سەرەکی » ئەدەب - سێبەر و سایە » ده‌بێ له‌ ئاستی ولیام فۆكنه‌ردا چی بكه‌ین؟

ده‌بێ له‌ ئاستی ولیام فۆكنه‌ردا چی بكه‌ین؟

له‌ ئینگلیزیەوە: سیامه‌ند موهته‌دی

له‌ مانگی‌ 7/2005 دا، ئۆپرا وینفێری له‌ په‌نجا و پێنجه‌مین بژارده‌ی یانه‌ی كتێب خوێندنه‌وه‌ و كاریگه‌ره‌كه‌یدا، هه‌ڵبژاردنێكی زۆر له‌ ناكاویی كرد. ئه‌و رایگه‌یاندنه‌ كه‌ مانگه‌كانی داهاتوو «هاوینی فۆكنه‌ر « ده‌بێت كه‌ له‌سه‌ر سێ رۆمانی فۆكنه‌ر (كه‌ گیانم ده‌سپارد)، (تووڕه‌یی و هاتوهاوار) و (رۆشناییه‌ك له‌ ئابدا) چڕ ده‌بێته‌وه‌ و ئه‌م سێ كتێبه‌ له‌پاكیجێكدا ئاراسته‌ ده‌كرێت، كه‌ بریتییه‌ له‌ نزیكه‌ی 1100 لاپه‌ڕه‌ و كێشی كه‌متره‌ له‌ یه‌ك كیلۆگرام. ماڵپه‌ڕی ئۆپرا وینفێری ئه‌و وتاربێژییه‌ كورته‌ ڤیدیۆییانه‌ی بڵاوكرده‌وه‌، كه‌ له‌لایه‌ن سێ مامۆستای ئه‌ده‌به‌وه‌ تۆماركراون بۆ ئه‌وه‌ی یارمه‌تی خوێنه‌ران بدات تا تێگه‌یشتنێكی باشتریان له‌ نووسینه‌ ئاڵۆز و به‌ناوبانگه‌كانی فۆكنه‌ر بكه‌وێته‌ به‌رده‌ست. ئه‌م سێ رۆمانه‌ی فۆكنه‌ر به‌خێرایی له‌پله‌ی دووهه‌می پڕفرۆشترین كتێبه‌كانی ئه‌مازۆندا جێگیربوون. به‌شێك له‌ ره‌خنه‌گرانی ئه‌ده‌بی گه‌ڕاندنه‌وه‌ی فۆكنه‌ر بۆ ناوده‌قی گشتیی كۆمه‌ڵگایان به‌رزنرخاند و هه‌ندێكی دیكه‌ش هه‌رچه‌شنه‌ چه‌مكی گه‌ڕاندنه‌وه‌ و ژیاندنه‌وه‌كیان خستۆته‌ ژێر پرسیاره‌وه‌ و پرسیار ده‌كه‌ن ئایا فۆكنه‌ر فه‌رامۆش كراوه‌؟
ده‌یه‌ونیوێك پاش ئه‌م به‌سه‌رهاته‌، بابه‌تی ره‌گه‌زپه‌ره‌ستی و مێژوو كه‌ رۆڵی سه‌ره‌كییان له‌به‌رهه‌مه‌كانی فۆكنه‌ردا هه‌یه‌ دووباره‌ بۆته‌ جێی سه‌رنج. ئێستا پرسیاری ئێمه‌ ئه‌وه‌یه‌ كه‌ چۆناوچۆن ده‌بێ له‌گه‌ڵ ئه‌م نووسه‌ره‌ پێشڕه‌وه‌دا كه‌ خاوه‌نی خه‌ڵاتی نۆبڵیشه‌ رووبه‌ڕووببینه‌وه‌، نووسه‌رێك كه‌ له‌گه‌ڵ تراژیدیای ره‌گه‌زپه‌رستیی له‌ وڵاته‌كه‌یدا به‌باشی ئاشنابوو، بلیمه‌تێكی له‌ دایكبووی 1897 له‌ باشووری ئه‌مریكا و له‌ كه‌شێكی خنكێنه‌ری كۆمه‌ڵگای داخراو و دابڕاوی میسیسیپی؟ له‌ ئێستای مێژوودا كه‌ دیسانه‌وه‌ پرسی ره‌گه‌زپه‌رستیی بۆته‌وه‌ جێی سه‌رنج و قووڵبوونه‌وه‌، بێگومان فۆكنه‌ر سه‌رچاوه‌یه‌كی ده‌وڵه‌مه‌نده‌ بۆ تاوتوێ و لێكدانه‌وه‌ی ورد.

