سەرەکی » وتار » ئاگرە گەورەكە

ئاگرە گەورەكە

هاوکار قادر

ئەو ئاگرەی لە توركیا کەوتۆتەوە، لە هەموو شوێنێك دەشێت بکەوێتەوە، بەڵام هۆكارەكان جیاوازن.

ناچمە ناو هۆكارەكانەوە، چونكە هەرچۆنێك بێت لەم دوورەوە كەسمان بە تەواوەتی نازانین کت و مت چی رویداوە و چی روودەدات، بەڵام كارەساتێكی سروشتییە و لەدوا خاڵدا بوونەوەرەكان زەرەر دەكەن. ئەو زەرەرەش لە سنوورێكی جوگرافیدا ناوەستێتەوە، بەڵكو راست و چەپ و سەر و خوار لەسەر ئەم گۆی زەوییە زیانەكەی پێدەگات، لەكاتێكدا خودی زەوی ماندووە و بەهۆی گۆڕانكاریی كەشوهەواوە ژینگە بە تەواوی سەری لێشێواوە.

بە سووتانی دارستانەكان، جا لە ئەمازۆن بێت یاخود كالیفۆرنیا، نەرویج یاخود ئوسترالیا، یان عەفرین و كوردستان بێت، هەر مرۆڤایەتی زیان دەكات، ئەوەی توركیاش (وەك سروشت) زیان و خەسارەتێكی گەورەیە بۆ مرۆڤایەتی.

ئاگرە گەورەكە چییە؟
لێگەڕێن ئێمەی كورد لە چی دۆزەخێكی جوگرافیداین، لەوەش گەڕێن هەتا ماوین دەبێت لە ململانێی ناسنامە و سنوور و بووندا بین، بەڵام داخی گەورەی من بۆ (ئاگرە گەورەكە)یە، كە تووشی مرۆڤایەتی بووە.

تەماشا بكەن، مرۆڤەكان ئەوەندە رق ئەستوور بوون بەرامبەر بە یەكتریی، ئەوەندە كینەیان لە سنگیاندا هەڵگرتووە، ئەوەندە دژی یەكتر وەستاونەتەوە و ئەوەی خودا پێی ناخۆشە بەرامبەر بەیەكتریی كردوویانە، حەزدەكەن نەك ژینگەكەیان بسووتێت، بەڵكو دەخوازن خودی مرۆڤەكانیش تێیدا بسووتێن.

دیدگای من بۆ دەیان ئاگری هاوشێوەی ئاگرەكەی توركیا، كە وەك یەك پاكێج وێنا دەكرێن، دیدگایەكی سیاسییە و سیاسیش نییە، مرۆڤانەیە و پەیوەندیدارە بە فەزای مرۆڤایەتییەوە.

ئەو ئاگرەی لە توركیا تاوی سەندووە و تەڕ و وشك پێكەوە لەبەر تینە بەهێزەكەدا خۆیان پێ راناگیرێت، كاردانەوەی زۆری لە تۆڕە كۆمەڵایەتییەكاندا بەدوای خۆیدا هێناوە، بەتایبەتی لەنێو چالاكوانانی فەیسبووك لە هەرێمی كوردستان، كە بەشێكیان بە تۆڵەیەكی ئیلاهی و زەبرێكی (چاو بە چاو و ددان بە ددان)ی دەبینن لەپای ئەوەی سوپای توركیا و چەكدارەكانی بە كوردستانی دەكەن، هەر لە عەفرین-ەوە تا باشووری كوردستان. هەندێكیشیان غەمبارن و دەیانەوێت سووتانەكە بە سیاسەتەوە نەبەستن.

بابەتەكە ئەگەر لە روانگەیەكی سیاسییەوە تەماشا بكرێت، پێناچێت هیچ هێزێكی كوردی و دەرەوەی كوردیش پەنا بۆ كارێكی لەو شێوەیە ببات و تەڕ و وشك پێكەوە بسووتێنێت و بە زمان و بێ زمان لەناوبەرێت.

لە دەرەوەی سیاسەتیش، ئاگر تێبەردان لە هەر مەملەكەتێكدا بێت، كە پێشتر لە هەندێك وڵات و ناوچەی خۆشماندا بیستوومانە، یەكێكە لە تاوانە هەرە گەورەكان، كە یەكەم كەس بكەر خۆی لە ژینگەكەدا باجەكەی وەردەگرێتەوە و دووەمیش كۆی مرۆڤەكان بێ رەچاوكردنی سنوور، زەرەرمەند دەبن، بۆیە ئاگركەوتنەوە لە دووری دوورەوە بێت یاخود لەسەر سنوورەكەمان، ئەوا بێ كەم و زیاد خۆشمان زەرەرمەند دەبین.

كەواتە، ململانێی سیاسی و سەلماندنی خود، لە كارێكەوە سەرچاوە ناگرێت، كە خودی خۆمان زەرەرمەند دەبین تێیدا، بۆیە تووڕەیی هەندێك بە كردەوەكانی پێشووی مرۆڤەكان و ئازاردەرەكانمان، نابێتە پاساو بۆ خۆشحاڵی بۆ ئەو رووداوانەی كە تا ساڵانێكی زۆر مرۆڤە سیڤیلەكانیش بەدەست ئازارەكەیەوە دەناڵێنن.

 241 جار بینراوە