سەرەکی » ساڵۆنی کوردستانی نوێ » بونیاده‌ گێڕانه‌وه‌گه‌رییه‌كان له‌ڕۆمان و چیرۆكه‌كانی گه‌لاوێژدا گفتوگۆی‌ له‌باره‌وه‌ كرا

ساڵۆنی کوردستانی نوێ

بونیاده‌ گێڕانه‌وه‌گه‌رییه‌كان له‌ڕۆمان و چیرۆكه‌كانی گه‌لاوێژدا گفتوگۆی‌ له‌باره‌وه‌ كرا

له‌چوارچێوه‌ی‌ كۆڕو سیمیناره‌كانی‌ ساڵۆنی‌ كوردستانی‌ نوێ‌، رۆژی‌ 16/10/2018، كۆڕی خستنه‌ڕوو و واژۆكردن و دابه‌شكردنی كتێبی (بونیاده‌ گێڕانه‌وه‌گه‌رییه‌كان له‌ڕۆمان و چیرۆكه‌كانی گه‌لاوێژدا) له‌ نووسینی پ.د. زاهیر له‌تیف كه‌ریم و پ. د. نیان فواد مه‌ستی به‌ڕێوه‌چوو.
له‌ كۆڕه‌كه‌دا، هه‌ردوو دكتۆری‌ نووسه‌ر، تیشكیان خسته‌ سه‌ر لایه‌نه‌ دیاره‌كانی‌ كتێبه‌كه‌و پاشانیش به‌شێك له‌ ئاماده‌بووان تێبینی‌ و سه‌رنجی‌ خۆیان له‌سه‌ر كتێبه‌كه‌ خسته‌ڕوو، ئه‌مه‌ی‌ خواره‌وه‌ش پوخته‌ی‌ كۆڕه‌كه‌ی‌ ساڵۆنی‌ كوردستانی‌ نوێیه‌:

ئالان محه‌مه‌د به‌ڕێوه‌به‌ری‌ كۆڕ:
میوانانی به‌رێز، ئاماده‌بوانی خۆشه‌ویست، به‌خێرهاتنێكی گه‌رمتان ده‌كه‌ین‌و خۆشحاڵین به‌ ئاماده‌بوونتان بۆ ناساندن‌و واژۆكردنی كتێبی بونیاده‌ گێڕانه‌وه‌گه‌رییه‌كان له‌ڕۆمان و چیرۆكه‌كانی گه‌لاوێژدا له‌ نوسینی هه‌ر یه‌ك پ.د. زاهیر له‌تیف كه‌ریم‌و پ.د.نیان نه‌وشیروان مه‌ستی، به‌خێربێن سه‌رچاوان.
پ.د. زاهیرله‌تیف كه‌ریم له‌ سلێمانی‌و له‌ خێزانێكی كوردپه‌روه‌ر‌و زانستخواز‌و هونه‌ر‌و وه‌رزش له‌دایكبووه‌. یه‌كێكه‌ له‌ نه‌وه‌كانی شێخ حه‌سه‌نی گڵزه‌رده‌‌و برای هونه‌رمه‌ندی شێوه‌كاری ناسراو عه‌لی له‌تیفه‌. خاوه‌نی بڕوانامه‌ی به‌كالۆریۆس له‌ زمان‌و ئه‌ده‌بی عه‌ره‌بی، زانكۆی به‌غدا 1977. دكتۆرا له‌ بواری ره‌خنه‌‌و ئه‌ده‌بی به‌راوردكاری له‌زانكۆی كلاسكۆ، به‌ریتانیا 1985، له‌ساڵی 2000، پله‌ی پرۆفیسۆری به‌ده‌ستهێناوه‌. ماوه‌ی 10 ساڵ 1985_1995 له‌ زانكۆی سه‌ڵاحه‌ددین كۆلێژی ئه‌ده‌بیات، وه‌كمامۆستا‌و سه‌رۆك به‌شی عه‌ره‌بی كاری كردووه‌. له‌ 1995_2001 راگری كۆلێژی زمان بووه‌.
یه‌كێكه‌ له‌ دامه‌زرێنه‌رانی خوێندنی باڵا له‌ زانكۆی سلێمانی. سه‌رپه‌رشتی چه‌ندین نامه‌ی ماسته‌ر‌و دكتۆرای كردووه‌، له‌وانه‌ ماسته‌رنامه‌كه‌ی نوری ئه‌لمالیكی‌و هه‌ردوو نامه‌ی ماسته‌ر‌و دكتۆراكه‌ی د.نیان نه‌وشیروان مه‌ستی.
له‌ ساڵی 2010‌و له‌لایه‌ن وه‌زاره‌تی خوێندنی باڵای عێراقه‌وه‌ خه‌ڵاتی پله‌ی پرۆفیسۆری یه‌كه‌می له‌سه‌ر ئاستی كوردستان‌و باكوری عێراق پێبه‌خشراوه‌. خاوه‌نی چه‌ندین وتار‌و كتێب‌و لێكۆڵینه‌وه‌یه‌. ئێستاش مامۆستایه‌ له‌ زانكۆی سلێمانی، كۆلێژی زمان، به‌شی زمانی عه‌ره‌بی.
پ.د. نیان نه‌وشیروان فوئاد مه‌ستی، له‌ سلێمانی له‌خێزانێكی كوردپه‌روه‌ر‌و تێكۆشه‌ر‌و روناكبیر له‌دایكبووه‌، گه‌وره‌ زانا‌و بیرمه‌ندی كورد، تۆفیق وه‌هبی به‌گ، مامی باوكیه‌تی. باوكیشی یه‌كێكه‌ له‌ پێشه‌نگه‌ تێكۆشه‌ره‌كانی بزووتنه‌وه‌ی رزگاریخوازی گه‌لی كورد، كه‌ هه‌ر له‌ سه‌ره‌تای شۆرشه‌وه‌، به‌بێ دابڕان خه‌باتی له‌ پێناو خاك‌و نیشتمان‌و نه‌ته‌وه‌دا كردووه‌. خاوه‌نی بڕوانامه‌ی به‌كالۆریۆس له‌ زمان‌و ئه‌ده‌بی عه‌ره‌بی زانكۆی موسته‌نسه‌ریه‌_ به‌غدا_ 1991. ماسته‌ر له‌بواری ره‌خنه‌‌و ئه‌ده‌بی به‌راوردكاری له‌ زانكۆی سه‌ڵاحه‌ددین_ 1995، دكتۆرا له‌ هه‌مان پسپۆریدا. له‌ زانكۆی سلێمانی_2004. له‌ ساڵی 1995 له‌ زانكۆی سلێمانی وه‌ك مامۆستا دامه‌زراوه‌، دووجار، یه‌رۆكایه‌تی به‌شی عه‌ره‌بی كۆلێژی زمان پێسپێردراوه‌. ساڵی 2012، وه‌ك یه‌كه‌م ئافره‌ت له‌ زانكۆی سلێمانی، پله‌ی پرۆفیسۆری به‌ده‌ستهێناوه‌.
