یادی یەكێتی

خوا بكەم بیرم كول نەبووبێت، قسەی تر بۆ یادی یەكێتی بكەم، بەڵام ئەمەم هی چەند ساڵ پێش ئێستایە، لەسەر رابردوو و ئایندە لە بۆنەی یەكێتی و شۆڕشی نوێدا. وتم پێشكەشتانی بكەمەوە.

ئەم وەرزە، وەرزی دامەزراندنی یەكێتیی نیشتمانیی كوردستانە. چوار دەیە لە خەباتی یەكێتی بەهەموو هەوراز و نشێوییەكانییەوە دەهێنێت ئەمساڵی وەك وێستگەیەكی گرنگ مامەڵەی لەگەڵ بكرێت.

یادكردنەوە سیاسییەكان لەهەموو شوێنێكدا ملكەچی تەوزیفی سیاسی‌ و رووداوەكانی سەردەم دەبن، هەرچەند یادەوەركاران وەفاداریی ئەسڵی بۆنەكە بن، وەك بۆنەی مێژوویی‌ و رابردووی پڕ سەروەریی.

لەڕاستیدا تەوزیفی سیاسیی یادە مێژووییەكان خۆی لەخۆیدا خەوش نییە، مادام تەوزیفە سیاسییەكەش دەبێتە دەسكەلا لەڕێی كەڵەكەكردنی دەستكەوت‌ و جۆشدانەوەی خەبات، كە لێرەدا قسە لەسەر خەباتێكی دژوار و سەخت دەكرێت.

لە بۆنەی یادكردنەوەكانی یەكێتی-دا، هەمیشە دوو ئاراستە خۆی دەنوێنێت:
یەكەم- یادی بكەینەوە بۆ باسكردنی مێژووی سەروەریی ‌و سەركەوتنەكان‌ و ئەوەی بۆ گەلەكەمان بەدەستهاتووە لەسایەی خەباتی یەكێتییەوە، ئەم یادكردنەوەیە جۆرێكە لە هەقپێدانەوە بەو پاڵەوانانەی لەهەر وێستگەیەكدا رەنجیان كێشاوە، فرمێسك‌ و عارەقیان رشتووە، خوێنیان بەخشیوە و خۆیان بۆ مەسەلە رەواكە تەرخان كردووە.

ئەم یادكردنەوەیە جۆرێكە لە هەڵێنجانی وانەی خەبات‌ و دەوركردنەوەیان جۆرێكە لە مەشقكردن لەسەر چاكە و باشە و بردنەوەكانیان تا ببنە ئەزموونی شایانی دووبارەكردنەوە، جۆرێكە لە وردبوونەوە لە هەڵە و كەمووكوڕییەكان تا فۆكسیان بخرێتەسەر و وەك ئاماژەی سووری كەموكوڕیی نیشانەی دووپات نەكردنەوەیان لەسەر بدرێت.

ئەم یادكردنەوەیە بۆ وەرگرتنی هێزو تینە لە مێژووی رابردوو، تا لەكاتی تەنگانە و لاوازیی كاتیدا ببێتە وزەی بەرجەستە بۆ كار و خەباتی ئایندە.

دووەم- یادەكە بكەینە وێستگە بۆ باسكردنی ئێستای یەكێتی‌و ئەو كەرەسانەی یەكێتی هەیەتی تا دەرەقەتی ئەركەكانی ئایندە بێت‌ و بۆ قازانجی كورد و كوردستان‌ و بەرنامە سیاسییەكەی خۆی ماڵی بكات. یادەكە لە رابردوودا نوقم نەكرێت، كە بەشی بەرنامەڕێژیی دوا رۆژو خواستەكانی ئەمڕۆ و سبەی تێدا نەمێنێتەوە.

رەخنەی ئەو ئاراستەیە ئەوەیە هەمیشە باسكردنی رابردوو لەم زەمەنی وەرگۆڕانە گەورەیەدا، كە ململانێی سیاسیی توندە و ستراتیژە جیاجیاكان شەڕیانە لەسەر راكێشانی جەماوەر و پێشبڕكێیانە لەسەر بردنەوەی ئایندە، یەكێتی وەك حزبێكی رابردوو نیشانی نەوە تازەكانی كوردستان دەدات، كە لەخەزینی دوێنێی دەخوات بۆ داپۆشینی گرفتەكانی ئەمڕۆ و نەبوونی ئاسۆیەكی نوێ. بۆیە ئەو ئاڕاستەیە خوازیارن قسە لەسەر رابردوو نەبێت، كە هەموو كەس دەیزانێت ‌و هەموو ساڵێك دەوترێتەوە. بەڵام لەڕاستیدا هەردوو ئاراستە ئەگەر بەتەنیا بن یەك لایەنە وێنای رەوتی خەباتی بەردەوامی یەكێتی و بۆنەی چل ساڵەی دەكەنەوە و یەك لایەنی یەكێتی‌ و پێویستیی یەكێتی بۆ كوردستان دەردەخەن.

یەكێتی نە رابردووەكەی وا جێی كەموكوڕییە بەجۆرێك وەبیرنەهێنرێتەوە‌ و نە ئایندەكەشی وا ناڕوونە، كە نەوەكانی ئەمڕۆ بە سەروەریی رابردوو غافڵ بكات، یەكێتی لەسەر بنچینەی رابردوویەكی پتەو لەسەرێتی كار بۆ ئایندەی گەشی بكات‌ و یادی چل ساڵەش وەك وێستگەیەكی جۆریی؛ دەتوانێت هەم بۆ نیشاندانی رابردوو بە نەوەی نوێ تەوزیف بكرێت‌ و هەمیش ببێتە بۆنەی دەستگرتن بە ئایندەوە‌ و دەستبەردان نەبوون لە ئەركی ئایندەسازیی ‌و لە هەقی نوێكردنەوەی یەكێتی.

هەڵبەت ئەوی نازی رابردووی نەبێت، ناتوانێت لافی ئایندەسازیی لێ بدات.
یەكێتی بە رابردوو و ئەمڕۆ و ئایندەیەوە جوانە و یەك رەوتی چوار دەیەیی پێكدێنێت و دەتوانێت رێگەش بۆ چەندین دەیەی تر بكاتەوە.

print

 355 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*