مایكڵ گورا، مامۆستای زمانی ئینگلیزیی زانكۆی «سمیس»له‌سه‌ر ئه‌و بڕوایه‌یه‌ كه‌ فۆكنه‌ر گرنگترین و دیارترین نووسه‌ری سه‌ده‌ی بیسته‌مه‌. ئه‌و له‌ كتێبه‌ ره‌وان و ده‌وڵه‌مه‌نده‌كه‌ی خۆی واته‌«خه‌مناكترین وشه‌كان: شه‌ڕی ناوخۆ-ی فۆكنه‌ر» له‌م باره‌یه‌وه‌ ده‌ڵێ چۆناوچۆن و بۆ ده‌بێ له‌ سه‌ده‌ی بیست و یه‌كدا فۆكنه‌ر بخوێنرێته‌وه‌ و ئه‌م كاره‌ له‌ رێگای تاوتوێی به‌رهه‌مه‌ ئه‌ده‌بیه‌كانی ئه‌و و له‌ رێگای كامێرای شه‌ڕی ناوخۆوه‌ ده‌كرد كه‌ له‌ روانگه‌ی ئه‌وه‌وه‌ به‌«ململانه‌ی ناوه‌ندیی مێژووی»ی گه‌لی ئه‌مریكا دێته‌ ئه‌ژمار. شه‌ڕێ ناوخۆ كه‌ له‌ روانگه‌ی گوراوه‌ پرسێكی روون نییه‌، پرسێك كه‌«ئه‌و جۆره‌ی كه‌ پێویسته‌ دراماتیزه‌ نه‌كراوه‌« له‌ به‌رهه‌می فۆكنه‌ردا هه‌م له‌ هه‌موو شوێنك هه‌یه‌ و هه‌م له‌ هه‌موو شوێنك نییه‌. به‌م حاڵه‌وه‌، «گورا» ده‌ڵێ فۆكنه‌ر ناتوانێ له‌ شه‌ڕی ناوخۆی ئه‌مریكا، دواهاته‌كانی یان ماناكانی هه‌ڵبێت و خه‌ڵكی ئه‌مریكاش به‌هه‌مان شێوه‌. ئه‌و جۆره‌ی كه‌ كاره‌كته‌ری پێشتر كۆیله‌ی»رینگۆ» له‌ رۆمانی»له‌شكان نه‌هاتوو» له‌ سه‌رده‌می ناسراو به‌سه‌رده‌می نۆژه‌نكردنه‌وه‌ سه‌باره‌ت به‌مافی ده‌نگدان ده‌ڵێ»ئه‌م شه‌ڕه‌ كۆتایی نه‌هاتووه‌. هه‌موو شتێك تازه‌ ده‌ستی پێكردووه‌« هه‌ر بۆیه‌ بۆ ئێمه‌ و هه‌روه‌ها بۆ جه‌یسۆن و كوینتین كامپسۆن له‌ رۆمانی تووڕه‌یی و هات و هاوار دا، «بوو» و «دووباره‌» «خه‌مناكترین وشه‌كان»ن. ئه‌و جۆره‌ی گورا باسی ده‌كا»شتێك كه‌ بووه‌ هه‌رگیز كۆتایی نایه‌ت»

