سەرەکی » وتار » بارزان شێخ عوسمان‌ » شازاد سائیب،شای خاكیبوون و روانینی راست و دروست

شازاد سائیب،شای خاكیبوون و روانینی راست و دروست

ئەمڕۆ یادی ماڵئاوایی ناوەخت و جەرگبڕی كاكە شازاد سائیبە، كە وەك ناوێكی درەوشاوەی بواری قانونیی و رۆژنامەگەریی و خەباتی سیاسیی لە كوردستان و عیراقدا بۆ هەتایە لە بیرەوەرییەكاندا بەزیندوویی دەمێنێتەوە.
سەرباری ئەوەی ئەم زاتە لەناو ژینگەیەكی رووناكبیر و كراوە و خوێندەواردا گەشەی كردووە، بۆ خۆیشی خاوەن بەهرە و سەلیقەیەكی ورد بوو لە هەموو ئەو بوارانەی كە پێیان بە ناوبانگ بوو.
شازاد سائیب كە سەرۆك مام جەلال-ی مەزن بە كاكە شا بانگی دەكرد، لە پیشەی پارێزەرییدا داكۆكی لە مافی جووتیاران و هەژاران دەكرد، لەكاتی خوێندكاریشدا شانبەشانی فێربوونی زانست، لەگەڵ توێژە تێكۆشەر و نیشتمانپەروەر و ئازادیخوازەكاندا خۆی بە چەكی رێبازی نوێی خەبات پەروەردە كردووە، لە رۆژنامەنووسیدا قەڵەمەكەی بۆ خزمەتی مەسەلەی رەوای گەلێك تەرخان كردبوو كە خەباتی لەپێناوی كۆتاییهێنان بە ستەمی نەتەوەیی و چینایەتی و سڕینەوەی شوێنەوارەكانی دواكەوتووییەوە بەرەو كۆمەڵێكی مۆدێرن و رووناكبیری كراوە بەڕووی جیهانی شارستانیدا، خەباتە سیاسییەكەشی لەسەر رێبازێكی دیموكراسیی پێشكەوتنخواز بوو لەپێناوی هێنانە كایەی كۆمەڵێكی ئازاد لەسایەی سیستمێكی فیدراڵی دیموكراسیی دادپەروەر و خزمەتگوزاردا كە وڵات بگەیەنێتە كەنارێكی ئارام و ئۆقرەگرتوو و دامەزراوەیی.
كاك شازاد سائیبـی نەمر كە رێك رۆژی سێشەممە ٢١ی مایسی ساڵی ٢٠٠١ لە كاتی بەرێكەوتنی بەرەو شاری رانیە بۆ تەواوكردنی كۆبوونەوەكانی ئەنجومەنی وەزیران لەوشارە، لە رێگەی سلێمانی- دوكان بەڕووداوی ئۆتۆمبیل دڵە مەزنەكەی دوایەمین ترپەی لێداو، نەپەرژا ئاوات و ئامانجە زۆر و زەوەندەكانی و بەرنامە و پلانەكانی بۆ خزمەتكردنی جووتیاران و گەل و نیشتمان و تاوسەندنی وڵات لە هەموو روویەكەوە جێبەجێ بكات و بە هەڤاڵ و هاوڕێباز و هاوڕوانینەكانی خۆی سپارد.
كاك شازادی هەمیشە زیندوو لەگەڵ پابەندبوونی بە دیسپلینی رێكخراوەیی لەناو ی.ن.ك-دا خاوەنی روانین و هەڵوێستی نەگۆڕی خۆشی بوو، لە ئاست هەر پێشهات و گۆڕانكارییەكدا دەستەواژەی (بۆ)ی دووبارە دەكردەوە، لە ململانێكانی ناوخۆی حزبیشدا بە هەمان شێوە بووەو پارێزەری هێڵە گشتییەكانی حزب بووە، هاوكاتیش لەگەڵ هەموو هەڤاڵاندا پەیوەندییەكانی پتەوبووە، تێكەڵ بە ململانێ سیاسییەكانی نەبووەو هێڵی راست و رەوانی سیاسیی خۆی پاراستووەو ئەركەكانی بەوپەڕی دڵسۆزیی و ئەمانەتەوە راپەڕاندووە، هەربۆیە هەمیشە لە ئەركە سەختە دیپلۆماسیی و سیاسییەكاندا كاكە شا دیاریكراوی یەكەم بووە بۆ راپەڕاندنی ئەو ئەركە.