سه‌رپه‌رشتی‌و گفتوگۆی چه‌ندین نامه‌ی ماسته‌ر‌و دكتۆرای ئه‌نجامداوه‌، خاوه‌نی چه‌ندین لێكۆڵینه‌وه‌و كتێب‌و وتاره‌, ئێستاش مامۆستایه‌ له‌ زانكۆی سلێمانی، كۆلێژی زمان به‌شی زمانی عه‌ره‌بی.
سه‌ره‌تا پ.د. زاهیر له‌تیف كه‌ریم له‌باره‌ی‌ كتێبه‌كه‌وه‌، وتی‌: ئه‌م كتێبه‌ی كه‌ڕۆژی 16/ 10/2018 و له‌ساڵۆنی كوردستانی نوێ واژوی بۆ ده‌كرێت به‌ناونیشانی» بونیاده‌ گێڕانه‌وه‌ییه‌كان له‌ڕۆمان وچیرۆكه‌كانی گه‌لاوێژ دا « وده‌كه‌وێته‌ به‌رده‌ستی ئێوه‌ی ڕوناكبیر و رۆشنبیری خوێنه‌ری كورد,پشتی به‌ڕێبازه‌ ڕه‌خنه‌ییه‌ نوێیه‌كانی تازه‌گه‌رایی ودوای تازه‌گه‌رایی به‌ستووه‌ وزۆریش دووره‌ له‌پیاهه‌ڵدان وستایش وڕسته‌ داڕێژراوه‌ پێش وه‌خته‌كان.هه‌ر له‌به‌ر ئه‌مه‌شه‌ سه‌رجه‌م لێكۆڵینه‌وه‌كانی ئه‌م كتێبه‌ ده‌چێته‌ ده‌ره‌وه‌ی سیاقه‌ مێژووییه‌كان كه‌زیاتر خۆیان له‌لێكۆڵینه‌وه‌ وه‌سفییه‌كاندا ده‌بینێته‌وه‌ كه‌به‌شێوه‌ بابه‌تییه‌كه‌ی ناتوانرێت ڕه‌هه‌نده‌ داهێنانییه‌كان ده‌ستنیشان بكات.له‌نێوه‌ندی لێكۆڵینه‌وه‌كانماندا گه‌یشتینه‌ ئه‌و ڕاستییه‌ی كه‌گه‌لاوێژ خاوه‌ن توانایه‌كی هونه‌ری وته‌كنیكی وداڕشتنی وده‌ربرینییه‌ بابه‌تییه‌كانه‌ كه‌له‌م ڕووه‌وه‌ توانای به‌راووردكاریكردنی هه‌یه‌ له‌گه‌ڵ كه‌ڵه‌ نووسه‌ر وڕۆمانووسه‌ جیهانییه‌كان ولۆكاڵییه‌كان به‌وپێیه‌ لێكچوونێك له‌هێز وتواناكاندا به‌دی ده‌كرێت وله‌هه‌مان كاتیشدا جیاوازییه‌كانی به‌ده‌رده‌كه‌ون به‌وپێیه‌ی گه‌لاوێژ نایه‌وێت وێنه‌یه‌كی دووباره‌ی ده‌قه‌ لۆكاڵی وده‌ره‌كییه‌كان بێت.ئه‌مه‌ش به‌و مانایه‌ نایه‌ت كه‌گه‌لاوێژ نه‌چوبێته‌ ژێر كاریگه‌رییه‌ ئه‌ده‌بییه‌كان به‌ڵام له‌گه‌ڵ ئه‌مه‌شدا پارێزگاری له‌كه‌سێتی وشوناس وڕه‌سه‌نایه‌تی ئه‌ده‌به‌ نه‌ته‌وایه‌تییه‌كه‌ی خۆی كردووه‌ كه‌ئه‌مه‌ به‌لای تیۆره‌كانی ئه‌ده‌بی به‌راووردكارییه‌وه‌ كارێكی زۆر په‌سه‌ند وگونجاوه‌.گه‌لاوێژ,له‌پاڵ ڕووداوی بابه‌ته‌كانیدا,وه‌ك نووسه‌رێكی به‌سه‌لیقه‌ وڕۆشنبیر به‌ده‌رده‌كه‌وێت.ئه‌مه‌ش هه‌ر وه‌ك شاعیر وڕه‌خنه‌گری جیهانی,ت.س.ئیلیۆت,ده‌ڵێت داهێنانه‌كان له‌ڕێگه‌ی ئه‌و دوو جه‌مسه‌ری سه‌ره‌كییه‌وه‌ دروست ده‌بن ئه‌وانیش,به‌هره‌ و ڕۆشنبیرییه‌ته‌.به‌هره‌ییه‌كه‌ی ده‌گه‌ڕێته‌وه‌ بۆ فینۆمینیای خێزانیی,نزیكترینیان كاریگه‌رییه‌كانی مامۆستا برایم ئه‌حمه‌د.ڕۆشنبیرییه‌كه‌شی ده‌رئه‌نجامی تێكه‌ڵبوونی به‌خوێندنه‌وه‌ وكارلێكه‌ سۆسیۆڵۆژی وفیكرییه‌كانه‌وه‌ به‌ده‌رده‌كه‌وێت.ئه‌م بۆچوونه‌,ئاستی تێگه‌یشتن وهه‌ستكردنی گه‌لاوێژ نیشان ده‌دات وبه‌مه‌ش خوێندنه‌وه‌كانی بۆ جیهانی ئه‌ده‌بی وفه‌لسه‌فی ڕووكه‌شی نین.هه‌ر ئه‌مه‌ش وایكردووه‌ كه‌ئێمه‌ی خوێنه‌ر نه‌توانین وه‌ك پێویست واقیعی ڕووداوه‌كان له‌خه‌یاڵه‌كان جودا بكه‌ینه‌وه‌ ئه‌مه‌ له‌كاتێكدا سه‌رجه‌م سه‌رچاوه‌ گێڕانه‌وه‌ییه‌كان ئه‌وه‌مان پێده‌ڵێن كه‌دامه‌زراندنی زۆربه‌ی هه‌ره‌ زۆری ڕووداوه‌كان له‌سه‌رچاوه‌ خه‌یاڵییه‌كانه‌وه‌ دروست ده‌بێت.