سەرەکی » وتار » ڕه‌سوڵ بۆسكێنی » شوناسی یه‌كێتی جیاوازه‌ له‌ حزبه‌كانی تر

شوناسی یه‌كێتی جیاوازه‌ له‌ حزبه‌كانی تر

یەكێـتیی نیشتمانیی كوردستان حزبێكی نەتەوەیی، نیشتمانی، سۆسیالیست و دیموكراتە، شوناسی یه‌كێتی جیاوازە لە شوناس و بەرنامەی حزبەكانی تری كوردستان، هه‌ر له‌ دوای نسکۆی شۆڕشی ئەیلولەوە، كوردستان كه‌وته‌ بارودۆخێكی ناله‌بارەوە و‌ ئه‌وپه‌ڕی نائومێدی و خه‌مگینی ‌باڵی به‌سه‌ر گه‌لی كورددا كێشا، نه‌ته‌وه‌ی كورد به‌تایبه‌تی خه‌ڵكی باشوور تروسكاییه‌ك له‌ ئومێد و ‌بیركردنه‌وه‌یاندا نه‌مابوو، دوژمنان دڵخۆش و به‌عس له‌وپه‌ڕی لوتبه‌رزییدا بوو، خه‌ڵكی كوردستان پێیان وابوو ئیتر کەس ناتوانێت بەرەنگاری ئەو زوڵم و ستەم و داگیرکارییانە ببێتەوە كە بەرامبەر کورد دەكرێت، به‌ڵام كاتێک له ‌شه‌وه‌زه‌نگی هه‌ستی خه‌مناكی خه‌ڵكدا یه‌كێتی وه‌ك چرایه‌كی دره‌وشاوه‌ تروسكه‌ی داو، له‌و سه‌رده‌مه‌ كاره‌ستباره‌دا یه‌كێتیی نیشتمانیی كوردستان دروست بوو، خۆی بۆ به‌رگریی له‌‌ نیشتمان و خه‌م و ئازاره‌كانی خه‌ڵك ته‌رخان كرد، ئیدی نەک بووە جێگەی هیوا و ئومێد، به‌ڵکو کۆمەڵانی خەڵکی کوردستان بۆ گه‌شه‌پێدانی لەهەموو ناوچە جیاجیاکانەوە پەیوەندییان پێوەدەکرد و ئامادەیی خۆیان دەردەبڕی بۆ پشتیوانیکردنی.

ئیتر له‌و رۆژه‌وه‌ تا خه‌باتی چه‌كداریی درێژه‌ی هه‌بوو، مێژووی یەکێتی مێژوویەکی پڕ سەروەری و تێکۆشان و خەبات و قوربانیدان بوو.

ئەو حزبە هەر لەسەرەتای دروستبوون و مێژووی خەباتیدا چەندین جار تووشی کێشە و كاره‌سات و کەوتن و هەستانەوە بووە و هه‌میشه‌ له‌ گۆڕانكاریی و نوێبوونه‌وه‌ی به‌ر‌ده‌وامدا بووه‌، هه‌ر ئه‌و جیاوازییه‌ش بووه‌ هۆی ئه‌وه‌ی نه‌یارانی هه‌میشه‌ كۆسپ و ته‌گه‌ره‌ بخه‌نه‌ به‌رده‌می بۆ ئه‌وه‌ی نه‌توانێت ئامانجه‌كانی له‌ خزمه‌تی گه‌ل و خاكه‌كه‌یدا به‌دی بهێنێت، هه‌روه‌ك چۆن كاره‌ساتی هه‌كاری و شه‌ڕی جۆراوجۆر و چه‌ندین رووداوی كاره‌ساتباری خه‌مهێنه‌ر له‌به‌رده‌می یه‌كێتیدا كرایه‌ كۆسپ، به‌ڵام ئەو هەروه‌ك شۆڕشێكی نوێخوازیی سه‌رده‌میانە به‌و هێزه‌ پۆڵاینه‌ی هه‌یبوو توانی به‌ره‌و رووی كاره‌ساته‌كان بووه‌ستێیەوە و رۆژبه‌ڕۆژ زیاتر توانیی به‌رنامه‌یه‌ك دابهێنێ کە جیاوازبێت له‌وانی تر.

