سەرەکی » وتار » لەتیف فاتیح فەرەج‌ » له‌ رۆما كه‌وته‌به‌رچاوم

له‌ رۆما كه‌وته‌به‌رچاوم

سه‌ره‌تا:
له‌ گه‌ڵ یوسفی‌ كوێخا برایم به‌ فڕۆكه‌ له‌ سلێمانیه‌وه‌ به‌ره‌و ئه‌سته‌نبوڵ كه‌وتینه‌ ڕێ‌، ئه‌سته‌نبوڵ شاری‌ چه‌ندین نه‌ته‌وه‌ی‌ جیاوازوهه‌وارگه‌ی‌ ده‌یان شاعیرو سیاسی‌ كۆنه‌ رۆژگاری‌ كورد، له‌ رێگا خه‌یاڵم لای‌ شیعره‌كانی‌ یوسف خه‌یاڵ ئۆغڵو بوو، ئه‌و شاعیره‌ی‌ له‌ رێی‌ ئه‌حمه‌د قایه‌و سیامه‌ندی‌ عه‌لی‌ نه‌ریمانه‌وه‌ ناسیم، ئه‌و شاعیره‌ی‌ دواتر له‌ چه‌ندین كتێبخانه‌ دیوانه‌كه‌یم ده‌ستنه‌كه‌وت و سه‌ید پێی‌ وتم ره‌نگه‌ ئه‌مانه‌ زۆریان حه‌ز پێی‌ نه‌بێت .
بەم دواییە هەڵبژاردنی شارەوانییەکان کرا و لە ئیستنبوڵ ئاک پارتی نەیتوانی بیباتەوە سەڕەڕای دووبارەکردنەوەی هەڵبژاردنەکان، ئه‌ردۆغان پێی‌ وایه‌ ئه‌وه‌ی‌ ئه‌سته‌نبوڵی‌ لێسه‌ند كورده‌كان بوون، ئه‌و كوردانه‌ی‌ له‌ هه‌موو كوچه‌و كه‌نارێكی‌ ئه‌سته‌نبوڵ هه‌ن وهه‌ر گاڤ له‌ ته‌ك یه‌كێكدا دوو قسه‌ بكه‌یت یه‌كسه‌ر ده‌ڵێت « هون كرمانجن « له‌ گه‌ڵ ئه‌وه‌ش زمان زمانی‌ باو، زمانی‌ هه‌موو خه‌ڵك توركیه‌، هه‌ندێك هه‌ن ئه‌گه‌ر به‌ توركی‌ قسه‌یان له‌ گه‌ڵ نه‌كه‌ی‌ هه‌ر حه‌ز ناكه‌ن سه‌یریشت بكه‌ن هه‌موو ناتوركێك له‌ نێو ئه‌سته‌نبوڵدا « یابانجه‌» یه‌، یانی‌ بیانی‌، یانی‌ ناتورك، تێناگه‌م حاجی‌ قادری‌ كۆیی‌ چۆن توانیویه‌تی‌ له‌وشاره‌دا زۆر بمێنێته‌وه‌، به‌ڵام كه‌ سه‌یدی‌ هاوڕێم ده‌بینم ئه‌وه‌ زیاتر له‌ 20 ساڵه‌ له‌ كوچه‌و كه‌ناره‌كانی‌ ئه‌و شاره‌دا دێت و ده‌چێت،ئه‌وه‌ی‌ حاجیشم لا ئاسای‌ ده‌بێته‌وه‌ .