گرێدانی واقیع وخه‌یاڵ,یان به‌رجه‌سته‌كردنی كارێكته‌ر وجێگه‌ وزه‌مه‌نه‌كان له‌نێو ئه‌و دوالیزمه‌دا (واقیع وخه‌یاڵ ) لێهاتوویی گه‌لاوێژ نیشان ده‌دات.وورده‌كاری له‌ڕووداو وچڕی له‌دایه‌ڵۆگ وجووڵه‌ی كارێكته‌ره‌كان ئه‌وه‌ ده‌رده‌خه‌ن كه‌هیچ بۆشاییه‌ك نه‌مێنێت له‌نێوان واقیع وخه‌یاڵدا.بابه‌تی ڕووداوه‌كان,هه‌موویان,په‌یوه‌ندی ڕاسته‌وخۆی به‌مه‌سه‌له‌ وتاكی كوردییه‌وه‌ هه‌یه‌.لێره‌دا گه‌لاوێژ, وه‌ك ده‌رهێنه‌رێك وسیناریستێك ,به‌ویژدانه‌وه‌ ده‌چێته‌ نێو ڕووداوه‌كانه‌وه‌ وه‌ك ئه‌وه‌ی خۆی به‌خاوه‌نی ئه‌و ڕووداوانه‌ بزانێت.له‌م گۆشه‌یه‌شه‌وه‌ ,كارنامه‌كانیمان بۆ ده‌رده‌كه‌وێت كه‌له‌هه‌موویان گرنگتر ئاشكراكردن وگه‌یاندنی په‌یام ونامه‌كانێتی بۆ تێكڕای خه‌ڵكی به‌هێزی ده‌سه‌ڵاتیشه‌وه‌.یان گواستنه‌وه‌ی واقیع وه‌ك ئه‌وه‌ی كه‌ده‌بینرێت وپێویسته‌ قسه‌ی له‌سه‌ر بكرێت وڕێگه‌ چاره‌ی ده‌شێیی بۆ بدۆزرێته‌وه‌.ئه‌وه‌ی جێگه‌ی سه‌رنجی ئێمه‌یه‌ ئه‌وه‌یه‌ كه‌گه‌لاوێژ له‌به‌رهه‌مه‌كانیدا به‌تایبه‌تی چیرۆك وڕۆمانه‌كانی,له‌لایه‌كه‌وه‌, توانای به‌رجه‌سته‌كردنی كه‌سێتی پیاوی هه‌یه‌ كه‌ئه‌مه‌ وه‌ڵامێكی لۆژیكی ومه‌عریفییه‌ بۆ پیاوان كه‌ژنانیش ده‌توانن ڕۆڵی پیاوان ببینن وبه‌رجه‌سته‌شی بكه‌ن.له‌لایه‌كی تریشه‌وه‌ توانای به‌رجه‌سته‌كردنی ڕۆڵی ژنان وئافره‌تانیشی هه‌یه‌ ئه‌مه‌ش دوای ئه‌وه‌ی نووسه‌رانی پیاوان ڕه‌نگه‌ وه‌ك پێویست نه‌توانن ئه‌و ڕۆڵه‌ ببینن.له‌گۆشه‌یه‌كی تره‌وه‌,گه‌ر ناوه‌ڕۆكی به‌رهه‌مه‌كانی گه‌لاوێژ بخه‌ینه‌ ژێر یاساكانی تیۆری چوارچێوه‌یی گوفمان,ئه‌وا ده‌بینین نووسه‌ر له‌كاتێكدا جه‌خت له‌سه‌ر پێكهاته‌ بابه‌تییه‌كانی ده‌كات ئه‌وا ده‌یبه‌ستێته‌وه‌ به‌كارنامه‌ی گه‌یاندنییه‌ هه‌واڵی وكارلێكه‌ سۆسیۆڵۆژییه‌كانی كۆمه‌ڵگاوه‌ وله‌وێشه‌وه‌ چه‌ند مانایه‌ك له‌مانایه‌كدا ده‌خوڵقێنێت.واته‌ ده‌رخستن وئاشكراكردنی چه‌ند دیارده‌ وڕووداوێك كه‌توانای گه‌وره‌كردن ودواتر هه‌ڵسه‌نگاندنی بابه‌ته‌كانی هه‌بێت.ئه‌م بابه‌ته‌مان داناوه‌ بۆ لێكۆینه‌وه‌یه‌كی سه‌ربه‌خۆی تر له‌سه‌ر به‌رهه‌مه‌كانی گه‌لاوێژ.هه‌ر له‌به‌ر ئه‌مه‌شه‌,ئه‌م كتێبه‌ چه‌ند زانیارییه‌كمان ده‌داتێ وه‌ك:
– تێگه‌یشتنی تێكڕای خه‌ڵكی بۆ ڕووداوه‌كانی زه‌مه‌نی به‌رهه‌مه‌كان له‌ڕووی سیاسی وفیكری وڕۆشنبیری وسۆسیۆڵۆژیاوه‌.
– تێگه‌یشتنی تێكڕای خه‌ڵكی به‌چه‌مكه‌ ڕه‌خنه‌ییه‌ نوێییه‌كان ,ئه‌مه‌ش له‌پێناو ده‌ربازبوون له‌چه‌مكه‌ ته‌قلیدییه‌كان.
– ده‌رخستنی هێز وتوانای ئه‌ده‌بیاتی فیمینیزم له‌نێو ئه‌ده‌بیاتدا,كه‌گه‌لاوێژ له‌زۆرێك له‌به‌رهه‌مه‌كانیدا نوێنه‌رایه‌تی ده‌كات.
