سەرەکی » وتار » بڕیاری‌ سڕكردنی‌ (سه‌رایا سه‌لام) چی‌ ده‌گه‌یه‌نێت؟

بڕیاری‌ سڕكردنی‌ (سه‌رایا سه‌لام) چی‌ ده‌گه‌یه‌نێت؟

یادگار عه‌لی‌

له‌پاش بردنه‌وه‌ی‌ زۆرترین ژماره‌ی‌ كورسییه‌كانی‌ خوولی‌ داهاتووی‌ ئه‌نجومه‌نی‌ نوێنه‌رانی‌ عیراق، (موقته‌دا سه‌در) به‌بڕیارێك كاره‌كانی‌ (سه‌رایا سه‌لام)ی باڵی‌ سه‌ربازی‌ سه‌ر به‌ ره‌وتی‌ سه‌در-ی‌ سڕكرد، ئه‌و هه‌نگاوه‌ به‌ گۆڕانێكی‌ گرنگ له‌ گۆڕه‌پانی‌ سیاسی‌ عیراق داده‌نرێت به‌تایبه‌ت كه‌ وڵاته‌كه‌ له‌ڕووی‌ سیاسی‌ و سه‌ربازییه‌وه‌ له‌بارێكی‌ گرژدایه‌. بڕیاره‌كه‌ش هه‌ڵگری‌ چه‌ند ئاماژه‌ و گریمانه‌یه‌كه‌. ره‌نگدانه‌وه‌كانی‌ له‌سه‌ر گۆڕه‌پانی‌ عیراق چی ده‌بن؟ ئه‌و ئاڵه‌نگارییانه‌ كامانه‌ن كه‌ رووبه‌ڕووی‌ بڕیاره‌كه‌ ده‌بنه‌وه‌؟

گۆڕانی‌ په‌یامی‌ سه‌در له‌ كاتی‌ هه‌ڵبژاردنه‌كاندا
كردنه‌وه‌ی‌ كۆدی‌ په‌یامه‌كانی‌ سه‌در له‌ پاش ده‌ركه‌وتنی‌ ئه‌نجامه‌كانی‌ هه‌ڵبژاردن، هۆكاری‌ ئه‌و كاردانه‌وه‌ زبرانه‌ نیشان ده‌دات، كه‌ هێزه‌ شیعییه‌كان به‌رامبه‌ر به‌ ئه‌نجامی‌ هه‌ڵبژاردنه‌كه‌ نواندیان، له‌پێش هه‌موویان (هاوپه‌یمانی‌ ده‌وڵه‌تی‌ یاسا) به‌سه‌رۆكایه‌تی‌ (نوری‌ مالیكی‌) و (هاوپه‌یمانی‌ فه‌تح) به‌سه‌رۆكایه‌تی‌ (هادی‌ عامری‌) له‌پاڵ سه‌ركرده‌ی‌ هاوپه‌یمانێتییه‌ نا سه‌ركه‌وتووه‌كانی‌ تری‌ هه‌ڵبژاردن. له‌و چوارچێوه‌یه‌شدا (موقته‌دا سه‌در) له‌ یه‌كه‌م په‌یامدا، پاش ئاشكرابوونی‌ ئه‌نجامی‌ هه‌ڵبژاردنی‌ پێشوه‌خته‌ی‌ په‌رله‌مانی‌ عیراق (11ی‌ ئۆكتۆبه‌ری‌ 2021)، وتی‌: «هه‌بوونی‌ چه‌ك له‌ده‌ره‌وه‌ی‌ ده‌وڵه‌ت كۆتایی‌ پێده‌هێنین»، «عیراقییه‌كان ده‌یانه‌وێت به‌ئارامی‌ و دوور له‌ داگیركاری‌ و تیرۆر و میلیشیاكان بژین كه‌ مایه‌ی‌ كه‌موكورتین بۆ شكۆی‌ ده‌وڵه‌ت»، هێمای‌ به‌وه‌شكرد، «هه‌رگیز رێگه‌ به‌ده‌ستوه‌ردان ناده‌ین، لێره‌ به‌دواوه‌ ده‌بێت چه‌ك ته‌نها به‌ده‌ستی‌ ده‌وڵه‌ته‌وه‌ بێت، ناهێڵین چه‌ك له‌ده‌ره‌وه‌ی‌ ده‌وڵه‌ت به‌كاربێت، ته‌نانه‌ت به‌ده‌ستی‌ ئه‌وانه‌ش كه‌ ناوی‌ گروپه‌كانی‌ به‌رگرییان لێنراوه‌«.

