سەرەکی » وتار » كاروان یاروه‌یس‌ » ئەو ڕێگایەی پێیدا دەڕۆن، هەر ڕێگاكەی پارە!

نیوه‌ی‌ دووه‌م

ئەو ڕێگایەی پێیدا دەڕۆن، هەر ڕێگاكەی پارە!

64

لە یەكەم وتاری ئەم گۆشەیەدا بەناونیشانی «بەغدا پایزە پایتەخت»، لەبارەی گرنگی ئامادەیی كورد لە بەغدا و ئاساییكردنەوەی پەیوەندییەكان‌و چارەسەركردنی كێشە هەڵپەسێردراوەكانی نێوان هەردوولا، نووسیبوومان.
ئەو كات هەندێك لە سەركردایەتی سیاسی كورد‌و حكومەتی هەرێم پێیانوابوو، ئیدی كاری ئێمە لەگەڵ بەغدا كۆتاییهاتووەو لەگەڵ عیراقدا « گەیاندیانە مریشكە ڕەشە»، لەژێریشەوە خەریكی ئاڵوگۆڕو وەرگرتنی پۆست بوون لە ناوەند.
نە ئەو بێمنەتكردن‌و خەمساردییەی ئەوسا بۆ عیراق، نە ئەم گەرموگوڕی‌و پەرۆشیی‌و جەختكردنەوە بەردەوامەی كورد بۆ گفتوگۆ و ئاساییكردنەوەی پەیوەندییەكان‌و چارەسەركردنی كێشەكان لەگەڵ بەغدا.
ئەوسا دەتوانرا هەركات ئارەزووی بكرابایە، وەفد بنێردرێتە بەغدا، دۆسیەی جۆراوجۆرو گرنگی وەك: ناوچە جێناكۆكەكان، پڕچەككردن‌و بودجەی پێشمەرگە، یاسای نەوت‌و گاز، شایستە داراییەكانی هەرێم، گفتوگۆی لەبارەوە بكرێ‌‌و چارەسەر بكرێ‌.
ئەی ئێستا كورد چۆن‌و بۆچی‌و كەی، دەچێتە بەغدا؟
بێگومان هێشتا روون نییە كەی دەچێت، لە دوای ریفراندۆمەوە زیاتر بەبۆنە و بێ‌ بۆنە، كورد ئامادەیی خۆی بۆ چوونە بەغدا و دەستپێكردنەوەی گفتوگۆكان دەربریوە، بەڵام حكومەتی ناوەند نەك هەر وەڵامدانەوەی ئەرێنی نییە، بەڵكو هەر ڕۆژەوە مەرج‌و بیانویەك بۆ دواخستنی گفتوگۆ دەخاتەروو.

بەڵام ئەوەی روونە، ئەمجارە، كە كورد بە پێگەیەكی لاوازەوە دەچێتە بەغدا گرنگترین دۆسیەیەش لە سەر مێزی گفتوگۆی لەگەڵ بەغد، دۆسیەی دارایی‌و چۆنێتی ناردنی بودجە و مووچەی هەرێم دەبێت. لەجیاتی یەكلاكردنەوەی چارەنوسی ناوچە جێناكۆكەكان‌و جێبەجێكردنی دوا قۆناغی مادەی (140) دەبێ‌ داوای ئاساییكردنەوەی دۆخی خورماتوو بكات.
لەم دۆخە سەخت‌و دژوارەی بەرۆكی كوردی گرتووە، لە باتی چارەسەركردنی كێشە ناوخۆییەكان‌و یەكخستنەوەی نێو ماڵی هەرێم‌و داڕشتنی گوتارێكی نیشتمانیی یەكگرتووی كوردستانیانە بۆ گفتوگۆ لەگەڵ بەغدا، بۆئەوەی نەختێك پێگەی كورد بەهێزبێتەوە، وەفدی حزبی‌و كەسیی دەچێتە بەغدا.
ئەم سەردانانە كێشەكانی نێوان هەرێم‌و ناوەند چارەسەر ناكەن، بەڵكو پێگەی كورد لاوازتر دەكەن، كێشە ناوخۆییەكانی هەرێمیش قووڵتر دەكەنەوە. پێشوازی گەرموگوڕی عەبادی‌و سەركردەكانی تری عیراقیش، بۆ زیاتر پەرتكردنی ماڵی كوردە. ئەگینا عەبادی بۆچی لەلایەك دەڵێ‌ ئەو وەفدەی هەرێم دێتە بەغدا پێویستە نوێنەرایەتی هەموو لایەنە سیاسیەكانی كوردستان بكات‌و بۆچی لەلایەكی ترەوە هەر خۆی نوێنەری چەند لایەنێك‌و چەند كەسێك دەبینێ‌؟
عەبادی ‌و سەركردەكانی تری عیراق باش دەزانن ئەمجۆرە سەردانانە نابێتە هەوێنی چارەسەركردنی كێشەكان، بەڵام وەك تەكتیك و مانۆری سیاسی‌و فشاری دەروونی بەكاریدەهێنن.
ئەم پەرتبوونەش، بەشێكی دەرئەنجام‌و كاردانەوەیە، لەماوەی ڕابردوودا، بارزانی‌و پارتی نەیانتوانی كێشەكان لەگەڵ لایەنە ناڕازییەكان چارەسەر بكەن‌و یەكێتی نێو ماڵی كورد بەدیبهێنن.
هەر خودی ئەم لایانانەش، بنی زمان‌و سەری زمانی میدیاییان بریتی بوو لەوەی بۆچی وەفدی حزبی دەچێتە بەغدا، یان بۆچی ئەو وەفدەی دەڕوات نوێنەراتی هەموو لایەنەكانی تێدانییە‌و ناكرێ‌ پەیوەندییەكان حزبی بن‌و دامەزراوەیی‌و نیشتمانیی نەبن، كەچی ئێستا خۆیان وەفدی حزبی دەنێرن‌و بەدەستكەوتی گەورەشی دەزانن؟!
ئەم رێگایەی پێیدا دەڕۆن هەر رێگاكەی پارە، كێشەكان چارەسەر ناكات‌و ناكۆكیەكان قوڵتر دەكاتەوە. بەڵام قەیرانی دارایی بەجۆرێك خەڵكی پروكاندووە، كە هاوڵاتیان پێكهاتەی وەفدەكانیان بەلاوە گرنگ نییە، بەڵكو چاوەڕوانن مووچە لە بەغدا بێت‌و ژیانیان ئاسایی بێتەوە.

 333 جار بینراوە