سەرەکی » ئاراستە » له‌ ئه‌حمه‌د پاشای باجه‌لانه‌وه‌ بۆ مه‌لا ئه‌حمه‌دی كۆر

ئومه‌رگومبه‌ت _ وراتی كۆیه‌

له‌ ئه‌حمه‌د پاشای باجه‌لانه‌وه‌ بۆ مه‌لا ئه‌حمه‌دی كۆر

خانه‌قین و باجه‌ڵان و ده‌رته‌نگ
ناوچه‌ی‌ خانه‌قین به‌شێك بووه‌ له‌ووڵاتی‌ گه‌لی «گۆتییه‌كان»و «لۆلۆیی» بنه‌چه‌ی‌ نه‌ته‌وه‌ی‌ كورد له‌هه‌زاره‌ی‌ سێیه‌می پ. ز پێكهاتبوو له‌كرمانشان و سه‌رپێڵی زه‌هاو (ئه‌لوان «حه‌لوان» و ده‌رته‌نگ) هه‌تا زێی بچووك و كه‌ركوكی كورد پایته‌ختی ده‌وڵه‌تی گۆتییه‌كان بووه‌و (ناوڕایتوم) له‌سه‌ده‌ی هه‌شته‌می پ. زخانمی پادشای گۆتییه‌كان بووه‌و خانه‌قین ناوی‌ (ئارتمیتا) بووه‌ به‌ناوی‌ (ئارتمیت) خواوه‌ندی ئیگریكیه‌كان له‌ساڵه‌كانی‌ (33 هه‌تا 127 پ. ز) له‌سه‌رده‌می عوسمانلیه‌ داگیركه‌ره‌كانی‌ توركی خوێنمژ خانه‌قین له‌چوارچێوه‌ی‌ سنوری‌ میرنشینی «باجه‌ڵان» بووه‌و پایته‌خته‌كه‌ی‌ شاری زه‌هاو (ده‌رته‌نگ) بووه‌، سنوره‌كه‌شی له‌شاره‌زوورو كه‌ركوك و موسڵی كورد بووه‌، میر «عه‌بداڵ به‌گ» دامه‌زرێنه‌ری‌ میرنشینی باجه‌ڵان بووه‌، جه‌وه‌ڵ حه‌مرین سنوریان بووه‌ هه‌تا چیاكانی‌ سه‌رپێڵ و روباری‌ سیروانی‌ كوردو پشتكێو و كرماشان. له‌ ڕۆژهه‌ڵات به‌لوڕی و له‌باشوور به‌لوڕی‌ و كرمانجی و له‌باكوری‌ كوردستان كه‌ نیشته‌جێ و زۆرن به‌زازایی ده‌دوێن و له‌موسڵ كه‌ركوك و گه‌رمه‌سێر بونیان زۆره‌. یه‌كێك له‌میره‌كانی‌ ئه‌م مه‌مله‌كه‌ته‌ (ئه‌حمه‌د پاشای باجه‌ڵان) بووه‌ سه‌ری‌ بۆ نادر پاشای ئه‌فشار دانه‌نه‌واندووه‌، بۆیه‌ هه‌میشه‌ له‌شه‌ڕو پێكداداندابون هه‌تا ساڵی (1732)ی زاینی ئه‌ماره‌ته‌كه‌یان له‌ ده‌رته‌نگ و سه‌رپێڵ له‌ناوچوو په‌نای‌ هێنایه‌به‌ر باشووری‌ كوردستانه‌كه‌ی‌ خۆی، له‌ساڵی (1778) به‌هۆی نه‌خۆشییه‌وه‌ له‌(قه‌ره‌داغ) كۆچی دوایی كردووه‌و مه‌حمود پاشای برای جێی گرتۆته‌وه‌. نادر پاشا دامه‌زرێنه‌ری‌ سولاله‌ی‌ ئه‌فشارییه‌كان بوو، له‌ئیران له‌ساڵی (1688) له‌دایك بووه‌ له‌ساڵی (1726) بووه‌ به‌پاشای ئه‌فشاره‌كانی‌ ئێران و تورك. له‌(27ی نۆڤه‌مبه‌ری‌ 1732) نادر پاشا په‌لاماری‌ هۆزه‌ كورده‌كانی‌ به‌ختیاری‌ و هه‌فت له‌نگ و زه‌ندی داو كرماشانی داگیركردو به‌ره‌و (ماهی ده‌شت)و (كره‌ند)و (شاخی كاوروان_ كه‌هواره‌) كه‌وته‌ڕێ‌و په‌لاماری‌ (ئه‌حمه‌د پاشای باجه‌ڵان)داو سه‌رپێڵی زه‌هاوی‌ داگیركردو له‌(18ی دیسه‌مبه‌ری‌ 1732) به‌ره‌و كه‌ركوك هێرشی بردو له‌وێشه‌وه‌ به‌ره‌و قه‌ره‌ته‌په‌و په‌نگیجه‌ بۆ به‌غدا. له‌و كه‌ین‌و به‌ینی شه‌ڕو جه‌نگانه‌ میرنشینی باجه‌ڵان له‌ناوچوو.

گوندی ئومه‌رگومه‌ت له‌ وراتی كۆیه‌و باجه‌ڵانه‌كان
ئیدریس عه‌بدوڵڵا ئوومه‌رگومبه‌تی خاوه‌نی‌ ماسته‌ر له‌مێژو و مامۆستای‌ زانكۆو خه‌ڵكی گوندی ئوومه‌رگومبه‌ت به‌گوندستانی‌ گووت: به‌رله‌هاتنی سه‌فه‌وییه‌كان حكومڕانی (كرماشان‌و سه‌رپێڵی زه‌هاو) هۆزی كه‌لهوڕو گۆران ده‌یانبرد به‌ڕێوه‌، لقی دووه‌می كه‌لهوڕ سه‌ركرده‌كانی‌ ده‌ره‌ته‌نگ باجه‌ڵانه‌، وڵاتی‌ باجه‌ڵان سه‌رپێڵه‌، به‌ری‌ ڕۆژهه‌ڵاتی‌ زه‌هاو مه‌حاڵی جوانڕۆ قه‌ڵای‌ زه‌نجیرو كه‌ره‌ندو به‌ری‌ باشوور كێوی‌ زه‌نكه‌سیان‌و شاكه‌كوش و هه‌تا ڕوباری‌ ئه‌ڵوه‌نده‌، به‌ری‌ ڕۆژئاوا سلیمانیه‌ مه‌یدان‌و (بن كوره‌)و قله‌یه‌و به‌شی ڕۆژهه‌ڵاتی موسڵی كوردو گونده‌كانی‌ (باشی پیتا) ئومه‌ركان_ جه‌لیوخان_ئارابه‌چی_ گرویاقوب ده‌روو، جه‌له‌ولا_ مه‌نه‌لی تیره‌ی‌ قازانلوی باجه‌ڵان تیاده‌ژین، له‌سنوری‌ كه‌ركوكی‌ كوردو هه‌ولێریش ده‌ربه‌ندی ده‌ژین. له‌ ووراتی كۆیان (ئوومه‌رگومبه‌ت_ سێ گردكان_سێ كێنی_ چه‌مه‌زه‌رده‌ڵه‌_ كێنی له‌له‌_ گه‌رمك_ موخه‌ره‌س_ كانی‌ ڕه‌ش_ شیوه‌جان‌و ناسرومیسر) به‌زۆری نیشته‌جێن، نادر پاشای ئه‌فشار ده‌یویست باج‌و خه‌راجی عوسمانلی كه‌ له‌ڕێی ئه‌حمه‌د پاشای میری باجه‌ڵانه‌وه‌ كۆده‌كرایه‌وه‌ بدرێته‌ ئه‌فشاریه‌كان، ئه‌حمه‌د پاشا نه‌چووه‌ ژێر بار ئه‌وه‌بوو له‌پایزی (1731) هێرشێكی گه‌وره‌ ئه‌فشاری‌ كرایه‌سه‌ر ووڵاتی‌ ئه‌حمه‌د پاشای باجه‌ڵان. له‌و شه‌ڕه‌دا سوپاكه‌ی‌ نادر شا شكستێكی