سەرەکی » وەرزش » چامپیۆنس لیگ به‌رده‌وام ده‌بێت

چامپیۆنس لیگ به‌رده‌وام ده‌بێت

له‌ دوێنی چوارشه‌ممه‌وه‌ یارییه‌كانی قۆناغی چاره‌كی كۆتایی چامپیۆنس لیگ ده‌ستیان پێكردۆته‌وه‌ كه‌ به‌شێوه‌ی پاڵه‌وانێتییه‌كی بچووككراوه‌ له‌ شاری لیشبۆنه‌ی‌ پرتوگال به‌ڕێوه‌ده‌چێت.

سه‌رجه‌م یارییه‌كانی پاڵه‌وانێتییه‌ به‌ په‌یڕه‌وكردنی پرۆتۆكۆلێكی ته‌ندروستی توند كه‌ یوفا دایناوه‌ ده‌كرێن، ئه‌مه‌ش به‌هۆی مه‌ترسییه‌كانی ڤایرۆسی كۆرۆنا.

له‌ مانگی 6ی ئه‌مساڵ پرتوگال به‌راورد به‌ ژماره‌ی دانیشتوانه‌كه‌ی‌ كه‌ 10 ملیۆن كه‌سه‌ زۆرترین ژماره‌ی توشبووی به‌ كۆرۆنا هه‌بوو به‌هۆی ئه‌مه‌ش شاری لیشبۆنه‌ كه‌ره‌نتینه‌ كرا، بۆیه‌ له‌ كاتێكدا ئێستا وڵاتانی تری ئه‌وروپا ژماره‌ی توشوبون به‌ كۆرنا له‌ زیادبووندایه‌ له‌ پرتوگال ژماره‌ی توشبووان رۆژ به‌ رۆژ له‌ كه‌مبوونه‌وه‌ دایه‌ كه‌ هه‌فته‌ی رابردوو 180 حاڵه‌تی نوێ تۆماركراوه‌و نیوه‌یان له‌ لیشبۆنه‌ بووه‌، بۆیه‌ هێشتا پایته‌ختی پرتوگال رێوشوێنی توندی خۆپاراستن له‌ نه‌خۆشیه‌كه‌ په‌یڕه‌و ده‌كرێت رێگه‌ نادرێت له‌ 10 كه‌س زیاتر له‌ شوێنێك كۆببنه‌وه‌ و سه‌عات 8ی شه‌ویش ده‌بێت هه‌موو بازاڕو قاوه‌خانه‌كان دابخرێن.

2 یاخود 3 رۆژ به‌ر له‌ گه‌شت كردن بۆ لیشبۆنه‌ش پێویسته‌ وه‌فدی هه‌موو یانه‌كان كه‌ له‌ یاریزان و راهێنه‌ر و فه‌رمانبه‌ر و به‌رپرسی یانه‌كان پێكهاتووه‌ پشكنینیان بۆ بكرێت، رۆژی پێش یارییه‌كه‌ش له‌و شاره‌ جارێكی تر پشكنین بۆ هه‌مووان ده‌كرێت و پێویسته‌ پێش 6 سه‌عات پێش یارییه‌كه‌ ئه‌نجامی پشكنینه‌كانیش ئاشكرا بكرێت، له‌ پاڵ ئه‌وه‌شدا پێش چوونه‌ نێو یاریگا ده‌بێت پشكنین له‌ رێگه‌ی‌ وه‌رگرتنی پله‌ی گه‌رمی بكرێت.

كاتێكیش یاریزانێك نیشانه‌ی‌ نه‌خۆشییه‌كه‌ی‌ هه‌بێت ئه‌وا پێویسته‌ له‌ هۆتێل كه‌ره‌نتینه‌ بكرێت و دواتر په‌یوه‌ندی به‌ به‌رپرسانی ته‌ندروستی ئه‌و شاره‌ بكات.

