سەرەکی » وتار » ئاوات كۆكه‌یی » رۆژی پێشمه‌رگه‌ رابردوی جوان و خه‌مێك بۆ ئێستا

رۆژی پێشمه‌رگه‌ رابردوی جوان و خه‌مێك بۆ ئێستا

پێشمه‌رگه‌ له‌ ریزی چه‌كداره‌كانه‌، به‌ڵام ئه‌وه‌ی پێشمه‌رگه‌ له‌ هه‌ر سلكێكی دیكه‌ی چه‌كدای جیاده‌كاته‌وه‌ ئه‌وه‌یه‌ خاوه‌ن بیروباوه‌ڕێكی شۆڕشگێڕانه‌ی ئازاده‌و، ئازاد و خۆبه‌خشانه‌ش ئه‌و بواره‌ی هه‌ڵبژاردووه‌.

له‌ ئێستاشدا كه‌ كورد خاوه‌نی حكومه‌ت و كیانی خۆیه‌تی، پێشمه‌رگه‌ به‌خواست و ویستی خۆی چه‌كی به‌ره‌نگاریی هه‌ڵگرتووه‌، ئاشكرایه‌ له‌ رابردووی سه‌رده‌می خه‌باتی شاخیشدا پێشمه‌رگه‌ هه‌روابووه‌و ئه‌و نه‌ریته‌ جوانه‌ له‌وكاته‌وه‌ بۆ ئێستا ماوه‌ته‌وه‌.

وشه‌ی پێشمه‌رگه‌ كه‌ ئاشكرایه‌ و مانای پێشمه‌رگ كه‌وتن ده‌گه‌یه‌نێ، به‌مانایه‌كی روونتر كه‌سی پێشمه‌رگه‌ لای سووره‌ ئه‌ركی سه‌ره‌كی ئه‌و ململانێیه‌كی سه‌خت و مامه‌ڵه‌كردنه‌ له‌گه‌ڵ مه‌رگ، له‌ پێناو بیروباوه‌ڕه‌كه‌یدا به‌زوویی شه‌هید ده‌بێت و پێشوه‌خته‌ نوقڵانه‌ بۆ مه‌رگی لێدراوه‌.
ساڵانێكی زۆره‌ وشه‌ی پێشمه‌رگه‌ وه‌ك ستایش بۆ كه‌سێكی به‌خشنده‌و گیانفیداكار به‌كار دێت كه‌ كارو ئه‌ركی سه‌خت و قازانج نه‌ویست ئه‌نجام ده‌دات، پێی ده‌ڵێن ( كاری پێشمه‌رگانه‌).

بۆیه‌ بیروباوه‌ڕی پێشمه‌رگه‌ له‌ ریزی بیروباوه‌ڕه‌ هه‌ره‌ پیرۆزه‌كان ده‌ژمێردێ و نیشانه‌یه‌ بۆ خۆبه‌ختكردن و خۆفیداكردن له‌ پێناو بیروباوه‌ڕێك كه‌ خۆی له‌ به‌رگریی و خه‌بات، له‌ پێناو خاك و گه‌لدا ده‌بینێته‌وه‌.

كورد به‌ درێژایی مێژوو خاكه‌ی داگیرو خه‌ڵكه‌كه‌ی چه‌وسێندراوه‌ته‌وه‌، بۆ ئه‌وه‌ش به‌رده‌وام له‌ به‌ره‌نگارییه‌كی سه‌ختدا بووه‌ و هێزی چه‌كداری به‌گه‌ڕ خستووه‌، هه‌رجاره‌ش ئه‌و هێزه‌ ناوێكی هه‌بووه‌، به‌ڵام بۆیه‌كه‌مجار وشه‌ی پێشمه‌رگه‌ له‌ سه‌رده‌می كۆماری كوردستان ( له‌ مهاباد) له‌ ساڵی 1946 دا هاته‌ نێو فه‌رهه‌نگی سیاسی و شۆڕشگێڕی كوردییه‌وه‌، له‌وكاته‌وه‌ چه‌كداری كورد فۆڕم و ناوێكی خۆشئاوازی به‌خۆوه‌ بینی كه‌ وشه‌ی پێشمه‌رگه‌یه‌.

به‌گشتیش پێشمه‌رگه‌ له‌ بزووتنه‌وه‌ی رزگاریخوازی گه‌لی كورددا رۆڵی ئێجگار گه‌وره‌و بێوێنه‌ی گێڕاوه‌.

دامه‌زراندنی یه‌كێتیی نیشتمانیی كوردستانیش به‌زویی دوای هه‌ره‌سی شۆڕشی ئه‌یلول له‌ 1975، هه‌ر له‌و ساڵه‌دا و له‌و بارودۆخه‌ ئاڵۆزو دژواره‌دا دامه‌زرا، ساڵێكیش دوای ئه‌وه‌ یه‌كێتی شۆڕشی نوێی راگه‌یاندو به‌ بیروباوه‌ڕی نوێ و به‌ مه‌شق و په‌روه‌رده‌ی نوێی پارتیزانییه‌وه‌ ده‌سته‌ی پێشمه‌رگه‌ی نارده‌وه‌ شاخ و سه‌نگه‌ری چۆڵبووی خه‌باتی ئاوه‌دان كرده‌وه‌.

