سەرەکی » وتار » هیوا محەمەد » هەیبەتی کەرکوک

یەکبێژ

هەیبەتی کەرکوک

کێشە یان هەڵە کە روودەدات لەبەرامبەریدا تەنها شتێک دێتە پێش ئەویش چارەسەر یان راستکردنەوەیە کە ئەمیش لە ئەنجامدا دەبێتەوە چارەسەرو ئەگەر کێشەکەش گشتگیر بێت دەبێت هەموان شان بخەنەبەری و کۆتایی بە زیانەکان بێت.
ناتوانم بڵێم ئێمەی کورد، چونکە من لێی بێبەریم و ئەوە رای من نیەو دوای دەنگی ئەو دەهۆڵەش ناکەوم ، لەساڵی ٢٠٠٣ وە کەرکوک وەک شارێکی ئازاد کراو لە ژێر ڕکێفی کوردانی هەرێمدا بووە ئەو دەستەڵاتە ڕۆڵی سیاسیی خۆی تیادا ئەنجام داوە، لە تەکیشیدا تورکیا بە پلەی یەکەمم و شۆڤێنییەتی عەرەبی عیراق و ناوچەکەش و ئەو رێکخراوە مەزهەبیانەش کە بەرژەوەندییەکیان تیادا هەیە لە دژی ئەوە بوون کەرکوک ئارام و ئاوەدەان بێت بۆ ئەوەی نەگەڕیتەوە سەر نەخشەی ئیداری هەرێم(ئەو هێرشەی داعشیس بۆ دەوروبەری کەرکوک هەر بەمەبەستی داگیر کردنی و تێک دانی و بەستنەوەی بوو بەو هێڵەی خۆیانەوە تا موسڵ و ڕەقە) هێزی پیشمەرگە توانی هەموو ئەو هەڕەشە و مەترسییانە دوور بخاتەوە و بە خوێن داکۆکی لێ بکات(دەبێ ئەوەش بزانین لەوانەدا هێزی هاوپەیمانی و خودی عیراقیش هاوکار بوون) بەڵام کاتێک کار بگاتە ئەوەی هێز و سوپای عیراق و دەیان هەزار حەشدی شەعبی توند مەزهەب(بەئاگاداریی ئەمریکیەکان و بە ئیعازی دەرەکی) هێرشی بکەنە سەرو چرای سەوزی تورکیاش داگیرسابێت، ئیدی دەبێت حیکمەتی راوەساتن و داکۆکی و شەڕ کردن (کە دەبوە هۆی وێرانکردنی شارەکە) چی بێت لەکاتێکدا ئەگەر بە رەزامەندی بەغدا نەبێت هەرچی هێزی پیشمەرگەیە بیخزێنیتە ناو شارەکەوە ناتوانێت داکۆکی لێ بکات لە کاتێکدا لەگەڵیشیدا پلانی ناوچەیی هەبێت.
مێژوو بەدوای یەکدا پێمان دەڵێت کاتێک رووداوێک روودەدات کورد دەبێت بەدوو بەشەوە نیوەی ئەو نیوەکەی تر تاوانبار دەکات، هەموو رووداوەکان وابوە، هیچ کات هەموو کورد پێکەوە لەگەڵ دوژمن و نەیارەکانیدا نەچوەتە دانوستانەوە بەیەک هەڵوێست.
تا ئەوڕۆشمان بینی ململانێی سەختی نێوان لایەنەکان لەمانگی سیپتەمبەری پارەوە تا چەند رۆژ لەمەو بەر کە حکومەتی تیادا دروست کرا پێمان دەڵێ کە هێشتا لەهەرێمدا سیاسەت و هەڵوێستی حزب و لایەنەکان بەتەواوی سەربەخۆ نیەو هاو شانە لەگەڵ معادەلە ناوچەییەکان، دەنا هەموو ئەو شتانەی کە ئەمڕۆ ئەنجامەکەی دەبینین دەکرا هەر مانگێک دوای هەڵبژاردن پیادە بکرێت چونکە هیچ گۆڕانکارییەک لە هەڵوێستی حزبەکاندا ڕووی نەداوە کە زۆر جیاوازتر بێت لە هی چەند مانگ بەر لەئێستا.
ئەم نا یەک هەڵوێستی و ناسەربەخۆبوونە وادەکات دەیان رووداوی لەو بەروار و ژمارە بۆدانراوانەی رابردوو دووبارە ببنەوە، یەک هەڵوێستی لەناو هەرێمی کوردستانهێندەی یەک هەڵوێستی لەبەرامبەر بەغداو ناوچەکە گرنگ نیە.