هه‌ر كه‌سێك بڕواته‌ توركیاو نه‌چێته‌ ئه‌سته‌نبوڵ توركیای‌ نه‌دیووه‌، هه‌ركه‌سێك بڕواته‌ ئه‌سته‌نبوڵ و نه‌چێته‌ ته‌قسیم، یان ئاكسه‌رای‌ دوو شوێنی‌ زۆر به‌ ناوبانگی‌ ئه‌وشاره‌ زل و زه‌به‌لاحه‌ی‌ سه‌رده‌ریا ی‌ ره‌ش ئه‌وه‌ مانای‌ وایه‌ ئه‌سته‌نبوڵی‌ نه‌دیوه‌، له‌ فڕۆكه‌ خانه‌ تازه‌كه‌ی‌ ئه‌سته‌نبوڵ دابه‌زین، به‌ر له‌ رۆیشتنهه‌ندێك دۆست پێیان وتم فه‌یس بوك و وێنه‌و هه‌ندێ‌ شتی‌ له‌و جۆره‌ رابگرم و دوای‌ بیگێڕمه‌وه‌، من ئه‌وه‌م نه‌كردو دنیاش ئاخر نه‌بوو، له‌ ئاكسه‌رای‌ دابه‌زین وسه‌رمان ته‌قی‌ به‌سه‌ر چه‌ندین كوردی‌ باشوردا، دۆستێكمان بینی‌ وه‌ ئه‌فه‌ندیه‌كی‌ بن و بنه‌چه‌ ئه‌سته‌نبوڵی‌ رێی‌ ده‌كرد وتمان با میزاجی‌ كورده‌واری‌ تێكنه‌ده‌ین .
سه‌یره‌ ئه‌و شاره‌ زه‌به‌لاح و دیرۆكیه‌ هێشتا له‌ دۆخی‌ دیموكراتیدا نه‌گه‌یشتوه‌ته‌ ئه‌وئاسته‌ی‌ كورد وه‌ك كورد، وه‌ك نه‌ته‌وه‌یه‌كی‌ خاوه‌ن زمان و كه‌لتور و جیاواز قه‌بوڵ بكات و ئه‌وه‌نده‌ چه‌ك و چۆڵ له‌ كوشتنی‌ كوردا به‌ هه‌ده‌ر نه‌دات وئه‌وه‌نده‌ش جه‌رگی‌ ژنی‌ كورد و تورك به‌ مه‌رگی‌ كوڕه‌كانیان نه‌سوتێنێت، ئاخر ئه‌گه‌ر په‌كه‌كه‌ حیزبێكی‌ یاساغ نه‌بێت و رێپێدراوبێت و له‌ ئه‌سته‌نبوڵ به‌ ئاشكرا باره‌گاو بنكه‌ی‌ هه‌بێت، ئیدی‌ توركیاش ئه‌وه‌نده‌ له‌نیگه‌رانی‌ و دڵه‌ راوكه‌دا نابێت، توركیا زۆربه‌ی‌ وڵاتانی‌ ده‌وروبه‌ری‌ خۆی‌ وه‌ك دوژمن سه‌یر ده‌كات له‌ ناوخۆیشدا به‌و جۆره‌ هه‌ڵاوێردی‌ هاوڵاتیه‌كانی‌ ده‌كات.
كه‌ گه‌یشتینه‌ ماڵی‌ سه‌ید له‌ به‌شه‌ شاره‌وانی‌ فاتیح، یه‌ك دوو رۆژ دواتر دۆستێك ته‌لی‌ بۆ كردم، له‌ كوێی‌ وتم ئه‌سته‌نبوڵ، ئه‌سته‌نبوڵ كوێ‌، وتم فاتیح، ده‌ی‌ وتی‌ وتارێك بنووسه‌ به‌ نێو نیشانی‌ له‌تیف له‌ فاتیح، له‌ ئه‌سته‌نبوڵ سه‌ره‌ڕای‌ هه‌موو رێنماییه‌كان سه‌ره‌ڕای‌ میترۆو پاسی‌ هه‌مه‌جۆرو و ته‌كسی‌ و شتگه‌لی‌ دیكه‌ هێشتا مرۆڤ ون ده‌بێت، ئه‌سته‌نبوڵ ده‌ڵێی‌ نێو ورگی‌ نه‌هه‌نگی‌ شینه‌ هه‌موو شتێكی‌ تیا ون ده‌بێت، به‌ مرۆڤی‌ قه‌باره‌ بچوكیشه‌وه‌ له‌ چاوته‌لارو پردوكه‌شتی‌ و كۆشكه‌كانه‌وه‌، كه‌ هه‌ر هه‌مووی‌ ده‌سكردی‌ خودی‌ مرۆڤ خۆیه‌تی‌، من كێشه‌ی‌ چۆنێتی‌ ده‌لابڕینیشم بۆ نێو نیشان بۆ دروست بوو، به‌ ته‌كسی‌ ده‌ڵێی‌ بمبه‌ بۆ مسته‌فا پاشا، ئه‌و ده‌ڵێ، گۆجه‌ مسته‌فا پاشا، یان كوچك مسته‌فا پاشا، ده‌تباته‌ یه‌كێكیان و ئه‌وی‌ تر شوێنه‌كه‌یه‌ كه‌ بۆی‌ ده‌چیت، به‌و جۆره‌ من خه‌یاڵم ده‌ڕوات بۆ لای‌ عه‌زیز نه‌سین و ده‌ڵێم ئه‌و پیاوه‌ له‌و بارو دۆخه‌دا ئه‌و هه‌موو چیرۆكه‌ ته‌نز ئامێزه‌ به‌رزه‌ی‌ نووسیوه‌،هه‌ڵبه‌ت ده‌گه‌ڕێمه‌وه‌ سه‌ر عه‌زیز نه‌سین و له‌ شوێنی‌ تریش ناچارین باسی‌ بكه‌ین .
