سەرەکی » ئەدەب - سێبەر و سایە » دەستەی كوردستانی لە كتێبێكدا دەیان توێژینەوەی زانستی پێشكەش بە خوێندكاران دەكات

دەستەی كوردستانی لە كتێبێكدا دەیان توێژینەوەی زانستی پێشكەش بە خوێندكاران دەكات

دەستەی كوردستانی بۆ دراساتی ستراتیجی و توێژینەوەی زانستی دەیان توێژینەوەی زانستی لە بوارەكانی ژینگەو زانستی زەوی، لەچوارچێوەی كتێبێكدا بەناونیشانی (گورزەیەك لەتوێژینەوە بڵاوكراوەكانی دەستەی كوردستانی بۆ دیراساتی ستراتیجی و توێژینەوەی زانستی لە بوارەكانی ژینگەو زانستی زەوی لەنێوان ساڵانی 2009-2019) وەك دیارییەك پێشكەش بە خوێندكارانی بەشی جیۆلۆجی و ژینگە دەكات.
كتێبەكە پێكهاتووە لە25 توێژینەوەو 346 لاپەڕەو بەتیراژی 500 دانە چاپكراوە، توێژینەوەكانیش لەلایەن چەندین پڕۆفیسۆرو دكتۆرو توێژەرو پسپۆڕو شارەزای ناوخۆیی و بیانییەوە ئامادەكراون و لە گۆڤارە زانستییە ناوخۆیی و جیهانییە باوەڕپێكراوەكاندا بڵاوكراونەتەوە. توێژینەوەكان سوودێكی بەرچاویان هەیە بۆ خوێندكارانی بەشی جیۆلۆجی و ژینگەو لایەنە پەیوەندیدارەكانی هەردوو بوارەكە.
بڕیارە بەمنزیكانە لەڕێوڕەسمێكدا لەدەستەی كوردستانی، كتێبەكە پێشكەش بە خوێندكارانی بەشی جیۆلۆجی و ژینگە بكرێت. هەروەها بۆ دەستكەوتنی كتێبەكە، سەردانی دەستەی كوردستانی بکە.

سەرۆكی دەستەی كوردستانی: لە كتێبەكەدا 25 توێژینەوەی زانستی بڵاوكراوەتەوە
لەبارەی كتێبەكەوە، پڕۆفیسۆر د.پۆڵا ئازاد خانەقا سەرۆكی دەستەی كوردستانی بۆ دیراساتی ستراتیجی و توێژینەوەی زانستی رایگەیاند: دەستەی كوردستانی، نزیكەی 12 ساڵە توێژینەوەی زانستی دەكات لەبوارەكانی جیۆلۆجی و ژینگە، بەتایبەت لەبارەی جیۆلۆجی كوردستان، چۆنێتیی چاككردنەوەی نەخشەی جیۆلۆجی لەكوردستان، بۆ ئەو مەبەستەش چەندین توێژینەوەی ئاستبەرزی ئەنجامداوە لەهەموو هەرێمی كوردستان، وتیشی: لەمیانی توێژینەوەكانی دەستەی كوردستانی و مامۆستایانی دەستەی كوردستانی و زانكۆی سلێمانی و چەند مامۆستایەكی دیكەش لە بواری جیۆلۆجیدا كە بەشداربوون لە توێژینەوەكاندا، توانراوە جیۆلۆجی كوردستان زیاتر بناسێنرێت، توانراوە توێژینەوەی ئاستبەرز ئەنجامبدرێت بۆ ئەوەی زیاتر لە بەردی كوردستان و چۆنێتیی بەكارهێنانی سامانە سروشتییەكان تێبگەین چ لە بواری جیۆلۆجی، چ لە بواری ژینگەدا.
وتیشی: لەكتێبەكەدا 25 توێژینەوەی زانستی بڵاوكراوەتەوە، توێژینەوەكانیش لەماوەی 10 ساڵی رابردوودا ئەنجامدراون، پێمانباشبوو ئەم كتێبە وەك دیاری ببەخشین بەخوێندكارانی بواری جیۆلۆجی و ژینگە، هیوادارین سوودی لێوەربگیرێت.

دەستەی كوردستانی بەردەوام لەخزمەت زانست و زانستخوازاندایە
شایانی باسە، دەستەی كوردستانی بۆ دیراساتی ستراتیجی و توێژینەوەی زانستی، نزیكەی 400 توێژینەوەی زانستی ‌و دەیان راپۆرتی زانستی لەبوارە جیاوازەكاندا ئامادەكردووەو لەڕێگەی 22 تاقیگەوە بەردەوام لەخزمەت زانست و زانستخوازان و خوێندكاراندایەو تائێستاش نزیكەی 200 خوێندكاری ماستەرو دكتۆرا لەهەموو ناوچەكانی كوردستانەوە، تاقیكردنەوەی كارەكانیان بەسەرپەرشتی پسپۆڕەكانی دەستەی كوردستانی و لەتاقیگەكانی دەستەی كوردستانی تەواو كردووە. هەروەها لەڕێگەی تاقیگەی فێرخوازی خوێندكاران-ەوە، كار لەسەر ئاشناكردنی زیاتری خوێندكاران بەلایەنە جیاوازەكانی بوارە زانستییەكان دەكات، بۆ ئەو مەبەستەش تائێستا چەند جارێك خوێندكارانی قۆناغە جیاوازەكانی خوێندن بە شێوەی گروپ لە ناوچە جیاجیاكانەوە سەردانی دەستەی كوردستانی-یان كردووەو بڕیاریشە هەفتانە سەردانی خوێندكاران بەردەوامبێت‌.

بۆ زانیاریی زیاتر سەردانی سایتی دەستەی كوردستانی بكە بەم ناونیشانە:
http://www.kissr.edu.krd

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*