سەرەکی » راپۆرت » قەڵای كەركوك بەرەو لە ناوچوون ‌و داڕمان دەچێت

«200 ناوچەی شوێنەواری هەیە»

قەڵای كەركوك بەرەو لە ناوچوون ‌و داڕمان دەچێت

نووسینگەی كەركوك، هێمن ئەحمەد

قەڵای كەركوك شوێنێكی گەشتیارییە‌و مێژووەكەی بۆ پێنج هەزار ساڵ بەر لەئێستا دەگەڕێتەوە، كە لەسەردەمی لۆلۆپی‌و گۆتییەكاندا دروستكراوە، بەڵام ئەم شوێنەوارە گەشتیارییە مێژووییە بۆتە ناوچەی فڕێدانی پاشماوەو وشك‌و وێرانكراو.

سەوزایی بەدیناكرێت
ئامینە عەلی، كە دایكی پێنج منداڵەو دانیشتووی گەڕەكی (رێگای بەغدا)یە لە كەركوك، بۆ كوردستانی نوێ وتی: «هەرچەندە شوێنی گەشتیاری لەكەركوكدا هەیە، بەڵام وەك پێویست نییە، چونكە بەهیچ شێوەیەك سەوزایی تیادا بەدیناكرێت‌و لە زۆربەی شوێنەكاندا سەرئاویان (W.C) تێدا نییە، پێویستە حكومەت كە ناوچەیەكی گەشتیاریی لەسنوورەكە دروست دەكات، گرنگی بەڕووبەری سەوزایی بدات‌و تەنیا بیناو باڵەخانە بەرز نەكەنەوە».

ئەو هاووڵاتییە داوا لەئیدارەی كەركوك دەكات، گرنگی بە پارك‌و قەڵای دێرین‌و شوێنەوارەكانی شارەكە بدات‌و خزمەتی بەردەوامی باخچەی ناو گەڕەكەكان بكات.

ئاوی خاسە و قەڵای كەركوك
هاوكات، میدیا عەلی كە فەرمانبەرە لەفەرمانگەی تەندروستیی كەركوك، دەڵێت: «پێویستە لەناو شارەكەدا ناوچەیەكی گەشتیاریی هەبێت، چونكە ئێمەی فەرمانبەران تەنیا لە رۆژانی پشووە فەرمییەكاندا دەتوانین كاتبەسەربەرین، بەهۆی نەبوونی شوێنی گەشتیاریش لەسنوورەكەدا، دەبێت بچینە دەرەوەی پارێزگاكە كە ئەمە جگە لە ماندوبوون، هیچ چێژێك لە گەشتەكان نابینین».

روونیكردەوە، پێشتر بەهۆی بوونی ئاوی «خاسە» و قەڵای دێرین‌و سرنجڕاكێشی كەركوكەوە، هەزاران گەشتیار لەدەرەوەی شارەكە روویان لە كەركوك دەكرد، بەڵام ئێستا هەم ئاوی خاسەو هەمیش قەڵای كەركوك بوونەتە شوێنی خۆڵ‌و خاشاك كە دیمەنێكی ناشیرینی هەیەو سیمای شارەكەی تێكداوە، بۆیە داوا لەلایەنە پەیوەندیدارەكان دەكەم، خەمێك لە جوانی شارەكە بخۆن‌و شوێنی گەشت‌و كاتبەسەربردن بۆ دانیشتووانی سنوورەكە دابین بكەن.

«تامەزۆی بینینی قەڵای كەركوك بووم»
نەسرین بەكر كە بە سەردان هاتبوو بۆ شاری كەركوك‌و تامەزرۆی بینینی قەڵای كەركوكە، بە كوردستانی نوێی راگەیاند، لە هەموو جیهاندا بوونی قەڵا ناوبانگ‌و مێژووی خۆی هەیە بەتایبەت لەم شارەدا، بەڵام بەداخەوە گریانم دەهات بۆ لەناوچوونی مێژوو و كەلەپوری نەتەوەیەك كە جگە لە وێرانبوون‌و داڕمانی ئەو شوێنەوارە دێرینە، هیچی دیكە بەدیناكرێت، بۆیە تكا لە بەرپرسان‌و شوێنەوارناسانی شارەكە دەكەم، بە هانای قەڵای كەركوكەوە بچن‌و لە وێرانبوون بیپارێزن‌و بە هێشتنەوەی سیما مێژوویەكەی بكرێت بە ناوچەیەكی مێژوویی گەشتیاری.