له‌ سه‌ره‌تای تاوتوێی بابه‌تێكدا كه‌ فۆكنه‌ر سه‌باره‌ت به‌شه‌ڕی ناوخۆی ئه‌مریكا به‌ ئێمه‌ی ده‌ڵێ و بابه‌تێك كه‌ شه‌ڕی ناوخۆی ئه‌مریكا ده‌توانێ سه‌باره‌ت به‌ فۆكنه‌ر به‌ ئێمه‌ی بڵێ، گورا وه‌ك مێژوونووسێك و هه‌م وه‌ك ره‌خنه‌گرێكی ئه‌ده‌بی ده‌رده‌كه‌وێت. به‌ڵام ئه‌و ده‌نووسێت و دانیشیپێداده‌نێت، وه‌ك «ئه‌كتێكی هاووڵاتی» كتێبی «شه‌ڕی هه‌تا هه‌تایی» روانینی ئه‌و له‌ ئاست مانای ره‌گه‌زخوازی ده‌خاته‌ڕوو، نه‌ك له‌ مێژوو و ئه‌ده‌بیاتی ئه‌مریكا به‌ڵكو له‌ سه‌رده‌می قه‌ره‌باڵغی ئێستای ئێمه‌دا.
ناوەڕۆكی سه‌ره‌كی كتێبه‌كه‌ی «گورا» له‌سه‌ر گێڕانه‌وه‌ی شه‌ڕی ناوخۆی ئه‌مریكا چڕبووه‌ته‌وه‌، كه‌ ئه‌و به‌كردنه‌وه‌ی گرێی رواڵه‌ته‌كانی ئه‌م شه‌ڕه‌ له‌ سه‌رانسه‌ری رۆمانه‌كه‌ی فۆكنه‌ر و رێكوپێككردنی سه‌رله‌نوێیان، له‌ راستیدا شتێكی ئه‌فراندووه‌ له‌ شێوه‌ی «Linearity». گۆرا له‌ كۆی 19 رۆمان و زیاتر له‌ 100 كورته‌ چیرۆكی فۆكنه‌ر، گێڕانه‌وه‌یه‌كی كات ته‌وه‌ر له‌شه‌ڕی «یوكناپاتاوفا» پێك دێنێت. فۆكنه‌ر ئازادانه‌ ره‌وتی رووداوه‌كان ده‌گۆڕێت. ئه‌و شته‌ی ئه‌و به‌ته‌ما بوو وێنای بكات»راستیی سایكۆلۆجیكاڵی به‌ره‌ی كۆنفێدراسیۆنه‌كان» و رۆژه‌كانی پاش شه‌ڕبوو. به‌بڕوای گۆرا، ئه‌وه‌ كارێكه‌ كه‌ به‌ڵگه‌كانی ئه‌و سه‌رده‌مه‌ هه‌وڵیانده‌دا بیكه‌ن.

رۆمانی ئەبشالۆم و شەڕی ناخۆی ئەمریکا
فۆكنه‌ر دیسان ئه‌م ستراتیژییه‌ی له‌ رێگای ئاكتی سه‌یركردنه‌وه‌، تاوتوێكردنه‌وه‌ی به‌شێك له‌ كاره‌كته‌ره‌كان و چیرۆكه‌كان و له‌ رێگای پێشه‌كییه‌كان و ئه‌نجامی ئه‌و شتانه‌ی پێشتر گوتبووی و رۆچوون به‌ناخی ئه‌و راستییه‌ شاراوه‌ و شۆكهێنه‌رانه‌ی كه‌ وێنایان ده‌كات، به‌كاردێنێت .