یەکێتی له‌ د‌نیابینی خۆیه‌وه‌ بۆ مەسەلەی نەتەوەیی هه‌وڵیدا له‌پێناوی به‌دیهێنانی ئاواته‌كانی خه‌ڵكی كوردستان له‌ مافی چاره‌ی خۆنووسینی گەلی كورد لە باشوری كوردستان و پارچەكانی تریش لەسەر بنەمای رێزگرتن لە ویست و ئیرادەی بزووتنەوە سیاسییەكانی خۆیان، هه‌روه‌ها داوای مافه‌ ره‌واكانی كورد و ئاشتی و ئازادیی و دیموكراسی و دادپه‌روه‌ریی كۆمه‌ڵایه‌تی، ئه‌مانه‌ و چه‌ندانی تر له‌ داواكارییه‌ شێلگیرانە‌كانی یه‌كێتی بوون، له‌پێناوی به‌دیهێنانی ئامانجی كۆمه‌ڵانی خه‌ڵكی كوردستان.

لەم قۆناغەدا ی.ن.ک سه‌ره‌ڕای شەڕی چەكداری و راگواستنی گوند و شارۆچه‌كه‌كان، به‌درێژایی سنوور بۆ ئۆردوگا زۆرەملێكان‌، به‌ره‌وڕووی چه‌ندین رووداوی كاره‌ساتباری وەك كیمیاباران و ئەنفال و سووتماككردنی خاكی كوردستان بۆوه‌، له‌گه‌ڵ ئه‌مانه‌شدا رۆژ به‌ڕۆژ له‌خه‌باتی چه‌كداریدا گه‌شه‌ی ده‌كرد و ئاوڕێكی گرنگیشی له‌ رێكخستن و په‌یوه‌ندیی نێوان شاره‌كان و شۆڕش دەدایه‌وه‌.

بێگومان ئه‌و خه‌باته‌ پڕشنگداره‌ گه‌واهی ئه‌وه‌ ده‌دات کە له‌ مێژووی ١٠٠ ساڵی رابردووی بزووتنەوەی رزگاریخوازیی كوردستاندا، هیچ حزب و رێكخراوێكی سیاسی كورد نەیتوانیووە هێندەی یه‌كێتی له‌ داهێنان و خەباتی چەكداریی له‌ پێشكه‌وتن و گه‌شانه‌وه‌دا بەردەوامبێت.

له‌ درێژه‌ی خه‌باتی خۆیدا داهێنانی فرە ئاراستەیی له ‌هه‌موو چین و توێژه‌كانی كۆمه‌ڵگەی كوردیدا له‌باشوور كردووە و به‌ بیروباوەڕێكی نەتەوەیی لە چوارچێوەی یەك رێكخراوی نیمچە بەرەییدا رێكخست، هه‌مووشمان ده‌زانین له‌ راپه‌ڕینی كۆمه‌ڵانی خه‌ڵكی كوردستان چ رۆڵێكی نایاب و گرنگی گێڕا.

دوای راپه‌ڕێنیش یه‌كێتی یەكەم كۆنگرەی خۆی به‌ست و بیروباوەڕی سۆسیالیست دیموكراتی كرده‌ ئامانج و رێبازی خۆی له‌كاری سیاسی و رێكخراوەییدا، كە بیروباوەڕێكی سەردەمییانەی كۆمەڵگە پێشكەوتنخوازەكانە، له‌ته‌واوی دنیا دیموكراتی و مافی مرۆڤ و ژینگە و مرۆڤ دۆستی و دادپەروەریی كۆمەڵایەتی و… هتد، كاری له‌پێشینه‌یانه‌. له‌زۆربه‌ی ئه‌و وڵاتانه‌ی سۆسیالیست دیموكراتەكان له‌ حوكمڕانیدان، كۆمەڵگەكانیان خۆشبەخت و پێشكه‌وتوون‌.

له‌ دوای راپه‌ڕینیش یەكێـتی له‌ناو شار و حوكمڕانی وڵاتدا، خاوەنی داهێنانی بیرۆكەی هەڵبژاردن و دامەزراندنی په‌رله‌مان و حكومەتی هەرێم و دامەزراوەكانی تر بوو له‌ باشووری كوردستان، رۆڵی دیاری هەبووە لە بواری هەماهەنگی لەگەڵ رێكخراوەكانی كۆمەڵگەی مەدەنی بۆ هێنانه‌دیی سیستمێكی مەدەنی و دیموكراسی باشتر، له‌لایه‌كی تریشەوە بیرۆكه‌ی بنیاتنانی پاڵاوگەی نەوت، وەك سەرچاوەیەكی گرنگ بۆ گەشەپێدانی لایه‌نی پیشەسازیی و هاندانی بازاڕی ئازاد و زۆربه‌ی پێویستییەكانی خه‌ڵكی كوردستان، سه‌ره‌ڕای هه‌موو كۆسپ و رێگرییه‌كان بۆ ئه‌و قۆناغە، یەكێتی وه‌ك حزبێكی مۆدێرن و نوێخواز هەمیشە توانیوێ‌تی خۆی لەگەڵ سەردەمدا بگونجێنێت.

