سەرەکی » ئاراستە » كه‌رنه‌ڤاڵی سروشت

كه‌رنه‌ڤاڵی سروشت

بڵند محەمەد

هه‌میشه‌ سروشت ئه‌و سكرینه‌ بووه‌ كه‌ مه‌زنترین ئامێری بینین كه‌ چاوی‌ مرۆڤه‌ رۆژانه‌ پێی ئاشنا ده‌بێت و به‌ركه‌وته‌ی له‌ ته‌كدا ده‌بێت، زۆر له‌ هونه‌رمه‌ندانی جیهان و به‌ درێژایی مێژووی هونه‌ری شێوه‌كاری كاریان له‌سه‌ر سروشت كردووه‌، ده‌بینین له‌ ئه‌شكه‌وته‌كانی سه‌رده‌می چاخی به‌ردین تا ئیستا مرۆژ سه‌رقاڵی نه‌خشاندنی جوانی‌ سروشت بووه‌.

له‌و په‌ڕی ئه‌بستكرات بۆ ئه‌وپه‌ڕی سوریالییه‌ت، له‌ زۆربه‌ی‌ تابلۆكاندا سرووشت ئاماده‌یی هه‌بووه‌، هونه‌رمه‌ند جه‌زا به‌كر سه‌باره‌ت به‌ سروشت ده‌ڵێت “وێناكردنی سروشت له‌نێو دیرۆكی‌ هونه‌ری نیگاركێشاندا دێرینترین پێگه‌ی‌ هه‌یه‌و نه‌خش و كاریگه‌ری له‌سه‌ر گه‌لێك هونه‌رمه‌ندو بزاڤی هونه‌ری هه‌یه‌، چونكه‌ وێناكردن میانره‌وییه‌كی‌ وه‌های تێدایه‌ له‌ ته‌ك به‌خششه‌كانی تر ده‌گونجێت”.

ئێمه‌ش له‌و روانگه‌یه‌وه‌ ئه‌م كۆمه‌ڵه‌ هونه‌رمه‌نده‌ وا رێككه‌وتین كه‌ ئه‌م پیشانگه‌یه‌ رێك بخه‌ین تایبه‌ت بێت به‌كاری سروشت، بێگومان هه‌ربۆیه‌ له‌ به‌شداران دیدو بۆچوونی خۆی هه‌بووه‌ سه‌باره‌ت به‌ سروشت له‌ روانگه‌ی‌ ئایدیاو ستایڵی كاری تایبه‌تی خۆی، هه‌ربۆیه‌ كاتێك گوزه‌ر ده‌كه‌ی‌ به‌ناو ئه‌م پیشانگه‌یه‌دا هه‌یت به‌ باكگراوندی ئه‌بستراكت، یان جۆرێك له‌ سیمێولیزم و رێچكه‌ی‌ تر ده‌كه‌یت داپۆشراوه‌ به‌ ره‌نگه‌كانی سروشتی جوان و نه‌خشاوه‌ به‌ ورده‌كاری، ئه‌گه‌ر سه‌یری كاره‌كانی‌ هونه‌رمه‌ند (به‌ها قه‌ره‌داغی) بكه‌ین هه‌ڵبه‌ت ماتریاڵی پاستیل زاڵه‌ به‌سه‌ر ته‌كنیكی‌ به‌رهه‌مه‌كانی له‌وه‌ی‌ ئه‌و چه‌ندین ساڵه‌ به‌و شێوازه‌ كار ده‌كات و رۆژ له‌دوای رۆژ ده‌یه‌وێت په‌ره‌ی پێ بدات، هونه‌رمه‌ند (ساله‌ح نه‌جار) كه‌ دانیشتووی‌ شاری سلێمانییه‌، به‌ڵام كلتورو سروشتی‌ زێدی باوباپیرانی‌ كه‌ له‌ گه‌رمیان و خانه‌قین ره‌نگی داوه‌ته‌وه‌و كاتێك هێزی‌ فڵچه‌ باریكه‌كان ده‌بینی و ره‌نگه‌ تۆخه‌كان، چ جای له‌ هه‌ندێ شوێن دیمه‌نی دارخورماش هه‌یه‌، هونه‌رمه‌ند (صباح جه‌زراوی‌) كه‌ خه‌ڵكی‌ زاخۆیه‌و دیمه‌نه‌ دڵرفێنه‌كانی‌ ئه‌و جوانییه‌ی‌ بۆ گواستینیه‌ته‌وه‌، هه‌ندێجار هه‌ست ده‌كه‌م به‌رامبه‌ر كارێكی‌ تیرنه‌ر، یان بۆنینگتۆن و كۆنستابل م، كۆمه‌ڵێك فڵچه‌ی‌ خێرا كه‌ ئه‌زموونی كاركردنی زۆری ده‌رده‌خات له‌ به‌رهه‌مه‌كانیدا ده‌رده‌كه‌وێت، ئه‌گه‌ر پاسپارتۆی كاره‌كان كاڵتر بوایه‌ هه‌ڵبه‌ت زۆر زیاتر ده‌رده‌كه‌وتن، به‌ڵام ئه‌و باوه‌ڕی به‌وه‌یه‌ كه‌ كاری هونه‌ری ده‌بێت تێكه‌ڵی پاسپارتۆو چوارچێوه‌ بێت، هی‌ربۆیه‌ خۆی به‌ ره‌نگكاری پاسپارتۆی بۆ ئاماده‌ كردووه‌.

