سەرەکی » وتار » عەتا کەریم‌ » هەرێم و دوو بەرەی ناكۆك

ناوه‌ڕاستی هه‌فته‌

هەرێم و دوو بەرەی ناكۆك

گرژیی و هەڕەشەكانی نێوان تاران و واشنتۆن چل ساڵی تەواوە لە بازنەی سیاسیی و دیپلۆماسی و ئابووری و هەواڵگرییدایە، ملی نەكێشاوە بۆ بەریەككەوتنی سەربازیی ئەم دوو زلهێزەی جیهان، بەڵام مانۆڕ و هەڕەشەیان لە دیالۆگی سیاسیی و رێگەی دیپلۆماسیی زیاترە.
لەدوای شۆڕشی ئیسلامی ئێرانەوە لە 1979، سەرەتاكانی ناكۆكیی نێوان كۆماری ئیسلامی ئێران و ویلایەتە یەكگرتووەكانی ئەمریكا سەریهەڵداوە و بە دەستاودەستی سەرۆكەكانیان تا ئێستا هاتووە، كە زیاتر لە فۆرمی شەڕی ئابووری و نەوتیی و گەمارۆدان و كەنارگیركردنی تاران دا بووە، بەڵام چوار دەیەیە تاران بە پێوەیەوە و ئاڵنگاریی دەكات، بەئاڵنگاریی ئەتۆمیشەوە!، كە كێرڤی مەترسییەكانی لەلای ئەمریكا و هاوپەیمان و هێڵی بەرژەوەندییەكانییان لە خۆرهەڵاتی ناوەڕاست، بەرزكردۆتەوە.
واشنتۆن تۆڕێكی بەرژوەندیی فراوان و هەستیاری نەوتی و بازاڕیی سەربازی لە خۆرهەڵاتی ناوەڕاستدا هەیە، كە نزیكن لە ئێرانەوە، بۆیە هەر مەترسی و هەڕەشەیەك لەوان، راستەوخۆ دەگوازرێتەوە بۆ كۆشكی سپی و كاردانەوە و پەیامەكانیش بە نها دەردەكەون.
ئەم ئاریشە چل ساڵییەی تاران و واشنتۆن، لە سەردەمی دۆناڵد ترامپ سەرۆكی ئەمریكا و حەسەن رۆحانی سەرۆك كۆماری ئێران دا، گەیشتۆتە ئاستی هەڵكردنی گڵۆپی سوور، بەتایبەت لەدوای شەڕی ئابووری و كشانەوەی ئەمریكا لە رێككەوتنی ئەتۆمی، بۆیە هەردوولا بەوردی چاودێری جووڵەی سیاسیی و ئابووری و دیپلۆماسی یەكتریی دەكەن، لێكەوتەو لێكدانەوەكان زۆرجار كاردانەوەی گرژیی بەهەمدەهێنن، كە ئێستا بەهۆی كێشەی كەشتیەكانی (ئەلفجیرە) كە بیانوییەكی لاوازی شەڕە، بەڵام گەیشتۆتە هەڕەشەی سیاسیی و میدیای و سەربازیی ئەم دوو وڵاتەی چواردەیەیە لەسەر هێلێ گەرم مامەڵە دەكەن.
هەڕەشە و بەریەككەوتنی ئێران و ئەمریكا نوێی نییە، بەڵام وڵاتانی ناوچەكە دابەش دەكەن بەسەر بەرەی خۆیاندا، كە بەرەی تاران و واشنتۆنە، كە زۆرجار دەوڵەتان بەگوێرەی بەرژەوەندییە فرەكانیان دابەشبوونەكە ئاسان دەكەن و دەبنە هاوپەیمان.
یەكلاكردنەوە، یان هەڵبژاردنی بەرەی هێزێك بۆ عیراق ئاڵۆز و ئاسان نییە، بەو پێیەی لەدوای پرۆسەی ئازادی عیراقەوە و پێشتریش لە پەیوەندییەكانی لەگەڵ واشنتۆن لە هەڵكشان و داكشاندا بووە، هەروەها لەگەڵ ئێرانیش مێژووی 8 ساڵ جەنگیان لەنێواندایە و دوای رووخانی رژێمی سەدامی دیكتاتۆریش، بەغدا لە ژێر كاریگەریی سیاسیی و ئابووری بەهێزدایە، كە زۆرجار دەگۆڕێت بۆ هەژموونی قورس و یەكلاكەرەوە، سەرباریش مەزهەبیش خاڵێكی دیكەی پەیوەستبوونی تاران و بەغدایە، لەم چوارچێوەیەشدا هەرێمی كوردستان هەیە، كە ئەویش دەبێت مامەڵە لەگەڵ ئەم گرژییە دوورەی تاران و واشنتۆن بكات، بەڵام چۆن و بەچ مەرجێك؟ چونكە بەرەكان دەوڵەتین و هەرێمیش كاراكتەرێكی نادەوڵەتییە و كاریگەرییەكانی لەسەر ئەزموونەكە سەختن، بۆیە دیسانەوە خۆیەكلاكردنەوە قورسترە! ئەزموونی ریفراندۆمی25ی ئەیلولی 2017یش وانەیەكی نزیكە بۆ بێدۆستی نێودەوڵەتی كورد.
عیراق و هەرێمیش لەم ئاریشەیەدا، پێویستیان بە هاوئاهەنگی و بڕیاریدانی هاوكۆك هەیە، نەك گەمەكاری دۆڕاوبن، باشتریشە كورد خۆی تەگبیری هەبێت و وەك دەرفەتێك بۆ مافەكانی لە دۆخەكە بڕوانێت، شەڕی بەرژەوەندییەكانی خۆی بكات، بەو پێیەی كەلێنی گەروەی هەیە لە ئاسایشی خۆراك و بازرگانی و وزەدا ، ئێران گەورەترین دەروازەی بازرگانی هەرێمە و راگری ئاسایشی خۆراك و ئەمنی و بازرگانیەكەیەتی، بەبێ گەرەنتیكردنی پاراستن و سەلماندنی ماف و بەرژەوەندییەكانی نەچێتە نێو هیچ بەرەیەكەوە لە خراپترین دۆخدا سیاسەتی هاوسەنگی پەیڕەوبكات لە قازانجیەتی، نەك خۆی دابەش بكات.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

فاڵی میدیا له‌ رووداو و هۆقه‌بازدا

له‌م چه‌ند رۆژه‌دا سێ رووداو روویاندا، له‌ هه‌رسێكیاندا (توركیا) تێیدا ...