ئه‌سته‌نبوڵ ئه‌گه‌ر خاوه‌نێكی‌ باشی‌ هه‌بێت، ئه‌گه‌ر بواری‌ هه‌ناسه‌دان به‌ كوردو ئه‌وانی‌ تر بدرێت، ئه‌گه‌ر چه‌وسانه‌وه‌ی‌ كوردو سته‌مكاری‌ نه‌بێت، ته‌نها به‌ پاره‌ی‌ گه‌شتیاران ده‌كرێت بكرێته‌ جوانترین شاری‌ دنیا،سروشتێكی‌ جوان، ده‌ریایه‌كی‌ فراوان، گردو گردۆڵكه‌و شوێنی‌ هه‌مه‌ جۆر، لێ‌ كه‌می‌ دیموكراسی‌، چه‌وسانه‌وه‌ی‌ كورد، وێنه‌ی‌ ئه‌سته‌نبوڵ و توركیاشی‌ لای‌ گه‌شتیاری‌ به‌ ئاوه‌ز ناشرین كردووه‌، سه‌ید پێی‌ وتم ئه‌گه‌ر ئەو جۆرە سیاسەتانە نەبوایە‌، ئێستا و له‌م وه‌رزه‌دا ئه‌سته‌نبوڵ جمه‌ی‌ ده‌هات له‌ گه‌شتیاری‌ ئه‌وروپا، به‌ڵام ئه‌وه‌تا زۆرینه‌ عه‌ره‌ب و خه‌ڵكی‌ ئاسیایی‌ لێره‌ن و كه‌متر خه‌ڵكی‌ ئه‌وروپا.

زمان و بلیت وشتی‌ تر
من بۆ یه‌ ده‌ڵێم عه‌زیز نه‌سین زاده‌ی‌ ئه‌و بارودۆخه‌یه‌و ده‌بوو له‌ بری‌ عه‌زیز نه‌سینێك توركیا سه‌دانی‌ هه‌با، ئاخر سروشتی‌ ئه‌وێنده‌ر وایه‌، له‌ پڕدا مرۆڤ له‌ دۆخێكدایه‌ ده‌بێت پێكه‌نینی‌ به‌ خۆی‌ بێت، ئه‌وه‌ بۆ وات لێهات، توركیا به‌وشێوه‌یه‌یه‌،هه‌ڵبه‌ت هه‌ر به‌و شێوه‌یه‌ش ده‌مێنێته‌وه‌، بلیتم بڕی‌ بۆ ئه‌وه‌ی‌ له‌ ئه‌سته‌نبوڵه‌وه‌ بڕۆم بۆ ئۆردو، ماڵی‌ دڵه‌ی‌ پورزام له‌وێیه‌،كورسی‌ ژماره‌ 39 كورسی‌ من بوو، كه‌چووم ده‌بوو سه‌عات 6 به‌ ڕێبكه‌وین، من سه‌عات پێشتر له‌وێ‌ بووم، ده‌ی‌ خۆ چاو له‌ جوانی‌ و شۆخ و شه‌نگی‌ تێر نابێت، سه‌عات چیه‌، سه‌عات 6 هات، لێخوڕی‌ پاسه‌كه‌ به‌ توڕه‌ییه‌وه‌ وتی‌ كێ‌ ژماره‌39ی‌ داوه‌ به‌تۆ، كورسیه‌كه‌ به‌ كه‌ڵك نایه‌ت و نابێت سه‌ركه‌ویت، تكاو پاڕانه‌وه‌ نه‌یخوارد، كۆمپانیای‌ پاسه‌كه‌ش هیچی‌ بۆ نه‌كرا، ناچار رۆیشتنه‌كه‌م كه‌وته‌ هه‌شت ونیو، هه‌شت ونیو بوو به‌ نۆ، بۆ ئه‌وه‌ی‌ كاته‌كه‌ بڕوات وسود له‌وماوه‌یه‌ ببینم ده‌ستمكرد به‌ خوێندنه‌وه‌ی‌ سه‌فه‌ری‌ بتڵه‌ به‌تاڵه‌كانی‌ قادری‌ عه‌بدوڵا، سه‌عات 9 سواری‌ پاس بووم له‌ كورسی‌ ژماره‌ 19 دوای‌ سێ‌ سه‌عات رۆیشتن، له‌ شوێنێك وه‌ستان و به‌ منیان وت تۆ هاتنه‌كه‌ت تا ئێره‌یه‌، منیش كردم به‌ ده‌نگه‌ ده‌نگ دوووشه‌ كوردی‌ ودووی‌ توركی‌ و توركمانی‌ و دووی‌ ئینگلیزی‌، كابرایه‌ك به‌ بلیتی‌ ژماره‌ 19ه‌وه‌ منی‌ له‌سه‌ر كورسیه‌كه‌ لاداو پاڵی‌ دایه‌وه‌، منیش دوای‌ ده‌نگه‌ده‌نگ و ته‌له‌فونی‌ ئه‌وان بۆ سه‌نته‌ر ناردیانمه‌ سه‌ ر كورسی‌ ژماره‌ 11 كه‌له‌وێش توركێك دانیشتبوو، ئیتر ئه‌ویش هه‌ستاو من دانیشتم، بیرم له‌وه‌ ده‌كرده‌وه‌ كه‌ كورسی‌ چه‌ند بێ‌ نرخه‌ ئه‌وه‌تا هه‌رجاره‌و بۆ یه‌كێكه‌، ئیتر ئه‌مشین و شه‌پۆڕه‌ له‌ پێناویدا بۆ، به‌ نێوسروشتێكی‌ سه‌وزوسه‌رنج راكێشدا دوای‌ زیاتر له‌ 10 كاتژمێر گه‌یشتمه‌ ئۆردوو، ئه‌و شاره‌ی‌ به‌پێی‌ قسه‌ی‌ دڵشادی‌ پورزام هه‌فته‌ی‌ پێشتر ته‌رمی‌ 10 سه‌ربازی‌ توركی‌ بۆ هاتبوه‌وه‌، باشه‌ ئه‌گه‌ر ده‌وڵه‌ت ده‌رگا به‌ڕووی‌ ئاشتیدا بكاته‌وه‌ بۆ ده‌بێت شارێكی‌ بچوكی‌ توركیا له‌ ماوه‌یه‌كی‌ كه‌مدا 10 كوژراوی‌ بۆ بێته‌وه‌و شین بكه‌وێته‌ 10 خانه‌واده‌وه‌ .