سروشت له‌لای تاقه‌ هونه‌رمه‌ندی ژن له‌م پیشانگه‌یه‌ تێكه‌ڵ ده‌بێت به‌ یه‌كه‌یه‌كی‌ تر كه‌ ئه‌ویش بوونی (هه‌نار) وه‌ك ده‌سته‌واژه‌یه‌كی‌ پرشنگدار، (نه‌سرین فه‌تاح) هه‌وڵ ده‌دات به‌ ته‌كنیكی‌ چه‌قۆ و فڵچه‌ بگاته‌ قوڵایی ئه‌زموونه‌كانو په‌ی‌ بردن به‌ جوانییه‌كانی سروشت، كاره‌كانی‌ نه‌سرین قه‌باره‌ گه‌وره‌ن و یه‌ك كه‌شی هارمۆنی ره‌نگ ده‌یانگرێته‌وه‌، هه‌ر وێنه‌ی‌ سروشت جارێكی‌ تر رێك ده‌خاته‌وه‌و تێكی‌ ده‌دات، به‌ واتای ئه‌وه‌ی‌ هه‌میشه‌ له‌گه‌ڕان و سێرچ دایه‌ بۆ گه‌یشتن به‌ لوتكه‌ی‌ ئیستاتیكا.

كاره‌ ئاوییه‌كانی‌ (عه‌بدولره‌حمان میرزا) كه‌ له‌ پاریزگای هه‌ڵه‌بجه‌یه‌و مامۆستای په‌یمانگه‌ی‌ هونه‌ره‌ جوانه‌كانی هه‌ڵه‌بجه‌یه‌، ره‌نگدانه‌وه‌ی‌ سروشتی ئه‌وێیه‌، ئه‌و زۆر به‌سه‌لیقه‌ ده‌زانێ كاری ئاوی‌ له‌ كوێ ده‌ست پێ ده‌كات و له‌ كوێ ته‌واو ده‌بێت، كاره‌كان ده‌رده‌خه‌ن به‌رامبه‌ر هه‌ژموونی ره‌نگی ئاوی‌، به‌هه‌مانشێوه‌ (كارزان غه‌ریب) ده‌رچووی‌ كۆلیژی هونه‌ره‌ جوانه‌كانی زانكۆی سلێمانییه‌و چه‌ندین ساڵه‌ كاری دیزاین ده‌كات، ده‌بینی ره‌نگدانه‌وه‌ی‌ دیزاینی‌ چۆن دێته‌ ناو كۆمپۆزیشنی‌ كاره‌كانی.

كاره‌كانی به‌نده‌ (محه‌مه‌د فه‌تاح) كۆمه‌ڵێك لۆكه‌یشن كه‌ هه‌ر یه‌كه‌و تام و بۆنی‌ به‌رامه‌ی‌ خۆی هه‌یه‌و ته‌كنیكی چه‌قۆو فڵچه‌و پاستیل كارم كردووه‌و ویستوومه‌ له‌ چركه‌ی‌ دامه‌زراندنی كاردا بژیم و بۆن و ره‌نگی ئه‌و ساته‌ هه‌ڵمژم و مێشكم به‌ ره‌نگه‌كانی دیمه‌ن پاراو بكه‌م.

