سەرەکی » ئاراستە » 11 ساڵە لووتكە بێ شینەهەڵۆیە

بۆ مەرگی موحسین بایز

11 ساڵە لووتكە بێ شینەهەڵۆیە

لاپەڕەی سەروەران

فەرماندەو تێكۆشەری كۆچكردوو محسین بایز یەكێكە لەپێشمەرگە ئازاو دیارەكانی بزووتنەوەی كوردایەتی بەگشتی و بەتایبەتیش شۆڕشی نوێ، كاك موحسین هەر لە سەرەتای لاوێتییەوە قەدەر نەخشەی ژیانی تێكداوەو بەئاراستەی گرفتەكاندا بردویەتی، بەڵام چۆكی دانەداوەو ئازایانە بەرگەی ژیانی سەختی گرتووەو تەنانەت بەشداری كاریگەرانەشی لەخەبات و تێكۆشاندا كردووە.

ئەوكاتەی (مام بایز)ی باوكی لەلایەن حكومەتی ئەوسای عیراقەوە شەهید دەكرێت، كاك محسین ئەوكاتە لەسەرەتای لاوێتییدابووەو براگەورەی خێزانێكی11كەسی بووە، بەناچاری و بۆ بژێوی ژیانی خێزانەكەی دەستدەكات بەكاری كشتوكاڵی و دوكانداری و بەو هۆیەشەوە لەپۆلەكانی خوێندنگە دوردەكەوێتەوە.

بەڵام ئەوباردودۆخە نابێتە هۆی ئەوەی كەمحسین بایز لەكۆڕی تێكۆشان داببڕێت، بۆیە ساڵی 1976 پەیوەندی بەڕێكخستنەكانی ی.ن.ك دەكات و دوچاری زیندان دەبێتەوە، لەشاخیشدا چەندان پلەی پێشمەرگایەتی و سیاسی دەبڕێت و لەدەیان نەبەردی و قارەمانیدا بەشداریدەكات و چەندجارێكیش برینداردەبێت.

هەروەها لەدەستەی یەكەمینی پێشمەرگە دەبێت لەرۆژی 5/3/1991 دەگاتە راپەڕینی شاری رانیە.

فەرماندەی نەمر موحسین بایز محەمەد ئەمین، ساڵی 1955 لە ناحیەی (میرزارۆستەم)ی بناری كۆسرەت لەدایكبووە.

خوێندنی سەرەتایی لە سەنگەسەر و سێیەمی ناوەندیشی لەرانیە تەواوكردووە، ساڵی 1975 باوكی كاك موحسین لەلایەن رژێمەوە دەستگیركراو دوای شەش مانگ تەرمەكەی لەدەریاچەی دوكان دۆزرایەوە، بەو هۆیەشەوە لەخوێندن دادەبڕێت و ئەركی بەخێوكردنی خێزانەكەی لەئەستۆدەگرێت.

كاك موحسین بایزی نەمر لەساڵی 1976 پەیوەندی بەرێكخستەكانی بزووتنەوەی سۆسیالیستی كوردستانەوە كردووە كە ئەو بزوتنەوەیە باڵێكی یەكێتیی نیشتمانیی كوردستان بوو.

هەمانساڵ لەلایەن رژێمی بەعسەوە دەستگیركراوەو ئازارو ئەشكەنجەیەكی زۆر دراوە، بەڵام ئەو قارەمانە هیچی لەنهێنییەكانی رێكخستن نەدركاندوووەو بەوهۆیەشەوە دوای شەش مانگ ئازادكرا.
دوای ئازادبوونی لەزیندان و لەساڵی 1977دا روویكردە شاخ و بووە پێشمەرگەی یەكێتیی نیشتمانیی كوردستان لەڕیزی بزووتنەوەی سۆسیالیستدا.

كاك موحسینی نەمر، لەپێشمەرگایەتیشدا كەسێكی ئازاو لێوەشاوەو لێهاتووبووەو دەورووبەری زانیویانە كەشایستەی فەرماندەیی كردنی هێزی پێشمەرگەی هەیە، بۆیە ساڵی 1979 كراوەتە فەرماندەی هێزی سەركردایەتی بزوتنەوەی سۆسیالیست و پاشانیش كراوەتە جێگری هەرێمی چواردەی سۆسیالیست.

فەرماندەی نەمر لەشەڕو نەبەردییەكاندا كەسێكی سەركەوتوو و خۆڕاگرو ئازابووە، لەنەبەردییەكانی شاخ سەروەری زۆری تۆماركردووەو لەشەڕی ناوشارەكانیش نەبەردی دەگمەنی تۆماركردووە، ساڵی 1981 لە چالاكییەكی گەورەی ناوشاری رانیەدا لەسەعات11ی نیوەڕۆ برینداردەبێت، بەڵام ئازایانە درێژە بەشەڕەكە دەدات تا سەروەختی خۆرئاوابوون و ئینجا توانیویەتی خۆی دەربازبكات.

ساڵی 1987 بەپیلانی دوژمن لەگەڵ چەندین فەرماندەو سەركردەی دیكەدا ژەهرخوارد كراون، بەڵام بەڕێكەوت كاك موحسین رزگاردەبێت، ساڵی 1988یش لە هێرشەكانی كیمیابارانی بەعس بۆ سەر ناوچەكانی كوردستان بریندار بووە.

بەگشتی محسین بایزی نەمر بەشداریی و سەرپەرشتی و زۆر چالاكی پێشمەرگانەی كردووەو ساڵی 1993 كە حزبی سۆسیالیستی كوردستان و یەكێتیی نیشتمانیی كوردستان یەكیانگرتەوە، كاك موحسین كرا بەئەندامی فەرماندەیی گشتی هێزی پێشمەرگەی كوردستان و پاشانیش كرا بە كارگێڕی فەرماندەیی گشتی (ه.پ.ك)، دوا پلەشی جێگری وەزیری پێشمەرگە بوو لە حكومەتی هەرێمی كوردستان.

بەداخەوە، رۆژی 11/6/2009 بەرووداوێك گیانی سپارد.

print

 311 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*