سەرەکی » مانشێت » ئەوانەی هانی گۆڕینی ئاقاری خۆپیشاندانەكان دەدەن!

ئەوانەی هانی گۆڕینی ئاقاری خۆپیشاندانەكان دەدەن!

شێرکۆ مەحمود خدر

لەگەڵ دەستپێكردنی خۆپیشاندانەكانی ئەمجارە، بەداخەوە كۆمەڵێك خەڵك كە تێیاندایە ئەندامی حزبەكانن، یان هونەرمەندو رووناكبیرن، یان تەنانەت مامۆستای زانكۆن، بەشێوەیەك هانی خەڵكی سڤیل و خۆپیشاندەر دەدەن، تا بارەگاو بینای موڵكی گشتیی و تایبەتی بسووتێنن، یان گوای (راپەڕین و شۆڕش)بەرپا بكەن… كەچی خۆشیان نەك هەر بەشداری خۆپیشاندان و ئاژاوەگێڕی و سووتاندنەكان نەبوون، بەڵكو بەدیار لاپتۆپ یان كۆمپیوتەر، یان موبایلەكەوە بە پۆستی نا بەرپرسانە هانی گەنجان و خەڵك دەدەن بۆ نانەوەی پشێوی و شێواندنی وڵات، كە ئەمە لەهەر وڵات و جێگایەكی تر بێت بە تاوانی خیانەتی نیشتمانیی دەپێوەرێت، ئەم كارەشیان هەمووی لەرێگەی تۆڕە كۆمەڵایەتییەكانەوە دەكەن، كە بەداخەوە لەئەنجامی ئەم جۆرە هاندانە, بووە هۆی شەهید بوون و برینداربوونی چەند گەنجێكی وڵات و سووتاندنی چەندین فەرمانگەو دائیرەو بارەگای خزمەتگوزاری لە شارو شارۆچكە جیاجیاكانی كوردستان.
بۆ نموونە پۆستی مامۆستایەكی زانكۆمان لایە كە بەداخەوە ماستەرەكەی خۆی لەسەر ئیتیك و ئەخلاقی رۆژنامەوانییە كەچی نووسیویەتی : «بەرەو كۆتایی هاتنی حوكمی چەتەگەرییانەی (شۆڕشگێڕەكان)» كە چی خۆشی لەماڵەوە بەدیار سۆپای گەرمەوە دانیشتووەو تەنانەت ئامادە نەبووە بایكۆتی وتنەوەی وانەش بكات لە زانكۆكەی خۆی!، كەچی هانی خەڵك دەدات بۆ گوایە (شۆڕش و راپەڕین)!.
یەكێكی تر هونەرمەندێكی چەپە، كە ئەكاونتەكەی خۆی ناو ناوە (هاواری ئازادی)، نووسیویەتی: « لەكوردستان بەعس بەجلوبەرگ و زمانی كوردییەوە سەری هەڵدایەوە». توخوا ئەمە قسەی هونەرمەندێكی چەپە، كە ناوی پیرۆزی پێشمەرگە بەمشێوەیە لەكەدار بكات و بەرواردی بكات بە بەعس و تەنانەت جلوبەرگی كوردیش ناشیرین بكات!.
یەكێكی تر میدیاكارێكی دیاری كوردستانە، كە تەنانەت چەند جارێك پۆستی حكومیشی وەرگرتووە لە كابینە جیاجیاكانی حكومەت، بەمەی ئێستاشەوە، كەچی بەردەوام پۆستی ڤیدیۆی هاندان و كۆمێنی هاندان دەنووسێت و یەكێتی بە ئەنفالچی وەسف دەكات!!، لەكاتێكدا خۆی لە سلێمانی دەژی و ئەم دەسەڵاتەی پێی دەڵێت ئەنفالچی ئەو دەپارێزێت.!!.
یەكێكی تر كە بەپێی پرۆفایلەكەی بێت بڕوانامەی زانكۆی هەیە، كەچی نووسیویەتی: دەسەڵات تێبگەن، ئەمجارە خۆپیشاندەران چەكیان پێیە، چەك!، واتە ئەم برادەرە دەیەوێت بەتەواوی هێزە ئەمنییەكان هانبدات كە خۆپیشاندەر چەكی پێیەو، لەلایەكی تریشەوە زیان بە خۆپیشاندەر بگات، چونكە گوایە چەكیان پێیە!، بۆیە ئەم جۆرە هاندانە، دووسەرەیە، جگە لە ماڵوێرانی هیچی تری بەدواوە نییە، چونكە ناكرێت تۆ هەردوو لا هانبدەیت بە بوونی چەك كەچی خۆشت لەماڵەوە لە پاڵ ماڵ و مناڵی خۆت دانیشتبیت، بۆیە بەداخەوە بۆ ئەم جۆرە كەسانە كە دڵنیام رۆژگارێك دێت داواكاری گشتیی لێیان دێتە وەڵام كە چۆن خەڵك هاندەدەن بۆ توندوتیژی و ئاژاوەگێڕی.
برادەرێكی تر كە ساڵانێكە كادیری حزبێكی دێرینەو ناوی (فەهد)ە!، كەچی دەیەوێت هانی خەڵكی هەولێر بدات ئاژاوە بنێنەوەو خۆشی هیچ باكی نییە لەوەی چی دەبێت یان نابێت!، گرنگ ئەوەیە خەڵك هانبدات و ئاژاوەكە دروستبكات، بەڵام بێگومان بە بێ‌ بەشداری خۆی!!.
یەكێكی تر لەو نووسین و فۆتۆیانە چەند رۆژێكە بۆتە هۆی نیگەرانی پێشمەرگە قارەمانەكان، گوایە دوكانێكی سەوزەو میوە نرخی زیاتری بۆ پێشمەرگە دیاری كردووە لە هاوڵاتی ئاسایی، ئەوەش وەكو سووكایەتیەك بە پێشمەرگە كە «گوایە سەركوتی خۆپیشاندەران دەكات» بەداخەوە چەند میدیاكارو چالاكوان و مامۆستا و فەرمانبەرێكیش فۆتۆكەیان داناوەتەوەو توانجی بێ‌ بنەما دەرهەق بە پێشمەرگە قارەمانەكان دەنووسن كە جێگای داخە، پێشمەرگە كە رەمزی نەتەوەو پاراستنی سەرو ماڵی هاوڵاتیانە، بەمشێوەیە بشێوێندرێ‌ و ناوی بزڕێ‌!.

 

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*