سەرەکی » ئاراستە » لە یادی هەشت ساڵەی كۆچی دوایی عەبەڕەق دا

زیاتر لە 10 جار بریندار بووە

لە یادی هەشت ساڵەی كۆچی دوایی عەبەڕەق دا

محەمەد رەزا

نەسرەوتن تا سەركەوتن، ئەو دەستەواژەیە بوو كە پێشمەرگەو فەرماندەكانی یەكێتیی نیشتمانیی كوردستان بە فیعلی پیادەیان دەكرد، بەهیچ كلۆجێك نەدەسروەتن، كۆڵیان نەدەدا تا سەردەكەوتن یاخود شەهید دەبوون.

خوێندنگەكەی مام هەموانی فێری گیانبازی و خوێنبەخشین كرد لە پێناو نیشتمانی دایكدا.

ئەوی رۆژێ، ئەو خەباتە رەوایەی ی.ن.ك بوو كە ئەمڕۆی ئازادی بەرهەمهێنا، هەر لەوپێناوەشدا دەیان سەركردەو سەدان فەرماندەو هەزارن پێشمەرگەی بۆ كردۆتە قوربانی.

یەكێك لەو فەرماندە خۆنەویستانە، تێكۆشەری كۆچكردوو عەبدوڵڵا قادرحەمەلاو (عەبەڕەق)ە، ئەم فەرماندە نەمرە كاتێك لەساڵی 1978 دەچێتە ریزی رێكخستنەكانی كۆمەڵەی رەنجدەرانی كوردستانەوە، دوژمن لەوپەڕی بەهێزیی دابوو، بەڵام ئەو بێ سڵەمینەوە ئەركەكانی سەرشانی جێبەجێدەكرد، باكی بە مردن و تیاچوون نەبوو، دڵسۆزی خاك و گەل و نیشتمان بوو، هەر بۆیە چاونەترسانە هەر ئەركێكی پێدەسپێردرا بە زیادەوە جێبەجێیی دەكرد.

لەئەنجامدا كارەكانی ئەو فەرماندەیە لە خەباتی نهێنیدا، دەبێتە جێگەی متمانەی هەڤاڵانی رێكخستن و سەركردایەتی شۆڕشیش.

عەبەڕەقی ئازاو دلێر، گوێ بە دڕندەیی دوژمن و مەترسییەكانی سەر ژیانی خۆی نادات، چەندینجاریش هەوڵی دەستگیركردنی دەدرێت، بەڵام هەمووجارەكان ئازایانە و زۆر بەچاپووكی لە دەستیان هەڵدێت و پیلانی ناحەزان پووچەڵ دەكاتەوە، تەنانەت دوژمنیش تووشی شۆك دەكات، ئیدی بە بڕیاری سەركردایەتی لە ساڵی 1979دا دەچێتە شاخ و دەبێتە پێشمەرگە لە كەرتی دووی بازیان- هەرێمی پێنجی ئەوسای قەرەداخ.

لەسەرەتای پێشمەرگایەتیشدا هێندە ئازاو قارەمان دەبێت، وا هەستدەكرێت خاوەن ئەزموونێكی دوورو درێژی پێشمەرگایەتییە.

پاش ماوەیەك دەگوازرێتەوە بۆ ناوەندی كۆمەڵە و دواتریش دەچێتە كەرتی زیندان لە خڕی ناوزەنگ.

لە هەموو ئەو شوێنانەی كار تیاكردووە وەك كەسێكی بە هیمەت و گورج و گۆڵ دەناسرێت و دەبێتە جێگەی متمانەی هەموولایەك و خۆشیاندەویست.

ساڵی 1980ش دەگوازرێتەوە بۆ كەرتی دووی هەرێمی سێی ئەوكاتە.

عەبەڕەق هێندە ئازاو چاونەترس بووە، بەشداریی دەیان شەڕی كردووە و زیاتریش لە 10جار بریندار كراوە، تەواوی پلەكانیشی بەئازایەتی بڕیوەو دوا پلەشی لەشاخ، فەرماندەی تیپی 31ی سلێمانی بوو.

لە كاتی پاشەكشەی هێزی پێشمەرگە بۆ سەر سنوورەكان لە ئەنفالدا، دەبێتە فەرماندەی هێزی مەكتەبی سیاسی و یەكێكیش دەبێت لەوانەی كە پەیوەندی نێوان رێكخراوی سلێمانی و سەركردایەتی گرێدەداتەوە، لەو ماوەدا زۆرترین جار چۆتە ناوشاری سلێمانییەوە و دوای تەواوكردنی كارەكانی، گەڕاوەتەوە شاخ و سەر لەنوێ جارێكی تر بەنهێنی چۆتەوە ناوشار، چەندین سیخوڕو تاوانبارانیشی بەسزا گەیاندووە.

لەداستانەكانی دابان- هەلاج و قەیوان- ماوەت دا رۆڵی بەرچاوی هەبووە و یەكێك بووە لەو فەرماندانەی بەهۆی سەركەوتنەكانییەوە چەندینجار مام جەلال دەستخۆشی لێكردووە.

هەروەها لە داستانی رزگاریشدا، عەبەڕەق و تیپەكەی كە شاخی گۆیژەو بەشێك لە رەبایەكانی شاخی ئەزمڕیان پێ سپێردرابوو، هەر لە سەرەتای شەڕەكەدا بەسەركەوتویی توانیان ئامانجەكان بپێكن و دوژمن لەو شوێنانە دەرپەڕێنن، لەكاتی گرتنی رەبایەكانی شاخی گۆیژە، وەك دڵخۆشییەكیش بۆ خەڵكی سلێمانی، عەبەڕەق چەند گوللە ئاڕبیجییەك بە ئاراستەی شاردا دەتەقێنێ.

جگە لەهەموو ئەمانەش، عەبەڕەق پەیوەندییەكی پتەوی لەگەڵ گوند نشینەكان هەبوو، بۆیە خۆشەویستییەكی زۆر لەنێوانیاندا هەبوو.

پێویستە ئاماژە بەوەش بكرێت هەر یەك لە خاتوو(نازیف)ی دایكی و (یاسین)ی برای بەدەستی بەعسی فاشی شەهیدكراون.

رۆژی 28/12/2012 بەمەبەستی بەشداریكردن لە پڕۆسەی هەڵبژاردنی لقەكانی كۆمەڵەی ێشمەرگە دێرینەكانی كوردستاندا، لە (سیتەك)ەوە بەرەو سلێمانی بەڕێدەكەوێت، بەڵام لە رێگەدا جەڵتەی دڵ لێی دەدات، دوای مانەوەی 10رۆژ لە نەخۆشخانە و لە رۆژی 6/1/2013 بۆدواجار چاوەكانی لێكدەنێ و دەگاتە كاروانی هاوڕێ شەهیدەكانی.

 89 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*