سەرەکی » هەواڵ » شاناز ئیبراهیم ئه‌حمه‌د: هه‌موان پشتیوانیی هاوپه‌یمانیی كوردستان بكه‌ین

شاناز ئیبراهیم ئه‌حمه‌د: هه‌موان پشتیوانیی هاوپه‌یمانیی كوردستان بكه‌ین

خاتوو شاناز ئیبراهیم ئەحمەد كارگێڕی مەكتەبی سیاسی و بەرپرسی میحوەری سلێمانی بۆ هەڵمەتی بانگەشە و هەڵبژاردن، بارەگای ناوەندی رۆشنبیری و جەماوەری سلێمانی كردەوە.

دوێنێ، لە رێوڕەسمێكی جەماوەریی فراواندا، لە سلێمانی، خاتوو شاناز ئیبراهیم ئەحمەد، ناوەندی رۆشنبیری و جەماوەری سلێمانی و كتێبخانەی ناوەندەكەی بەناوی (مامۆستا ئیبراهیم ئەحمەد) كردەوە، كە سەدان كتێب و سەرچاوەی جۆراوجۆری لەخۆگرتووە. لە وتەیەكدا، خاتوو شاناز ئیبراهیم ئەحمەد، لەبارەی هەڵبژاردنی ئەنجومەنی نوێنەرانەوە، وتی: وەك یەكێتی و گۆڕان بە یەكدەنگ و یەكڕەنگ پێكەوە دەچینەسەر سندوقەكانی دەنگدان، ئەم هەڵبژاردنەش زۆر چارەنووسسازە لەبەرئەوەی بەشێكی زۆری كێشە و گرفتەكانی كورد لە بەغدا چارەسەردەكرێت، بۆیە پێویستە هەمووان پشتیوانیی هاوپەیمانیی كوردستان بكەین بۆ چارەسەركردنی ئەو كێشانە و بەدەستهێنانی مافەكانی گەلی كورد. وتیشی: خۆم بە كچی سلێمانی دەزانم و هەر بێڕێزییەك بەرامبەر هەر مرۆڤێكی ئەم شارە، بە بێڕێزیی بەرامبەر خۆم دادەنێم، بۆیە چیتر كەس بۆی نییە پەنجە درێژبكات بۆ دووكاندارێك و خانوویەك و گەڕەكێكی ئەم شارە و بیخاتە موزایەدەوە.

خاتوو شاناز ئیبراهیم ئەحمەد، راشیگەیاند: هیوادارم ئەمجارە پێكەوە تۆڵەی شەهیدانمان بكەینەوە و دەبێت رێگەنەدەین ئەو هەڵە و كەموكورتیانەی لە رابردوودا یەكێتی باجەكەیداوە، دووبارەببێتەوە و رێگەنادەین جارێكی تر یەكێتی باجی هەڵەی هیچ كەسێك بدات.

جێگەی باسە، ناوەندی رۆشنبیری و جەماوەری سەر بە مەڵبەندی یەكی رێكخستنی سلێمانی (ی.ن.ك)ە، بە ئامانجی خزمەتكردنی چینوتوێژە جیاجیاكان كراوەتەوە بەتایبەتی هونەرمەندان و وەرزشوانان و كەسوكاری شەهیدان و گەنجان و ئەدیب و رۆشنبیران.

 71 جار بینراوە