ئه‌و په‌یامه‌ی‌ سه‌در هه‌ڵگری‌ جۆرێك له‌ گۆڕانكاری‌ گرنگه‌ له‌ هه‌ڵوێست له‌باره‌ی‌ بابه‌تی‌ چه‌ك كه‌ تائێستاش له‌ده‌ره‌وه‌ی‌ ده‌وڵه‌تدایه‌، به‌تایبه‌ت كه‌ ئه‌و رابه‌ری‌ براوه‌ترین لیستی‌ هه‌ڵبژاردنی‌ خوولی‌ داهاتووی‌ ئه‌نجومه‌نی‌ نوێنه‌رانه‌. هه‌ر بۆیه‌ بینیمان په‌یامه‌كه‌ رووبه‌ڕووی‌ كاردانه‌وه‌ی‌ توندی‌ سه‌ركرده‌ی‌ گروپه‌ چه‌كدارییه‌كان بوویه‌وه‌، له‌دیارترینیان: لێدوانه‌كانی‌ (ئه‌بوعه‌لی‌ عه‌سكه‌ری‌) وته‌بێژی‌ كه‌تائیبی‌ حیزبوڵای‌ عیراقی‌ بوو.

به‌دڵنیاییه‌وه‌ سه‌ركه‌وتنی‌ ره‌وتی‌ سه‌در له‌ هه‌ڵبژاردنی‌ پێشوه‌خته‌ی‌ په‌رله‌مان به‌شێكی‌ گه‌وره‌ی‌ بۆ هاتنه‌كایه‌ی‌ گۆڕانكاری‌ له‌ په‌یام و تێڕوانینی‌ ئه‌و ره‌وته‌ ده‌گه‌ڕێته‌وه‌، به‌تایبه‌ت به‌ڵێنیان بۆ چاكسازی‌ سیاسی‌ كه‌ ئێستا ئه‌و دۆسیه‌یه‌ بووه‌ته‌هۆی‌ زیادبوونی‌ ده‌مارگیری‌ تائیفی‌ و مه‌زهه‌بی‌ له‌ عیراق، هه‌روه‌ها به‌ڵێنه‌كانیان بۆ تێكۆشان له‌پێناو پێكهێنانی‌ كۆمه‌ڵگه‌ی‌ شارستانی‌، دانانی‌ سنور بۆ ده‌ستوره‌دانی‌ وڵاتانی‌ هه‌رێمایه‌تی‌ له‌كاروباره‌كانی‌ عیراق و له‌قاڵبدانی‌ ئه‌و گروپه‌ چه‌كدارییانه‌ی‌ بڕیار و هه‌ڵوێست له‌ده‌ره‌وه‌ی‌ عیراق وه‌رده‌گرن، له‌گه‌ڵ ده‌ركردنی‌ هێزه‌ ئه‌مه‌ریكییه‌كان له‌ ته‌واوی‌ عیراق. سه‌رباری‌ ئاماژه‌ی‌ روونی‌ سه‌در و ره‌وته‌كه‌ی‌ بۆ پێویستی‌ دووباره‌ پێناسه‌كردنه‌وه‌ی‌ رۆڵی‌ حه‌شدی‌ شه‌عبی‌، به‌وردتر ئه‌وانه‌ی‌ ئینتیمایان بۆ شوێنانی‌ ده‌ره‌وه‌ی‌ عیراق هه‌یه‌ و رێكخستنه‌وه‌یان له‌ناو سیسته‌می‌ ئه‌منی‌ عیراقی‌.

