سەرەکی » ئاراستە » شەهید رەفیق ئاغجەلەری مامۆستا و پێشمەرگەیەكی نموونەیی بوو

شەهید رەفیق ئاغجەلەری مامۆستا و پێشمەرگەیەكی نموونەیی بوو

خەبات ئاغجەلەری*

شەهید رەفیق رەشید ناسراو بە مامۆستارەفیق ئاغجەلەری، ساڵی 1953 لەئاغجەلەری ناوچەی قەڵاسێوكە لە دایكبووە، كوڕە تاقانەی خێزانەكەی بووەو تەنیا سێ خوشكی هەبووە، كاتێك منداڵ بووە باوكی كۆچی دوایی دەكات و لەگەڵ خوشكەكانیدا ئەركی بەخێوكردنیان دەكەوێتە ئەستۆی دایكیان، بەڕاستیش دایكیان بەهەق شێرەژنێك بووە لەناوچەكەدا.

شەهید مامۆستا رەفیق لە ساڵی 1972دا ئاشنای كاری سیاسیی دەبێت لە ریزەكانی ئەوسای پارتیداو تا نسكۆی شۆڕشی ئەیلول بەردەوام بووە، پاشان لەكاتی هەڵگیرسانەوەی شۆڕشی نوێی گەلەكەمان و لەساڵی 1977دا دەچێتە ریزەكانی كۆمەڵەی رەنجدەرانی كوردستانەوەو دەبێتە ئەندامێكی چالاك، لەو سنوورە هەمیشە جێگەی رێزو متمانەی خەڵك بووە بەهۆی كەسایەتییە هێمن و بەهێزەكەیەوە.

پاش ئەوەی دەبێتە جێگەی گومانی سیخوڕەكانی بەعس، لە ساڵی 1979دا لەلایەن ئەمنی ئاغجەلەرەوە دەستگیر دەكرێت و رەوانەی ئەمنی سلێمانی دەكەن، بۆماوەی چوارمانگ ئازارو ئەشكەنجەی دەدەن بەڵام هیچ نهێنییەك نادركێنێ و بەناچاری ئازادی دەكەن، دوای ماوەیەك لە ئازادبوونی جارێكیتر لە ساڵی 1980 لەگەڵ خاڵێكیدا بەناوی محەمەد حامید كە ئەویش ئەندامی رێكخستن بووە، دەستگیردەكرێن و رەوانەی هەیئەی كەركوك و ئەمنی شیمالی هەولێر دەكرێن و ئازارو ئەشكەنجەیەكی زۆر دەدرێن، بەڵام ئەمجارەش دوژمن بەناچاری خۆی و خاڵی ئازاد دەكەن.

شایەنی باسە ئەوكاتەی شەهید دەستگیركرا مامۆستابوو لەگوندی كودەریانی ناوچەی زرارەتی.

دوای ئازادبوونی، لە ساڵی 1981دا دەبێتە پێشمەرگە لە هەرێمی دووی كەركوكی ئەوسای یەكێتیی نیشتمانیی كوردستان، هاوكاتیش بەعسی دوژمن سەرجەم خانەوادەكەی مامۆستا رەفیق دەستگیردەكەن، لەئەنجامدا دایك و هاوسەرو منداڵە تەمەن یەك ساڵەكەی و خوشكەكانی شەهید بۆ ماوەیەكی زۆر لەئەمنی سلێمانی دەستبەسەردەبن، بەڵام ئەو رووداو وگرفتە گەورەیە كار لە بیروباوەڕی شۆڕشگێڕ و كوردپەروەریی شەهید ناكات، پاشان كەسوكارەكەی ئازاد دەكرێن و ئەوانیش روو لەشاخ دەكەن و دەچنە گوندی (كۆزەبۆرە)ی ناحیەی ئاغجەلەر و لەوێ نیشتەجێ دەبن.

شەهید مامۆستا رەفیق لەبەر ئازایەتی و دلێری خۆی پلەكانی پێشمەرگایەتی بڕیوە تا فەرماندەی كەرت، پاشان لەگەڵ دروستبوونی تیپەكان لە تیپی 21 ی كەركوك درێژە بەخەباتی پێشمەرگایەتی دەدات، لەیەك كاتدا پێشمەرگەو مامۆستاش بووە لە گوندی كۆزەبۆرە.

بەڵام مەخابن، لە رۆژی 2/10/1982 لەگەڵ دوو پێشمەرگەی دیكەدا بەناوەكانی(سەرتیپ ئاوبارەیی و شەماڵی سلێمانی) لە سنووری گوندی چەرمەگای ناوچەی سورداش، شەهیدكران.

*پورزای شەهید

 158 جار بینراوە