سەرەکی » راپۆرت » ئامادەکردنی:بورهان ئەمین » ئەڵمانیا؛ پارتی دیموكراتی كریستیان شوێنگرەوەی مێركل-ی هەڵبژارد

ئەڵمانیا؛ پارتی دیموكراتی كریستیان شوێنگرەوەی مێركل-ی هەڵبژارد

لە چەند رۆژی رابردوودا، پارتی دیموكراتی كریستیان CDU لە كۆنفرانسێكی ئۆنلایندا كە هەزار و یەك نوێنەر تیایدا بەشداربوون، هەڵبژاردنی گشتیی سازكرد، بۆ دیاریكردنی سەرۆكی پارتەكە و كاندیدی یەكەم بۆ شوێنگرتنەوەی ئەنجیلا مێركل و پۆستی راوێژكاری داهاتووی ئەڵمانیا، كە بڕیارە لە هەڵبژاردنی مانگی ئەیلولی ئەمساڵدا لە هەر 16 هەرێمەكەی ئەو وڵاتە بەڕێوەبچێت.

ئارمین لاشیت بووە سەرۆك
لەو هەڵبژاردنەدا سێ كاندیدی سەرەكیی ركابەری یەكدی بوون بۆ بەدەستهێنانی زۆرترین دەنگ. لە خولی یەكەمدا ئارمین لاشیت، فریدریش مێرتس و نۆبەرت رۆتنگن، سێ سەركردەی دیاری پارتەكە، توانییان ركابەرییەكی توند بكەن و لاشیت لە بەرامبەر مێرتس دۆڕاندی، بەڵام لە خولی دووەمدا لارشیت توانیی 521 دەنگ لە بەرامبەر 466 دەنگی مێرتس مسۆگەر بكات و سەركەوتنی بەدەستهێنا، بەم جۆرە ئەو كەسایەتییە 59 ساڵەیە، بووە شوێنگرەوەی مێركل و بەپێی پەیڕەوی پارتەكەش، سەرۆكی پارت ئەگەر خۆی بیەوێت، دەبێتە كاندید بۆ وەرگرتنی پۆستی راوێژكاری وڵات.

ئارمین لاشیت ئێستا سەرۆك وەزیرانی هەرێمی نۆردڕاین وێستیڤاڵنە و یاریدەدەری سەرۆكی پارتی دیموكراتی كریستیانە، سیاسییەكی كراوە و بە توانایە، لە زۆر هەڵوێستدا لە میركل-ەوە نزیكە، بەڵام بەپێی هەڵسەنگاندنی چاودێران، ئەو ناتوانێت وەك مێركل دۆخەكە رابگرێت. لەناو پارتەكەیدا باڵی راسترەو هەیە لە دژی پەنابەران و بیانییەكان كە لە یەكێتیی ئەوروپا كاردەكەن، مێركل توانیبووی رازییان بكات و هاوسەنگییەكە رابگرێت.

سەركەوتوو دەبێت
بەپێی لێدوانی پارتە چەپ و لیبراڵەكان، سەركەوتنی لارشیت زۆر باشترە لەوانی تر، چونكە فریدریش مێرتس كەسێكی توندڕەوە و دژی هاتنی زیاتری كۆچەر و پەنابەرانە و لێدوانەكانی ئەم دواییەی، ناڕەزایەتییەكی زۆری لێكەوتۆتەوە. جگە لەوەش نەیاری سەرسەختی .ئەنجیلا مێركل بووە و لە كۆنەوە لەسەر زۆر پرس رێكنەكەوتوون، بۆیە زۆرینە وایدەبینن كە دەرچوونی لارشیت لە بەرژەوەندیی لایەنەكانیشدایە و ئەو دەتوانێت پارێزەری ئەو دۆخە دیموكراسییە بێت، كە لە كەشی سیاسیی وڵاتدا هەیە.

لە یەكەمین وتاریدا لە دوای بردنەوەی پۆستی سەرۆكی نوێی پارتەكە، لارشیت سوپاسی .ئەنجیلا مێركل-ی كرد، كە لە ماوەی ئەو چەند ساڵەدا توانیبووی كێشە سیاسییەكان چارەسەر بكا و حوكمڕانییەكی ئەوتۆ پەیڕەو بكات، كە لە خزمەتی هەموو چین و توێژەكانی كۆمەڵگەدا بووە و دادپەروەری و یەكسانی تێدا بەدیكراوە. بەڵێنیشیدا كە لەسەر ئەو شێوازەی مێركل بەردەوام بێ و ئەو متمانەیەی پێی بەخشراوە، لە دەستی نەدات.

مێركل خۆی كاندید ناكاتەوە
بەم جۆرە، ئارمین لاشیت كرایە سەرۆكی پارتی دیموكراتی كریستیانی ئەڵمانی. پێشتر ئەنجیلا مێركل كە هاوكات راوێژكاری وڵاتەكەیە، دەستی لە پۆستی سەرۆكی ئەو پارتە هەڵگرت و هەر ئەوكات ئاشكرایكرد، كە نیازی نییە جارێكی دیكە خۆی بۆ سەرۆكایەتیی حزبەكەی و پۆستی راوێژكاریش كاندید بكاتەوە.

سەرچاوە: شپیگل ئۆنلاین، دۆیچەڤێللا

 440 جار بینراوە