سەرەکی » وتار » ئەوەی كە بۆ خورماتوو پێویستە

ئەوەی كە بۆ خورماتوو پێویستە

عومەر ئاوارە

شاری خورماتوو شارێكە سەرباری دووچاربوونی بە كۆمەڵێك كێشە و گرفتی سیاسی و ئەمنی و ئیداریی، تائێستا لەسەر هەردوو پێی خۆی وەستاوە و لە بەرامبەر هەریەك لەو كێشانەدا پشتی نەچەماوەتەوە و چۆكی دانەداوە.

وەك هاووڵاتییەكی ئەو شارە ئەگەر بەشوێن هۆكاری مانەوەی شارەكە و خەڵكەكەی لەسەر پێی خۆیان ‌و چۆكدانەدانیاندا بگەڕێین، ئەوا دەگەینە ئەو راستییەی كە هۆكاری ئەو حاڵەتە بوونی یەكێتیی نیشتمانیی كوردستان بووە كە هەمیشە لە رێگەی بەرپرس و ئەندامانی ئۆرگانەكانییەوە و بەتایبەتی مەڵبەندی 16ی حەمرین و كادرە دڵسۆزەكانییەوە هاوكار و پشتیوانی خەڵكی شارەكە بوون بەبێ‌ جیاوازیی و ئەوەی كە بۆیان كرابێت، درێغیان نەكردووە لە پێشكەشكردنی خزمەتگوزاریی و چارەسەركردنی كێشە لاوەكییەكانی شارەكە.

یەكێتی لە خورماتوو بەبێ‌ ئەوەی چاوەڕوانی سوپاسێك لەكەس بكات، كاری كردووە، دەستێكی باڵای هەبووە لە راپەڕاندنی چەندین ئەركدا بەمەبەستی گەیاندنی باشترین خزمەت بە چین و توێژە جیاجیاكانی شارەكە و هەوڵیشیداوە ئەو كەلێنانەی كە دروست دەبن لە بوارە جیاجیاكاندا، پڕیان بكاتەوە و ئەو بارە قورسەی كە كەوتۆتە سەر هەندێك لە چین و توێژەكان سووكیان بكات، ئەوەشی وەكو ئەركی سەر شانی خۆی زانیووە كە ئەمانە و چەندین كاری لەم جۆرە بۆ یەكێتی لە شارێكی وەكو خورماتوو كە تائێستاش بەدەست كێشەی ئەمنیی و ئیداریی و تەنانەت سیاسیشەوە دەناڵێنێت كەم نییە. بۆئەوەی هەر نەبێت ئومیدێك و هیوایەك بۆ خەڵكە ستەمدیدەكەی بگەڕێنێتەوە لەدوای ئەو هەموو ئازار و مەینەتییانەی كە بەدەست نەیارە جیاجیاكانی كوردەوە لە شارەكە و دەوروبەرییەوە چەشتوویانە.

كارنامەكانی یەكێتی لە خورماتوو زۆرشت روون دەكاتەوە، كە رەنگە بە یەكێتی بكرێت و بەلایەنەكانی دیكە نەكرێت. یەكێتی توانی لە رێگەی مەڵبەندی 16ی حەمرینەوە كە ئۆرگانی سەرەكیی حزبەكەیە لەو سنوورە، هاوسەنگییەك لەنێوان پێكهاتەكاندا دروستبكات و رێگریی لە سەرهەڵدانی چەندین كێشە بكات ئەوەش لە رێگەی نوێكردنەوە و بەهێزكردنی پەیوەندییەكانی لە گەڵ دانیشتووانی شارەكەدا بە شایەتی ‌و گەواهیدانی چەندین كەسایەتی و ریش سپی خورماتوو، ئەمەش بۆئەوەی شارەكە نەبێتە گۆڕەپانێك بۆ شەڕ و ئاڵۆزیی و پێكدادانی نێوان پێكهاتە جیاجیاكانی .