له‌و ماوانه‌ی‌ دواییه‌دا؛ په‌یامه‌كانی‌ سه‌در به‌و ئاراسته‌یه‌ بوون، له‌گه‌ڵ گروپه‌ چه‌كداره‌كان به‌رێكه‌وتن درووست نه‌بێت، به‌تایبه‌ت كه‌ ئه‌و گرووپانه‌ رژانه‌ سه‌ر شه‌قامه‌كان و ئه‌نجامه‌كانی‌ هه‌ڵبژاردنیان ره‌تده‌كرده‌وه‌، چه‌ندین ته‌نگژه‌ی‌ ئه‌منیان خوڵقاند، وه‌ك ئه‌وه‌ی‌ له‌ دیاله‌ روویدا، له‌گه‌ڵ گه‌ڕانه‌وه‌ی‌ كاتیۆشاكان له‌ شه‌وان، ده‌ركردن و خوێندنه‌وه‌ی‌ هه‌ندێك له‌ به‌یاننامه‌ و په‌یام و هه‌ڕه‌شه‌ بۆ تێكچوونی‌ ئاشتی‌ كۆمه‌ڵایه‌تی‌ له‌ عیراق، ئه‌وكات سه‌در له‌به‌یاننامه‌یه‌كدا «داوای‌ «دانبه‌خۆداگرتن، كاركردن به‌ رۆحیه‌تی‌ نیشتیمانی‌ و له‌پێناو نیشتیمان»ی‌ كرد، هه‌روه‌ها داوایكرد «هه‌موو لایه‌ك پابه‌ندی‌ رێگا یاساییه‌كان بۆ په‌ڵپ گرتن له‌ ئه‌نجامی‌ هه‌ڵبژاردنه‌كان بن، له‌پشێوی‌ و ئاڵۆزی‌ دروستكردن دووربكه‌ونه‌وه‌«، ئه‌وه‌ش ئاماژه‌یه‌كی‌ ئاشكرابوو بۆ مه‌ترسی‌ گۆڕینی‌ ململانێی‌ سیاسی‌ بۆ شه‌قام.

پاڵنه‌ره‌كانی‌ سڕكردنی‌ سه‌رایا سه‌لام و ئاماژه‌كانی‌
ده‌كرێت گرنگترین پاڵنه‌ر و ئاماژه‌كانی‌ ئه‌و هه‌نگاوه‌ی‌ (موقته‌دا سه‌در ) به‌مجۆره‌ بخه‌ینه‌ڕوو:

1- سه‌ركه‌وتنی‌ كوتله‌ی‌ سه‌دری‌ له‌ هه‌ڵبژاردنی‌ پێشوه‌خته‌ی‌ په‌رله‌مان وایكرد كه‌ رابه‌ره‌كه‌ی‌ یه‌كه‌ زمانییه‌كانی‌ په‌یامه‌كه‌ی‌ بگۆڕێت و ئاراسته‌ی‌ په‌یامه‌كه‌ به‌وشێوه‌ بێت كه‌ له‌گه‌ڵ چه‌مكی‌ ده‌وڵه‌ت و به‌گژاچوونه‌وه‌ی‌ هێزی‌ ده‌ره‌وه‌ی‌ ده‌وڵه‌ت بێـت، كه‌ تاڕاده‌یه‌كی‌ زۆر هێزی‌ له‌به‌ر ده‌وڵه‌ت بڕیوه‌، هه‌روه‌ها هه‌نگاوێكی‌ سه‌دریش بوو بۆ جیاكردنه‌وه‌ی‌ ئه‌و گروپه‌ سه‌ربازییانه‌ی‌ كه‌ له‌ گه‌ڵ به‌هێزی‌ ده‌وڵه‌تن له‌گه‌ڵ ئه‌وانه‌ی‌ له‌ده‌ره‌وه‌ی‌ چوارچێوه‌ی‌ دامه‌زراوه‌ ده‌وڵه‌تییه‌كان كارده‌كه‌ن.

2- بۆ قۆناغه‌كانی‌ داهاتوو سه‌در به‌شێوه‌ی‌ بنه‌ڕه‌تی‌ پێویستی‌ به‌ كاری‌ سیاسی‌ هه‌یه‌، به‌ورمانایه‌ی‌ كه‌متر پێویستی‌ به‌ هێزی‌ چه‌كداری‌ ده‌بێت، به‌تایبه‌ت كه‌ بتوانێت حكومه‌تی‌ داهاتوو له‌گه‌ڵ هه‌ندێك له‌لایه‌نه‌كانی‌ تر پێكبهێنێت و جڵه‌وی‌ حكومه‌ت به‌ده‌سته‌وه‌ بگرێت.