گه‌وره‌ی‌ هێناو سه‌رله‌شكره‌كه‌شی كوژراو پاشان جارێكی دی هێرشێكی خوێناوی‌‌و وه‌حشیانه‌ی‌ كرده‌وه‌سه‌ر كورده‌كان، لافاوی خوێنی هه‌ڵسان و ئه‌وانه‌ی‌ كه‌ مابوون له‌سه‌ربازو میرو خه‌ڵكی باجه‌ڵان پاشه‌كشه‌یان كرد، قۆناغ به‌قۆناغ به‌ره‌و ناوچه‌كانی‌ باشووری‌ كوردستان دێن‌و لێره‌ ناوی‌ خۆیی و كه‌سایه‌تییه‌ دیاره‌كانی‌ له‌شكره‌كه‌یی و بنه‌ماڵه‌كه‌ی ده‌گۆڕێ، خۆی به‌(جومعه‌ ده‌ربه‌ندی) ده‌ناسێنێ، له‌باشور عوسمانلیه‌ توركه‌ داگیركه‌ره‌كان ئه‌حمه‌د پاشای باجه‌ڵان ڕاده‌سپێرن بۆ حاكمی (هه‌مه‌دان‌و كرماشان‌و زه‌هاو و كه‌ركوك) به‌وه‌ بووه‌ میری باجه‌ڵان، دواتر دێنه‌ خانه‌قین و میرایه‌تییه‌كه‌یان ڕێك ده‌خه‌نه‌وه‌، پاش شه‌ش مانگ له‌خانه‌قین، نادر شا سه‌ربازه‌كانی‌ له‌ژێر ناوی‌ خومچی‌و بازرگان‌و كاروانچی ده‌نێرێته‌ ئه‌و ناوچه‌یه‌ تاكو ئه‌حمه‌د پاشا بكوژن، به‌ڵام ئه‌مان پێیده‌زانن و ئیدی به‌یه‌كجاری‌ ئه‌و ناوچه‌یه‌ چۆڵ ده‌كه‌ن و به‌ره‌و كه‌ناره‌كانی‌ زێی بچوك خۆیان بزرده‌كه‌ن، ئه‌وجا له‌نزیك گوندی (مه‌زران)ی كۆیه‌ له‌هه‌واری‌ (كانی‌ قه‌برۆك) نیشته‌جێ ئه‌بن، پاشان ئه‌چنه‌ هه‌واری‌ (ئۆمه‌ر كوشیاو)و جمعه‌ ده‌ربه‌ندی له‌وێ كۆچی دوایی ده‌كا، ئه‌وجا هۆزه‌كه‌ی‌ ڕووده‌كه‌نه‌ (بانی قه‌یتاس) له‌ساڵی (1748) ئوومه‌رگومه‌ت ئاوه‌دان ده‌كه‌نه‌وه‌، دواتر له‌ئه‌نجامی‌ زۆربوون گونده‌كانی‌ (گۆڕقه‌ره‌ج_ سێگردكان_ كێنه‌له‌_ سێ كێنی_ موخه‌ره‌س_ شیوه‌جان_ گه‌رمك) ئاوه‌دان ده‌كه‌نه‌وه‌. سه‌باره‌ت به‌ شێوه‌زاری‌ ئوومه‌رگومبه‌ت مامۆستا ئیدریس به‌گوندستانی‌ گووت: زمانی‌ كوردی چوار لكی لێده‌بێته‌وه‌ «شێوه‌زاری‌ كرمانجی ژوورو، شێوه‌زاری‌ كرمانجی خوارو، شێوه‌زاری‌ كرماشانی، لوڕی و له‌كی» گونده‌كانی‌ ئێمه‌ تێكڕایان به‌ لوڕی_ كه‌لهوڕی ده‌دوێن هه‌تا ئێستاش‌و منداڵانیش به‌لوڕی قسان ده‌كه‌ن. لێره‌ ژماره‌یه‌ك شوێنه‌واری‌ مێژوویی هه‌ن بۆ پێش هاتنی سوپای داگیركه‌ری‌ عه‌ره‌ب ده‌گه‌ڕێنه‌وه‌، ژیان لێره‌ پێش زایین هه‌بووه‌.