– ده‌رخستنی ڕاستییه‌كان دوای ئه‌وه‌ی داپۆشرابوو به‌ ده‌مامكه‌ تاریكه‌كان.گه‌رچی گه‌لاوێژ وه‌ك كه‌سێكی سیاسی به‌ده‌رناكه‌وێت به‌ڵام له‌كاتێكدا به‌رهه‌مه‌كانی ده‌خوێنینه‌وه‌ ئه‌وا به‌ئاشكرا هه‌ست به‌هه‌ڵسه‌نگاندنه‌ فیكری وسیاسی وسۆسیۆڵۆژییه‌كان ده‌كرێت وه‌ك ئه‌وه‌ی گه‌ر ئه‌و هه‌ڵسه‌نگاندنانه‌ به‌پیاوه‌ سیاسییه‌كان ئه‌نجام نه‌درابێت ئه‌وا گه‌لاوێژ ئه‌و بۆشاییه‌ی بۆ پڕكردونه‌ته‌وه‌. ئه‌مانه‌و گه‌لێكی تریش
له‌كۆتایدا ئومێد ده‌كه‌ین ئه‌ده‌بیاتی گه‌لاوێژ له‌لایه‌ن نووسه‌ران وڕه‌خنه‌گران وئه‌كادیمیانه‌وه‌ فه‌رامۆش نه‌كرێت كه‌ئه‌م ئه‌ده‌بیاته‌ ته‌نها په‌یوه‌ندی به‌خودی گه‌لاوێژه‌وه‌ نیه‌ به‌ڵكو له‌لایه‌كه‌وه‌ په‌یوه‌ندی به‌ئه‌ده‌بیاتی فێمینیزم وله‌لایه‌كی تره‌وه‌ به‌ناوه‌ڕۆكی كۆمه‌ڵگاوه‌ هه‌یه‌.
پاشان،د.نیان نه‌وشیروان مه‌ستی-یش قسه‌ كردو وتی‌: سه‌ره‌تا به‌خێرهاتنی ئاماده‌بوانی به‌ڕێز ده‌كه‌م‌و پێخۆشحاڵین به‌شداریتان كرد له‌ مه‌راسیمی ناساندن‌و واژۆكردنی كتێبی (بونیاده‌ گێرانه‌وه‌ گه‌ریكان له‌ رۆمان‌و چیرۆكه‌كانی گه‌لاوێژدا).
ده‌توانین بڵێین خاتو گه‌لاوێژ یه‌كێكه‌ له‌ نوسه‌ره‌ هه‌ڵكه‌وتووه‌كان بواری رۆمان‌و چیرۆكی كوردی، به‌رهه‌مه‌كانی هه‌ڵقوڵاوی هه‌ستێكی قوڵی واقعی مرۆییه‌، به‌ گشتی‌و كورده‌واریه‌ به‌تایبه‌تی‌وله‌ تێكرا رۆمان‌و چیرۆكه‌كانیدا كه‌سایه‌تیه‌كان له‌ واقیعه‌وه‌ وه‌رگیراون ده‌تگرێنن بۆیه‌ له‌ پێناو به‌رجه‌سته‌ كردنی ئه‌و كه‌سایه‌تیه‌ په‌نا بۆ ره‌هه‌نده‌ سۆسۆیۆلۆژی‌و سایكۆلۆژی‌و ره‌وشته‌كان ده‌بات‌و له‌ هه‌مان كاتدا كاره‌كان بریتین له‌ كارێكی گه‌یاندن له‌ نێوان خوی خۆی‌و وه‌رگردا به‌مه‌به‌ستی اككردنی دۆخه‌كان له‌ نێگه‌تیڤه‌وه‌ بۆ پۆزه‌تیڤ.
له‌به‌رهه‌مه‌كانیدا جه‌ختێكی ته‌واوی له‌ جێگه‌‌و زه‌مه‌ن‌و كردووه‌‌و كوردستان بۆته‌ شانۆیه‌ك بۆ رووداوه‌كان، ناوه‌رۆكی نوسینه‌كانی به‌رگێكی به‌رگری‌و ئازایه‌تی‌و فیداكاكاری‌و خۆنه‌ویستی پۆشبوه‌، له‌سه‌رجه‌م نووسینه‌كانیدا به‌دوای شوناسی كوردیدا ده‌گه‌ڕێت، ناتوانێت له‌ هزر‌و هۆشی تاكه‌كاندا بیچه‌سپێنێت‌و هه‌میشه‌ خاك‌و نیشتمان‌و كه‌سایه‌تیه‌كانی مه‌به‌سته‌. به‌رهه‌مه‌كانی ده‌رئه‌نجامه‌كانی باروودۆخه‌ سه‌خت‌و ناله‌باره‌كانی كۆمه‌ڵگایه‌، تێیدا ته‌نها رووی نه‌كردووته‌ چینه‌ رۆشنبیریه‌ باڵاكه‌، به‌ڵكو بایه‌خی زۆری داوه‌ به‌ چینه‌ مام ناوه‌ند‌و هه‌ژاره‌كان‌و زمانێكی پاراوو ره‌وان به‌كار ده‌هێنێت بۆ ئه‌وه‌ی گوزارشت له‌ واقع بكات. هونه‌ر له‌گه‌لاوێژه‌وه‌ ره‌نگدانه‌وه‌ی راستیه‌كانی ژیانی كۆمه‌ڵایه‌تیه‌ له‌پێناو خزمه‌تكردنی كۆمه‌ڵگا. هیوادارین ئه‌م كتێبه‌ سوود به‌خش بێت بۆ كتیێبخانه‌ی كوردی.
پاشان، ئاماده‌بووانی‌ كۆڕه‌كه‌، سه‌رنج و تێبینی‌ خۆیان، خسته‌ڕوو:
مسته‌فا ساڵح كه‌ریم:
ئه‌وه‌ی راستی بێت هه‌ردوو پرۆفیسۆر ماوه‌یه‌كی باش خۆیان ته‌رخان كردووه‌ بۆ لێكۆڵینه‌وه‌ له‌سه‌ر به‌رهه‌مه‌كانی خاتوو گه‌لاوێژ، له‌به‌ر ئه‌وه‌ گوێمان له‌ بۆچوونه‌كانیان بوو، من ده‌مه‌وێت ئاماژه‌ به‌وه‌ بده‌م كه‌ جگه‌ له‌م دوو به‌رێزه‌ كاك شیروان عه‌بدوڵڵا له‌ رێی سایتی خاكه‌وه‌ زیاتر خوێنه‌ری ئاشنا كرد به‌ به‌رهه‌مه‌كانی گه‌لاوێژخان.