پێشمه‌رگه‌ی شۆڕشی نوێ له‌ فۆڕمێكی دیكه‌و شێوازێكی دیكه‌ی خه‌باتدا ده‌ركه‌وت و قۆناغی پێشخۆی تێپه‌ڕاند، ئه‌ركی هێزی پێشمه‌رگه‌ی شۆڕشی نوێ زۆر له‌ ئه‌ركی هێزی پێشمه‌رگه‌ی پێشتر سه‌ختتر بوو، گه‌له‌كۆمه‌كێی ناوچه‌یی و نێوخۆیی زیاتر له‌ دژی به‌رپاكرا، رووبه‌ڕووی سیاسه‌تی راگواستنی گونده‌كان بۆوه‌، له‌ لایه‌ن دوژمنه‌وه‌ به‌هێزی زۆرتر و ته‌كنه‌لۆژیای پێشكه‌وتووتری سه‌ربازییه‌وه‌ شه‌ڕی ده‌كرا، به‌ڵام تا بازنه‌ی شه‌ڕو گه‌له‌كۆمه‌كێكانی سه‌ری زۆرتر و سه‌ختتر و به‌رته‌سكتر ده‌بوه‌وه‌، ئه‌ویش به‌ بیروباوه‌ڕی نوێتر و ئازایانه‌ و قاره‌مانانه‌تر ئیدامه‌ی به‌ خه‌باتی چه‌كداری ده‌دا.

سه‌رۆكی نه‌مر مام جه‌لال له‌ وه‌سفی پێشمه‌رگه‌دا ده‌یوت: (مرۆڤێكی شۆڕشگێڕی سیاسی چه‌كداره‌) واتا هه‌م كه‌سێكی شه‌ڕكه‌ر و هه‌میش كه‌سێكی سیاسیی تێگه‌یشتوو و خاوه‌ن بیروباوه‌ڕێكی پیرۆزی نیشتمانییه‌.

هه‌روه‌ها هه‌ر له‌ شۆڕشی نوێدا ده‌سته‌واژه‌ی ( پێشمه‌رگه‌ باسكی به‌هێزی گه‌له‌) هاته‌ نێو فه‌رهه‌نگی خه‌باتی كوردییه‌وه‌، كه‌ مانای ئه‌وه‌ی ده‌گه‌یاند گه‌ل به‌رگری ده‌كات و چۆك بۆ دوژمنان دانادات، ئه‌و به‌رگرییه‌ش له‌ رێگه‌ی باسكێكی به‌هێزو كاریگه‌ری وه‌ك پێشمه‌رگه‌وه‌ به‌ڕێوه‌ ده‌چوو.

وشه‌ی پێشمه‌رگه‌ خاوه‌نی سیحرێكی جوان و پیرۆزه‌ له‌ كورده‌وارییدا به‌تایبه‌ت له‌ خه‌باتی شاخدا، به‌داخه‌وه‌ به‌هۆی هه‌لومه‌رجی نوێی سه‌رده‌مه‌وه‌ ئه‌و شه‌یه‌ جۆرێك له‌ پێگه‌ مه‌عنه‌وه‌ییه‌كه‌ی له‌ده‌ستداوه‌ و له‌لایه‌ن كه‌سانی باڵاده‌ستیشه‌وه‌ خراپ به‌كارهێنراوه‌، بۆیه‌ له‌كه‌داربوونی لێكه‌وتۆته‌وه‌، به‌ڵام له‌ بنه‌ڕه‌تدا پێشمه‌رگه‌ هه‌ر پێشمه‌رگه‌كه‌ی رابردووه‌ و له‌كاتی پێویستدا و به‌تایبه‌ت مه‌ترسییه‌كاندا، هه‌ر وشه‌ پیرۆزه‌كه‌ی جاران و هه‌ر خۆشه‌ویسته‌كه‌ی ناو كۆمه‌ڵانی خه‌ڵكه‌، بۆ گێڕانه‌وه‌ی ئه‌و پیرۆزی و خۆشه‌ویستییه‌ش، پێویسته‌ خه‌مخۆرانی سیاسی و سه‌ربازیی باڵاده‌ست، پێشمه‌رگه‌ بخه‌نه‌وه‌ سه‌ر ئه‌ركی پیرۆزی خۆی و له‌و كاره‌ لاوه‌كیانه‌ی ئێستای داببڕن، چونكه‌ به‌داخه‌وه‌ ئێستا له‌هه‌ندێك حاڵه‌تدا پێشمه‌رگه‌ ئه‌رك و كارێكی ئه‌وتۆی پێده‌سپێردرێ، كه‌ ئه‌ركی ئه‌و نییه‌ و له‌ ئاست ناوی پیرۆزی پێشمه‌رگه‌دا نییه‌.

print

 379 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*