سەرەکی » وتار » خالد سلێمان‌ » بۆ حەیدەر ئەلعەبادی لەگەڵ رێزدا

بۆ حەیدەر ئەلعەبادی لەگەڵ رێزدا

كاتێك ئەم چەند دێڕەت بۆ دەنووسم، تۆ نوقمی سەركەوتنەكانتی، ئەوەتا وێنەیەكی خۆت بە جلی كوردییەوە گرتووە لەسەر چیا بەرزەكانی كوردستان وەك دیارییەكی دوای وێرانە بۆ گەلی كورد.
دەوڵەتمەدار سەرۆك وەزیران، بەر لە قەرزكردنی وێنەیەكی مێژوویی بۆ نەرمكردنەوەی ئەو توندوتیژییەی فەرمانت پێكرد، بەو پێیەی فەرماندەی هێزە چەكدارەكان‌و پۆلیسی فیدراڵی‌و حەشدی شەعبیت، وەك هاووڵاتییەك دەڵێم: پەیڤەكانت گەیشتن‌و نیازیشت روون بۆوە، تۆ گەلی كوردت خۆش دەوێ‌و لەگەڵیدایت‌و باوەڕت بە دۆزەكەی هەیە‌و كاریش دەكەیت لەپێناو مافەكانی‌و پاراستنیدا، هەر بۆ زانیاریت ئەوانەی پێش تۆش وڵاتیان بەڕێوە دەبرد هەر وایان دەوت، بەڵام كارەسات‌و ئازارەكان لەپشتەوە زۆر گەورە بوون، زۆر زۆر گەورە بوون، ناچار دەبم بەسەرهاتی تایبەتت بۆ بگێڕمەوە، بۆ ئەوەی پێت بڵێم وشە شیرینەكان لەبارەی كوردەوە دەرگای نووسینگەكەت تێناپەڕێنێت، وەك چۆن وشەكانی ئەوانەی پێش تۆش دیواری كۆشكەكانیانی تێنەدەپەڕاند.
تۆ دەڵێیت هێزە فیدراڵییەكان بەپێی دەستوور‌و بۆ پاراستنی هاووڵاتیان چوونەتە ناو كەركوك‌و دووزخورماتوو شارەكانی ترەوە. رێگەم بدە پێتان بڵێم هاووڵاتیانی كورد توندوتیژانە مامەڵەیان لەگەڵدا كرا، كە جیاوازیی لەگەڵ مامەڵەی بەعسییەكاندا نەبوو. ماڵەكانیان رووخێنرا، دووكانەكانیان سووتێنرا، سوكایەتی بە پیرۆزییەكانیان كرا‌و ئاوارەش بوون وەك چۆن لە عیراقی سەردەمی بەعسدا ئاوارە دەبوون. زیادەڕۆیی ناكەم‌و لەو كەسانەش نیم لەقسەكردندا زیادەڕۆیی دەكەن، بەڵام كاتێك نیوەی كەسوكارم لە دووزخورماتوو ئاوارە دەبن (حوشودی شەعبی)ش ماڵ‌و دووكانەكانیان دەسووتێنن‌و دەریان دەكەن، ناچار دەبم بەراوردێك لەنێوان تۆ‌و ئەوانەی پێش تۆدا بكەم لە شوێنبزركردنی هاووڵاتیاندا.
بەڕێز سەرۆك، لەم چەند ساڵەی دواییدا گەلی كورد زۆرترین تاڵاوی چەشت: یەكەمیان بەدەست دەستەبژێرێك لە دەسەڵاتداری گەندەڵەوە لە هەرێمی كوردستان، كە مافە مەدەنییەكان‌و دیموكراسی‌و ئازادیی گشتی پێشێل كران، لە دەركردنی سەرۆكی پەرلەمان‌و داخستنی دەرگاكان بەڕووی نوێنەرانی گەلدا، تا دەگات بە سەپاندنی سیاسەتی ئەمری واقیع‌و بڕیاردانی تاكڕەوانە لەسەر چارەنووسی خەڵك. ئێوەش یەك وشەتان نەوت، لەكاتێكدا ئێمەی رۆشنبیران‌و نووسەران لەم ساڵانەی دواییدا دەنگمان هەڵدەبڕی بۆ رای گشتی كوردی‌و عیراقی‌و جیهانی‌و داوامان دەكرد هاوكاربن بۆ پاراستنی هەرێمی كوردستان لە حوكمی تاكڕەویی‌و بنەماڵە.
تاڵاوی دووەم كە گەلی كورد چەشتی لەسەر دەستی حكومەتە رەشیدەكەت بوو، كە بەر لە بڕینی گەردنمان خۆراكی بڕین. هیوامان دەخواست گەیشتنی كوتوپڕی تۆ بە دەسەڵات، شتێك بگۆڕێت لەو وێرانییەی كە لە (بەعدە خەرابی بەسرە) دەچێت، بەڵام نائومێدیی لە هیوا گەورەتر بوو.
تاڵاوی سێیەم كە لەسەردەمی حوكمی ئێوەدا بوو بەڕێز سەرۆك، بەشمان بڕینی سەر‌و رووخاندنی ماڵەكان بەسەر منداڵەكانماندا‌و بێ سەروشوێن كردنی گەنجەكانمان بوو. وێنە‌و گەواهیدانم لەبەر دەستدایە سەبارەت بەم بەشەی بەرمان كەوتووە، كە حەشدی شەعبیتان راسپارد بۆمان بهێنن. ئێستا هیچ نەماوە بكەیت ئەوە نەبێت وێنەیەك بە جلی كوردییەوە بگریت‌و نامەیەكی خۆشەویستیمان بۆ بنێریت، ئەویش بە كەسێكدا بینێریت كە كورد بە داگیركەری خاكی كوردستان دەزانێت.
print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*