گه‌لاوێژخان وه‌كو نمونه‌ی ئافره‌تی كورد كه‌ له‌ئه‌ده‌بی كوردیدا ده‌ركه‌وت به‌راستی، به‌ سه‌روو سیمایه‌كی نوێوه‌ هاته‌ نێو دنیای ئه‌ده‌بی، من له‌ سه‌ره‌تای ساڵی 2000 به‌ولاوه‌ بوو رۆژێكیان به‌ ته‌له‌فۆن قسه‌م له‌گه‌ڵ كرد وتی من ده‌مه‌وێت هه‌ندێك له‌ عه‌ره‌بیه‌كانم سه‌یر بكه‌یت، یه‌كیانمان دا به‌ كه‌ریم شێخانی عاله‌م فی غابه‌، یه‌كێكی ترمان دا به‌ كاك سه‌لاحی موده‌ریس به‌ڵام خۆم پێیدا چوومه‌ته‌وه‌. ته‌شجیعیشم كرد بوكی ئاته‌ خان بكاته‌ عه‌ره‌بی، وتم عه‌ره‌بیه‌كه‌ت باشه‌ خۆت هه‌وڵی له‌گه‌ڵ بده‌، گوتی یارمه‌تیم بده‌، ته‌واوی كرد‌و خۆم پێیدا هاتمه‌وه‌، گه‌لاوێژخان ورده‌كاری هه‌یه‌ له‌ چیرۆكدا من خۆم ئه‌زموونم هه‌یه‌ به‌راستی زۆر سه‌رنج راكێشه‌، له‌ بووكی ئاته‌ خاندا به‌راستی ورده‌كاری وای تێدایه‌ ئه‌زانی له‌ له‌نده‌ن ئێواران ژنانی ئه‌وێ چۆن ده‌چن بۆ لای كچان‌و كوره‌كانیان چۆن ده‌چن بۆ قوتابخانه‌، ته‌بعه‌ن به‌ سه‌یاره‌ی خۆی چووه‌ كه‌ قوباد‌و بافڵ بهێنێته‌وه‌ هه‌موو رۆژێك، حه‌مه‌ تۆفیق ره‌حیم ده‌ڵێ له‌ هه‌موومان ئازاتربوو به‌ یه‌كجار مۆڵه‌تی سایه‌قی له‌ له‌نده‌ن وه‌رگرت.
ئینجا له‌رێگه‌ی ئه‌و هاتووچۆپێكردنه‌وه‌ له‌گه‌ڵ خانمه‌ ئینگلیزه‌كان تێكه‌ڵاوی دروستكردووه‌ شاره‌زای عادات‌و ته‌بیعه‌تیان ده‌بێت، چۆن قسه‌ ده‌كه‌ن، چۆن باسی منداڵه‌كانیان ده‌كه‌ن، ئه‌مانه‌ی هه‌موو خستوه‌ته‌ نێو كتێبه‌كه‌وه‌، پاشان كوڕێكی كورد له‌ له‌نده‌ن ژن ده‌هێنێ، ئینجا كه‌سوكاری چاوه‌ڕوانن بووكی ئه‌جنه‌بی بێته‌وه‌ ئه‌و ورده‌كاریه‌ی باسی ده‌كات به‌راستی هه‌ر له‌ خۆی دێت، كه‌ ده‌گه‌نه‌وه‌ ئێره‌‌و دوای پێشوازی‌و ئه‌و هه‌موو خواردنه‌ی ئه‌كرێت ئه‌و ژنه‌ فێری ئه‌وه‌ نه‌بووه‌، هه‌روه‌ها ده‌نگی بانگ له‌ به‌ره‌به‌یان. چه‌ندین چیرۆكی تر كه‌ زۆر به‌ ورده‌كارییه‌وه‌ باسی لێكردووه‌.
ئینجا ئێستا كۆی به‌رهه‌مه‌كانی كه‌ باسیان كرد بۆ ژنێكی كورد به‌راستی زۆره‌، ئه‌مه‌ ژماره‌یه‌كی قیاسیه‌ له‌ بواری ئه‌ده‌ب‌و چیرۆكدا به‌ڵام تا ئێستا حه‌قی خۆی به‌ جوانی نه‌دراوه‌تێ ئیللا له‌ رێی ئه‌م دوو به‌رێزه‌وه‌ نه‌بێت كه‌ باسكراوه‌. گه‌لاوێژخان له‌ ژنی راستگۆی چیرۆكنوسی موته‌وازیعی له‌سه‌رخۆ كه‌ قه‌ڵه‌مێكی پێیه‌ قه‌ڵه‌مه‌كه‌ی ورده‌كاری زۆری تێدایه‌‌و ته‌نانه‌ت ده‌گه‌ڕێت بۆ ئه‌و ورده‌كاریانه‌ی كه‌ له‌ كۆمه‌ڵگه‌ی خۆمان‌و كۆمه‌ڵگه‌ی ده‌ره‌وه‌شدا هه‌یه‌.
گه‌لاوێژخان نمونه‌یه‌كه‌ له‌چیرۆكنوسه‌ ورده‌كان كه‌ به‌راستی ده‌توانێت شت بگه‌یه‌نێت، ته‌نانه‌ت له‌ رۆمانیشدا كه‌ ئاسان نیه‌ ده‌ستێكی باڵای هه‌یه‌، هیوای ته‌مه‌ن درێژیی ته‌ندروستی باشی بۆ ده‌خوازم پیرۆزبایی ئه‌م به‌رهه‌مه‌ی لێده‌كه‌م‌و جارێكی دیكه‌ش ده‌ستخۆشی له‌ هه‌ردوو پرۆفیسۆر ده‌كه‌م بۆ ئه‌م كاره‌‌و زۆر سوپاس.
ده‌وه‌ن مه‌عروف:
ده‌ستان خۆشبێت دكتۆر گیان نوسینه‌كانی گه‌لاوێژخان به‌راستی بۆ من له‌ رووی زمانه‌وه‌ كاریگه‌ری زۆر باشی هه‌یه‌، هه‌ست ده‌كه‌م كه‌ به‌شێكی زۆر له‌و وتارانه‌ی كه‌ به‌رێزتان‌و د.نیان نوسیوتانه‌ زیاتر له‌سه‌ر ده‌ق بووه‌ وه‌ پاڵپشت به‌ مێتۆده‌كانی دیارده‌گه‌راكان‌و پێكهاته‌گه‌راكان راسته‌ ئه‌مه‌ مه‌سه‌له‌یه‌كی گرنگه‌‌و نمونه‌یه‌كی گگرنگی ئه‌و ئه‌زموونه‌ن له‌ رۆژئاواوه‌ سه‌ری هه‌ڵداوه‌، بۆ من ئه‌وه‌ی زۆر گرنگه‌ ئه‌وه‌یه‌ خاتوونێك به‌ زمانێك ده‌نوسێت زۆر جوودایه‌ له‌ زمانی ئه‌و نوسه‌رانه‌ی ئێستا‌و ئه‌وساش، زمانێكی كوردی پاراو هه‌ستده‌كه‌م زۆر زاڵه‌ به‌سه‌ر ئه‌و زمانه‌ كوردیه‌ی كه‌ پێی ده‌نوسێت، ئایا ئێوه‌ نه‌تان توانیوه‌ هه‌وڵ بده‌ن له‌ رووی زمانیشه‌وه‌ قسه‌ له‌سه‌ر چیرۆكه‌كانی بكه‌ن؟ چونكه‌ له‌ راستیدا ئه‌وه‌ی كه‌ ئه‌مرۆ ده‌گوزه‌رێت له‌ كتێبخانه‌ی كوردیدا ئه‌ویش كۆڵه‌واركردن‌و هه‌ژاركردنی زمانی كوردیه‌ به‌ڵام ئه‌م خانمه‌ توانیویه‌تی به‌و زمانه‌ جوانه‌ی خۆی هه‌م زمانی كوردی له‌ ته‌قلید‌و لاسایی كردنه‌وه‌ بپارێزێت‌و هه‌میش توانیویه‌تی ره‌سه‌نایه‌تی زمانمه‌كه‌ی خۆی بپارێزێت.
