سەرەکی » وتار » مستەفا محەمەد » نەریتێكی نوێی حزبایەتی

شەن و كەو

نەریتێكی نوێی حزبایەتی

دوێنێ لە سەردانێكی مەیدانی و نەریتێكی نوێی حزبیدا، لاهور شێخ جەنگی هاوسەرۆكی یەكێتیی نیشتمانیی كوردستان، هاوڕێ لەگەڵ ژمارەیەك لە ئەندامانی مەكتەبی سیاسی و سەركردایەتی، سەردانی دەڤەری راپەڕینی كرد و لەگەڵ داوا و خواستە رەواكانی كادرانی یەكێتی و كەسوكاری شەهیدان و پێشمەرگەی دێرین و سەرجەم چین و توێژ و هاووڵاتیانی رانیە و قەڵادزێ و ناحیەكانی ئەو دەڤەرە، ئاوێتە بوو.

ئاپۆرای جەماوەر و جۆش و خرۆشی چین و توێژەكانی دەڤەرەكە لە پێشوازیی هاوسەرۆكدا گرنگی و بایەخی ئەجێندای سەردانەكەی شێخ لاهور دەردەخەن و سەلمێنەری ئەوەن كە یەكێتی هەڵقوڵاوی ناو ریزەكانی جەماوەر و خەڵكە، هەر بەو چەشنەش هاووڵاتیان چاویان لەسەر حزبەكەی مام-ە، كە چارەی ئەم دۆخە نالەبارەی بێ مووچەیی و قەیران و كێشە كەڵەكەبووەكان بكات و هەر لە كات و وادەی خۆشیدا بڕیاریان لەبارەوە بدات.

لە وێستگەكانی سەردانەكەی دوێنێدا ئەم نیەتەم لە هاوسەرۆك بینی، كە یەكێتی ئەمڕۆ دەیەوێ بە كردەوە ئەم نەریتی گەڕانەوەیە بۆ ناو خەڵك بەرجەستە بكا و چی لەدەست دێ بۆ خزمەتی ئەوان بیكات، جێی دەستخۆشیشە كە ئەولەویەت دەدرێتە سێكتەرە گرنگەكان. بۆ نموونە، لە دەڤەرێكی وەك راپەڕیندا كە لە بواری تەندروستیدا گرفتی زۆرە و لەم دۆخی كۆرۆنایەدا شوێنگەیەكی گونجاو بۆ چارەسەری ئەم پەتا نەگریسە نییە، هاوسەرۆكی یەكێتی بڕیار لە تەواوكردنی نەخۆشخانەیەكی تایبەت بە كۆرۆنا دەدا، كە پێشتر لەلایەن خێرخوازانەوە دەستپێكراوە، هەرلەوێدا بڕیار لە دابینكردنی تەواوی ئامێر و پێداویستییەكانی دەدات، هەروەك بەڵێن بە وەرزشەوان و گەنجان دەدا كە یاریگا و پێگەی وەرزشی و شوێنی تایبەتیان بۆ بسازێنێ.

ئەگەرچی نادیدە ناگیرێ كە پێش سەردانەكەی هاوسەرۆكی یەكێتی، لەسەر راسپاردەی شێخ لاهور، وەفدێكی باڵای یەكێتی لە ماوەی رابردوودا سەردانی دەڤەرەكەیان كردووە و هاوكاری و پاڵپشتی مادی و مەعنەوی یەكێتییان پێشكەش بە كەرتی تەندروستی و پزیشكان، خۆبەخشان و بوارەكانی تر كردووە، بەڵام ئەم سەردانە خۆی هەڵگری پەیامێكی گرنگی بەرپرسیارێتییە كە هەرەمی ئەم حزبە دەیەوێ رچەشكێنی بكا بۆ حزب و كەس و لایەنەكانی تریش، تا بۆ خزمەتی گشتی، ركابەریی یەكێتی بكەن و هەرچی لەدەست دێ، درێغی لێنەكەن، هەروەها ئاشتبوونەوە لەگەڵ جەماوەر بكەنە مۆدێلێكی نوێی حزبایەتی، چونكە بە راستی ئیدی كاتی بڕیاری وشك و بێ ئەزموون و دابڕانی پشت مێز و لاپتۆپەكان بەسەرچووە، دەبێ هەموو حزبەكان بەپێی توانا و قودرەتی سیاسی خۆیان، ئاوڕێك لە داوا هەنووكەییەكانی دەڤەر و ناوچە جیاوازەكان بدەنەوە، جا چ لە رێگەی نوێنەرەكانیانەوە بێ لە ناو حكومەتدا، یاخود لەسەر ئاستی لایەن، راستەوخۆ ئەوەی لە توانایاندا بێت، پێشكەشی بكەن.

ئەم دۆخە تاقەت پڕوكێنەی هاتۆتە پێش، پێویستی بە تێكشكاندنی تەلیسمی دوورە پەرێزییە، كاری جددی و گەرم و گوڕ و پاڵپشتی مەعنەوی و سیاسی و كارگێڕیی سەركردەكان و كەشی گونجاوی لێكتێگەیشتنی هەمووانی گەرەكە، پێویستی بە وەلانانی بەرژەوەندییە خودییەكان و جۆشدانەوەی بیر و ئەندێشەی خزمەتی گشتییە، كە خۆشبەختانە ئەوەتا یەكێتی لە رێگەی هاوسەرۆكان و لێپرسراوانی ریزی یەكەمی یەكێتی بە سەردانی دەڤەر و ناوچە جیاجیاكانی هەرێم، پراكتیزەی دەكا و مەبەستێتی چەقی ململانێكان لە قازانجی هاووڵاتیاندا تەوزیف بكاتەوە.

ئەو نەخشەڕێگەیەی هاوسەرۆكانی یەكێتی و ئەندامانی سەركردایەتی و بەرپرسانی بۆردە جوداكانی ئەم حزبە كە لە دوای كۆنگرەی چوارەوە تەبەنییان كردووە، جێی دڵخۆشییە و بە دوور لە بیر و ئایدۆلۆژیای حزبگەرا، دەهێنێ دەستخۆشی لێبكرێ، چونكە سەلمێنەری راستییەكە كە پێشڕەویی بۆ قۆناغی دەربازی نیشتمانی و نۆژەنكردنەوە و خۆسازدانەوەی بیر و هزری كۆمەڵانی خەڵك لە خانووە قوڕەكانەوە، یەكێكە لە پێویستییە حەتمییەكانی ئەم وێستگەیەی خەبات كە ناكرێ و ناشێ بە تۆخكردنەوەی ناكۆكیی لایەنەكان و بەئامانجگرتنی سەركردەكان، ئەم تێزە لێڵ، یاخود ون بكرێ، بەڵكو ئەم دۆخە شڵەژاوەی هەرێم پێویستی بە هەنگاوی خێرا و قوربانی گەورە و نیەتی خاوێنە، كە دوور لە ئاراستەی بیری تەسكینەی حزبی و شكاندنی یەكتری تەنها و تەنها خزمەتی كۆمەڵانی خەڵك و باشتركردنی بژێوییان و بووژاندنەوەی سێكتەرەكانی پەیوەست بە ژیانی هاووڵاتیان، خەم و كاری لەپێشینەی هەمووان بێ.

 171 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*