سەرەکی » وتار » بارزان شێخ عوسمان‌ » تەقینەوەكانی سریلانكا، تیرۆری ئیسلامی…

تەقینەوەكانی سریلانكا، تیرۆری ئیسلامی…

تەقینەوەكانی سریلانكا، تیرۆری ئیسلامی هەر لە ژینگەی هەژاری و گەندەڵیدا لەدایك نابێ

رۆژی یەكشەممەی رابردوو ١٤ی ئەپریل/نیسانی رابردوو لە كاتی مەراسیمەكانی جەژنی ئیستەر (رابون)دا، زنجیرەیەك پەلاماری خۆكوژیی، كۆڵۆمبۆ و چەند شارێكی تری سریلانكای هەژاند كە ژمارەیەك كڵێسا و هۆتێلی بەناوبانگ كرابونە ناو بازنە ستێری ئەو پەلامارە تیرۆریستیانە، لە ئەنجامدا نزیكەی چوار سەد كەسی مەدەنی بونە قوربانی و پێنج سەد كەسیش بریندار بون. هەرچەندە دوای پەلاماردانەكان هەموو جیهان بەتوندیی ئەو تاوانەیان ئیدانە كرد، بەڵام هیچ كامیان ئاماژەیان بۆ بەرپرسیارانی پەلامارەكان نەكرد، بەڵام بێ خۆهەڵكێشان لەجریوەی تیوتەرەكەی خۆمدا ئیسلامیە تیرۆریستەكانم بەرپرسیاری ئەو تاوانە كرد، لەروانگەی شارەزایی و ئاشنا بونی قوڵمان بەرەفتار و تەوقیتەكانی ئەو دڕندانە كە چ كات و وادەیەك دیاری ئەكەن بۆ ئەوەی زۆرترین خەڵكی بێ دیفاع بكەنە قوربانیی رقوكینەكانیان لەلایەك و لەلایەكی تریشەوە دەمێك بو ئەو وڵاتە پڕ كێشمە كێشمەیە روداوی تەقینەوە و كۆمەڵكوژیی بە خۆوە نەبینیبوو، ئەوەش لەوێ بوەستێت كە تیرۆریستانی ئەو تاقمانە جێدەستیان لەو جۆرە تاوانانەدا ئاشكراو دیارە.
وەك گەورە لێپرسراوانی سریلانكا ئاماژەیان بۆ كرد خۆكوژەكانی ئەو زنجیرە تاوانە زۆربەیان خاوەنی بڕوانامەی بەرز بون لە وڵاتانی ئەوروپایی، كوڕە دەوڵەمەند و لە خێزانی مامناوەند بون، لەوانە (ئینساف و ئیلهام)ی كوڕی محەمەد یوسف بون كە نازناوی (شای ئاڵەت)ی وەرگرتبوو كە ببوە خاوەنی سامانێكی زۆر لە ئەنجامی ئەو بازرگانیەدا، بەڵام ئێستا دەستگیركراوە لەسەر ئەوەی دوو كوڕەكەی لەو پەلاماردانەدا خۆیان تەقاندۆتەوە، لێكۆڵەرەوانی ئەمریكاییش بەهۆی گرنگیی مەسەلەكەوە بەشدارن لە پرۆسەی لێكۆڵینەوەكاندا، سەیرەكە لەوەدایە لەو كاتەی محەمەد یوسف، نكوڵی لەوە ئەكات ئاگاداری جموجۆڵی كوڕەكانی بێت، كاتێك هێزە ئەمنییەكان چونەتە كۆشك‌و تەلارە گرانبەهاو فەخمەكەیان لە دەوروبەری كۆلۆمبۆی پایتەخت، ژنی یەكێك لە كوڕەكانی محەمەد یوسف خۆی تەقاندۆتەوە، لە ئەنجامدا دوو مناڵی خۆی و ژمارەیەكی زۆری ئاسایش كوژراون، ئەمەش ئاماژەیە بۆ ئەوەی ئەو خێزانە هەمویان تیرۆریست بن و ئەو پارەیەی محەمەد یوسف ئیبراهیمیش پارەی تاقمە تیرۆریستیەكان بێت و لە چوارچێوەی پارە شتنەوەی تیرۆریستاندا بەكارهێنرابێت (وەك چۆن لە وڵاتانی جیهاندا بڵاوە، لە عیراق و ناوچەکەشدا لە هەندێك سەنتەری بازرگانی و سوپەرماركێت و كۆمپانیای حەج و عەمرە و تاكسییە گەڕۆكەكان و شوێنەكانی بیناسازیی ئەبینرێت و دەزگا ئەمنییەكانی حكومەت و ئاسایشی ئابوری لێی بێئاگان).