ئەگەرچی یەكێتی لەو كاتەوەی دروستبووە تائێستا، خۆی بەخاوەنی خورماتوو زانیووە و هەمیشە و بەبەردەوامیش خەمی لێ خواردووە و بەرگریی لێكردووە، بەڵگەنامەكان زۆرن بۆ ئەوەی ئەو كارانەی كە یەكێتی پێشكەشی شارەكەی كردووە و ئەو خزمەتە مەعنەوییانەی بە شارەكەی كردووە بخرێنەڕوو لە نموونە هەرە سادەكانی ئەوەیە كە یەكێتی پێشەنگ و دەستپێشخەر بووە بۆ گەیاندنی خزمەتگوزاریی بۆ ناوچە دابڕێنراوەكان و بەتایبەتیش شاری خورماتوو، جگە لەوەش لەو شارەدا جێگایەك نییە شوێن دەستی یەكێتی پێوە دیار نەبێت و هەرگیزیش وەك حزب خۆی نەكردۆتە خاوەنی هیچ دەستكەوتێكی سیاسی ‌و ئیداریی ‌و حزبی لەو شارەدا، چونكە ئەوەی بۆ خورماتووی كردووە، ناوی ناوە خزمەتكردن نەك دەستكەوت، لەبەرئەوەی خورماتوو شارێكی فیداكاری ریزی پێشەوەی كوردایەتی بووەو ستەمی زۆری لێكراوە كە خاوەنی سەدان شەهید و ئەنفال و كەڵە پێشمەرگەی دێرینە كە بەشێك لەوانە هێشتا بەردەوامن لە خەبات ‌و تێكۆشان چ وەك پێشمەرگەو فەرماندە، یان وەك كادری سیاسی ‌و ئیداری، جگە لەوەش خورماتوو شارێكە نە ئەو دەتوانێت بەبێ‌ یەكێتی بژی و نە یەكێتیش دەتوانێت لێی بەدوور بێت.

دیارە ئاوێتەبوونی یەكێتی لەگەڵ خەڵكی كوردستان بەگشتی ‌و ئەو شارە بەتایبەتی و هۆگریی دانیشتووانی خورماتوو و دەوروبەری ‌و زۆربەی ناوچە دابڕێنراوەكان، بابەتێك ‌و دیاردەیەكی نوێ‌ نییە، ئەو لەسەردەمێكدا لەگەڵ ئەو خەڵكەدا بووە و ئاگاداری مەینەتی ‌و گوزەرانیان بووە، كە وڵات لە ژێر چەپۆكی دڕندەترین رژێمی سیاسی وەك رژێمی بەعسی فاشیستدا بووە. ئەوكاتە یەكێتی و جەماوەری سنوورەكە هاودەم و هاوخەبات بوون، جگە لەوەش زیندانەكانی ئەو رژێمەش بەڵگەی ئەو قوناغەیە كە لەو قۆناغە سەختەدا یەكێتی لەخەمی خەڵكدا بووە، بۆیە بۆ خەڵكی ناوچەكە سەیرنییە كە ئێستاش هەر ئەو حزبە خەمی لێ دەخوات.

لەدوای ئەو هەموو رووداوە ناخۆشەی كە بەسەر خورماتوودا هات، ئێستا چی دەگوزەرێت و چۆن ئارامیی بەشێوەیەكی باش باڵی بەسەر شارەكە و دەوروبەریدا كێشاوە، هەمووی بە هەوڵ و ماندووبونی هەڤاڵانی یەكێتییە لە ناوچەكە، هەرچەندە لەملاولاوە هەندیك قسەو قسەڵۆك دەكرێت لەوەی كە گوایە یەكێتی لەخورماتوو كەمتەرخەمە، بەڵام خۆشبەختانە ئەوانەی ئەو دەنگۆیانە بڵاودەكەنەوە چەندین فرسەخ لە خورماتووەوە دوورن، بۆیە ئەوانەی بەشوێن بنكۆڵكردنی راستییەكانەوەن دەتوانن سەردانی خورماتوو بكەن و بە چاوی خۆیان راستییەكان ببینن.

 51 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*