ژیان ‌و گوزه‌ران له‌ ئومه‌رگومبه‌ت
تاته‌ (خه‌جیله‌ حه‌مه‌ده‌مین) له‌ته‌مه‌نی‌ شه‌ست به‌ره‌و ژووره‌، كه‌ پێكه‌وه‌ له‌گوندی كه‌ون باس‌و خواسمان دامه‌زراند وه‌ لوڕی كه‌وته‌ باس به‌گوندستانی‌ گوت: من منداڵ بیم كاروانیم ده‌كرد، «تویره‌« نانم هه‌ڵده‌گرت به‌ره‌و هه‌ڵه‌ته‌كانی‌ پشتی ئاوایی، كه‌ گه‌وره‌ بیم بیمه‌ توتنه‌وان له‌«شه‌تر واته‌ شه‌تڵی توتن»ه‌وه‌ «گوول هه‌ڵدرایا»و خاكاو ده‌كرا شه‌تڵ لێدان، لانكم له‌نزیك «گول واته‌ گۆل»ی توتن داده‌نیاو كارم ده‌كرد، هه‌تا داو لێ دان و په‌لك لێكردنه‌وه‌، سه‌پانیشم كردووه‌، له‌یره‌ ژن ئازاو مێرخاس بی، شان وه‌ شانی پیاو كاركردی، شه‌غره‌م كردیه‌و (ڕه‌واقه‌)و دوایه‌دمان كیشایه‌وه‌، گیر وه‌ پاگیره‌ بی، قرشه‌كه‌ت پێنوكردی، شیش له‌ناوه‌ڕاست چه‌قیا كه‌رێك ده‌بووه‌ (بنه‌) ده‌به‌سترایه‌وه‌ (شه‌ش) كه‌ر بی گیره‌ كردیان، ئه‌وجا تارم ده‌كه‌یا، له‌سه‌ر شه‌ماڵ دووه‌سیان تا (وا _ با)ی ده‌هات دوایی شه‌ن كردین، لێره‌ دڵشاد (توتین، بیوه‌ر، خه‌یار، بامێ، ته‌ماته‌و باینجان)مان ده‌كرد، فه‌لاحه‌ت و مه‌ڕوماڵات‌و چێرمان به‌خێوده‌كرد، هه‌سترمان بی (واته‌ هێستر)، به‌ر ئه‌ی‌ خانوانه‌ هه‌مووی تانوك كردمان، له‌پشته‌وه‌ «هه‌ویز»مان بی.