ته‌قسیم و گۆرانی‌ كوردی‌
ئه‌وچه‌ند رۆژه‌ی‌ له‌ ئه‌سته‌نبوڵ بووم، چه‌ند جارێك كۆرسی‌ گۆرانی‌ كوردیم گوێ‌ لێبوو، گۆرانیه‌كانی‌ ئه‌حمه‌د قایه‌و زۆری‌ تر، گروپی‌ جیا جیا لێره‌و له‌وێ‌ ئاهه‌نگیان گه‌رم ده‌كردو كوردو تورك و عه‌ره‌ب و بیانی‌ له‌ ده‌وریان كۆده‌بوونه‌وه‌، من چه‌ندین جار ئه‌وه‌م بینی‌ و له‌ هه‌ندێ‌ شوێنیش به‌ دیاریانه‌وه‌ ده‌وه‌ستام، له‌ جارێكیاندا به‌ ته‌نیشت منه‌وه‌ سێ‌ كچی‌ باڵاپۆش و سه‌رپۆشدار كه‌ هه‌ر ته‌نها چاوه‌ ره‌ش و جوانه‌كانیان به‌ ده‌ره‌وه‌ بوو بێ‌ ئه‌وه‌ی‌ تێبگه‌ن له‌نجه‌یان ده‌كردو چه‌پڵه‌یان لێده‌دا، راستی‌ من ئه‌وانم به‌ عه‌ره‌ب زانی‌، له‌ شوێنێكیش جه‌مشید ئه‌وكوڕه‌ی‌ له‌ كوردساتیش گۆرانی‌ گوت چه‌ند گۆرانیه‌كی‌ كرمانجی‌ گوت و دواتریش بۆ ئێمه‌سێ‌ گۆرانی‌ سۆرانی‌ چڕی‌ له‌وێش كۆڕی‌ چه‌پڵه‌و سه‌ما گه‌رم بوو، هه‌رچۆنێكه‌ ته‌قسیم كه‌م ئێواره‌ هه‌یه‌ گۆرانی‌ كوردی‌ تیا نه‌وترێت، ئه‌وه‌ش به‌سه‌ بۆ ئه‌وه‌ی‌ دەستەڵاتی ئەو وڵاتە له‌وه‌ تێبگه‌ن كه‌ زمان تا سه‌ر قه‌ده‌غه‌ ناكرێت و قه‌ده‌غه‌ نابێت.
كه‌م مناڵه‌ كوردی‌ باكور هه‌یه‌ گۆرانیه‌كانی‌ شیڤان په‌روه‌ر نه‌زانن، یان شتێك له‌و گۆرانیانه‌ نه‌ڵێن،له‌و شوێنه‌ی‌ جه‌مشید گۆرانی‌ بۆ ده‌گو تین، وێنه‌ی‌ نالی‌ و شێركۆ بێكه‌س و پیره‌ مێردو زۆری‌ تر دانرابوون، به‌ خاوه‌نه‌كه‌یم گوت ئه‌دی‌ بۆ وێنه‌ی‌ من لێره‌ نیه‌، به‌ پێكه‌نینه‌وه‌ وتی‌ «پشتی‌ مرنێ‌ « به‌لامه‌وه‌ سه‌یر بوو وێنه‌ی‌ خاتونێكی‌ لێبوو پێم وت ئه‌مه‌ كێیه‌ وتی‌ ئه‌وه‌ یه‌كه‌م ژنه‌شانۆكاری‌ كورده‌و خه‌ڵكی‌ سلێمانیه‌.
هه‌ر له‌ ته‌قسیم له‌ دوكانێكی‌ گۆڕینه‌وه‌ی‌ پاره‌ به‌ ته‌نیشت ئاڵای‌ ئه‌مه‌ریكاو زۆر شوێنی‌ تره‌وه‌ ئاڵای‌ كوردستانیشم بینی‌، له‌ دڵی‌ خۆمدا گوتم خۆ ئه‌گه‌ر ئه‌وناسیونالیسته‌ كه‌س نه‌بینه‌ی‌ ته‌رابزۆن به‌مه‌ بزانێ‌ ده‌یكات به‌ رۆژی‌ خۆی‌.

ئه‌سته‌نبوڵی‌ پاشاو سوڵتان
ئه‌رێ‌ ئه‌و ئه‌سته‌نبوڵه‌ كه‌ به‌ درێژای‌ مێژوو به‌ ملیۆن كرێكارو سه‌رباز پاراستویانه‌و دروستیان كردووه‌، له‌ مێژوودا هه‌زاران شۆخ و شه‌نگ، گۆرانی‌ بێژو میوزیكزان، شاعیرو نوسه‌ورو رۆژنامه‌وان، فیداكارو قاره‌مان و عاشق تێیدا ژیاون و رۆیشتون، خێره‌ هه‌موو كوچه‌و كۆڵانه‌كانی‌ به‌ ناوی‌ سوڵتان و پاشا هه‌وه‌س بازه‌كانه‌وه‌یه‌ ئاخر به‌ هه‌ر گه‌ڕه‌ك و كوچه‌یه‌كدا ده‌ڕۆی‌ پاشاو سوڵتانێكت لێ‌ قوت ده‌بێته‌وه‌، لێخوڕی‌ ته‌كسیه‌ك پیی‌ ووتم ئه‌م شاره‌ شاری‌ سوڵتان و پاشا خۆپه‌رسته‌كانه‌و ئه‌وان له‌ هه‌ر كوێ‌ بایه‌كیان لێبووبێته‌وه‌، ئه‌وشوێنه‌یان به‌ناوه‌وه‌ ناو نراوه‌، جا خۆش ئه‌وه‌ بوو، من توشی‌ دوو مسته‌فا پاشا بووبووم گۆجه‌ مسته‌فا پاشاو كوچك مسته‌فا پاشا .