پ.د.زاهیر له‌تیف:
ئه‌گه‌ر سه‌یری كتێبه‌كه‌ بكه‌یت جار به‌جارێك ئه‌و ئاوڕه‌مان له‌ زمان داوه‌ته‌وه‌ بێگومان گه‌لاوێژخان به‌و پێیه‌ی خۆی له‌ رێبازێكی ریالیزمدا ده‌بینێته‌وه‌ واته‌ پێویسته‌ زمانی ریالیزم ئه‌و زمانه‌ بێت كه‌ تێكرای خه‌ڵك قسه‌ی پێده‌كات چونكه‌ هه‌موو مه‌به‌ست‌و ئامانجی نوسه‌ری ریالیزم گه‌یاندنی نامه‌كه‌یه‌تی بۆ تێكرای خه‌ڵكی چونكه‌ زۆربه‌ی زۆری كێشه‌كان خۆی له‌ كێشه‌ی تێكرای خه‌ڵكیدا ده‌بینێته‌وه‌، بۆیه‌ ناتوانێت به‌ زمانی نالی ‌و مه‌حوی بنوسێت چونكه‌ چینێكی زۆر زۆر كه‌م به‌داخه‌وه‌ ده‌توانن له‌ زمانه‌ تێبگه‌ن بۆیه‌ گه‌لاوێژ وه‌كو هه‌موو بابه‌تێكی گێرانه‌وه‌ گه‌ری وه‌كو هه‌موو نوسه‌رانی له‌و جۆره‌ ده‌چنه‌ نێو بازار‌و زمانی بازاره‌وه‌ كه‌ ئه‌و ده‌سته‌واژانه‌ له‌ ده‌ره‌وه‌ی رێزمانه‌ سینتاكسیه‌كانیشن، بۆ نموونه‌ ئیدیۆمی وای به‌كارهێناوه‌ ته‌نها له‌نێو بازاردا هه‌یه‌ ته‌نانه‌ت له‌ناو خه‌ڵك‌و نێو خێزانه‌كانیشدا نیه‌ به‌ڵام له‌ نێو بازار كاری پێده‌كرێت، ته‌نانه‌ت به‌ واقیعی بێت یان خه‌یاڵ هاتووه‌ته‌ نێو ناوه‌رۆكی بازار‌و ژیان‌و سوودی بینیوه‌ مامه‌ڵه‌كردنی تێكرای خه‌ڵكیه‌ به‌رامبه‌ر زمانه‌كه‌. بۆیه‌ گه‌لاوێژ به‌ هه‌قیقه‌ت ئه‌و رێبازه‌ی كاری له‌سه‌ر ده‌كات ئه‌و جۆره‌ زمانه‌ ده‌خوازێت، كه‌ ده‌بێت زمانی تێكرای خه‌ڵكی بێت.
ته‌نانه‌ت خۆشه‌ویست خانم ده‌ڵێت رۆژانه‌ به‌ناو خه‌ڵكی ده‌گه‌ڕێم بۆ ئه‌وه‌ی بزانم ده‌سته‌واژه‌یه‌كی نوێ‌و نامۆ نیه‌؟ بیخه‌مه‌ نێو وتاره‌كانمه‌وه‌؟ گه‌لاوێژیش ئه‌م رۆڵه‌ی بینیوه‌. ئه‌مه‌ یه‌كێكه‌ له‌و شێوازانه‌ی رێبازی ریالیزم پێویستی پێیه‌تی‌و ئیشه‌ڵا له‌ ئاینده‌یه‌كی نزیكیشدا لێكۆڵینه‌وه‌یه‌ك له‌سه‌ر ئه‌و بۆچوونه‌ی جه‌نابت ده‌نوسین.
د.نیان فوئاد مه‌ستی:
ته‌نانه‌ت له‌ ئه‌ده‌بی عه‌ره‌بی یوسف الحكیم به‌ زمانێكی پاراو ده‌نوسێت جگه‌ له‌وه‌ ئه‌ده‌بی یوسف ئیدریس هه‌یه‌ چیرۆكه‌كانی به‌ له‌هجه‌ی میسری عامی ده‌نوسێت، واته‌ شێوه‌زاری میسری عامی ده‌هێنێته‌ نێو ئه‌ده‌بی عه‌ره‌بیه‌وه‌ كه‌ ئه‌ده‌بی عه‌ره‌بی خۆی ئه‌ده‌بێكی عه‌ره‌بی فه‌سیحه‌.
جگه‌ له‌وه‌ش نه‌جیب مه‌حفوز هه‌یه‌ ده‌ڵێت من له‌ چایخانه‌ دانیشتووم له‌وێ رۆمانه‌كانم نوسیوه‌، بۆ ئه‌وه‌ی بتوانم بچمه‌ نێو زمانمی كۆمه‌ڵگا‌و چینی چه‌وساوه‌وه‌.
له‌به‌رئه‌وه‌ گه‌لاوێژخانیش ده‌رگایه‌ك بۆ ئێمه‌ ده‌كاته‌وه‌ تاكوو زیاتر لێكۆڵینه‌وه‌ بكه‌ین له‌ نێوان زمانی نوسینه‌كانی خاتوو گه‌لاوێژ‌و زمانی كۆمه‌ڵگا.
