سەرەکی » ئابووری » قائمقامی سلێمانی: نرخی نان گران نابێت

قائمقامی سلێمانی: نرخی نان گران نابێت

یەکەی ئابووری

نوێنەری نانەواخانەكان و سەندیكای كرێكاران لەگەڵ قایمقامی سلێمانی كۆبوونەوە و گفتوگۆیان لەبارەی كێشەی نانەواخانەكان كرد، كە خۆی لە گرانبوونی نرخی ئارد و سووتەمەنی دەبینێتەوە، لە كۆبوونەوەكەدا بڕیار درا نرخی نان وەكو خۆی بمێنێتەوە و نرخی هەشت نان بە هەزار دینار بێت.

لە كۆبوونەوەكەدا، چالاك رەئوف سەرۆكی لقی سلێمانی یەكێتیی سەندیكاكانی كرێكارانی كوردستان، بە نوێنەرایەتی تەواوی خاوەن نانەواخانەو سەمونخانەكان كێشەكانی باس كرد، كە خۆی لە گرانبوونی نرخی ئارد و سوتەمەنی و بەرزبوونەوەی نرخی كارەبا و زۆری رسوماتی تازەكردنەوەی مۆڵەتدا دەبینێتەوە و ئەمەش فشاری زۆری لەسەر نانەواخانەکان دروستكردووە و وتی: «ئێمە لە خەمی ژیانی هاووڵاتیانداین، بەڵام ئێستا فشاری زۆرمان لەسەرە و لە زەرەرداین».

لای خۆیەوە، قایمقامی سلێمانی پێیڕاگەیاندن، ئێمە لە كێشەكانی ئێوە تێدەگەین و دەزانین بەشێكی گرنگی كۆمەڵگە و شارەكەمانن و زەرەرمەندی یەكەم ئێوەن، لە چەند لایەكەوە هەوڵێكی زۆرمان بۆ چارەسەری كێشەكان داوە، ئومێد دەكەین لە ئایندەدا ئەنجامەكەی ببینین، لەهەمان كاتدا رێگە نادەین بەهیچ جۆرێك ئارد ببرێتە دەرەوە، لە هاتنەناوەوەشدا هەوڵ دەدەین رسوماتی لەسەر نەبێت.

وتیشی: «دەزانم هەمووتان لە زەرەردان، بەڵام با هەوڵ بدەین بە هەموومان رێگە بگرین لە گرانبوونی نرخی نان، چونكە دواجار شارەكەمان و كۆمەڵگەكەمان زیان دەكات».

لە كۆبوونەوەكەدا رێكەوتن كە لەپێناوی بەرژەوەندیی هاووڵاتیاندا نرخی نان وەكو خۆی بمێنێتەوە و ژمارەی نان دەستكاری نەكرێت و 8 نان بە هەزار دینار دەبێت و خاوەنی نانەواخانەكانیش رەزامەند بوون.

 176 جار بینراوە