ئەم سەركردە رۆح سوك و پەسەند دیدەیەی هەموو چین توێژەكان كەسایەتییەكی بەجۆرێك بەهێز بوو كە بەردەوام پۆست و ئەركەكان خۆیان ئەهاتنە بەردەرگاكەی، ئەویش لەگەڵ ئەوەی بەدوایاندا نەگەڕاوەو هەوڵی بۆ نەداون، بەڵام لەكاتی جێبەجێكردنیاندا زۆر بە تەفانی و دڵسۆزییەوە جێبەجێی كردون. ئێستاش بیرەوەرییەكانی سەردەمی منداڵیم و سەردەمەكانی دواتر بەتایبەتی دوای ساڵانی نەوەدەكانی سەدەی رابردوو، سیمای ئەم سەركردە لەخۆبردووەم دەهێننەوە بەرچاو كە چەندە مرۆڤێكی مەزنی خاكیی و مرۆڤ دۆست بووە، هەر لە دەركەوتنی سیما دەم بەخەندەكەی لای قەسرەكەی تۆفیق قەزاز و جادەی بەردەركی سەرا تا هاتوچۆكانی لەنێوان ئەنكەرەو قەڵاچوالان و قسە بەنرخەكانی لە دووەمین كۆنگرەی ی.ن.ك و كە دواتریش عەرزی مامی گەورەمانی كرد، كە خۆی كاندید ناكات بۆ سەركردایەتیی، سەرباری داوای زۆر ئەو هەر قایل نەبوو، وەنەبێت بۆ خۆ دوورخستنەوە بووبێت لە بەرپرسیارێتی، بەڵكو بۆ رێگە خۆشكردن بوو لەبەردەم خوێنی نوێتر.
ئێستاش وێنەكەی رۆژی 3ی مایسی 2001م لەبەرچاوە كە چۆن خۆی و وەزیری مافەكانی مرۆڤ كاك سەڵاح رەشید و كاك د. بەرهەم ئەحمەد ساڵح سەرۆك وەزیرانی ئەوكاتەی هەرێمی كوردستان لەكاتی بەشدارییان لە یادی 13 ساڵەی بۆردومانی گۆپتەپە بە چەكی كیمیایی، سیمای كاك شازاد دیارە كە چەندە تێكەڵ بە هەست و نەستی خەڵكەكە بووە و چەندە پەرۆشە بۆ پێشكەشكردنی گەورەترین خزمەت بەو جەماوەرە زیان لێكەوتووە قوربانیدەرە، كە زۆر لێی رادەمێنی و ورد دەبیتەوە، ئەگەر نەیناسیت وا دەزانیت یەكێكە لە دانیشتوانی گوندەكە، ئەوەش خاكیبوون و خۆ بەگەورە نەزانین لەجەماوەر نیشان دەدات كە یەكێك بوو لە خەسڵەتەكانی ئەم زاتە.
ئەو كاتەشی كە نوێنەر خۆی وتەنی «تەمسیلچی» ی.ن.ك بوو لە توركیا، بەندەش لە دەنگی گەلی كوردستان خزمەتم دەكرد و ئێزگەكە لەوێش وەردەگیرا، پێی وتم با گلەییەكی دۆستانە لە تۆش و راگەیاندنەكانی تر بكەم، من ئەو چالاكییانەی دەیكەم ئەركی خۆمە وەك زانیاریی و ئاگاداریی دەیاننێرم بۆ مام جەلال و برادەران، كەچی ئێوە بەشان و باڵیدا هەڵدەدەن، پێویست ناكات، هەرچەند بیانووم هێنایەوە، بەڵام هەر قایل نەبوو، سووربوو لەسەر (بۆ)كەی خۆی.
زۆر وێستگە و قۆناغی گرنگی ئەم سەركردە بەهەموو ماناكان (گران قەدرە)هەیە كە باس بكرێن، بەڵام هەڵسەنگاندنەكانی سەرۆك مام جەلال-ی مەزن و سەركردەی مەزن كاك نەوشیروان و هەڤاڵە نزیكەكانی تری گەورەیی و گرنگیی پێگەكەی دەردەخەن كە ی.ن.ك چ سەركردەیەكی لە دەستچووە! بەداخەوە، لەكاتێكی ناسكدا كاكە شا یەكێتی و گەلەكەی بەجێهێشت كە زۆر پێویست بوو، چونكە لەهەر پۆست و پێگە و ئەركێكدا بووایە، دەیزانی چۆن مامەڵە بكات.
درود بۆ گیانت كاك شازاد سائیبـی گەشمردەی رێگای خزمەت و دیموكراسیی و ئازادیی.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

بۆ كۆنگره‌، پێویستمان به‌ حه‌كیمێکه‌

به‌ستنی چواره‌مین كۆنگره‌ی گشتیی ی.ن.ك بووه‌ته‌ دیفاكتۆ (ئه‌مری واقیع)، تازه‌ ...