سەرەکی » وتار »  ‌عه‌داله‌ت عه‌بدوللا‌ » به‌های حكومه‌ت و پله‌و پۆسته‌كانی

به‌های حكومه‌ت و پله‌و پۆسته‌كانی

به‌ پێوه‌ری ستاندار و ته‌قلیدیی جیهانی، سیستمی هه‌ڵسه‌نگاندن بۆ هه‌ر دام و ده‌زگایه‌كی ده‌وڵه‌تی و كاراكته‌ره‌كانی ناوی، پێش هه‌ر شتێك، به‌نده‌ به‌ ئه‌ندازه‌ی پابه‌ندبوونیانه‌وه‌ به‌و كارنامه‌ راگه‌یه‌نراو و به‌ڵێن و مژدانه‌ی كه‌ پێش ده‌ستبه‌كاربوونیان، بۆ رای گشتیی وڵات، راگه‌یه‌نراون.
جگه‌ له‌ كارنامه‌، به‌ڵێنه‌كانی ماوه‌ی بانگه‌شه‌ی پارته‌ سیاسییه‌كانیش‌ له‌ هه‌ڵبژاردنه‌ گشتییه‌كانی وڵاتدا، ده‌بێته‌ پێوه‌رێكی ترو كاریگه‌ریی خۆی له‌سه‌ر چاوه‌ڕوانیی چین و توێژه‌ جیاجیاكانی كۆمه‌ڵ به‌جێ ده‌هێڵێت، ئه‌مه‌ش به‌و پێیه‌ی سروشتی ده‌نگده‌ر و دابه‌شبوونیان به‌پێی جوگرافیا و دیموگرافیا و چه‌شنی چینی كۆمه‌ڵایه‌تی و تایبه‌تمه‌ندیی وه‌زیفی و پیشه‌یی، وه‌هایه‌ كه‌‌ هه‌ریه‌كه‌ چاوی له‌سه‌ر به‌شێك له‌و كارنامه‌ و به‌ڵێنانه‌یه‌ كه‌ راسته‌وخۆ كاریگه‌رییان له‌سه‌ر فۆرم و كرۆكی گوزه‌ران و ژیان و پێگه‌ی كۆمه‌ڵایه‌تی و مه‌عنه‌وییان هه‌یه‌، هه‌ر له‌به‌ر ئه‌وه‌ش ده‌بینی كه‌ له‌ یاده‌وه‌رییاندا ده‌مێنێته‌وه‌، له‌سه‌ر بنه‌مای بڕی جێبه‌جێكردنی ئه‌و كارنامه‌ و مژده‌ و به‌ڵێنانه‌ش بڕیار له‌ چۆنیه‌تی به‌خشینی متمانه‌ به‌ پارته‌ سیاسییه‌كان و كاندید و كاراكته‌رانیان، ده‌ده‌ن.
له‌ واقعی هه‌رێمی كوردستاندا، له‌به‌ر ئه‌وه‌ی ساڵ به‌ساڵ، بێ متمانه‌یی زۆرتر ده‌بێت به‌رامبه‌ر به‌و به‌ڵێن و كارنامانه‌ی كه‌ پارته‌ سیاسییه‌كان ده‌یانخه‌نه‌ڕوو و دواتر له‌ ده‌زگا ده‌وڵه‌تییه‌كاندا جێبه‌جێیان ناكه‌ن، رێژه‌ی به‌شداریی سیاسی و ده‌نگدان پاشه‌كشه‌ ده‌كات.
له‌‌ ئه‌زموونی وڵاتانی پێشكه‌وتوودا، زۆرجار، دابه‌زینی رێژه‌ی ده‌نگده‌ران و ده‌نگدان وابه‌سته‌ی به‌هێزبوونی پێگه‌ی كۆمه‌ڵگه‌ی مه‌ده‌نی و سه‌رقاڵبوونی هێزه‌ كۆمه‌ڵایه‌تییه‌كانه‌ به‌ ژیانی تایبه‌تی و وه‌زیفیی خۆیانه‌وه‌، یان گه‌یشتن به‌ دۆخێك له‌ خۆشگه‌زه‌رانی كه‌ ناچاریان ناكات بچنه‌ ناو ورده‌كاریی ژیانی سیاسی و سروت و رێوڕه‌سمه‌كانییه‌وه‌، به‌ڵام لێره‌، بایكۆته‌كه‌، پێچه‌وانه‌یه‌!.