هونه‌رمه‌ند (سامان ئه‌بوبه‌كر) وه‌كو چۆن خۆی هه‌میشه‌ به‌بێ ده‌مگی ده‌یبینی هه‌ر ئاواش به‌رهه‌مه‌كانی ئه‌م كوره‌ كه‌ركوكییه‌ كه‌ له‌ ناخیدا چه‌ندین زوڵم و سته‌می رۆژانه‌ هه‌یه‌، زۆر به‌ سانایی و فڵچه‌ی‌ وردو به‌ هێمنی‌ دێته‌ سه‌ر تابلۆكه‌، سامان له‌ هه‌ڵبژاردنی كۆرنه‌ری گرته‌ زۆر شاره‌زاییانه‌ مامه‌ڵه‌ ده‌كات و زۆر به‌ وردی هێرشی بۆ ده‌كات.

هونه‌رمه‌ند (ئه‌یوب ره‌ئووف) به‌ یه‌ك شێوه‌ دێت و له‌سه‌ر گرته‌كان ده‌وه‌ستێت، ئه‌و كه‌ ناسراوه‌ به‌ به‌كارهێنانی ره‌نگی په‌مه‌یی فسفۆڕی ئه‌مرۆ ئه‌و ره‌نگه‌ به‌ شاره‌زایی هه‌ستی پێ ده‌كرێت و تێكه‌ڵ به‌ سه‌وزایی سرووشت ده‌بێت، ئه‌و دیمه‌نه‌كانی حاجی مامه‌ند هه‌ڵده‌بژێرێت و گوڵه‌ سپییه‌كان تۆخ و قه‌یسی و چواله‌ی ئه‌وی‌ ده‌هێنێته‌ ناو تابلۆكانی.

یانزه‌هه‌مین هونه‌رمه‌ندی به‌شدار مامۆستا (حیكمه‌ت هندی) كه‌ به‌ پانزه‌ به‌رهه‌م به‌شداربووه‌ كه‌ ستایلێكی‌ تایبه‌ته‌ به‌خۆی و خۆی چۆن سروشت ده‌بینێ، ئه‌و تا دوێنێ بوو دیمه‌نی لادێ سوتاوه‌كانی كوردستانی نیشانی ئێمه‌ ئه‌دا، ئه‌مرۆ دێته‌ ناو مێرگ و پانتاییه‌ سروشتییه‌كان و جوانییه‌كانی دێنێته‌وه‌، لێره‌وه‌ ده‌ستخۆشی له‌ ماندوو نه‌بوونی ده‌كه‌م.

بێگومان ئێمه‌ وه‌كو ئه‌م كۆمه‌ڵه‌ هونه‌رمه‌نده‌ چه‌ندین جار دانیشتووین و ئاڵووگۆڕی بیروبۆچوونه‌كانمان كردووه‌، هه‌ربۆیه‌ له‌ ده‌رچوونێكمان بۆ هاوینه‌هه‌واری سه‌رچنار هه‌موو یه‌ك لۆكه‌یشن هه‌لده‌بژێرین و هه‌ر كه‌س و به‌ ستایلی خۆی كاری بۆ ده‌كات، هه‌وڵێكی جوان بوو بۆ ئارامی مرۆڤ به‌ تایبه‌ت له‌مرۆی په‌تای كۆرۆنا بتوانین به‌و هێزو ته‌وژم و ئه‌و كارانه‌ به‌رهه‌م بێنین.

سلێمانی پایته‌خی رۆشنبیریی نابێت له‌ كارو چالاكی بوه‌ستێت، ئه‌مرۆ ئه‌م كۆمه‌ڵه‌ هونه‌رمه‌نده‌ ملوانكه‌یه‌كی‌ نوێی تر ده‌كات به‌ به‌رۆكی گۆیژه‌و ئه‌زمه‌ردا، ملوانكه‌یه‌ك له‌ گویڵی نه‌سرین و هه‌میشه‌ به‌هارو ناز ناز.

ماوه‌ته‌ بڵێین كه‌ ئه‌م پیشانگه‌یه‌ به‌ سپۆنسه‌ری رێكخراوی‌ (CDO) بوو كه‌ بۆ ماوه‌ی‌ 4 رۆژ له‌ گه‌له‌ری ئه‌منه‌ سوره‌كه‌ نمایشكراو جه‌ماوه‌رێكی زۆر ئاماده‌ی بینینی بوون و به‌نده‌ش خاوه‌نی بیرۆكه‌و سه‌رپه‌رشتیاری گشتی كاره‌كانم كردووه‌، به‌و ئومێده‌ی‌ ویستگه‌یه‌كی‌ پشوو كرد بێت بۆ جه‌ماوه‌ری خۆشه‌ویستی‌ كوردستان.

 108 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*