سەرەکی » دۆسێ » ئەوروپا كۆتوپێوەند بەسەر مانەوەی عیراقییەكاندا دەسەپێنێت

بۆ كەمكردنەوەی كۆچی نایاساییە

ئەوروپا كۆتوپێوەند بەسەر مانەوەی عیراقییەكاندا دەسەپێنێت

كۆمسیۆنی ئەوروپا، بۆ كەمكردنەوەی كۆچی نایاسایی، كۆتوپێوەندی نوێی كاتی بەسەر ڤیزای مانەوەی كورتمەودای ئەو عیراقیانەدا دەسەپێنێت كە داواكارییان پێشكەش كردووە.

بەپێی بەیاننامەیەك كە لەلایەن كۆمسیۆنی ئەوروپا لە ناوڕاستی ئەم مانگە بڵاوكرایەوە»كۆتوپێوەند بەسەر ڤیزای مانەوەی كورتمەودای ئەو عیراقیانەدا دەسەپێنرێت كە لەو بارەیەوە داواكارییان پێشكەش كردووە، ئەم پێشنیازەش لە مانگی رابردوودا پێشكەش كرا، دوای ئەوەی هاوئاهەنگییەكی پێوست نەبوو لەگەڵ وڵاتانی یەكێتی ئەوروپا، لەڕووی قبوڵكردنەوەی كۆچبەرە نایاساییە عیراقییەكان لە وڵاتانی یەكێتی ئەوروپا»، بڕیارەكەش بە گونجاو لەگەڵ یاسای هەمواركراوی ڤیزای مانەوە دادەنرێت كە لە شوباتی 2020وە خراوەتە بواری جێبەجێكردنەوە، «بەو پێیەی سیاسەتی ڤیزای مانەوەی كورتمەودای تایبەت بە یەكێتی ئەوروپا، پەیوەندییەكی توندوتۆڵی هەیە لەگەڵ هاوئاهەنگی وڵاتە هاوبەشەكان، بەو مانایەی یەكێتی ئەوروپا داوا لە هەموو دەوڵەتەكان دەكات ئەو هاووڵاتیانە قبوڵ بكەنەوە كە مافی مانەوەیان نەماوە لەسەر خاكی وڵاتەكانیان».

هەر لە بەیاننامەكەدا هاتووە» لەگەڵ عیراقییەكان، كۆتوپێوەند بەسەر ڤیزای هاتنەناوەوەی هاووڵاتیانی گامبیا و بەنگلادیش سەپێنراوە، ئامانج لەو پێشنیازەش كە كاریی پێدەكرێت، باشكردنی هاوئاهەنگی سێ‌ وڵاتە لەگەڵ وڵاتانی ئەندام لە یەكێتی ئەوروپا سەبارەت بە قبوڵكردنەوە، لەگەڵ تێكەڵكردنەوەی هەمیشەیی كە پێكهێنەری سەرەكی هاوبەشییەكانە لە كۆچی هەمەلایەنەی هاوسەنگ و نەخشەبۆداڕێژراوی تایبەت كە بۆ هەردوولا بەسودە لەگەڵ وڵاتانی دەرەوەی یەكێتی ئەوروپا».

كۆمسیۆنی ئەوروپا دەڵێت»پارێزگاریی لە رێڕەوی هاوبەشی بۆ بنیاتنانی بەرچاوڕوونییەكی هاندەرە لەپێناو پێشكەوتنێكی خێرا لە قبوڵكردنەوە، كۆمسیۆن بەردەوام دەبێت لە بەشداریكردنی لەگەڵ وڵاتە پەیوەندیدارەكان بۆ باشكردنی هاوئاهەنگی هەمەلایەنە لەگەڵ ئەو وڵاتانە».

پێشتر ئاژانسی پاراستنی سنورەكانی یەكێتی ئەوروپا «فرۆنتكس» بڵاویكردبۆوە»11.150 كەس تەنیا لە مانگی حوزەیرانی 2021، بەشێوەی نایاسایی هەوڵیانداوە بگەنە وڵاتانی یەكێتی ئەوروپا، ئەمەش دەستەواژەیە بۆ زیادبوون بە رێژەی 69%، بەراورد بە هەمان ماوە لە ساڵی رابردوو».

لەم ماوەیەی دواییدا، كۆچی نایاسایی عیراقییەكان بەرەو وڵاتانی یەكێتی ئەوروپا بەشێوەیەكی بەرچاو رووی لە زیادبوون كرد، ئەمەش وایكرد یەكێتی ئەوروپا ناڕەزایی دەرببڕێت و بەڕەسمی داوا لە عیراق بكات، بەر لە كۆچی هاووڵاتیانی بگرێت بۆ ئەوروپا.

وڵاتی بیلاڕوسیاش كە دەیەوێت گوشاربخاتە سەر یەكێتی ئەوروپا بەهۆی ناكۆكییەكانی نێوانیان، سنورەكانی بۆ كۆچی نایاسایی بۆ وڵاتانی یەكێتی ئەوروپا ئاواڵاكردووە، زۆربەی هەرەزۆری ئەو كۆچبەرانەی لەم ماوەیەی دواییدا لەو رێگەیەوە كۆچییان بەرەو لیتوانیا و پوڵەندا و وڵاتانی ئەوروپا دەكرد، لە عیراقییەكان پێكهاتبوون، ئەمەش بووە مایەی ئەوەی وەزیری دەرەوەی لیتوانیا بێتە بەغدا و لەو بارەیەوە گفتووگۆ لەگەڵ بەرپرسانی عیراق بكات، تا هەوڵەكانیان بۆ بەرگرتن لەو كۆچە بخەنەگەڕ.

لەبەرامبەردا حكومەتی عیراق، گەشتە ئاسمانییەكانی بۆ مینسك راگرت و هێڵی ئاسمانی وڵاتیشی بۆ گێڕانەوەی ئەو عیراقیانە خستەگەڕ كە لە بیلاڕوسیا گیرییان خواردبوو.

هەر لەو چوارچێوەیەدا، وڵاتی ئەڵمانیا داوای لە بەرپرسانی عیراق كردبوو سەردانی وڵاتەكە بكەن، بۆ چارەسەركردنی كێشەی ئەو پەنابەرە عیراقیانەی لە وڵاتەكەدا داواكاریی پەنابەرییان رەتكراوەتەوە، بۆ ئەو مەبەستەش كریستیان بوۆك بەڕێوەبەری ئیقلیمی كاروباری خۆرهەڵاتی ناوەڕاست و باكووری ئەفریقا لە وەزارەتی دەرەوەی ئەڵمانیا، هاتە بەغدا و لەگەڵ ڤیان فایەق وەزیری كۆچ و كۆچبەرانی عیراق گفتووگۆی كرد.

لەئێستادا شەپۆلی كۆچی نایاسایی عیراقییەكان بۆ وڵاتانی یەكێتی ئەوروپا، قورسایی لەسەر یەكێتییەكە دروستكردووە، هەر ئەمەش وای لە جۆزیپ بوریل كۆمسیاری یەكێتی ئەوروپا بۆ ئاسایشی دەرەوە كرد، داوای روونكردنەوە لە عیراق بكات سەبارەت بە بەكارهێنانی فڕۆكەخانەی نێودەیوڵەتی بەغدا بۆ كۆچی نایاسایی بۆ بیلاڕوس كە لێوەی كۆچبەران دزە دەكەنە نێو لیتوانیا.

 151 جار بینراوە