ئومه‌رگومبه‌ت و ئاوه‌دانی‌ و ژیان
«ئۆمه‌ر لاله‌حه‌ حه‌دین» ئه‌نجومه‌نی‌ گوندی ئوومه‌رگومبه‌ته‌، به‌ گوندستانی‌ گوت: كاكه‌ دڵشاد له‌ساڵی 2013 ئاوایی كۆنمان به‌جێهێشت (ئاوایی كۆن چووم له‌ناو دۆڵێكی درێژكۆڵه‌ی‌ نێوان ژماره‌یه‌ك گردۆڵكه‌و به‌رزایی دایه‌، ئێستاش خانووه‌ قوڕه‌كان كه‌ به‌شێكن له‌كه‌لتوورو كه‌له‌پوری‌ كورد به‌خشت و قوڕ دروست كراوه‌ و ماونه‌ته‌وه‌، حوجره‌و ته‌كێی مه‌لا ئه‌حمه‌دی كۆریش ماوه‌ته‌وه‌) هاتینه‌بان جاده‌، بیرت بێنمه‌وه‌ له‌ساڵی 1916 له‌شه‌ڕ یه‌كه‌م جه‌هان ئوومه‌رگومبه‌ت (70) حه‌فتا ماڵ بیه‌، (22) جویت هه‌سیان، (واته‌ 22 جوت گا جوتیان بووه‌ بۆ كێڵان و جوتكردن) له‌گونده‌ كۆنه‌كه‌ (138) خانو و ماڵ بون ژماره‌یه‌ك كانیاویان بووه‌. هه‌موو زه‌وییه‌كانی‌ ئوومه‌رگومبه‌ت 19 هه‌زارو 985 دۆنم زه‌وییه‌، (50) كیلۆمه‌تر چوار گۆشه‌یه‌، زه‌وی دێمی پشتاو (4500) دۆنممان هه‌نه‌، وه‌راو (به‌راو) 9000 دۆنم زه‌ویمان هه‌یه‌، ئێستا (500) سه‌ر مه‌ڕو (24) به‌ران و (118) به‌رخی مێ و (93) به‌رخی نێرمان له‌ئاوایی هه‌یه‌. برام وه‌ تۆ بڵێ (1500) بزن و (54) خرت (سابرێن_ نێره‌ی‌ بزن)مان هه‌یه‌ له‌گه‌ڵ (400) مانگاو (64) جوانه‌گا، چێنی»واته‌ كانی‌«مان 7 دانه‌ هه‌یه‌ له‌گه‌ڵ 4 كارێز (شیروه‌زه‌ن)و (زه‌لین)و (مه‌لا كازا)و (ئه‌وڵاگووار). (1970) قوتابخانه‌مان بۆ كراوه‌ته‌وه‌و له‌(8/5/1988) به‌عسی عه‌ره‌بی فاشیزم گونده‌كه‌یان ڕوخاندین و كۆتایی به‌ژیان و ئاوه‌دانی‌ له‌ئوومه‌رگومبه‌ت هات.

مه‌لا ئه‌حمه‌دی كۆری ئومه‌رگومبه‌ت
دوو مه‌لا ئه‌حمه‌دی‌ كۆر له‌مێژووی‌ كوردستان تۆمارن، یه‌ك ئی «سابڵاخی»یه‌ سڵاوی‌ لێ بێت، ئه‌وی دی ئی «ئوومه‌رگومبه‌ت»ه‌و بابه‌تی‌ باسه‌كه‌مانه‌، مه‌لا ئه‌حمه‌دی كۆر «كوێر»ی ئوومه‌رگومبه‌ت (كوڕی بابه‌ ڕه‌سوڵه‌ له‌ نه‌وه‌ی‌ سه‌ید محه‌مه‌د زاهید _ پیر خدری شاهۆیه‌)و له‌نه‌وه‌ی‌ ئه‌حمه‌د پاشای باجه‌ڵانه‌ كه‌ دواتر له‌مێژودا له‌ ووراتی كۆیه‌ به‌(جوما ده‌ربه‌ندی) خۆی ناساندووه‌، مه‌لا ئه‌حمه‌د داكی نێوی ده‌وڵه‌ت خانم بووه‌، خوشكی شاعیری مه‌زن و گه‌وره‌ی‌ كورد (حاجی قادری كۆیی)یه‌ كه‌ له‌شیعرێكی دا ده‌ڵێ واته‌ حاجی قادری ده‌ڵێ:
باوكم ئه‌حمه‌د بوو ناوی‌، فكرم دێ
خه‌ڵكی لادێ بوو، دایكی من فاتێ

«سه‌ركه‌وت محه‌مه‌د نه‌جیب» یه‌كێكه‌ له‌تێكۆشه‌ره‌كانی‌ (ی، ن، ك)و خه‌ڵكی گوندی ئوومه‌رگومبه‌ته‌ ئه‌و به‌گوندستانی‌ ووت: به‌ڵێ من خه‌ڵكی ئێره‌م و له‌كه‌ركوك نیشته‌جێم ئه‌مما ئه‌م گونده‌ ئی شه‌هیدی سه‌ركرده‌ی‌ كورد (عه‌بدولڕه‌زاق محه‌مه‌د عومه‌ر مه‌ولود)ه‌ كه‌ له‌ساڵی 1948 له‌یره‌ له‌دایك بووه‌و له‌(28/3/1991) تاجی شه‌هاده‌تی كوردو كوردستانی‌ له‌ناو كه‌ركوكی كورد كه‌ركوكی كوردستان له‌سه‌رنا، بێمه‌وه‌ سه‌ر باسه‌كه‌م مه‌لا ئه‌حمه‌دی كۆر، كاكه‌ دڵه‌، له‌ساڵی 1829 له‌یره‌ له‌داك بووه‌، له‌ساڵی 1916 لێره‌ كۆچی دوایی كردووه‌، وڵاتان زۆر گه‌ڕاوه‌ تاكو ده‌رسی دین بخوێنێ، سه‌ره‌تا له‌كن بابی خیندیتی له‌م حوجره‌ی‌ فه‌قیانه‌ «ده‌ستی بۆ حوجره‌كه‌ ئاماژه‌ پێ دا» له‌هه‌موو شوێنان خۆشناوه‌تی_ شێخ بزێنی_ كۆیه‌ خوێندێتی، چۆته‌ لای‌ (حاجی كاك ئه‌حمه‌دی شێخ/ سلێمانی‌، زۆری خۆشویستووه‌) دواتر چۆته‌ بریفكان (بریفكان له‌نێوان چیاكانی‌ پانگ_ ناومسك_ ده‌بستی_ دوو ده‌رمشی_ گه‌رما فوك 44كم باكوری‌ خۆرهه‌ڵاتی‌ موسڵ) له‌وێ به‌فه‌قیایه‌تی ئاشه‌وانی‌ چه‌ند ساڵێكی به‌سه‌ر بردووه‌و بۆته‌ موریدی شێخ نوره‌دینی بریفكانی‌، له‌شیعرێكیدا بریفكانی‌ ده‌ڵێ:
هه‌قیقه‌ت قادریمه‌ من _له‌ ته‌نگا وا ڕناعیمه‌
له‌ زه‌وقا سه‌هره‌وه‌ردی و غوڵامی‌ نه‌قشبه‌ندیمه‌
سه‌ركه‌وت محه‌مه‌د نه‌جیب له‌درێژه‌ی‌ قسه‌كانیدا بۆ گوندستان گوتی: مه‌لا ئه‌حمه‌دی كۆری ئوومه‌رگومبه‌ت ده‌چێته‌ به‌غداو له‌كن (موفتی زه‌هاوی‌) ده‌رسه‌كانی‌ ته‌واوی‌ مه‌لایه‌تی ته‌واو ده‌كاو له‌نێوان 4 هه‌زار موریدو فه‌قێی زه‌هاوی‌ ده‌بێته‌ یه‌كێك له‌یه‌كه‌مه‌كانی‌ (ده‌ یه‌كه‌م)و ئیجازه‌ی‌ مه‌لایه‌تی لێ وه‌رده‌گرێ و دێته‌وه‌ وڵاتی‌ خۆ، لێره‌ ته‌كێ و حوجره‌ی‌ خۆی بنیات ده‌نێ و ئێستاش ئه‌وانه‌ ماون، ده‌بێته‌ یه‌كێك له‌(فتوا) ده‌ره‌كانی ناوچه‌ی‌ كۆیه‌و ته‌قته‌ق و وراتی كۆیه‌، له‌سه‌رده‌ستی وی ده‌یان مه‌لاو عالیم و عرفان له‌وڵاتانه‌وه‌ هاتون ده‌خوێنن و په‌روه‌رده‌ی‌ كوردایه‌تی‌ و ئیمانداری كراون.