دانیشتوانی هه‌رێم، به‌بۆنه‌ی نائومێدبوونیانه‌وه‌ له‌ كایه‌ی سیاسی و نابه‌رپرسیارێتیی ده‌زگا ده‌وڵه‌تییه‌كان و كاربه‌ده‌ستان‌ به‌رامبه‌ر به‌ چاوه‌ڕوانی و پێویستییه‌كانیان، دوور ده‌كه‌ونه‌وه‌. كێشه‌ ئه‌وه‌یه‌، زۆربه‌ی پێوه‌ره‌كانیش بۆ هه‌ڵسه‌نگاندنی حكومه‌ت و ده‌زگا ده‌وڵه‌تییه‌كانی ترو كاربه‌ده‌ستان، هانده‌ری گێڕانه‌وه‌ی په‌یوه‌ندییه‌كی توندوتۆڵ نین له‌نێوان دانیشتوانی هه‌رێم و ده‌زگا ده‌وڵه‌تییه‌كانیدا، چونكه‌ له‌ بنه‌ڕه‌تدا، به‌های هه‌ر حكومه‌ت و پۆستێكی ده‌وڵه‌تی، بۆ ئه‌زموونی هه‌رێمیش، دواجار، به‌وه‌ ده‌پێورێ كه‌:
خه‌ڵك چه‌ند ئاسووده‌یه‌؟ دادپه‌روه‌ریی كۆمه‌ڵایه‌تی ره‌چاو ده‌كرێ یان پێشێل؟ یاسا سه‌روه‌ره‌ یان یاساشكێنی؟ سامانی وڵات بۆ خێری گشتییه‌ یان تایبه‌تی؟ گه‌نده‌ڵی هه‌یه‌ یان نا؟، هه‌لی كار تا چه‌ند و كوێ، ره‌خساوه‌؟، هێڵی هه‌ژاری چه‌ند دابه‌زیووه‌؟، حاڵی ئابووریی وڵات چییه‌ و پشت به‌چی ده‌به‌ستێت؟، خزمه‌تگوزاری چۆنه‌؟ باج و خه‌راج له‌سه‌ر هاووڵاتی قورسه‌ یان سوك؟، وڵاته‌كه‌ قه‌رزاره‌ یان قه‌رزی لای وڵاتانه‌؟ وڵات و كۆمه‌ڵگه‌ به‌رهه‌مهێنه‌رن یان به‌رخۆرو چاو له‌ده‌ستی به‌رهه‌م و كاڵای ده‌ره‌كی؟ خه‌ڵكی پسپۆڕ وڵات به‌ڕێوه‌ ده‌بات، یان نه‌شیاو؟، تاچه‌ند سوود له‌ وزه‌ و توانای نوێ و لێهاتوویی كه‌سانی ته‌كنۆكرات وه‌رده‌گیرێت؟، ئاسایشی كۆمه‌ڵایه‌تی و خۆراك چۆنه‌و له‌ چ ئاستێكدایه‌؟، دۆخی زانكۆكان و ده‌زگاكانی په‌روه‌رده‌ چۆنن؟ باری رووناكبیریی و مه‌عریفی له‌ چیدایه‌؟، گه‌نجه‌كان له‌چ دۆخێكدان؟ ژن تاچه‌ند ناچه‌وسێنرێته‌وه‌؟ ئه‌مانه‌ و زۆری تریش.
لێره‌ له‌ هه‌رێم،‌ ئه‌م هۆشیارییه‌ كۆمه‌ڵایه‌تییه‌‌، ساڵ به‌ ساڵ، په‌ره‌ ده‌ستێنێ و به‌هۆی ئاڵۆزبوونی پێویستییه‌ كۆمه‌ڵگه‌ییه‌كانیشه‌وه‌ ژماره‌ی پرسیاره‌ گه‌وهه‌رییه‌كان زۆرتر ده‌بن!، ئێستا وای لێهاتووه‌، زۆر به‌ ساده‌یی، ده‌وترێت: كه‌ ویستت ده‌وڵه‌ت و ده‌زگاكانی هه‌ڵبسه‌نگێنیت، به‌وانه‌شه‌وه‌ كه‌ تیایدان، ئه‌وا پێوه‌ره‌كان ته‌نها وه‌ڵامی ئه‌و پرسیارانه‌ن و هیچیتر، وه‌ڵامی ئه‌و پرسیارانه‌ش بۆ واقعی ئێستای هه‌رێم، تا ئه‌مڕۆ دڵخۆشكه‌ر و جێی ئومێد نین.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*