سەرەکی » هەواڵ » یادكردنەوەی 43 ساڵەی دامەزراندنی كۆمەڵەی خوێندكارانی كوردستان

یادكردنەوەی 43 ساڵەی دامەزراندنی كۆمەڵەی خوێندكارانی كوردستان

رۆژی 28/4، لەچەند رێوڕەسمێكدا لەهەولێرو سلێمانی‌و كۆیە، یادی 43 ساڵەی دامەزراندنی كۆمەڵەی خوێندكارانی كوردستان كرایەوە.
لەڕێوڕەسمەكەدا لەسلێمانی، بەئامادەبوونی حاكم قادر حەمەجان كارگێڕی مەكتەبی سیاسی و قادر عەزیزو ئاسۆ مامەند ئەندامانی مەكتەبی سیاسی‌و ژمارەیەک لەئەندامانی سەرکردایەتی و لێپرسراوو هەڤاڵانی یەكێتی‌و سكرتێرو ئەندامانی سكرتاریەتی كۆمەڵەی خوێندكاران، سەرتیپ عەلی سكرتێری كۆمەڵەی خوێندكاران، ئاماژەی بەمێژووی زیاتر لە چوار دەیەی پڕ لەخەبات‌و چالاكییەكانی كۆمەڵەی خوێندكاران كردو وتی: كۆمەڵەكەمان، كە خاوەنی سێ سكرتێری شەهیدە، هەر لەسەرەتای دامەزراندنییەوە، رۆڵێكی گەورەو كاریگەری گێڕاوە لە هۆشیاركردنەوەی خوێندكاران بۆ بەدەستهێنانی مافەكانیان‌و داكۆكیكردن لەو ئامانجانەی خوێندكاران لەپێناویدا كۆششی بۆ دەكەن، هەروەك بەڵێنی ئەوەشیدا بۆ ئێستاو داهاتوو هەرچی لەتوانای كۆمەڵەی خوێندكاراندا بێت درێغی ناكات لەخزمەتكردنی خوێندكاران‌و بەدیهێنانی ئامانجەكانیان.
هەر لەڕێوڕەسمەكەدا، بەرزان ئەحمەد كوردە ئەندامی سەركردایەتیی یەكێتی، وتارێکی پێشكەشكردو رایگەیاند: كۆمەڵەی خوێندكارانی كوردستان هەمیشە خوێندنگەیەكی مەزن بووە بۆ پەروەردەكردن‌و پێگەیاندنی كادرو سەركردەی سیاسی‌و پیشەیی. وتیشی: كۆمەڵەی خوێندكاران داینەمۆی شۆڕشە‌و 43 ساڵی خەباتی خوێندكارییش، ئەو راستییە دووپاتدەكاتەوەو گەواهیدەرە.
لەوتەیەكیشدا، حاكم قادر حەمەجان، بەڵێنی دووپاتكردەوە كە وەك هەمیشە پشتیوانی تەواوی كۆمەڵەی خوێندكارانی كوردستان دەبن بۆ خزمەتی خوێندكاران‌و كۆمەڵگەكەمان‌و وتیشی: پێویستە لەسەر هەمووان بەهەموو شێوەیەك پشتگیریی لەكۆمەڵەی خوێندكاران‌و هەوڵەكانیان بكەین، چونكە كۆمەڵەی خوێندكاران رێكخراوی دوێنێ‌و ئەمڕۆو سبەینێیەو دەبێت كارەكانیان بەرزهەڵبسەنگێنرێت.
لەلایەكی دیكەوەو لەڕێوڕەسمێكدا لەهەولێر بەدروشمی (نوێگەری‌و ئازادی‌و زانست)، بەئامادەبوونی سەعدی ئەحمەد پیرە ئەندامی مەكتەبی سیاسی‌و ژمارەیەك لەلێپرسراوانی حزبی‌و حكومی، یادی دامەزراندنی كۆمەڵەی خوێندكاران كرایەوەو ئاماژە بەڕۆڵ‌و خەباتی رێكخراوەكە لەخەباتی رێكخراوەیدا، كرا.
لەوتەیەكدا، سەرپەرشتیاری كۆمەڵەی خوێندكاران لقی هەولێر، رایگەیاند: لەم ساڵیادەدا بەڵێن دەدەین چۆن لەخەباتی قۆناغە جیاجیاكاندا بەردەوام بووین لە خزمەتكردن بە زانست‌و چین‌وتوێژە جیاجیاكانی نەتەوەكەمان‌و لەپێش هەمووشیانەوە بەدیهێنانی مافەكانی خوێندكاران، ئێستا‌و بۆ داهاتووش بەهەمان رۆحیەتەوە بەردەوام دەبین‌و تائەوپەڕی توانامان لەخزمەتكردن بەخوێندكاران‌و مافەكانیان تێدەكۆشین.
لەڕێوڕەسمەكەدا، سەعدی پیرە، لەوتەیەكدا بەناوی مەكتەبی سیاسیی یەكێتی-یەوە، وێڕای پیرۆزبایی، رایگەیاند: كۆمەڵەكەتان هەر لەسەرەتای دامەزراندن‌و خەباتییەوە، بەبیری قەڵەم‌و بەچالاكیی زانستی‌و ئەكادیمی، داكۆكیكاری خوێندكاران‌و مافەكانیان بووە، ئەوەش جێگەی رێزو ستایش‌و پێزانینە، هەروەك داواشیلێكردن بەهەمان رۆحیەتی رابردوو بەردەوام بن لە خەباتی پاك‌و پیرۆزیان، ئەو خەباتەی كە سەرۆك مام جەلال پاڵپشت‌و پشتیوانی راستەقینەو بەردەوامی كۆمەڵەی خوێندكارانی كوردستان بوو.
هەردوێنێ، بەئامادەبوونی بورهان سەعید سۆفی لێپرسراوی مەڵبەندی كۆیە، لەناوەندی رێكخراوە دیموكراتییەكانی كۆیە یادی 43 ساڵەی دامەزراندنی كۆمەڵەی خوێندكارانی كوردستان كرایەوەو قەڵغانی رێزلێنان بەخشرایە ژمارەیەك كادری دێرینی كۆمەڵەی خوێندكاران.
لەڕێوڕەسمەكەدا لێپرسراوی مەڵبەندی كۆیە، وتی: وەك چۆن سەرۆك مام جەلال پشتیوانێكی بەهێزبوو بۆ كۆمەڵەی خوێندكاران، دەبێت ئێمەش پشتیوانیان بین، تا كۆمەڵەی خوێندكاران بەقەڵەمەكانیان بەردەوام بن لەهۆشیاركرنەوەی تاكی كۆمەڵگەكەمان‌و خزمەتكردنی خوێندكاران.

print

 29 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*