تێكۆشان و خه‌باتی ئومه‌رگومه‌تیان
لاله‌ حه‌مه‌ی‌ حه‌مه‌ عه‌لی مام حه‌مه‌ ئێستا ته‌مه‌نی‌ 70 ساڵه‌ و به‌گوندستانی‌ ووت: به‌خودای‌ كاكه‌ دڵشاد مه‌ له‌هه‌موو شۆڕشه‌كانی‌ باشووری‌ كوردستان به‌شداری كاریگه‌رمان بووه‌، له‌ساڵی 1977 شه‌هید (عه‌لی ساڵح)و (محه‌مه‌د عه‌جه‌م)و (فه‌روخ هه‌مزه‌ كه‌ خه‌ڵكی كه‌ڵهوڕی ساڵه‌یی) بوو هاتن مژده‌ی‌ شۆڕشی نوێی (ی، ن، ك)یان پێداین به‌سه‌رۆكایه‌تی مامی‌ گه‌وره‌ی‌ كوردایه‌تی و شۆڕشی كورد مام جه‌لالی ڕه‌وانشاد، زۆرمان به‌دڵ بوو (كاك عه‌بدولڕه‌زاق) هه‌ر له‌سه‌ره‌تای‌ حه‌فتاكانه‌وه‌ ده‌گه‌لیان بوو، مه‌خابن له‌ كه‌ركوك شه‌هید كرا، سه‌ركرده‌ بوو به‌خوا، لێره‌ ڕێكخستنیان دروست كرد (لاله‌ حه‌كیم_ عه‌وڵای‌ كوێخا ئه‌حمه‌د/ عه‌وڵا مه‌ولود/ سڵه‌مان ئه‌حمه‌د/ محه‌مه‌د ڕه‌سوڵ و هه‌نده‌كی دی، بوون به‌ڕێكخستن، یه‌كه‌م پێشمه‌رگه‌ی‌ ئوومه‌رگومبه‌ت (كاكه‌ دلێر كانی‌ له‌له‌یی) له‌گه‌ڵ مه‌فره‌زه‌ سه‌ره‌تاییه‌كانی‌ مه‌لا به‌ختیار كه‌وت، یه‌كه‌م شه‌هیدی گوندی مه‌ (عه‌بدولڕه‌حمان برایم)ه‌. خاوه‌نی‌ هه‌شت پێشمه‌رگه‌ی‌ شه‌هیدین، (20) شه‌هیدی هاووڵاتی‌ به‌ده‌ستی سوپای غه‌دداری‌ به‌عسی عه‌ره‌بی شه‌هید بوون، له‌بۆردومان و فرۆكه‌و هه‌ڵكوتانه‌سه‌ر گوند (5) ژن شه‌هید بوون، چوار ئه‌نفالكراومان هه‌یه‌، له‌(12/8/1982) شه‌ڕێكی گه‌وره‌ له‌نێو گوند دژی له‌شكری‌ عاره‌بان كرا، پێشمه‌رگه‌ سه‌ركه‌وت و به‌عسییه‌كان ڕایان كردو زۆریان لێ كوژرا، ئێستا زیاتر له‌(150) پێشمه‌رگه‌مان بۆ پاراستنی كوردستان هه‌یه‌، سه‌ربه‌رزین به‌پێشمه‌رگه‌و ئه‌م كه‌ش‌وهه‌وای‌ ئازادیه‌ی‌ كوردو كوردستان.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*