پێویسته‌ له‌سه‌ر هه‌ر تیپێك ناوی 13 یاریزان تۆماربكات بۆ یارییه‌كه‌ كه‌ ته‌ندروستیان زۆر باش بێت و ده‌بێت یه‌كێكیان گۆڵپارێز بێت، ئه‌گه‌ر بێت و یانه‌كه‌ نه‌توانێت 13 یاریزان ئاماده‌ بكات ئه‌وا یوفا ده‌توانێت یارییه‌كه‌ دوابخات و ئه‌گه‌ر بۆ ماوه‌یه‌كی كورتیش دوای دواخرانی یارییه‌كه‌ تیپه‌كه‌ نه‌توانێت 13 یاریزانی ته‌ندروست ئاماده‌ بكات ئه‌وا به‌ دۆڕاو هه‌ژمار ده‌كرێت.

بۆ یارییه‌كانیش هه‌ر تیپێك بۆی هه‌یه‌ وه‌فدێك كه‌ له‌ 45 كه‌س پێكبێت بباته‌ ناو یاریگاوه‌ كه‌ له‌ نێویاندا سه‌رۆك و ئه‌ندامانی ده‌سته‌ی كارگێڕی هه‌بێت به‌ڵام بۆی نییه‌ له‌ 10 كه‌س زیاتر بێت.

پێویسته‌ له‌ ژووری خۆگۆڕین پابه‌ندی له‌یه‌ك دووركه‌وتنه‌وه‌ی یاریزانان بكرێت و هه‌وا گۆڕكێ له‌ ژووره‌كه‌ هه‌بێت، له‌ پاڵ ئه‌وه‌شدا ده‌بێت سه‌رجه‌م شوێنه‌كانی ساوناو خۆشتنی یاریزانان دابخرێت هه‌روه‌ها هه‌موو ئه‌و كه‌ل و په‌لانه‌ی‌ به‌كاردێت ده‌بێت به‌ ماده‌ی‌ پزیشكی پاك بكرێته‌وه‌.

ئه‌و منداڵانه‌شی كه‌ تۆپ ده‌هێننه‌وه‌ پێویسته‌ ژماره‌یان 6 بۆ 8 كه‌س بێت و كه‌مامه‌ به‌كاربهێنن و نابێت تۆپ بده‌نه‌ ده‌ست یاریزان به‌ڵكو ده‌بێت له‌سه‌ر زه‌وی دایبنێت و چه‌ند جارێكیش ده‌ستیان به‌ دیتۆڵ پاك بكه‌نه‌وه‌ و نابێت له‌ هیچ كاتێكیش 2 مه‌تر كه‌متر له‌ یاریزانان نزیك ببنه‌وه‌.

ئه‌و تۆپه‌ی له‌ یارییه‌كانیش به‌كار دێت ده‌بێت پێش یاریی و دوای خۆگه‌رم كردن و دوای گێمی یه‌كه‌م به‌ ماده‌ی‌ پزیشی پاك بكرێنه‌وه‌، هه‌موو ئه‌مانه‌ش بۆ ئه‌وه‌ی‌ پاڵه‌وانێتیه‌كی سه‌ركه‌وتوو به‌ڕێوه‌ببه‌ن.

یارییه‌كان
ئه‌مڕۆ پێنجشه‌ممه‌ یارییه‌كی تری قۆناغی چاره‌كی كۆتایی ده‌كرێت كه‌ یانه‌ی‌ ئه‌تله‌تیكۆ مه‌درید رووبه‌ڕووی یانه‌ی‌ لایپزیگی ئه‌ڵمانی ده‌بێته‌وه‌و پاڵێوراوه‌ بۆ ئه‌وه‌ی‌ بگاته‌ قۆناغی پێش كۆتایی.

