سەرەکی » وتار » قۆناغی دووەم

بەنیازی ئاوڕدانەوە

قۆناغی دووەم

شیرین. ك

دوای 31ی ئاب كە بۆ چەند مانگێك رۆژنامەی كوردستانی نوێ وەستا، لە 4ی كانوونی دووەمی ساڵی 1997 دا یەكەم ژمارەی لە شاری سلێمانی دەرچوو، بینای كۆنی رێكخراوی لاوانی حزبی بەعس كە لە گردی رعایە، كرایە بارەگای رۆژنامەكە، بینایەكی كۆنی ناشیرینی ناقۆڵا، ژووری بچووك بچووك و راڕەوی تەسك، پەنجەرەی بچووك، سەرەتا بۆ لاپەڕەی ئەدەب و هونەر و دوا لاپەڕە ژوورێكمان پێدرا، رۆژنامەكە بەهەشت لاپەڕە دەستیپێكردەوە، پێشتر چوار ساڵ لە هەولێر دەرچوو بوو، زۆر گەشەی كردبوو، ژمارەی لاپەڕەكان گەیشتبووە دوازدە لاپەڕە و رەنگە زیاتر و چەندین پاشكۆشی هەبوو، لەوانە پاشكۆی ئەدەب و هونەر، بەڵام دوای دەرچوونەوەی رۆژنامەكە تا ماوەیەك ئەدەب و هونەر یەك لاپەڕە بوو.

بەو پێیەی من و مامۆستا رەوف بێگەرد پێشتر لە لیژنە رۆشنبیرییەكەی نووسینگەی سلێمانی كارمان لەسەر بابەتە ئەدەبی و هونەرییەكان دەكرد، هەردووكیشمان ئەدیب بووین، بۆیە لە لاپەڕەی ئەدەب و هونەر دەستبەكار بووین، محەمەد رەنجاویشمان لەگەڵا بوو كە پێشتر لە هەولێر لەو لاپەڕەیە ئیشی كردبوو، هەرسێكمان پێكەوە لاپەڕەكەمان بەڕێوە دەبرد، رۆژێك كاك فریاد رواندزی سەرنووسەر پێیوتین كە دەبێت یەكێكمان ببینە بەرپرسی لاپەڕەكە چونكە دەبێ هەموو لاپەڕەیەك لێپرسراوێكی هەبێت، من پێشنیازم كرد مامۆستا رەوف ببێتە لێپرسراوی لاپەڕەكە، مامۆستا رەوف-یش پێشنیازی كرد من ببمە لێپرسراو، هەر ئەو كاتە محەمەد رەنجاویش داوایكرد بچێتە لاپەڕەی ناوخۆ، دواجار من بووم بەلێپرسراوی لاپەڕەكە، زۆریشی نەخایاند جارێكیتر ئەدەب وهونەر وەكو پاشكۆیەكی چوار لاپەڕەیی دەستیكردەوە بەدەرچوون، كە هەموو رۆژانی پێنج شەممە دەردەچوو، لە31 ی مارتی ساڵی 2000 یشەوە پاشكۆكە بوو بە هەشت لاپەڕە و هەردوو لاپەڕەی یەك و هەشتیش رەنگاو رەنگ كرا، تا ساڵی 2009 لەو پۆستەدا مامەوە كە ئیتر بووم بە سكرتێری نووسینی رۆژنامەكە.

دوای ئەوەی دوا لاپەڕە چووە ژوورەكەی تەنیشتم ئیتر خۆم بەتەنیا مامەوە لە ژوورێكدا كە جگەلەوەی بەكومبارێكی تازە پڕكرابۆوە، تەنیا یەك كورسی و مێزی تەنەكە و لۆكەرێكی تیابوو، كاتیش زستان بوو، هەر ژوورە و زۆپایەكیان پێداین كە زۆربەیان بێكەڵك بوون، كە هاوینیش هات بەبۆڵەبۆڵی من و هەموو رۆژ ناڕەزایی دەربڕین پانكە و موبەریدەشیان بۆ داناین، ئەگەر كەسێك بهاتایەتە ژوورەكەم بۆ كارێك دەبوو بەپێوە بوەستێ، كورسییەكی زیادە نەبوو، بیرمە ئەو كاتەی دیاری محەمەد، دیاری پانفلوت هات بۆئەوەی ببێتە پەیامنێر هەموو چاوپێكەوتنەكە، هەر بەپێوە وەستابوو، پێش دیاری چنور محەمەد كە هێشتا خوێندكاری زانكۆ بوو كاری پەیامنێری بۆ دەكردین، دواتر بەڕەسمی بوو بە پەیامنێری ئەدەب و هونەر و دوالاپەڕە، حەز ئەكەم حیكایەتێكی خۆشی چنور محەمەد باسبكەم كە یەكەم پەیامنێری ئەدەب و هونەر بوو، سەرەتای كاركردنی بوو، یادی جەواهیری شاعیر لە سلێمانی كرایەوە، چنورم نارد بۆ رووماڵ كردنی یادەكە، كاتێ راپۆرتەكەی چنورم خوێندەوە بەم رستەیە دەستی پێكردبوو: (چ زوو مردی!!) كە ئەوەم خوێندەوە دامە قاقای پێكەنین، وتم چنور گیان باسی كیێ ئەكەیت؟ كێ زوو مرد جەواهیری؟؟ خۆ ئەو پیاوە ساڵی لەدەست خوا بڕیبوو، ئاشكرایە كە جەواهیری نزیكەی سەد ساڵ ژیاوە وهەندێكیش دەڵێن زیاتر.

 392 جار بینراوە