3- بێزاركردنی‌ كوتله‌ سیاسییه‌كانی‌ تر كه‌ باڵی‌ سه‌ربازییان هه‌یه‌، به‌تایبه‌ت هاوپه‌یمانی‌ فه‌تح، چونكه‌ هه‌نگاوه‌كه‌ زیاتر سیاسییه‌ تاوه‌كو سه‌ربازی‌، تا وایان لێبكات پشتگیری‌ له‌و هه‌نگاوه‌ بكه‌ن، به‌تایبه‌ت كه‌ سه‌در له‌ هه‌ر هه‌ڕه‌شه‌ و پشێوییه‌ك ده‌ترسێت ببێته‌ هۆی‌ شكستهێنان به‌هه‌وڵه‌كانی‌ پێكهێنانی‌ حكومه‌تی‌ داهاتووی‌ عیراق، بڕیاری‌ سڕكردنی‌ كاره‌كانی‌ سه‌رایا سه‌لامیش له‌و رووانگه‌یه‌وه‌ و تا كه‌شێكی‌ سیاسی‌ له‌بار بۆ پێكهێنانی‌ حكومه‌ت دروستبێت و له‌ونێوه‌نده‌شدا؛ گروپه‌ چه‌كدارییه‌كانی‌ تریش له‌چه‌ك دابماڵرێن.

4- ناردنی‌ په‌یامێكی‌ روون بوو بۆ ئه‌و كوتله‌ سیاسییانه‌ی‌ كه‌ باڵی‌ چه‌كدارییان هه‌یه‌، به‌وه‌ی‌ كه‌ سه‌در سووره‌ له‌سه‌ر به‌رنامه‌ی‌ حكومه‌ت كه‌ له‌میانه‌ی‌ ده‌ركه‌وتنی‌ ئه‌نجامی‌ هه‌ڵبژاردنه‌كان باسی لێوه‌كردووه‌، به‌تایبه‌ت: تێكه‌ڵكردنی‌ گروپه‌ چه‌كداره‌كان به‌ ده‌زگا ئه‌منییه‌كانی‌ ده‌وڵه‌ت، قه‌ده‌غه‌كردنی‌ نمایشی‌ چه‌كداری‌ و به‌هێزكردنی‌ رۆڵی‌ ده‌زگا ئه‌منییه‌كان.

5- سه‌در ده‌یه‌وێـت له‌و رێگه‌یه‌وه‌ په‌یام بۆ ده‌ره‌وه‌ش بنێرێت، كه‌ ئه‌وان تێڕوانینێكی‌ نوێیان هه‌یه‌ و پێشكه‌شی‌ لایه‌نه‌ سیاسیه‌كانیان كردووه‌ به‌پێچه‌وانه‌ی‌ هه‌موو لایه‌نه‌ سیاسییه‌كانی‌ تر كه‌ تائێستاش ئاره‌زوومه‌ندن چه‌ك به‌شێك بێت له‌ هێزی‌ سیاسی‌.

ئاڵه‌نگارییه‌كان
كۆمه‌ڵێك ئاڵه‌نگاری‌ ناوخۆیی‌ و ده‌ره‌كی‌ ره‌نگه‌ رووبه‌ڕووی‌ ئه‌و هه‌نگاوه‌ی‌ سه‌در بێته‌وه‌، له‌وانه‌:

هه‌نگاوی‌ سڕكردن شتێكی‌ كه‌رتییه‌ نابێته‌ گشتی‌، وه‌ك ئاشكرایه‌ سه‌رایا سه‌لام به‌شێكه‌ له‌ ده‌سته‌ی‌ حه‌شدی‌ شه‌عبی، له‌چوارچێوه‌ی‌ كه‌رته‌كانی‌ (313، 314 و 315) رێكخراون، ئه‌و به‌شانه‌یان له‌ شاره‌كانی‌ نه‌جه‌ف، كه‌ربه‌لا، سه‌ڵاحه‌ددین و به‌غداد بڵاوه‌یان پێكراوه‌، به‌ده‌ركراون له‌ بڕیاره‌كه‌ی‌ سه‌در، ئه‌وه‌ش مانای‌ ئه‌وه‌ ده‌گه‌یه‌نێت بڕیاره‌كه‌ زیاتر هه‌نگاوێكی‌ ته‌كتیكیه‌ تاوه‌كو ستراتیژی‌، چونكه‌ كاره‌كانی‌ سه‌رایا سه‌لام ته‌نها له‌و پارێزگایانه‌ سڕكراوه‌ كه‌ له‌په‌راوێزدان و سه‌رچاوه‌ی‌ بڕیاری‌ سیاسی‌ و ئایینی‌ نین و ئه‌وه‌ش بیانووی‌ داوه‌ته‌ ده‌ست گروپه‌ چه‌كداره‌كان كه‌ له‌سه‌ر كاری‌ ئێستای خۆیان به‌رده‌وامبن و ئه‌و بڕیاره‌ زۆر بێزاریان نه‌كات.