ئه‌تله‌تیكۆ مه‌درید دوای كردنه‌ ده‌ره‌وه‌ی‌ پاڵه‌وانی وه‌رزی رابردوو هیوایه‌كی زۆری هه‌یه‌ نازناوه‌كه‌ بباته‌وه‌ به‌تایبه‌ت كه‌ له‌وه‌ته‌ی‌ دیگۆ سیمیۆنی بۆته‌ راهێنه‌ری ئه‌و یانه‌یه‌ 2 جار گه‌یشتونه‌ته‌ یاری كۆتایی و له‌ پێشووشدا هیچ یانه‌یه‌ك نه‌یتوانیوه‌ بیانكاته‌ ده‌ره‌وه‌ ئه‌گه‌ر كریستیانۆ رۆناڵدۆ له‌ ریزه‌كانیدا نه‌بووبێت، ئێستاش كه‌ یۆڤانتۆس و ریاڵ مه‌درید كراونه‌ته‌ ده‌ره‌وه‌ سیمیۆنی هیوای ئه‌وه‌ ده‌خوازێت بۆ جاری یه‌كه‌م نازنازه‌كه‌ بباته‌وه‌.

ئه‌تله‌تیكۆ مه‌درید دوای گه‌ڕانه‌وه‌ی‌ یارییه‌كان به‌ ئاستی به‌رز ده‌ركه‌وت و توانی له‌پله‌ی شه‌شه‌می خولی ئیسپانیاوه‌ سه‌ربكه‌وێت بۆ پله‌ی سێیه‌م له‌ پاڵ ئه‌وه‌شدا یانه‌كه‌ توانایه‌كی زۆر باشی له‌و قۆناغانه‌ هه‌یه‌ كه‌ ته‌نها به‌یه‌ك یاری به‌ڕێوه‌ده‌چێت، بۆیه‌ گۆڕینی شێوازی چامپیۆنس لیگ به‌سوودی سیمیۆنی و یاریزانه‌كانی ده‌بێت.

له‌به‌رامبه‌ردا یانه‌ی‌ لایپزیگ له‌ قۆناغی پێشوو توانی ماڵئاوایی به‌ تۆتنهام بكات، به‌ڵام یانه‌كه‌ له‌ میركاتۆی هاوینه‌ ده‌ستبه‌رداری تیمۆ ڤیرنه‌ری گۆڵكه‌ر و ئه‌ستێره‌ی یه‌كه‌می بووه‌ چاوه‌ڕێش ده‌كرێت ئه‌مه‌ كاریگه‌ری گه‌وره‌ی له‌سه‌ر ئاستی یانه‌كه‌ هه‌بێت.

بارسێلۆنا×بایرن مونش
سێیه‌م یاری قۆناغی چاره‌كی كۆتایی كه‌ رۆژی هه‌ینی ده‌كرێت ده‌توانرێت به‌ یاری كۆتایی پێشوه‌خت ناوی ببرێت، چونكه‌ یارییه‌كه‌ له‌نێوان بایرن مونشن و بارسێلۆنا ده‌بێت كه‌ تاكه‌ 2 تیپن پێشتر نازناوه‌كه‌یان بردۆته‌وه‌، له‌ پاڵ ئه‌وه‌شدا له‌ ساڵانی رابردوو كاتێك ئه‌م 2 یانه‌یه‌ رووبه‌ڕووی یه‌كتر بوونه‌ته‌وه‌ ئه‌وا براوه‌یان له‌ كۆتایی نازناوه‌كه‌ی‌ بردۆته‌وه‌.

ئه‌م یارییه‌ به‌یه‌كێك له‌ یارییه‌ كلاسیكیه‌كانی چامپیۆنس لیگ داده‌نرێت، ئه‌مه‌ش به‌هۆی ئه‌وه‌ی‌ چه‌ند جارێك له‌م چه‌ند ساڵه‌ی دوایی ئه‌م 2 یانه‌یه‌ رووبه‌ڕووی یه‌كتر بوونه‌ته‌وه‌ كه‌ سه‌ره‌تا وه‌رزی 2008-2009 بارسێلۆنا توانی به‌ربه‌ستی بایرن ببڕێت و له‌ كۆتایی نازناوه‌كه‌ بباته‌وه‌.

