سەرەکی » دۆسێ » ئێران ئامادەیی خۆی بۆ دانوستان لەگەڵ ئەمریكادا دەردەبڕێت

لە رێكەوتنە ئەتۆمییەكەش پاشەكشە ناكات

ئێران ئامادەیی خۆی بۆ دانوستان لەگەڵ ئەمریكادا دەردەبڕێت

سەرۆكی ئێران دەڵێت، ئەمریكا دەیەوێت گفتووگۆ لەگەڵ ئێران بكات، ئەوانیش گفتووگۆ رەتناكەنەوە، ئەمەش لەكاتێكدایە كە پێشتر تاران رەتیكردبووەوە وڵاتەكەی لە رێككەوتنە ئەتۆمییەكەی تەمموزی ساڵی 2015 پاشەكشە بكات.
لە سەرەتای كانوونی یەكەمی 2019وە عەباس عیراقچی، جێگری وەزیری دەرەوەی ئێران رایگەیاندبوو، لە رێككەوتنە ئەتۆمییەكەی تەمموزی 2015 پاشەكشە ناكەن و نایانەوێت لەو رێككەوتنە ئەتۆمییەكە بكشێینەوە.
جێگری وەزیری دەرەوەی ئێران رایگەیاندبوو» نایانەوێت لە رێككەوتنە ئەتۆمییەكەی 2015 پاشەكشە بكەن، ئەگەر لایەنەكانی تر پابەندبن، ئەوانیش دەگەڕێنەوە بەشێوەیەكی تەواوەتی دەگەڕێنەوە بۆ جێبەجێكردنی».
عیراقچی لەمیانی دیدارێكی لەگەڵ وەزیری دەرەوەی ژاپۆن، دەڵێت»هەركاتێك سزا سەپێنراوەكانی سەر وڵاتەكەی هەڵگیران كە بەهۆی بەرنامە ئەتۆمییەكەوە بەسەریاندا سەپێنراوە، ئەوانیش بەشێوەیەكی تەواوەتی پابەندی رێككەوتنەكە دەبن».
رێككەوتنامەی ئەتۆمی لە مانگی تەمموزی 2015 لەنێوان ئێران و هەریەك لە (ئەمریكا، روسیا، چین، ئەڵمانیا، بەریتانیا، و فەرەنسا) ئیمزاكرا بۆ سنورداركردنی پیتاندنی یۆرانیۆم لەلایەن ئێران و كەمكردنەوەی چالاكییە ئەتۆمییەكانی وڵاتەكە، لەبەرانبەر هەڵگرتنی سزا نێودەوڵەتییەكانی سەر تاران.
لەمانگی ئایاری 2018، و لە دوای راگەیاندنی پاشەكشەكردنی ئەمریكا لە رێككەوتەنە ئەتۆمییەكە، واشنتۆن سازاكانی بەسەر تاراندا سەپاندەوە، لەبەرانبەردا كۆماری ئیسلامیش بەچەند قۆناغێك كەمكردنەوەی پابەندبونی وڵاتەكە بە رێككەوتنە ئەتۆمییەكە راگەیاند.

گوشارە ئابورییەكان
حەسەن رۆحانی سەرۆكی ئێران لە سەرەتای مانگی كانوونی یەكەمی 2019 رایگەیاندبوو، ویلایەتە یەكگرتوەكان پیلانی بۆ لاوازكردن و شكستپێهێنانی ئێران داڕشتبوو لەڕێگەی گوشارە ئابورییەكان، بەڵام ئێران توانی ئەو رەوشە ئابورییە سەختە تێبپەڕێنێت و سەركەوتنیشی لەو رووەوە بەدەستهێنا.
حەسەن رۆحانی لە 3ی كانوونی یەكەمی 2019 و لە میانی ساڵیادی رۆژی جیهانی خاوەن پێداویستیە تایبەتەكاندا رایگەیاندبوو»لەدوای پاشەكشەی ئەمریكا لە رێككەوتننامە ئەتۆمیەكەی ساڵی 2015، و دووبارە سەپاندنەوەی سزا ئابورییەكان بەسەر ولاتەكەماندا، ئێران توانی بەرگەبگرێت و نەهێڵێت ئەمریكا بە ئامانجەكانی خۆی بگات».
بە گوتەی رۆحانی» ئەمریكا چەندان جار بەنهێنی داوای گفتووگۆی كردووە لەبارەی ئەو ناكۆكیانەی كە وڵاتەكەی لەبارەی رێككەوتننامەكەوە لەگەڵ ئەوروپاییەكاندا هەیەتی، بەڵام ئەمریكا دەبێت باش بزانێت كە سیاسەتەكانی بەرامبەر ئێران هەڵەیە و بەردەوامبوون لەسەر ئەو سیاسەتانەش هیچ سودێكی بۆ وڵاتەكە نابێت».
سەرۆكی ئێران دەڵێت»ئێمە ناتوانین ئەو گوشارە ئابورییانە لەسەر گەلی ئێران دروستبوون لابدەین، بەڵام دەتوانین، هەوڵ بۆ سوككردن و كەمكردنەوەیان بخەینەگەڕ».
لە 2ی تشرینی یەكەمی 2019 جێگری سەرۆك كۆماری ئێران رایگەیاندبوو» ئێران توانی رووبەڕووی سیاسەتی زۆرترین گوشار ببێتەوە كە لەلایەن ئەمریكاوە جێبەجێ دەكرێت، لەگەڵ ئەوەی بۆ ماوەی دوو ساڵە ئەو سیاسەتانە بەرانبەر بە تاران پەیڕە و دەكرێت، بەڵام نەتوانراوە هەناردەكردنی نەوت رابگرێت».
لە مانگی ئایاری 2018، ویلایەتە یەكگرتوەكان لە رێككەوتننامە ئەتۆمییەكەی تەمموزی ساڵی 2015 بەچەند قۆناغێك پاشەكشەی كرد و بە چەند قۆناغێكیش سزاكانی بەسەر ئێراندا سەپاندەوە.
ئەو سزایانەی ئەمریكا بەسەر ئێران سەپاندویەتی بریتین لە، قەدەغەكردنی كرینی نەوت لە ئێران، بلۆككردنی بانكی ناوەندی تاران، راگرتنی مامەڵەی بازرگانی لەگەڵ ئەو وڵاتەن لەگەڵ چەندان سزای تری ئابووری.

گفتووی گۆی نوێ‌ لەنێوان تاران و واشنتۆن
سەرۆكی ئێران دەڵێت»ئەمریكا خوازیاری سازكردنی گفتووگۆیە لەگەڵ تاراندا».
حەسەن رۆحانی لە 4ی كانوونی یەكەمی 2019، و لە وتارێكیدا رایگەیاند»ترەمپ زیانمەندی یەكەمە لە پاشەكشەكردن لە رێككەوتنی ئەتۆمی، ئێمە پابەندی رێكەوتنەكە دەبین و پێشێلی ناكەین».
بە گوتەی رۆحانی“ئەمریكا خوازیاری گفتووگۆیە لەگەڵ ئێران و ئێمەش دانوستاندن ڕەتناكەینەوە».
سەرۆكی ئێران رایگەیاندبوو «هەر كاتێك ترەمپ سزاكانی سەر ئێران لابەرد، ئەوان ئامادەن لەگەڵیدا كۆببنەوە، ئەوان هەوڵدەدەن مەترسییەكانی سەر گەلی ئێران كەمبكەنەوە».

print

 65 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*