پێشبینی‌ ده‌كرێت كه‌ جارێكی‌ تر سه‌در له‌ بڕیاری‌ سڕكردنی‌ گروپی‌ سه‌رایا سه‌لام پاشگه‌زبێته‌وه‌، وه‌ك له‌پێشوودا چه‌ندجارێك ئه‌وجۆره‌ كاره‌ی‌ كردووه‌، هه‌ر بۆرنموونه‌: له‌ بۆنه‌یه‌كدا؛ (سووپای‌ مه‌هدی‌) هه‌ڵوه‌شانده‌وه‌ دواتر بڕیاره‌كه‌ی‌ بۆ سڕكردن گۆڕی‌، بۆیه‌ پێشبینیركراوه‌ بۆ داهاتووش؛ هه‌ركات پێویست بێت، بڕیاری‌ سڕكردنی‌ سه‌رایا سه‌لامیش هه‌ڵبوه‌شێنێته‌وه‌.

ئه‌وه‌ی‌ زیاتر گریمانه‌كه‌ی‌ خاڵی‌ پێشوو ده‌چه‌سپێنێت ئه‌وه‌یه‌ كه‌ گروپه‌ چه‌كدارییه‌كانی‌ تر به‌خراپ كه‌ڵك له‌ بڕیاره‌كه‌ وه‌ربگرن و له‌ڕووی‌ هه‌ژموونی‌ ئابووری‌ و ئاسایش زیاتر هه‌ڕه‌شه‌ له‌سه‌ر سه‌رایا سه‌لام له‌و ناوچانه‌ دروستده‌كه‌ن كه‌ بڕیاری‌ سڕكردن ده‌یانگرێته‌وه‌، ئه‌وه‌ش به‌ڕوونی‌ له‌ لێدوانێكی‌ (ئه‌حمه‌د كنانی‌) له‌ هاوپه‌یمانی‌ فه‌تح ده‌بینرێت: «ده‌سته‌ی‌ حه‌شدی‌ شه‌عبی هه‌ڵناوه‌شێته‌وه‌ و له‌گه‌ڵ ده‌زگا ئه‌منییه‌كانی‌ تریش تێكه‌ڵ ناكرێت».

چه‌كی‌ ده‌ستی‌ گروپه‌ چه‌كداره‌كان به‌تایبه‌ت ئه‌وانه‌ی‌ ئینتیمایان بۆ هه‌ندێك وڵاتی‌ هه‌رێمایه‌تی‌ هه‌یه‌، به‌شێك له‌ ئاسایشی‌ نه‌ته‌وه‌یی‌ ئه‌و وڵاتانه‌ پێكده‌هێنن، به‌تایبه‌ت ئه‌وانه‌یان به‌ (ره‌وتی‌ به‌رگری‌) ناسراون، بۆیه‌ پێشبینی‌ ناكرێت ده‌ستی‌ ده‌ره‌كی‌ رێگه‌ به‌چه‌كداماڵینی‌ ئه‌و گرووپانه‌ بدات، ته‌نانه‌ت یه‌كخستنیشیان له‌ناو ده‌زگا ئه‌منییه‌كانی‌ ده‌وڵه‌تی‌ عیراق.

