سەرەکی » راپۆرت » ئامادەكردنی: دیاری سابیر » دادگای ئەوروپا بۆ مافی مرۆڤ: پۆڵەندا ‌و لاتیڤیا یارمەتیی كۆچەران بدەن

دادگای ئەوروپا بۆ مافی مرۆڤ: پۆڵەندا ‌و لاتیڤیا یارمەتیی كۆچەران بدەن

لەسەر سكاڵای ژمارەیەك لە كۆچەران، دادگای ئەوروپا بۆ مافی مرۆڤ، داوای لە پۆڵەندا ‌و لیتوانیا كرد، هاوكاریی پێشكەش ئەو كۆچەرانە بكەن، كە لەسەر سنووری وڵاتەكانیان لەگەڵ بیلاڕوسیا گیریانخواردووە.

رێگە بە چوونە ناوەوەی ئەو دوو وڵاتە نادات
دادگاكە كە بارەگاكەی لە شاری ستراسبۆرگ-ی فەرەنسایە، لە بەیاننامەیەكدا داوای لە پۆڵەندا ‌و لاتیڤیا كردووە، بە شێوەیەكی كاتی، ئاوی خواردنەوە ‌و خواردن ‌و جلوبەرگ ‌و هاوكاریی تەندروستی پێشكەش بەو پەنابەرانە بکەن كە داوای مافی پەنابەرێتییان لەو دوو وڵاتە كردووە ‌و ئێستا لەسەر سنووری نێوان هەردوو وڵات لەگەڵ بیلاڕوسیا گیریانخواردووە، ئەگەر لەتواناشیاندا بێت، شوێنی كاتیی نیشتەجێبوونیان بۆ دابین بكەن.

لە بەیاننامەكەدا، دادگای ئەوروپا بۆ مافی مرۆڤ روونیكردۆتەوە: بەهۆی ئەوەی ئەو كۆچەرانە ناتوانن بچنە ئەو دوو وڵاتەوە ‌و ناشتوانن بگەڕێنەوە بۆ بیلاڕوسیا، لەسەر سنووری نێوان پۆڵەندا ‌و لاتیڤیا گیریانخواردووە ‌و پێویستە هەردوو حكومەتی وارسۆ ‌و ریگا تێبگەن، كە ئەو رێوشوێنە رێگە بە چوونە ناوەوەی كۆچەران بۆ ناو ئەو دوو وڵاتە نادات.

هەزاران كۆچەر
بەیاننامەكەی دادگای ئەوروپا بۆ مافی مرۆڤ دوای سكاڵای ژمارەیەك كۆچەری عیراقی ‌و ئەفغانییە، كە بە ئامانجی پاراستنی گیانیان لەلایەن لایەنی نێودەوڵەتییەوە، دەیانەوێت بچنە ناو خاكی پۆڵەندا ‌و لاتیڤیاوە.

لەم چەند مانگەی دواییدا، هەزاران كۆچەر كە زۆربەیان خەڵكی خۆرهەڵاتی ناوەڕاست بوون، سنووری بیلاڕوسیایان بەرەو پۆڵەندا ‌و لاتیڤیا بەزاند، یەكێتیی ئەوروپاش خەمساردیی چوونی ئەو شەپۆلە زۆرەی كۆچەران لە بیلاڕوسیاوە بۆ وڵاتانی ئەندام لە یەكێتییەكە، لەلایەن حكومەتی میسنك-ەوە وەك تۆڵەكردنەوە دادەنێت، لە بەرامبەر ئەو سزایانای كە یەكێتیی ئەوروپا خستوویانەتە سەر بیلاڕوسیا.

پلانی بۆ دانراوە
لەم دواییەشدا ‌و لە راگەیەنراوێكی هاوبەشدا، سەرۆك وەزیرانی ئەستۆنیا ‌و لاتیڤیا ‌و لیتوانیا ‌و پۆڵەندا رایانگەیاند، كە چوونی ئەو ژمارە زۆرەی پەنابەران لە سنوورەكانی بیلاڕوسیا، پێشتر لەلایەن حكومەتی مینسك-ەوە پلانی بۆ دانراوە.

بەپێی لێدوانی دەسەڵاتدارانی پۆڵەندا، لەمساڵدا چوونە ناوەوەی زیاتر لە 4000 كۆچەریان تۆمار كردووە، كە چوونەتە وڵاتەكەیانەوە ‌و پۆڵەندا بۆتە روویەكی نوێ لە یەكێتیی ئەوروپا بۆ داواكارانی مافی پەنابەرێتی. دەشڵێن: تەنها لە مانگی رابردوودا زیاتر لە 2000 كۆچەر هەوڵیانداوە بە شێوەیەكی نایاسایی بچنە پۆڵەنداوە.

وەكو رێوشوێنێكیش بۆ بەرگرتن لە چوونە ناوەوەی ئەو ژمارە زۆرەی كۆچەران، پۆڵەندا بە تەلی دڕكاوی دیوارێكی لەسەر سنووری خۆی لەگەڵ بیلاڕوسیا دروستكردووە ‌و ژمارەیەكی زۆری سەربازیشی لەو ناوچانە بڵاوكردۆتەوە.

داوای پاراستنی گیانیان دەكەن
زۆربەی كۆچەرەكان خەڵكی عیراق ‌و سوریا ‌و ئەفغانستانن ‌و هەموویان لەسەر سنووری نێوان پۆڵەندا ‌و بیلاڕوسیا گیریانخواردووە، كە لەلایەن هێزە سەربازییەكانی هەردوو وڵاتەوە دەپارێزرێت.

لەلایەكی دیكەوە، رێكخراوەكانی مافی مرۆڤ ‌و ئۆپۆزسیۆنی پۆڵەندا، حكومەتی وارسۆ بەوە تۆمەتبار دەكەن كە یاسای نێودەوڵەتی پێشێل دەكات ‌و بە دەنگ داوای ئەو كەسانەوە ناچێت كە پێویستیان بە یارمەتییە.

ئەو كۆچەرانە لە دادگای ئەورپا بۆ مافی مرۆڤ سكاڵایان تۆماركردووە، داوای پاراستنی گیانیان دەكەن لەلایەن كۆمەڵگەی نێودەوڵەتییەوە، بەڵام دەسەڵاتدارانی پۆڵەندا داواكاریی ئەو كەسانەیان رەتكردۆتەوە، كە نزیكەی سێ هەفتەیە، لەسەر سنووری نێوان پۆڵەندا ‌و بیلاڕوسیا گریانخواردووە.

سەرچاوە: euronews

 213 جار بینراوە