له‌وانه‌یه‌ به‌هێزترین گێڕانه‌وه‌ی فۆكنه‌ر سه‌باره‌ت به‌ شه‌ڕی ناوخۆی ئه‌مریكا رۆمانی «ئه‌بشالۆم. ئه‌بشالۆم» بێت. رۆمانێك كه‌ له‌سه‌ر بنه‌مای خۆپاراستنی كه‌سایه‌تیی كوینتین كامپسۆن له‌ خۆگێلكردن، پێكهاتووه‌. ئه‌گه‌رچی فۆكنه‌ر پێداگریی ده‌كات كه‌ كوئینتین له‌ جیاتی نووسه‌ر و له‌لایه‌ن ئه‌وه‌وه‌ قسه‌ ناكات، گورا «هه‌رگیز به‌ ته‌واوی بڕوای پێی نییه‌«

ئه‌وه‌ی كه‌ ئه‌م رۆمانه‌ هه‌ر له‌و ساڵه‌دا بڵاوبووه‌وه‌ كه‌ رۆمانی»به‌باكراو» بڵاوكرایه‌وه‌ زۆر سه‌رنجڕاكێشه‌. ئه‌وه‌ زیاتر چیرۆكی مانگه‌شه‌و و ماگنۆلیابوو كه‌ سه‌رنجی كۆمه‌ڵگای راكێشا هه‌تا وێنه‌ی ماندوو و ژاكاوی میراته‌كانی كۆیله‌داری: مارگرێت میچێل و نه‌ك فۆكنه‌ر كه‌ خه‌ڵاتی پۆلیته‌زیشی له‌ 1937دا ده‌سته‌به‌ر كرد. به‌ڵام سه‌رده‌می»ده‌ركه‌وتنی به‌هره‌كان»ی‌ فۆكنه‌ر له‌1929دا ده‌ستیپێكرد 13 كتێب له‌ 13ساڵدا و سه‌رنجه‌ جۆراوجۆره‌كانیشی بۆ لای خۆی راكێشا و هۆكاره‌كه‌شی له‌ داهێنانی شێوه‌ی گێڕانه‌وه‌ و ستایلی ئه‌زموونخوازیی ئه‌وه‌وه‌ سه‌رچاوه‌ی ده‌گرت، نه‌ك ته‌نیا وێنه‌سازییه‌ خه‌وشدار و توندوتیژه‌كانی ئه‌و له‌ ره‌گه‌زخوازی.»سارته‌ر» فۆكنه‌ری له‌گه‌ڵ پروست هه‌ڵده‌سه‌نگاند و له‌ ره‌وتی رۆشنبیریی ئه‌و كاته‌ی فه‌ره‌نسادا، فۆكنه‌ربوو به‌ په‌یكه‌ر.

گورا ئاماژه‌ به‌گرنگی ره‌گه‌زخوازی له‌ رۆمانه‌كانی فۆكنه‌ر ده‌دات كه‌ به‌رده‌وام له‌ زیادبوونه‌. ئه‌م روانگه‌یه‌ و ئاكتی ره‌گه‌زخوازانه‌ی كۆمه‌ڵگا ته‌نانه‌ت خێراتر له‌ بۆچونه‌كانی فۆكنه‌ر تووشی گۆڕانكاری هاتن. له‌گه‌ڵ به‌هێزبوونی بزووتنه‌وه‌ی كۆمه‌ڵگای مه‌ده‌نی له‌ پاش كۆتایی هاتنی شه‌ڕی جیهانی دووهه‌م، فۆكنه‌ر زیاتر له‌ جاران سه‌باره‌ت به‌پۆلێنبه‌ندی ره‌گه‌زی و نادادپه‌روه‌ری له‌ ئه‌مریكا ده‌دوا.