وه‌ره‌ له‌ شارێكدا نازم حیكمه‌ت، یه‌شار كه‌ماڵ، ئۆرهان پامۆك، عه‌زیز نه‌سین و زۆری‌ تر ژیابن وداهێنانیان كردبێت، كه‌چی‌ گه‌ڕه‌ك و جاده‌و بانه‌كان و شاره‌وانیه‌كان به‌ ناوی‌ ئه‌و پاشاو سوڵتانانه‌وه‌ بن، كه‌ هه‌میشه‌ له‌ یه‌كتر و له‌ میلله‌ت و له‌ كچانی‌ شۆخ و شه‌نگی‌ وڵات له‌ بۆسه‌دا بووبن، ئاخر هه‌ندێك له‌و پاشاو سوڵتانانه‌ ته‌نانه‌ت نه‌ك هه‌ر مێباز نێر بازیشیان كردووه‌، كه‌ لاپه‌ڕه‌ شاراوه‌كانی‌ مێژوو، یان ئه‌و لاپه‌ڕانه‌ی‌ به‌ سپێتی‌ ماونه‌ته‌وه‌ له‌ مێژوودا ده‌خوێنیته‌وه‌ « شی‌ ده‌كه‌یته‌وه‌ « تێده‌گه‌یت ئه‌و سوڵتان و پاشایانه‌ چ ده‌عباو جانه‌وه‌رێك بوونه‌.
دیاره‌ زۆر بابه‌ت وپرسی‌ تر هه‌یه‌ له‌ باره‌ی‌ ئه‌سته‌نبوڵه‌وه‌ قسه‌ی‌ له‌ سه‌ر بكه‌ین، ده‌رباره‌ی‌ ژن، ده‌ریا، ماسی‌ و زۆر شتی‌ دیكه‌، ده‌رباره‌ی‌ مۆزه‌خانه‌ی‌ پاكیزه‌یی‌ پامۆك كه‌ بۆ خۆی‌ بابه‌تێكی‌ مایه‌ی‌ هه‌ڵوه‌سته‌یه‌، هه‌موو ئه‌مانه‌ هی‌ ئه‌وه‌ن مرۆڤ جارێكی‌ تر له‌ باره‌یانه‌وه‌ بنووسێت، به‌ڵام له‌وانه‌ گه‌ڕام بۆ جارێكی‌ تروسه‌فه‌رێكی‌ تر، ئه‌مه‌ ئه‌گه‌ر له‌ پڕێكا له‌ نێوفڕگه‌ یان هه‌ر شوێنێكی‌ تر پێت نه‌ڵێن تۆ بۆ له‌ وڵاتی‌ ئێمه‌دای‌ .
ئه‌وه‌تان بیر نه‌چێت ئه‌گه‌ر به‌ ویژدانه‌وه‌ سه‌رژمێری‌ وراپرسی‌ له‌ ئه‌سته‌نبوڵ بكرێت و خه‌ڵك ترسی‌ ئه‌وه‌ی‌ نه‌بێت له‌ سه‌ر راستی‌ سزاده‌درێت، ئه‌وه‌له‌و شاره‌ گه‌وره‌یه‌دا كه‌ سێ‌ هێنده‌ی‌ هه‌رێم زیاتر حه‌شیمه‌تی‌ تیایه‌ تورك ده‌بنه‌ كه‌مینه‌، یان هه‌ر له‌ بنه‌ڕه‌تا كه‌مینه‌ن، له‌ ئه‌سته‌نبوڵ جگه‌ له‌ تورك 10 نه‌ته‌وه‌و ریشه‌ی‌ دیكه‌ ده‌ژین .

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

مامه‌ند كه‌ركوكی‌

1 ئه‌م جه‌هل و نیفاق و سیفه‌و زیلله‌ته‌ ده‌كه‌ی‌ ئه‌م ...