هاوكات یەكێك لە خۆكوژەكانی تر كە لە كڵێسایەك خۆی تەقاندۆتەوە ناوی عەبدوللەتیف جەمیل محەمەدە ئەندازەی فڕۆكەوانی لە ئینگلتەرا تەواو كردوە و دوایی چوە بۆ ئوسترالیا بۆ تەواوكردنی خوێندنی باڵا. تەنیا زەهران هاشم نەبێت كە بڕوانامەكەی باڵا نییە، بەڵام ئەویش باوكی روحیی ئەو باندەبوە كە لە مزگەوتێكی شاری (كاتانكودی) وتاربێژ بوە، پێشینەیەكی تیرۆریستییانەی ئیسلامیی هەبوە و پەیكەری بوزییەكانی شكاندوە و هانی خەڵكی داوە بۆ بەگژاچونەوە و دژایەتیكردنی غەیرە ئیسلامەكان لە قاڕەی هیندی و هەمو جیهاندا.
هەرچەندە ئەو زنجیرە تەقینەوانەی سریلانكا لە ئەنجامی بێباكی و بۆشاییەكی ئەمنییدا دروست بوە و سەرچاوەكانی هیند و شانشینی مەراكیشی عەرەبیی ئەڵێن ناوەندە موخابەراتی و هەواڵگرییەكانی سریلانكا ئاگادار كراون لەوەی پیلانێكی تیرۆریستی لە ئارادایە، بەڵام ئەو دەرس و پەندەی كە لەو روداوانە وەرگیراون پوچەڵبونەوەی ئەو بیردۆز و روانینەیە كە ئەمانوت تیرۆریستانی تاقم و باندە ئیسلامییەكان و حزبە ئیسلامییەكانی وەك ئیخوان موسلمین لەناو كۆمەڵ و ژینگەی هەژاریی و نەخوێنەواریی و دواكەوتویی و گەندەڵی و رژێمە ناعەدالەتەكاندا گەشە ئەكەن و دروست ئەبن. ئەو راستییە خۆی سەلماند كە خودی ئەم ئایدۆلۆژیایە لەهەر جێگە و شوێنێكدا بێت هەوادار و لایەنگرەكانی بە گیانی كوشتن و خوێنڕشتن پەروەردە ئەكات بەتایبەتی لەو ژینگە و كۆمەڵانەدا كە شەڕ و كوشتار و خوێنڕشتن زۆر نامۆ نییە، لەوانە ژینگەیەكی وەك سریلانكا كە هێندە زۆر نییە لە شەڕی خوێناوی بەورەكانی تامییل پشوی داوە، شەڕێك كە خۆتەقانەوە بە هێزە سەربازییەكانی حكومەتدا شانازیی پاڵەوانێتی بوو، ئیرهابی ئیسلامییش سودی لەو ئەزمونە وەرگرتوە بۆ سەرگرتنی مەرام و پیلانەكانی لەو گۆشەی جیهاندا. بۆیە هەقە پیاچونەوە و هەڵسەنگاندن بكرێت بۆ ئەو روانینەی پێشوو و هەموان درك بەو راستییە بكەن كە ئەم فكری تیرۆرە لە ناخی ئایدۆلۆژیایەكدایە پێویستە كۆمەڵی مرۆڤایەتیی؛ بێ سازش بەگژیابچێتەوە و چیتر موجامەلەی ئەو هێزانە نەكرێ كە لەسەر بنەمای ئاین و مەزەب دامەزراون، كە عێراق و كوردستانیش ئەگرێتەوە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

بۆ كۆنگره‌، پێویستمان به‌ حه‌كیمێکه‌

به‌ستنی چواره‌مین كۆنگره‌ی گشتیی ی.ن.ك بووه‌ته‌ دیفاكتۆ (ئه‌مری واقیع)، تازه‌ ...