لە رابردوودا بایەخی باشتریان پێدراوە
مێژوونوس سمكۆ بەهرۆز، سەبارەت بە قەڵای كەركوك‌و ناوچەی گەشتیارییەكانی شارەكە، بەكوردستانی نوێی راگەیاند، كەركوك یەكێكە لەو ناوچانەی كە دەتوانرێت بكرێت بە ناوچەیەكی گەشتیاری، چونكە كۆمەڵێك بنەماو پێوەرو شوێنەواری گەشتیاریی تێدایە، كە دەتوانرا لەڕووی سەرچاوەی داهاتەوە سوودی لێ ببینرێ، بەڵام لەدوای پڕۆسەی ئازادی عیراقەوە‌و بەهۆی ململانێ سیاسی‌و دۆخی ئەمنییەوە، نەتوانرا سوود لەناوچە گەشتیاری‌و مێژووییەكانی شارەكە وەربگیرێت.

وتیشی: «ناوچە مێژوویەكانی شارەكە بەرەو كاولبوون‌و لەناوچوون دەچن، لە بری ئەوەی خزمەت بكرێن‌و ببن بە ناوچەیەك بۆ هاتنی گەشتیاران لەدەرەوەی شارەكە. تەنانەت لە رابردوودا بایەخی زیاتر بەو شوێنانەی كەركوك دراوە».

ئەو روونیدەكاتەوە، لەدوای پڕۆسەی ئازادی عیراقەوە دەبوو بەڕێوەبەرایەتی شوێنەواری كەركوك بایەخ‌و گرنگی تەواوی بە ناوچە شوێنەوارەكانی سنووری پارێزگاكە بدایە، بەتایبەت قەڵای كەركوكیان نۆژەن‌و ئاوەدان بكردایەتەوە، چونكە ئێستا ئەو قەڵایە گرنگییە مێژوویەكەی لەدەستداوە.

200 ناوچەی شوێنەواریی هەیە
سەبارەت بەبوونی ناوچەی شوێنەواریی لەكەركوك، ئەو مێژوونوسە رایدەگەیەنێت، لەكەركوك 200 ناوچەی شوێنەواریی هەیە كە دەتوانرێت بكرێنە ناوچەیەكی گەشتیاری، بەڵام بەشێكی خەریكە دەڕوخێت‌و لەناودەچێت، بۆ نموونە بەشێكی زۆر لەخانووی جولەكەكانی شارەكە بەرەو لەناوچوون دەچێت وەك گەڕەكەكانی (زێوی، ئیمام قاسم، موسەڵڵا‌و شورجە)و چەند گەڕەكێكی تر، چونكە زۆرێك لەو خانووانە كراون بە باڵەخانە كە هیچ بنەمایەكی شوێنەواریی تێدا نەماوە، هەروەها ئەوانەی لە بەڕێوەبەرایەتی شوێنەواری كەركوك كار دەكەن، لەئاستی شیاودا نین كە بتوانن بەو شێوەیە كار بكەن، ئەمە لەكاتێكدا بودجەیەكی زۆریشیان لەبەردەستدایە.

تەنیا دوو پارك هەیە
هاوكات، فەرەیدون عادل سەرۆكی شارەوانی كەركوكك بەكوردستانی نوێی راگەیاند، دەسەڵاتی شارەوانی كەركوك تەنیا لەناو شاردایە، بۆیە ئێمە وەك شارەوانی توانیومانە باخچەكان نۆژەن بكەینەوەو درەختی تێدا بچێنین، لەشاری كەركوكیش تەنیا دوو پارك هەیە بۆ حەوانەی دانیشتووانی شارەكە، لەگەڵ ئەوەشدا بەغدا بودجەی پێویستمان بۆ دابین ناكات، بۆئەوەی خزمەتی سەوزایی باخچەكانی ناو شاری كەركوك بكەین.
وتیشی: «وەكو شارەوانی كێشەی كەمی فەرمانبەرمان هەیە، بۆیە ناتوانین وەك پێویست پاركی زیاتر دروست بكەین، چونكە ئەگەرهاتوو پارك‌و شوێنی گەشتیاریی دروست بكەین، پێویستمان بە باخەوان‌و كارمەندی زیاتر دەبێت بۆ خزمەتكردنیان».

راشیگەیاند، وەكو سەرۆكی شارەوانی پێشنیازی دروستكردنی چەند ناوچەیەكی گەشتیاریم بۆ ئیدارەی پارێزگاكە كردوە، بەڵام بڕیارەكە لە دەسەڵاتی سەرووی ئێمەیە، ئەگەر ئەوان بڕیاری لەسەر بدەن، ئەوا وەك شارەوانی دەتوانین سەرپەرشتی بكەین بە باشترین شێوە.

print

 97 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*