هه‌وڵه‌كانی گورا له‌سه‌ر كۆمه‌ڵێك پرسی گرنگه‌. به‌ڵام ئێستا كه‌وتووینه‌ رۆژگارێكه‌وه‌ بایه‌خی نووسه‌ران تووشی نسكۆ هاتووه‌، به‌رهه‌مه‌كانیان له‌ پێڕستی خوێندنه‌وه‌كان وه‌لانراوه‌، ده‌سكه‌وته‌كانیان بێبایه‌خ ده‌كرێن ته‌نیا له‌به‌رئه‌وه‌ی به‌نیسبه‌تی ئه‌و كێشه‌ و پرسانه‌ی ئێمه‌ ئێستا جیاواز ده‌یبینین، نابینابوون. چینۆ ئاچێبێ كاتی خۆی جۆزیف كۆنرادی به‌ به‌رگریكاری ئه‌مپریالیزم ده‌زانی. گۆرا ده‌ڵێ فۆكنه‌ریش به‌ده‌ردی كۆنراد چووه‌ و بۆ ئه‌وه‌ی راسته‌قینه‌ی ئه‌م نووسه‌ره‌ ده‌ربكه‌وێت پێویسته‌ سه‌رله‌نوێ بخوێندرێته‌وه‌.

فۆكنه‌ر دژی كوشتنی به‌بێ دادگاییكردن قسه‌ی ده‌كرد
گورا ده‌ڵێ»فۆكنه‌ر جیم كرۆی باشووری خسته‌وه‌ یادی پیاوێكی سپیپێست و به‌گشتی له‌وه‌ناچێته‌ سه‌رووتر هه‌ندێك جار وشه‌كانیشی ده‌توانن و ده‌بێ بتوانن ئێمه‌ ئازار بده‌ن.»چیرۆكه‌كه‌ی فۆكنه‌ر»وێنه‌یه‌كی زۆر به‌خشنده‌ له‌ پاتریاكی ده‌ورانی كۆیله‌داری ده‌خاته‌ڕوو» رۆمان و چیرۆكه‌كان ناتوانن به‌وردی ئێش و ئازار و توندوتیژیی له‌دژی كۆیله‌كان بگوازنه‌وه‌ بۆ ناخی خوێنه‌ر، خێزانێك كه‌ به‌هۆی فرۆشتنییانه‌وه‌ له‌یه‌ك دابڕاون، یان لێدانی كۆیله‌كان. زۆرینه‌ی كه‌سایه‌تییه‌ ره‌شپێسته‌كان ناته‌واو دێنه‌ به‌رچاو، ئه‌گه‌رچی ئه‌وان كۆمه‌ڵێك كڵێشه‌ی كاریكاتۆریش نین كه‌وا له‌ نووسینی سپیپێسته‌كانی‌ ئه‌و سه‌رده‌مه‌دا ده‌بینرا.

فۆكنه‌ر چیرۆكی كۆمه‌ڵێك پیاوی سپیپێست ده‌گێڕێته‌وه‌ كه‌«ئازایه‌تی و خۆڕاگری پێویستیان بۆ به‌رخۆدان و نۆژه‌نكردنه‌وه‌« هه‌بوو. رۆمانی «له‌شكان نه‌هاتوو» كه‌سایه‌تی جۆن سارتۆریس وه‌ك رێبه‌ری كۆمه‌ڵگایه‌كی خۆجێی نیشانده‌دا كه‌ به‌شێوه‌یه‌كی هانده‌رانه‌ به‌ته‌مایه‌«ئیزن نه‌دات به‌ تازه‌پێگه‌یشتووه‌كان كه‌ ره‌شپێسته‌كان رێك بخات بۆ شۆڕش» واته‌ ئه‌و روانگه‌یه‌ی كه‌ «سارتۆریس» سه‌باره‌ت به‌ ئازادی مافه‌ تایبه‌ته‌كان هه‌یبوو.