رۆژگاری ئه‌مڕۆ قۆناغێكه‌ هۆكارگەلێكی زۆری وه‌ك پێشكه‌وتنی ته‌كنۆ‌لۆژیا و ئی‌نته‌رنێت و په‌لهاویشتنی جیهانگیریی، وایكردووه‌ مرۆڤی ئه‌مڕۆ بیركردنەوەی له‌ پێشوو جیاوازبێت و پێویستییەكانی لەهەموو روویەكەوە زیاتر بن. هه‌ر ئه‌مه‌ش وایكردووه‌ مرۆڤ داواكاریی زیاتری هه‌بێت، به‌تایبه‌تی له‌ هه‌رێمی كوردستان ئه‌گه‌رچی پێشكه‌وتن و گه‌شه‌ی باشی به‌خۆیه‌وه‌ بینیووه‌، له‌گه‌ڵ ئه‌وه‌شدا به‌هۆی بارودۆخی تایبه‌تی هه‌رێمی كوردستانەوە لەگەڵ‌ گه‌شه‌كردن و هاتنه‌ناوه‌وه‌ی ته‌كنۆ‌لۆژیای نوێ و كرانەوەی كوردستان بە رووی جیهان و گه‌شه‌ی ئابووریی كوردستان، گەندەڵی و مشەخۆری به‌شێوه‌یه‌كی به‌رچاو بڵاوبۆوه‌، ئه‌گه‌رچی وه‌ك پێویست نه‌توانرا ئه‌م گه‌شه‌ ئابوورییه‌ به‌ ئاراسته‌یه‌كی باشدا ببرێت، به‌ڵام هەمیشە ره‌خنه‌گرتن و دەنگی ئازادی لە سنووری نفوزی یەکێتیدا داوایه‌كی له‌پێشینه‌ بووه‌،‌ داوای چاكسازیی و ریفۆرم به‌هۆی پێشێلكردنی یاسا و نادادپه‌روه‌ری و كه‌می مووچه‌ و گرفتی ئابووریی و كێشه‌ی بازاڕ، هاووڵاتیان كه‌وتنه‌ گازه‌نده‌ و خۆپیشاندان و ناڕه‌زایی، بۆ ئه‌مه‌ش پێویسته‌ یەکێتی ببێتە دەنگی هەمووان بە یار و نه‌یاره‌وه‌، هه‌مووانیش ده‌زانن داوای ئازادیی و راده‌بڕین له‌ سنووری دەسەڵات و نفوزی یه‌كێتیدا دەنگێکی کپ نەکراو و ڕێگا پێدراو بووەو تا یەکێتیش هەبێت هەر وا دەبێت.

دوای ئەو هەموو بارودۆخه‌ نه‌خوازراوانەی دووچاری یەکێتی بوو، سه‌ره‌ڕای هه‌موو كه‌موكوڕییه‌كان، بەڵام توانیی چاكسازی و نوێبوونەوە له‌ناو هەناوی خۆیدا بكات و دواجار توانیی زاڵبێت بەسەر هەموو کێشەکانیدا بەدروشمی نوێبوونەوە کۆنگرەیەکی سەرکەوتووی بەست و توانی خۆی نوێ بكاته‌وه‌ و خۆی ئاماده‌ بكات بۆ قۆناغی داهاتوو.

