سەرەکی » وتار » ئازاد ئیبراهیم ‌ » 320 جار بەرەو بەغدا

رای ئازاد

320 جار بەرەو بەغدا

7

ئەگەر هەردوو حكومەتی هەرێم و عیراق نیازپاكییەكی تەواوەتی پیشانی یەكتریی نەدەن و بەشێوەیەكی بێ گرێ و گۆڵ لەسەر مێزی گفتوگۆ دانەنیشن بۆ چارەسەرێكی تەواوەتی یاخود لانیكەم رێكەوتنێكی ماوە درێژ، ئەوا 320 جار وەفدی كوردی بۆ 320 ملیارەكە سەردانی بەغدا بكەن و لەگەڵ وەفدی عیراقی دابنیشن، سوودی نابێت و هەردوولا كۆمەڵێك دەستەواژەی هەمیشەیی و چەندان بارەیان هەیە وەك تۆمەت ئاراستەی یەكتریی بكەن.

وەك بینراوە هەموو جارێك دوای زەمەنێك دیدار و گفتوگۆ لەنێوان هەردوولادا، كێشەكان هاتوونەتەوە گۆڕێ و مووچەی فەرمانبەر و مووچەخۆرانی هەرێم لەلایەن بەغداوە دەستی بەسەردا گیراوە و میزاجی حزبی و سیاسی گفتوگۆكانی تێكداوە و هاووڵاتیانیش بوونەتە قوربانی لەو نێوانەدا.

ئێستاش كە عیراق بەرەو پەسەندكردنی بودجەی ساڵی نوێ دەچێت، مەترسی هەیە كە بەشە بودجەی هەرێم لە بودجەی گشتیدا جێی نەكرێتەوە، چونكە بەرچاوڕوونییەك نییە تا هەردوولا رێكەوتنێكی نوێ ئیمزابكەن.

لەدوای ساڵی 2003 و گەڕانەوەی كورد بۆ بەغدا و بوونی كۆمەڵێك نوێنەری شارەزا و كارامە لە ئەنجومەنی نوێنەران و چەندان پۆستی تر لەلایەك، سەرۆك كۆمارێكی كوردی وەك سەرۆك مام جەلال لەلایەكی ترەوە، ئەوە وایكرد كورد كرانەوەیەكی یەكجار گەورە بكات بەڕووی دەرەوە و عیراقدا. نەك تەنها بۆ كورد، بەڵكو بوونی سەرۆك كۆمارێكی وەك مام جەلال بۆ عیراقیش خەڵاتێكی كوردەكان بوو كە تەواوی لینكە بچڕاوەكانی عیراقی بەدەرەوە گرێدایەوە و عیراقی خستەوە نێو هاوكێشە جیهانییەكان، بەڵام لەگەڵ ژیانئاوایی سەرۆك مام جەلال ئیدی ئەو قسەیەی حەسەن عەلەوی گەورە نووسەری عیراقی بووە راست كە دەڵێت: «هەمیشە لایەنە عیراقییەكان لە بۆسەدا بوون بۆ كورد، بەڵام ئەوە مام جەلال بوو نەیدەهێشت جارێكی تر عیراق ببێتەوە بە گۆڕەپانی ناكۆكی كورد و هێزە سیاسییەكانی عیراق».

كەواتە لە روانگەی ئەو بۆچوونەی حەسەن عەلەوی-یەوە، دەگەینە راستییەك كە لەگەڵ ئەوەی هەولێر و بەغدا بەئەندازەیەك متمانەیان بەیەكتر نەماوە و هەردوولا یەكتریی تۆمەتبار دەكەن بە لادان لە رێكەوتنی نێوانیان، هاوكات سەركردەیەك و رابەرێكی سیاسیی وەك مام جەلالیش لە عیراقدا نییە هێزی كۆكەرەوە و چارەسەری كێشەكانی نێوان هەولێر و بەغدا بێت و لێنەگەڕێت پیلانی ناوخۆیی و هەرێمایەتی بگاتە نێوان پێكهاتەكان و جارێكیتر هەولێر و بەغدا كورد و عەرەب لە فۆڕم و شێوەیەكی تردا بەگژ بەیەكتریدا بكات و هیچ دەرفەتێك نەمێنێت بۆ رێكەوتن و ئاشتەوایی و پێكەوە ژیانی نەتەوە و لایەنە جیاوازەكانی عیراق.

ئێستا كاتێك لە دووریی نێوان هەولێر و بەغدا وەك دوو وێستگەی جودا دەڕوانین، دەكرێت ئەم دوورییە لە حاڵەتی دانیشتن و كۆبوونەوەدا لەگەڵ یەكتر ئاسان و نزیك ببینین، بەڵام لە روانگەی سیاسی و دارایی و حكومڕانییەوە دوو جوگرافیا و وێستگەی دوورن لەیەكتریی و بە ئاسانی ناگەن بە یەكتر. بۆیە تاكو ئەم پێكگەشتنە سیاسی و داراییە روونەدات ئەوا 320 جاری تریش وەفدی كوردی بچێتەوە بەغدا ناتوانێت ئەو دوورییە نزیك بكاتەوە و لە خاڵیكدا هەولێر ‌و بەغدا بۆ هەمیشە بگەیەنێتەوە بەیەكتریی.

تا هەولێر و بەغدا دڵنیایی بەیەكتریی نەدەن و شەفاف نەبن لەگەڵ یەكتریدا، هەمیشە ئەگەرێك هەیە بۆ سفربوونەوە و تێكچوونی پەیوەندییەكانیان.

ئەم دڵنیایی دروستكردنەی هەولێر و بەغدا بۆ یەكتریی بەهێزترە لەهەموو ئەو نێوەندگیریی و رێگاچارانەش كە لەلایەن وڵاتانی دەرەوە و ئەمریكاوە خراونەتەڕوو.

 67 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*