د.زاهیر له‌تیف:
هه‌روه‌ها له‌ناو ئه‌و زمانه‌دا ناوه‌رۆكی تێدا به‌دی ده‌كرێت كه‌ قسه‌ ده‌كه‌ن ئه‌مه‌ ته‌نها گوێگرتنێكی زمانی نیه‌ گوێگرتنێكی ناوه‌رۆكیه‌ به‌دی ده‌كرێت، واته‌ ئه‌و گفتوگۆیه‌ی له‌نێو خه‌ڵكی بازار ده‌كرێت هه‌م سوود له‌ زمانه‌كه‌ ده‌بینێت هه‌م سوود له‌ ناوه‌رۆكی ئه‌و زمانه‌ ده‌بینێت، هه‌ر ئه‌مه‌ش وای كردووه‌ زۆربه‌ی كێشه‌كان كێشه‌ی تێكرای خه‌ڵكیه‌ به‌ نموونه‌ (كاره‌كه‌ر_بووكی ئاته‌خان_ئه‌و پێشمه‌رگانه‌ی له‌ ئه‌شكه‌وتی دلێران)، چونكه‌ پێشمه‌رگه‌ی تێدا بووه‌ رۆشنبیر‌و رووناكبیر بوون پێشمه‌رگه‌ی تێدا بووه‌ ته‌نها زانیوه‌یه‌تی چه‌ك ماناكه‌ی چییه‌ له‌ ده‌ره‌وه‌ی چه‌ك هیچی نه‌زانیوه‌، هه‌موو ئه‌مانه‌ ماناكه‌ی له‌ رێگه‌ی زمانه‌كانه‌وه‌ چووته‌ ناو ناوه‌رۆكه‌كانه‌وه‌، ئه‌مه‌ش لای من یه‌كێكه‌ له‌ زیره‌كیه‌كانی خاتوو گه‌لاوێژ.
ده‌وه‌ن مه‌عروف:
نه‌ك وه‌ك زمانه‌ سروشتیه‌كه‌ی وه‌ك نوسه‌رێك كاری پێده‌كان زمانه‌ به‌رگریه‌كه‌شی ته‌واو زاڵه‌ به‌سه‌ریدا چونكه‌ ئه‌گه‌ر رۆمانی به‌ره‌و ئه‌شكه‌وتی دلێران بخوێنینه‌وه‌ ده‌بینین زمانێكی به‌رگری زۆر سه‌یری به‌كار هێناوه‌ ده‌توانم بڵێم ره‌نگه‌ ئه‌وه‌ لای ده‌وڵه‌ت ئابادی نمونه‌ی هه‌بێت.
زاهیر له‌تیف:
راسته‌ خۆی ئه‌وه‌ یه‌كێكه‌ له‌ خه‌سڵه‌ته‌كانی گه‌لاوێژ كه‌ زمانی زبر‌و نه‌رم له‌ كوێدا به‌كار ده‌هێنێت زمانی زبری هه‌یه‌ به‌ڵام له‌و كاته‌نه‌دا به‌كاری ده‌هێنێت كه‌ پێویستی پێیه‌تی
مسته‌فا ساڵح كه‌ریم:
بۆ ته‌ئیككردنه‌وه‌ له‌سه‌ر ئه‌و تێبینیه‌ی پ.د.زاهیر ئه‌مه‌نده‌ پابه‌ند بوو به‌ بابه‌تی زمان‌و شاره‌زابوون له‌و ده‌سته‌واژانه‌ی به‌كاردێت، ته‌نها گرنگی به‌ سامانی نه‌ته‌وه‌یی زۆر داوه‌ كه‌ درێژه‌ده‌ری ئه‌و وتارانه‌ی خۆیه‌تی بۆ نموونه‌ كه‌ گه‌راجی ئه‌سحابه‌ سپی تێكدرا‌و كرا به‌ باڵه‌خانه‌ وتارێكی نووسی هه‌ر به‌ ناونیشانی ده‌ك ده‌ستانشكێت چاوتان كوێربێت چونكه‌ وابه‌سته‌ بوو به‌و ده‌سته‌واژانه‌وه‌و كه‌ توراسێكه‌ له‌ نزیك ماڵی خۆیانه‌وه‌ بوو ده‌بوایه‌ وه‌كو سامانێك بمێنێته‌وه‌.
زاهیر له‌تیف:
ئه‌مه‌ به‌لای منه‌وه‌ زۆر گرنگه‌ ره‌نگه‌ له‌ئاینده‌دا ببێته‌ لێكۆڵینه‌وه‌یه‌كی سه‌ربه‌خۆ چونكه‌ چیرۆكنووسی باش مامۆستا مسته‌فا ساڵح كه‌ریم لێره‌یه‌‌و، یه‌كێك له‌و خه‌سڵه‌ته‌ گرنگانه‌ی لای من بووه‌ به‌ بابه‌تێكی بابه‌ت گرایی له‌لای گه‌لاوێژ ئه‌وه‌یه‌ رۆڵی كاره‌كته‌ره‌كان یه‌ك ئاراسته‌ییه‌‌و یه‌ك وه‌زنی داوه‌تێ، هیچ كاره‌كته‌رێك له‌وی تر وه‌زنی نه‌گه‌وره‌تر نه‌ بچوكتره‌، ئه‌مه‌ش به‌راستی زۆر به‌ده‌گمه‌نی لای رۆماننوسه‌كان‌و چیرۆك نوسه‌كان به‌دی ده‌كرێت، به‌ڵام به‌بڕوای خۆم ره‌نگه‌ گه‌لاوێژ كاریگه‌ریگه‌ری مه‌كسیم گۆركی له‌سه‌ر بوو بێت، كاره‌كته‌ره‌كانی وا لێنه‌كردووه‌ دابه‌شببێت كاره‌كته‌ری سه‌ره‌كی‌و لاوه‌كی‌و ته‌وه‌ری‌و میحوه‌ری‌و سانه‌وی، هه‌موو كاره‌كته‌ره‌كان رۆڵی خۆسیان هه‌یه‌، هه‌مووش كاریگه‌ریخۆیان هه‌یه‌‌و ناتوانین كاره‌كته‌رێك له‌ چیرۆكه‌كان حه‌زف بكه‌ین یان له‌ گرنگی كه‌م بكه‌ینه‌وه‌، هه‌موو كاره‌كته‌ره‌كان رۆڵێكی وای داونه‌تێ كه‌ هیچیان له‌وی تر نه‌ بچوكتر نه‌ گه‌وره‌تر نه‌بن بۆ نموونه‌ له‌ رۆمانی كاره‌كه‌ر ئاستی كاره‌كه‌ زۆر لاوازه‌ به‌ڵام رۆڵێكی ناوازه‌ی داوه‌تێ، ته‌نانه‌ت له‌ پیاوه‌ ئه‌رستۆقراتیه‌كانی كه‌ ته‌عه‌دا له‌ نامووسی كاره‌كه‌ره‌كه‌ ده‌كه‌ن گرنگتره‌، ته‌نانه‌ت ئه‌وانیش رۆڵی جوانی داونه‌تێ، رۆڵێكی وا ناوازه‌ی داونه‌تێ هه‌ست ده‌كه‌یت له‌ ناخی كه‌سه‌ ئه‌رستۆقراتیه‌كاندایت كه‌ به‌دوای شته‌ ناشرینه‌كان ده‌كه‌ون‌و كه‌سه‌كانیان كردووه‌ به‌ خۆراكی رۆژانه‌ی خۆیان‌و له‌سه‌ری ده‌ژین.