بۆچوونه‌ ئاشكراكانی فۆكنه‌ر له‌ سه‌رده‌می سه‌رهه‌ڵدانی بزووتنه‌وه‌كانی كۆمه‌ڵگای مه‌ده‌نی سه‌باره‌ت به‌ ره‌گه‌ز و ره‌گه‌زپه‌رستیی له‌ زۆر لاوه‌ ته‌نانه‌ت له‌و كه‌موكوڕییانه‌ی گورا ده‌ستنیشانی كردوون، مه‌ترسیدارترن. فۆكنه‌ر له‌ وتووێژێكدا له‌گه‌ڵ رۆژنامه‌ی به‌ریتانی «سه‌نده‌ی تایمز» له‌ ساڵی 1956، زۆر به‌تامه‌زرۆییه‌وه‌ ده‌ڵێ له‌ ئه‌گه‌ری ناچاربوونی باشوور بۆ یه‌كگرتن له‌گه‌ڵ باكوور، شه‌ڕێكی ئه‌تنیكی/ ره‌گه‌زی رووی ده‌دا. به‌ڵام كاتێك قسه‌كانی له‌ ده‌قی كۆمه‌ڵگادا ره‌نگی دایه‌وه‌، گوتی من هه‌رگیز شتی وام نه‌گوتووه‌. فۆكنه‌ر به‌رده‌وام دژی كوشتنی به‌بێ دادگاییكردن قسه‌ی ده‌كرد و كوشتنی «ئه‌مت میل» له‌ 1955ـی شه‌رمه‌زار ده‌كرد و ده‌یگوت هه‌ر كۆمه‌ڵگایه‌ك مناڵان بكوژێت شایانی ژیان و مانه‌وه‌ نییه‌. به‌ڵام فۆكنه‌ر كاتی خۆی گوتبووی ده‌سته‌وتاقمی بێ نرخ و بێ ئه‌خلاقی»وه‌ك ئه‌نجومه‌نی دادوه‌ران و رێگه‌یه‌كیان بۆ به‌رحه‌قبوون هه‌یه‌« گورا ناسه‌قامگیری پێگه‌ و هه‌ڵوێسته‌كانی فۆكنه‌ر هه‌م وه‌ك ره‌خنه‌گر و هه‌م وه‌ك پارێزه‌ری خۆڕاگری سپیپێسته‌كانی باشوور له‌به‌رامبه‌ر گۆڕانكاریدا زه‌ق ده‌كاته‌وه‌.

له‌ زۆر رووه‌وه‌، ئه‌و سپیپێستێكی باشووریی «ناوه‌ندگیر»ی زاتی بوو، شوناسێك كه‌ به‌شوێن گه‌شه‌كردنی بزووتنه‌وه‌كانی كۆمه‌ڵگای مه‌ده‌نیدا، زیاتر له‌جاران درایه‌ به‌ر ره‌خنه‌. ئه‌و توندوتیژی ئیدانه‌ ده‌كرد و لای وابوو پێویسته‌ به‌خێرایی هه‌ڵاواردنی ره‌شپێست و سپیپێستان كۆتایی بێت، به‌ڵام دواتر ئه‌و شته‌ی ره‌تكرده‌وه‌ كه‌ مارتین لۆسه‌ركینگ پێی ده‌گوت»پێویستیی كاتی هه‌نووكه‌یی» گورا لیستێكی له‌ شكسته‌ ئه‌خلاقییه‌كانی ئه‌م نووسه‌ره‌ی كۆكردووه‌ته‌وه‌، به‌تایبه‌ت ئه‌گه‌ر به‌چاوی هه‌نووكه‌وه‌ سه‌یری فۆكنه‌ر بكه‌ین، نه‌ك به‌ روانگه‌كانی سه‌رده‌می خۆی.