لێرەدا خاڵێکی گرنگ دێتە گۆڕێ ئەویش ئەوەیە کە هەموو نووسەران و رۆشنبیران دەکرێت ئینتیمای حزبییان هەبێ بەڵام مەرجیش نیە بێ ئەوە نەتوانن ڕۆڵیان هەبێت لە بەرەو پێش بردنی سیستمی بەڕێوەبردنی کۆمەڵگادا، ئەوەش کە لەم نێوەندەدا سەیر دەبیندرێت هەندێ نووسەری حزبییە کە ڕستەو ووتەکانیان هێندە توندن لە هەر ئەندام مەکتەب سیاسییەکی حزبەکەی توند ترە یان چاکترە بڵێین لە فەرماندەی سەربازی باڵای حزبەکەشی، ئیدی نازانم ئەم نووسەرە حساب بۆ ئەو رێکەوتنە سیاسییانە ناکات کە هیچ کات مەحاڵ نین و لەو پەڕێ ساردییەوە هەڵدەکشێ بۆ ئەو پەڕی گەرمی ؟ ئەی دوای ئەوە دەڵێت چی؟
ئەوەی لە کەرکوکدا روویدا ئێستا جار جار لە کاناڵ و بلاوکراوە دیارەکاندا قسەی لەسەر دەکرێت و دەوترێتەوە، ئەمەش هیچ خزمەت بە دۆزەکە ناکات و هەیبەتی کورد بۆ ناو کەرکوک بەوە ناگەڕێتەوە، ئەوەی لە ماوەی نزیکەی چواردەساڵدا دەسەڵاتی هەبووو بارەگاو رێکخستنی ئاشکرای هەبوە هەموو ئەو حزبانە بوون کە لە ئێستادا لەناو هەرێمی کوردستاندا هەن، بەتایبەت پارتی و یەکێتی، چەندە یەکێتی پیشمەرگەو چەکداری دیکەی بوە پارتیش هێندەی هەبوە، خۆ ئەگەر تەنها لایەنێک نەیویستوە شەڕ بکات یان شارەکە بدات بەدەستەوە دەبا لایەنێکی دیکە شەڕی بکردایە، بەلام باشترە هەموان دان بەوەدا بنێن کە کەرکوک پلانێکی نێو دەوڵەتی بووەو ئەمریکییەکانیش تیایدا بێدەنگن چونکە چرا سەوزەکە هی خۆیان بوە.
باس کردنی ئەو رووداوە بە دیوە جیاوازەکانیدا لە بەرژەوەندی هەموو ئەو کەس و لایەنانەیە کە دەیانەوێت ئاگری ئەم ناکۆکییە خۆش بکەن، دەشڵێن هەموو رووداوێک خێر و شەریش لەگەڵ خۆی دێنێ ئەگەر ئەم روداوە نەبوایە ژێر هەگبەی هەندێ بەرپرسی شارەکەش ئاشکرا نەدەبوو. هەرچی هێزی سیاسیی کوردستانیشە گەیشوتەوە ئەو قەناعەتەی نەبەتەنها دەتوانێت تاک ڕەوانە دەسەڵاتی لابێت نەدەشتوانێت بە هێز هێزێکی دیکە لەناو بەرێت، لەبەر ئەمە باشترە حزبەکان و ئورگانەکانی باڵایان پیادا جوونەوەیک لەناو رێکخستنەکانیاندا بکەن و بڕیاری ئەوە بدەن کە هیچ نووسەرێکی دیاری سەر بەو لایەنە رێگە پێدراو نیە بە مەبەستی ووروژاندان بابەت بنووسێت و لە ڕۆژێکی وەک رۆژی سوێند خواردنی کابینەی نۆیەمدا لە کەناڵێکی سەرەکیدا بڵاوی بکاتەوە، ئەمە پێی دەوترێت بانێک و دوو هەوا و لێرەشەوە خەڵک نەمتمانەی حزبی بە خودی حزبەکەی دەمێنێت نە بە حوکڕانی هەرێم و پێی وادەبێت هەموو ئەم پرۆسانە بۆ خۆڵ کردنە ناو چاوی خەڵکەو ئەمەی ئەمڕۆش لەوی دوێنێ باشتر نابێ.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*