سەرەکی » وەرزش » دۆڕاندنە ئابڕوبەرەكەی ئەڵمانیا چ رووداوێكی مێژوویی وەبیرهێناینەوە؟

دۆڕاندنە ئابڕوبەرەكەی ئەڵمانیا چ رووداوێكی مێژوویی وەبیرهێناینەوە؟

كاتێك گوزەر بە مێژووی یارییە نێو دەوڵەتییەكاندا دەكەین چ یارییە نێو دەوڵەتییە رەسمیەكان یان یارییە نێو دەوڵەتییە دۆستانەكان، ئەو مێژووە چەندین وانەی گرنگ و هەستیارت دەهێنێتەوە یاد كە سەرجەمیان شایانی ئەوەن وەبیری هەوادارانی یاریی تۆپی پێی جیهانی بهێنرینەوە.

هەموو لایەكمان دۆڕاندنە سەخت و ئابڕو بەرەكەی ئەڵمانیامان بینی 0-6 بە ئیسپانیا لە نەیشنس لیگدا كە نرخەكەی كرانە دەرەوەی ئەڵمانیا بوو لەم خولەدا.

ئەم دۆڕاندنەی ئەڵمانەكان دۆڕاندنێكی تری ئەڵمانیای بیرهێناینەوە بەدەستی نەمساوییەكان و بە هەمان ئەنجام.

ئەم دۆڕاندنەی ئەڵمان بە ئیسپانییەكان لە نۆ دەیەی رابردوودا واتە لە 90 ساڵی رابردوودا وێنەی نەبووە، تاكە دۆڕانی تری لەم شێوەیەی ئەڵمانەكان و یەكەم دۆڕان بەهەمان ئەنجام رۆژی 24/5/1931 بووە بەدەستی نەمساوییەكان و ئەو یارییەش یارییەكی دۆستانەی نێو دەوڵەتی بووە لە ئەڵمانیاش كراوە.

مێژووی وەرزشی و سیاسی نەمساو ئەڵمانیا
ئەم دوو دۆڕاندنەی ئەڵمانەكان 0-6 بە ئیسپانیاو نەمسا، چەند لاپەڕەیەكی رەشی نێوان ئەڵمان و نەمسامان بیر دەخاتەوە لە وەرزش و تەنانەت لە مێژووی سیاسی نێوان هەردوو وڵاتیشدا كە بەكورتی بەمشێوەیەی لای خوارەوەیە.

فۆندەر تیم
تۆپی پێی نەمسا خاوەنی مێژوویەكی پرشنگدارە لەسەر ئاستی جیهان و ئەوروپاش، سەرەتا با باس لە سەروەرییەكانی ئەم هەڵبژاردەیە بكەین لەساڵانی سیەكاندا.

ساڵانی سیەكان هەڵبژاردەی نەمسا بە (فۆندەر تیم) ناو دەبرا، بە دیارترین هەڵبژاردەی سەر گۆڕەپانی ئەوروپا دادەنرا، لەنێوان مانگی نیسانی ساڵی 1931 تا ئۆكتۆبەری 1932 ئەم هەڵبژاردەیە هیچ یارییەكی نەدۆڕاند، ساڵی 1932 جامی وڵاتانی ناوەندی ئەوروپای بردەوە، لە ئۆڵۆمپیادی میونشنی 1936 یشدا میدالی برۆنزی خولی تۆپی پێی ئەو ئۆڵۆمپیادەی بردەوە.

لەئەشلۆسەوە بۆ كۆتایی دووەم جەنگی جیهانی
بەڵام ساڵی 1938 ساڵی ئاوابوونی ناو و ناوبانگی نەمساوییەكان بوو، ئەوساڵە نازییەت گەیشتە لووتكەو ئەڵمانەكان و هیتلەر نەمسایان بە پرۆسەیەكی داگیركاری سەربازی كە ناوی (ئەشلۆس) بوو لكاند بە ئەڵمانیاوە و هەڵبژاردەیەكی تۆپی پێ نەما بە ناوی نەمساوە.

ئەنشلۆس 12/3/1938 روویدا، پرۆسەیەكی سەربازی بوو كە زۆربەی خەڵکی نەمسا دژی نەبوون و تەنانەت پێشیان خۆشبوو، ئەو سەردەمە ئارتۆر زایس ئینكفارت راوێژكاری كۆماری نەمسابوو، بە ئەنشلۆس دەسەڵاتـی لەدەستدا و نەمسا بووبە بەشێك لە ئەڵمانیا تا كۆتاییهاتنی دووەم جەنگی جیهانی.

ئەو ماوەیە دەبوو دەسەڵاتدارانی ئەڵمانەكان سودیان لەو یەكگرتنەی نەمساو ئەڵمانیا ببینیایە و بە تێكەڵاوكردنی هەردوو هەڵبژاردەكە بەهێزترین هەڵبژاردەیان بۆ مانشافت درووستبكردایە، بەڵام حساباتی دەسەڵاتی نازییەكان و خۆپەرستییان نەیهێشت ئەوە رووبدات و بیری نازییەت بەجۆرێك زاڵ بووبوو كە رێگەی بە بەشدارییكردنی یاریزانانی دەرەوەی ئەڵمانیا نەدەدا یاریی بۆ مانشافت بكەن و سەرجەم یاریزانە ناودارەكانی ئەو سەردەمەی نەمسا لە نموونەی ماتیاس سیندیلار بێ كار مانەوەو نەبوون بە یاریزانی هەڵبژاردەی ئەڵمانیا.

ئەم خۆ بەزلزانینەی ئەڵمانەكان وایكرد لە مۆندیالی 1938 -فەرەنسا مانشافت لە یەكەم جەولەی یارییەكاندا توشی دۆڕاندنێكی ئابڕوبەر بێت 2-4 بە سویسرا.

بەڵام دواتر و پاش تەواو بوونی دووەم جەنگی جیهانی جارێكی تر نەمسا رزگاریی خۆی رادەگەینێت و وەك وڵاتێكی سەربەخۆ دێتەوە سەر گۆڕەپانی سیاسی و وەرزشی ئەوروپا و ئێستا نەمسا یەكێكە لە هەڵبژاردە باشەكانی ئەوروپا و چەندین یاریزانی لە خولە ناوخۆییەكانی وڵاتانی ئەوروپا یاریی دەكەن.

 62 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*