ئایا ده‌رخستنی خاڵی لاوازی و كه‌موكووڕییه‌كانی فۆكنه‌ر وه‌ك سه‌رچاوه‌ی تواناكانی جۆرێك ئاكتی «جیۆجیتسۆی راڤه‌یی»یه‌؟ یان له‌وانه‌یه‌ ته‌واو پێچه‌وانه‌كردنه‌وه‌ و نواندنه‌وه‌ی بێت به‌ روانینێكی رۆمانتیك له‌ به‌هره‌یه‌كی رزگاركه‌رانه‌؟ یان ئایا گورا خۆی له‌ژێر كاریگه‌ری شتێكدایه‌ كه‌ فۆكنه‌ر به‌سه‌ر به‌ره‌ی داهاتوودا سه‌پاندی: ئه‌وه‌ی كه‌ ژیانی «له‌ مێژوو جیایه‌ و به‌تاڵ كراوه‌« ته‌نها «كتێبه‌ چاپ كراوه‌كانی» بمێننه‌وه‌؟ له‌هه‌ر حاڵه‌تێكدا فۆكنه‌ر كاتی خۆی گوتبووی كه‌ ده‌یه‌وێت له‌سه‌ر كێله‌كه‌ی بنووسرێ: «ئه‌و كتێبی ده‌نووسی ومرد»

به‌ڵام گورا له‌سه‌ر گرنگی گێڕه‌وه‌وه‌ و گێڕانه‌وه‌ جه‌خت ده‌كاته‌وه‌ و هه‌روه‌ها له‌سه‌ر هێزێكی داهێنه‌رانه‌ كه‌ فۆكنه‌ر له‌ژێر باری ره‌گه‌زپه‌رستیی ده‌ریهێنابوو، نه‌یده‌توانی لێی ده‌رباز بێت. به‌هۆی ئه‌م لاوازیانه‌وه‌یه‌ كه‌ ئێمه‌ ده‌بێ فۆكنه‌ر بخوێنینه‌وه‌، ئه‌م شكستانه‌ به‌رهه‌م و هێمای میراتگه‌لێكن له‌ نادادپه‌روه‌ری ره‌گه‌زی كه‌ هه‌موو مرۆڤه‌كانی ئه‌م سه‌رده‌مه‌ی پێكهێناوه‌. فۆكنه‌ر له‌ وته‌كانی خۆی له‌كاتی وه‌رگرتنی خه‌ڵاتی نۆبڵدا رایگه‌یاند ته‌نیا شتێك كه‌وا بایه‌خی ئه‌وه‌ی هه‌یه‌ بینووسێته‌وه‌ «دڵی مرۆڤێكه‌ كه‌ له‌گه‌ڵ خۆیدا له‌شه‌ڕ دایه‌« ئه‌و هاوكات له‌گه‌ڵ نووسینه‌وه‌ی ئه‌م پرس و كێشانه‌، له‌گه‌ڵیشیان ده‌ژیا. كێشه‌ و هه‌وڵه‌كانی وایان لێكرد ئه‌زموونخواز و داهێنه‌ر بێت و به‌م جۆره‌ بگاته‌ روانگه‌ی جوانیناسانه‌ و ئه‌خلاقی خۆی. ئه‌م ئاسته‌نگانه‌«
هه‌وڵه‌كانی ئه‌و بۆ كاریگه‌ربوون له‌ مێژووی ئێمه‌دا و هه‌روه‌ها بۆ تێوه‌گلان یان واتاداركردنی كۆمه‌ڵێك خاڵن كه‌ فۆكنه‌ریان ئاوه‌ها پڕبایه‌خ كردووه‌. ئێمه‌ كتێبه‌كانی ده‌خوێنینه‌وه‌، چونكه‌ ده‌مانبات بۆ ناخی گه‌لێك، ده‌مانخاته‌ مێژوویه‌كی شه‌رماوییه‌وه‌ كه‌ خه‌ڵكی ئه‌مریكا هێشتا نه‌یاتوانیوه‌ له‌گه‌ڵی رووبه‌ڕوو ببنه‌وه‌ و لێی تێبگه‌ن. گورا و فۆكنه‌ر له‌سه‌ر ئه‌م خاڵه‌كۆكن كه‌ مێژووی ئه‌مریكییه‌كان هه‌رگیز كۆتایی نایه‌ت و بێگومان هێشتاش كۆتایی نه‌هاتووه‌.

سه‌رچاوه‌:
The Saddest Words: William Faulkner›s Civil War

 246 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*