سەرەکی » دۆسێ » نەتەوە یەكگرتووەكان:500 هەزار كەس لە ئیدلیب ئاوارەبوون

داوای راگرتنی شەڕ دەكات

نەتەوە یەكگرتووەكان:500 هەزار كەس لە ئیدلیب ئاوارەبوون

نەتەوە یەكگرتووەكان دەڵێتـ، زیاتر لە نیو ملیۆن كەس لەماوەی مانگێكدا بەهۆی شەڕ و بۆردومانەكان لە باكووری خۆرئاوای سوریا ئاوارەبوون، لە ئاكامی هەڵمەتە سەربازییەكانی هێزەكانی حكومەتی سوریا و روسیای هاوپەیمانی.
دێڤید سوانسۆن، وتەبێژی ئیقلیمی نوسینگەی رێكخستنی كاروباری مرۆیی سەر بە نەتەوە یەكگرتووەكان، لە 5ی شوباتی 2020 بە ئاژانسی (فرانس پرێس)ی رایگەیاندووە»لە یەكی كانوونی دووەمەوە، نزیكەی 520 هەزار كەس ماڵوحاڵی خۆیان جێهێشتووە كە هەشتا لەسەدیان ژن و منداڵن».
لە مانگی كانوونی یەكەمی رابردووەوە، هێزەكانی حكومەتی سوریا بە پاڵپشتی روسیا، هەڵمەتێكی سەربازی بۆ گرتنەوەی ناوچەكانی ئیدلیب و دەروبەری دەستپێكردووە كە زیاتر لە سێ‌ ملیۆن كەس تێیدا نیشتەجێن و نیوەیان ئاوارەن، و هەیئەی تەحریری شام (نوسرەی پێشوو) و هاوپەیمانەكانی دەسەت باڵان تێیدا، گروپە ئۆپۆزسیۆنەكانی تریش كە هەژموونێكی كەمتریان هەیە، لە ناوچەكە بونیان هەیە.
سوانسۆن دەڵێت»كاریی تەندوتیژی رۆژانە بۆتە مایەی دروستكردنی نەهامەتی بۆ سەدان هەزار كەسی دانیشتوانی ناوچەكە».
ئاوارەكان روو لەو ناوچانە دەكەن كە بۆردومانەكان نایانگرێتەوە، بە تایبەت ئەو شار و كەمپانەی ئاوارەكانی تێیدا نیشتەجێن لە نزیك سنورەكانی باكووری خۆرئاوای ئیدلیب، لە هەمان كاتدا هەزاران كەسی تر روویان لە ناوچەكانی عەفرین و ئەعزاز كردووە لە باكووری پارێزگەی حەلەب كە لەژێر دەسەڵاتی گروپە سورییەكانی سەر بە ئەنقەرەدان.
تەوژمی ئاوارەبوونی ئەم دواییە لە سەرەتای دەستپێكردنی ناكۆكییەكان لە سوریا لە ساڵی 2011 بە یەكێك لە گەورەترین تەوژم دادەنرێت وەك سوانسۆن باسی دەكات»رەوشی مرۆیی بەشێوەیەك رووی لە خراپبوون كردووە لە ناوچەكانی ئیدلیب، بەجۆرێك كە لە كۆتایی مانگی نیسانەوە تا كۆتایی ئابی رابردوو، زیاتر لە 400 هەزار كەس ئاوارەبوون، زۆرێك لەوانە بۆ چەندەمین جارە ئاوارەدەبن، ئەمەش بەهۆی ئەو هەڵمەتە سەربازییە هاوشێوانەی كە لەئێستادا دیمەشق بە پاڵپشتی مۆسكۆ لەم ماوەیەدا دەستیپێكردووە.
لەو دەمەی گروپە جیهادییەكان دەستییان بەسەر تەواوی پارێزگەكەدا گرتووە لە ساڵی 2015وە، هێزەكانی حكومەتی سوریا بە پاڵپشتی روسیا بۆردومانەكانی بۆسەر ئیدلیب دەستپێكردووە، و ناوبەناویش هێرشی زەمینی ئەنجام دەدات كە لێوەی پێشڕەوی دەكات و زۆرجاریش بە رێككەوتنی ئاگربەست كۆتاییان دێت كە لەلایەن روسیا و توركیاوە سەرپەرشتی دەكرێن، دوایین رێككەوتنی ئاگربەستیش لەو بارەیەوە لەم ماوەیەی دواییدا بوو كە تەنیا چەند رۆژێك بڕی كرد.
لەم ماوەیەی دواییدا، هێزەكانی سوپای سوریا توانیان شاری مەعرەت لنوعمان كۆنترۆڵبكەنەوە كە دووەم گەورەترین شاری ئیدیلیبە، دوای ئەوەی هەزاران كەس بەچەند قۆناغێك ئاوەبوون.
لەئێستادا هێزەكانی سوپای سوریا، سەرقاڵی شەڕی توند و رووبەڕووبوونەوەن لەگەڵ گروپە چەكدارەكانی ئۆپۆزسیۆن لە نزیك شاری سەراقب كە بە هەمان شێوە دانیشتوانەكەی شارەكەیان چۆڵكردووە و هەوڵ دەدرێت شارەكە كۆنترۆڵ بكرێت كە خاڵی یەكترگرتنەوەی نێوان دوو رێگەی نێودەوڵەتی ستراتیژییە كە چەند پارێزگەیەك لە سوریادا بەیكەوە دەبەستێتەوە.
هەر لەو چوارچێوەیەدا، ئەنتۆیۆ گۆتێریش، سكرتێری گشتی نەتەوە یەكگرتووەكان داوای راگرتنی كارە جەنگییەكانی كرد لە نێوان توركیا و سوریا لە پارێزگەی ئیدیلیب، چونكە بە وتەی ئەو «گۆڕانی سروشتی ناكۆكییەكان، دەبێتە هۆی دروستكردنی نیگەرانییەكی گەورە».
گۆتێریش لە كۆنفرانسێكی رۆژنامەوانی لە 4ی شوباتی 2020 رایگەیاندبوو»بەر لە پەرەسەندنی رەوشەكەو كە رەنگە لەژێر كۆنترۆڵ دەربچێت، پێویستە كارە جەنگییەكان رابگیرێن».
بە وتەی گۆتێریش»ئێمە نیگەرانیین بەتایبەت بە بینینی سوپای سوریا و سوپای توركیا كە یەكتر بۆردومان دەكەن لە ئیدلیب كە دوایین مۆڵگەی گروپە جیهادییە چەكدارەكانە لە باكووری خۆرئاوای سوریا.
توركیا لە 4ی شوباتی 2020 رایگەیاندبوو، رێگە بە هێزەكانی سوپای سوریا نادات لە پێشڕەوی زیاتر بكات لە ئیدلیب، ئەمەش لەكاتێكدایە كە شەوی پێشووتر بەهۆی تۆپبارانی سوپای سوریاوە، هەشت سەربازی تورك كوژران، لەبەرانبەردا ئەنقەرە پێگەكانی سوریای لە ناوچەكە بۆردومان كرد و بەوهۆیەوە لانی كەم 13 سەربازی سوری كوژران.
لەماوەی دوو مانگدا، نزیكەی نیو ملیۆن كەس لە باكوور خۆرئاوای سوریا بەهۆی هێرشەكانی سوپای سوریاوە كە لەلایەن روسیاوە پشتیوانی دەكرێن، بۆسەر ناوچەكانی ژێر دەستی گروپە جیهادییە چەكدارەكانی ئۆپۆزسیۆن، ئاوارەبوون.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*