له‌وه‌ش زیاتر، له‌و ماوه‌یه‌ی‌ دواییانه‌دا؛ چه‌ند بڕیارێك له‌ حكومه‌ته‌كه‌ی‌ (مسته‌فا كازمی)یه‌وه‌ ده‌رچووه‌، چه‌ندین گرووپی‌ تری‌ بۆ ناو چوارچێوه‌ی‌ ده‌سته‌ی‌ حه‌شدی‌ شه‌عبی گه‌ڕاندووه‌ته‌وه‌، به‌ڵام له‌واقیعدا؛ هیچ یه‌كێك له‌و بڕیارانه‌ جێبه‌جێرنه‌كراون. ئه‌و گرووپانه‌ له‌ماوه‌ی‌ پێشوودا دروستكراون، وه‌ك هێزی‌ ئابووری‌ و ئه‌منییان لێهاتووه‌، بۆیه‌ هه‌روارئاسان نییه‌ سه‌ركرده‌كانیان ده‌ستبه‌رداریان بن، به‌بێ‌ ئه‌وه‌ی‌ ئیراده‌یه‌كی‌ به‌هێزی‌ سیاسی‌ له‌حكومه‌ت و له‌نێو ئه‌و گروپانه‌ به‌و ئاراسته‌یه‌ هه‌بێت، وه‌ك ئه‌وه‌ی‌ به‌رامبه‌ر به‌ (سه‌رایا خۆراسانی‌) كرا و بووه‌رهۆی‌ هه‌ڵوه‌شاندنه‌وه‌ی‌ گروپه‌ چه‌كدارییه‌كه‌ و ده‌ستگیركردنی‌ سه‌ركرده‌كانیان.

ده‌رئه‌نجام:
سیاسه‌تی‌ كار و كاردانه‌وه‌ی‌ نێوان (موقته‌دا سه‌در) و گروپه‌ چه‌كداره‌ عیراقییه‌كان، له‌سه‌ر چه‌ندین دۆسیه‌یه‌، دیارترینیان: داماڵینی‌ گروپه‌ چه‌كداره‌كان له‌ چه‌ك به‌جۆرێك چه‌ك ته‌نها له‌ ده‌ستی‌ ده‌وڵه‌ت بێت، له‌گه‌ڵ رێكخستن و یه‌كخستنی‌ گروپه‌ چه‌كداره‌كان له‌نێو ده‌زگا ئه‌منییه‌كانی‌ ده‌وڵه‌ت، ئه‌وه‌ش بارێكی‌ ئاڵۆزی‌ دروستكردووه‌، خۆی‌ به‌سه‌ر گۆڕه‌پانی‌ سیاسی‌ عیراقیدا سه‌پاندووه‌، بڕیاره‌كه‌ی‌ سه‌در به‌ سڕكردنی‌ كاره‌كانی‌ (سه‌رایا سه‌لام) كه‌ سه‌ر به‌ ره‌وته‌كه‌ی‌ خۆیه‌تی‌، بووه‌ته‌ مایه‌ی‌ زیادكردنی‌ ناكۆكییه‌كان، بڕیاره‌كه‌ وه‌ك به‌ته‌واوی‌ (سه‌رایا سه‌لام) سڕ ناكات، مایه‌ی‌ تووڕه‌بوونی‌ گروپه‌ چه‌كداره‌كانی‌ تریشی‌ لێكه‌وتووه‌ته‌وه‌، ئه‌وان ئه‌و پلانه‌ی‌ سه‌در و كه‌مكردنه‌وه‌ی‌ هه‌ژموونیان له‌داهاتووش ره‌تكردووه‌ته‌وه‌، ئه‌مه‌ش ئاماژه‌یه‌ بۆئه‌وه‌ی‌ كه‌ له‌داهاتوودا؛ ململانێی‌ زیاتر له‌نێوان ئه‌و دوو لایه‌نه‌ رووده‌دات، به‌دیاریكراوی‌ له‌پرسه‌كانی‌ په‌یوه‌ست به‌: چه‌كداماڵێنی‌ گروپه‌ چه‌كداره‌كان، ده‌سه‌ڵاتی‌ ده‌وڵه‌ت، ئابووری‌ گروپه‌ چه‌كداره‌كان، به‌تایبه‌ت ئه‌گه‌ر سه‌در سه‌ركه‌وتووبێت له‌وه‌ی‌ حكومه‌تی‌ داهاتوو پێكبهێنێت، ئه‌وكات گروپه‌ چه‌كداره‌كان به‌ئه‌ركی‌ خۆیان ده‌زانن ببن به‌ ئۆپۆزسیۆنی‌ ئه‌و حكومه‌ته‌ و تا پێكدادانیش له‌گه‌ڵیدا ده‌ڕۆن.

•له‌ (مركز الإمارات للسیاسات)ـه‌وه‌ ئاماده‌كراوه‌.

 168 جار بینراوە