له‌ وه‌رزی 2012-2013 یانه‌ی‌ بایرن مونشن توانی یاری چون و گه‌ڕانه‌وه‌ له‌ بارسێلۆنا بباته‌وه‌و له‌ كۆتاییشدا نازناوه‌كه‌ی‌ برده‌وه‌، دواین جاریش وه‌رزی 2014-2015 بوو كه‌ بارسێلۆنا توانی سه‌ركه‌وتن به‌رامبه‌ر بایرن مونشن تۆماربكات و نازناوه‌كه‌ش له‌ كۆتاییدا بباته‌وه‌.

بایرن مونشن له‌ باشترین دۆخدا رووبه‌ڕووی بارسێلۆنا ده‌بێته‌وه‌ كه‌ ئه‌و یانه‌یه‌ پێش یارییه‌كه‌ خاوه‌نی 18 سه‌ركه‌وتنی له‌سه‌ریه‌كه‌ له‌سه‌رجه‌م پاڵه‌وانێتییه‌كاندا، ئه‌مه‌ش وایكردوه‌ به‌ متمانه‌یه‌كی زۆره‌وه‌ یارییه‌كه‌ بكه‌ن و زۆرینه‌ی‌ پێشبینیه‌كانیش له‌به‌رژه‌وه‌ندی ئه‌و یانه‌یه‌.

له‌به‌رامبه‌ردا بارسێلۆنا دۆخی زۆر باش نییه‌ به‌ڵام پێش یارییه‌كه‌ مێسی كه‌ له‌ یاری رابردوو لێدانی به‌هێزی به‌ركه‌وت گه‌ڕاوه‌ته‌وه‌ بۆ راهێنان و به‌ بوونی ئه‌و یاریزانه‌ش ئه‌وا هه‌موو ئه‌گه‌رێك كراوه‌یه‌ چونكه‌ وه‌كو كارل هاینز رۆمه‌نیگه‌ی به‌ڕێوه‌به‌ری جێبه‌جێكاری بایرن مونشن ئاماژه‌ی پێداوه‌ مێسی خاوه‌نی شتێكه‌ كه‌ هیچ یاریزانێك نییه‌تی و توانای ئه‌وه‌ی هه‌یه‌ به‌ته‌نها یارییه‌ك یه‌كلایی بكاته‌وه‌.

مان سیتی× لیۆن
دوا یاری قۆناغی چاره‌كی كۆتاییش له‌ نێوان مان سیتی و لیۆن ده‌بێت و هه‌موو پێشبینیه‌كانیش له‌به‌رژه‌وه‌ندی تیپیه‌كه‌ی‌ پیپ گواردیۆلایه‌ كه‌ وه‌كو یه‌كێك له‌ به‌هێزترین پاڵێوراوه‌كان بۆ بردنه‌وه‌ی‌ پاڵه‌وانێتییه‌كه‌ داده‌نرێن.

دوای سه‌ركه‌وتن له‌ یاری چون و گه‌ڕانه‌وه‌ به‌رامبه‌ر به‌ ریاڵ مه‌درید و پێشكه‌ش كردنی ئاستێكی به‌رز مان سیتی وه‌كو پاڵێوراوێكی به‌هێز سه‌یر ده‌كرێت، به‌ڵام ناكرێت ئه‌وه‌ له‌ بیر بكرێت لیۆنیش له‌ قۆناغی پێشوو ماڵئاوایی به‌ یۆڤانتۆس كردوه‌، بۆیه‌ ناكرێت به‌ كه‌م سه‌یر بكرێن و له‌ توانایاندایه‌ ئه‌نجامی چاوه‌ڕوان نه‌كراو بنووسنه‌وه‌.

print

 175 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*