵەكە و زانیارییەكانن و دەتوانن بە كاتێكی زووتر و ڕاست و دروست هەواڵەكە و زانیارییەكانی بگەیەنن بەمیدیاكان.

ئەو كارانەی كە پێشتر لە میدیای كوردیدا لەسەر گوندەكان و بوارە جیاوازەكانی گوند كراوە و بینراوە، زیاتر كۆمەڵە كارێك بووە چوەتە بواری كاری تەرفیهی و ئارەزووی تاكە كەسی ڕۆژنامەنوسێك و میدیاكارێكەوە، ئەگینا كەمترینجار بینیومانە میدیای كوردی وەك هەواڵ و زانیاری لەگەڵ پرس و بابەتە گەرم و لەناكاوەكانی گوندەكاندا مامەڵە بكات، جگە لەو یادو بۆنانەی كە ساڵانە لەگوندەكاندا دەكرێن و بەرپرسە حكومی‌و حیزبییەكان كۆدەبنەوە تێیدا.

 112 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*