مسته‌فا ساڵح كه‌ریم:
یه‌ك تێبینیم هه‌یه‌ له‌سه‌ر قسه‌كانی ئێستای د.زاهیر وا تێنه‌گه‌ن كه‌ هه‌موو كاره‌ئه‌كته‌ره‌كان یه‌ك رۆڵیان هه‌یه‌ مه‌ته‌ساوین مه‌به‌ستی ئه‌وه‌یه‌ ئیهمالی نه‌كردوون.
ئالان محه‌مه‌د: ده‌ستان خۆش به‌رێزان ده‌توانن ته‌واوی به‌رهه‌مه‌كانی خاتوو گه‌لاوێژ له‌ سایتی گه‌لاویژ دۆت كۆم بخوێننه‌وه‌.

ژیاننامه‌ی گه‌لاوێژخان:
گه‌لاوێژ ساڵح فه‌تاح كه‌ هه‌ڵگری نازناوی گه‌لاوێژه‌، له‌دایكبووی موسڵ، 6ی ئه‌یلولی ساڵی 1930 له‌خێزانێكی كوردپه‌روه‌ر‌و تێكۆشه‌ر‌و نیشتمانپه‌روه‌ر هاتۆته‌ دنیاوه‌، عه‌شیره‌تی باوكی، قوچه‌به‌گی، یه‌كێك بووه‌ له‌عه‌شیره‌ته‌ به‌ناوبانگه‌كانی باكوری كوردستان له‌ ره‌سه‌نایه‌تی‌و دێرینیدا.
باپیری (باوكی دایكی) كه‌ ئه‌فسه‌رێكی ده‌وڵه‌تی عوسمانی بوو، له‌ جه‌نگی یه‌كه‌می جیهانیدا شه‌هید ده‌بێت.
خاڵه‌موحه‌مه‌دی، هاوڕێیه‌كی نزیكی عه‌بدولكه‌ریم قاسم بوو، یه‌كێك بووه‌ له‌ شۆرشگێرانی شۆرشی چوارده‌ی ته‌مووز.
هه‌مزه‌ عه‌بدوڵای خاڵی ماف په‌روه‌ر‌و سیاسه‌تمه‌دار‌و دامه‌زرێنه‌ری پارتی دیموكراتی كوردستان‌و یه‌كه‌م سكرتێری ئه‌وپارته‌ بوو.
له‌ساڵی 1947 هاوسه‌رگیری له‌گه‌ڵ بیرمه‌ند‌و نوسه‌ر‌و سیاسه‌تمه‌دار ئیبراهیم ئه‌حمه‌د ده‌كات.
دواتر، مام جه‌لال به‌هۆی هاوسه‌رگیری كچه‌ گه‌وره‌كه‌یه‌وه‌ هێرۆخان زیاتر تێكه‌ڵ به‌ خێزان ده‌بێت به‌و پێیه‌ی پێشتر، به‌هۆی كاری سیاسییه‌وه‌، هاوڕێیه‌تی له‌گه‌ڵ هه‌مزه‌ عه‌بدوڵا‌و ئیبراهیم ئه‌حمه‌ددا زۆر پته‌و بووه‌.
هه‌ر له‌ منداڵییه‌وه‌، خولیای خوێندنه‌وه‌و نوسین بووه‌.
له‌سه‌ره‌تاوه‌، وه‌كخۆی ده‌ڵێت، كاریگه‌ری تۆفیق ئه‌لحه‌كیم‌و مه‌كسیم گۆركی له‌سه‌ر بووه‌.
ئیبراهیم ئه‌حمه‌دی هاوسه‌ری، ته‌واو پیشتگیری له‌ خوێندنه‌وه‌و نووسینه‌كانی كردووه‌، له‌ هه‌مان كاتیشدا به‌رهه‌مه‌كانی مامۆستا بۆته‌ سه‌رچاوه‌و سه‌رچاوه‌ لێگرتنێك بۆ نوسیه‌كانی به‌گشتی‌و چیرۆك‌و رۆمانه‌كانی به‌تایبه‌تی.
به‌رهه‌مه‌ گێرانه‌وه‌ گه‌ریه‌كانی ئه‌وه‌ ده‌سه‌لمێنن كه‌ ئاستی ته‌كنیكی له‌ ئاستێكی به‌رزی داهێناندایه‌.
ئه‌مه‌ش له‌ رێگه‌ی كاریگه‌ریه‌ لاوه‌كی‌و ده‌ره‌كییه‌كانه‌وه‌ سه‌رچاوه‌ی گرتووه‌.
گه‌ر به‌ چاوی ره‌خنه‌وه‌ پشكنین بۆ ده‌قه‌كانی بكرێت ئه‌وا هه‌ر زوو ده‌گه‌ین به‌و راستیه‌ی كه‌ گه‌لاوێژ خاوه‌ن ده‌سه‌ڵاتێكی بیركردنه‌وه‌و شێوازی ده‌ربڕین‌و زمانی خۆیه‌تی كه‌ جوودایان ده‌كاته‌وه‌له‌ به‌رهه‌می نووسه‌رانی تر.
ته‌واو یاسا‌و پێوه‌ره‌كانی چه‌مكی گه‌رانه‌وه‌ گه‌ری به‌كارهێناوه‌.
گه‌لاوێژ خاوه‌نی نزیكه‌ی 27 بیست‌و حه‌وت به‌رهه‌مه‌ كه‌ زۆربه‌یان، خۆیان له‌ چیرۆك‌و رۆماندا ده‌بیننه‌وه‌ به‌نموونه‌ی، به‌ره‌و ئه‌شكه‌وتی دلێران (سێ به‌ش، دایك‌و كوڕ، بوكی ئاته‌ خان، پایز‌و خونچه‌، دنیا بێشه‌یه‌، رێبوارێكی سه‌رگه‌ردان، كاره‌كه‌ر، له‌سه‌ر باڵی سیمورخ، ئه‌فسانه‌ی گه‌لی ناوگردان،…هتد.

print

 47 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*