دیاره‌ وه‌ك هه‌ر له‌سه‌ره‌تاوه‌ یه‌كێتی له‌ به‌رنامه‌ی كاری خۆیدا بڕیاری داوه‌ بۆ كار و خزمه‌تكردن به‌ كۆمه‌ڵانی خه‌ڵكی كوردستان، له‌م قۆناغه‌شدا به‌ئامانجگرتنی داهاتوویه‌كی باش بۆ خزمه‌ت كردن، ‌بابه‌تێكی پێویست و داوایه‌كی پڕ هه‌ڵوێستی یه‌كێتییه‌كانه،‌ كه‌ هیواخوازن له‌م قۆناغه‌ی هاتۆته‌ پێشەوە و دەستپێکی کاری نوێی یەکێتی گەڕانەیە بۆ ناو خەڵک و خانووە قوڕەکان، ئه‌مه‌ بكرێته‌ خاڵی بەهێزو دەستپێکیش بۆ زیاتر نزیکبوونەوەی یەکێتی و کۆمەڵانی خەڵکی کوردستان.

ئێستا هەمووان بەئومێدن و وه‌ك جاران لە یەکێتیەکەیان دەڕوانن، كه‌ یه‌كێتی جیاواز له‌ هه‌موو لایه‌نه‌كان جارێکی تر ببێته‌وه‌ پێشه‌نگ و هه‌مووان چاو له‌ ره‌فتاره‌كانی یه‌كێتی بكه‌ن له‌پێناوی خزمه‌تكردن به‌ نیشتمان و كۆمه‌ڵانی خه‌ڵكی كوردستان.

ئه‌مانه‌ هه‌مووی رووداوی پڕشنگداربوون له‌ مێژووی خه‌باتی یه‌كێتیدا، ئیتر کاتی ئەوە هاتووە یه‌كێتی جیاوازییه‌كانی خۆی تۆخ بكاته‌وه‌ و بەرنامە باوەرپێکراوەکانی چوارەمین کۆنگرەی خۆی جێبه‌جێ بكات و وه‌ك هه‌میشه‌ جه‌خت له‌سه‌ر ئاشتی و ئازادی و مافی مرۆڤ و مافی چاره‌ی خۆنووسین و دیموكراسی و دادپه‌روه‌ری كۆمه‌ڵایه‌تی بكاته‌وه‌، به‌ تایبەتی یەکێتی وەک هێزێکی کاریگەر کار لەسەر بووژانەوەی ئابووریی هه‌رێمی كوردستان بکات، بۆ به‌دیهێنانی ئاوات و بەرژەوەندییەکانی خەڵکی کوردستان و به‌رده‌وامیدان به‌ گۆڕانكارییه‌كان به‌و ئاراسته‌یه‌ی كه‌ كادر و ئه‌ندامانی یه‌كێتی و هه‌مووان چاوه‌ڕێیان كردووه‌، دوور له‌ به‌رژه‌وه‌ندیی شه‌خسی و ماددی و پۆست وه‌رگرتن، ئه‌مه‌ش ده‌مانگه‌یه‌نێته‌ ده‌سته‌به‌ركردنی مافه ‌نه‌ته‌وه‌ییه‌كان و‌ دابینكردنی خۆشگوزه‌رانی بۆ هاووڵاتیان و به‌دیهێنانی ئاواته‌كانمان.

یەكێتی ده‌بێ وه‌ك هەمیشە داکۆکیکاری سه‌رسه‌ختی مافی خەڵک بێت، ئه‌ركی یه‌كێتی نیشتمانیی كوردستانه‌ له‌م قۆناغه‌دا به‌دواداچوون و چاره‌سه‌ر دابنێت بۆ ئه‌و بابه‌ته‌ هه‌ستیارانه‌ی، كه‌ په‌یوه‌ندییان به‌ مافی تاك و كۆمه‌ڵ و دامه‌زراوه‌كان و مه‌سه‌له‌ چاره‌نووسسازه‌كانی په‌یوه‌ندیدار به‌ حكومه‌ت و خه‌ڵكەوە هه‌یه،‌ له‌سه‌ر ئاستی ناوخۆ و ده‌ره‌وه‌ به‌مه‌به‌ستی چاره‌سه‌ركردن، به‌تایبه‌تی مه‌سه‌له‌‌ی مووچه‌ی فه‌رمانبه‌ران و قۆرخكاریی له‌ بژێوی ژیانی هاووڵاتیان، بێگومان له‌م رووه‌وه‌ پێویسته‌ خه‌ڵكیش هۆشیار و هاوكاربن له‌م ئه‌ركه‌ پیرۆز و سه‌خته‌دا، بۆ گەیشتن بە ئامانجە وەدەست نەهاتووەكانی گەلی كوردستان و رێكخستنەوەی بەرنامەی ژیانی كۆمەڵگەی كوردستان.

print

 181 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*