سەرەکی » وتار » بۆ ساڵیادی مامەڕیشە

بۆ ساڵیادی مامەڕیشە

ئازاد سەراوی

هەموو ساڵێك لە وەرزی سەهۆڵبەنداندا، بوومەلێڵی رێبەنداندا، لە مانگی كانوونی دووەم، چاوەكانم فرمێسكیان تیا دەزێت و دڵیشم؛ غەم، هەموو ساڵێك لە ساڵیادی شەهیدبوونت رۆخانە بوار نادات و شەپۆلەكانی سەركێشن، سەری سەگرمەش سەر بە تەم، هەموو ساڵێك لەم رۆژەدا هەردوو نیشتمان پێكەوە پڕدەبن لە خەم و ماتەم، نیشتمانی خاكی دایك تاجی سەرت، لەگەڵ خاتوونی نیشتمانی هاوسەرت.

قەرەحەسەن ئێستاش چاوت بۆ دەگێڕێ و بەدوای هەواڵێكتدا وێڵە، جەباریی؛ رەشپۆش و غەمگین، گەرمیانیش تاریك و لێڵە، وەك ئاسمانی گەورە و بەرین مامشەو قرخ و تاڵەبان هەتا ئێستاكەش بۆت دەگرین.

تاكو ئێستا لە بێتواتە سەنگەرەكەت سەربووردەیە بەسەرهاتە ئەفسانەیە، دەست و مەچەك و تفەنگت رێی خەباتە، هەڵمەتت وەك یەكانەیە.

رەبیەكەی سەردڵی خاك، لووتكەی كڵاوی دێوانە، هێندە قایم و قەڵا بوو، لووتی لە هەور ژەنیبوو و لە ناو وەشی هەورا بوو، بەڵام لەژێر هەڵمەتی شێرانەی تۆدا وا رووخا بووە هەشەكۆ، دار و بەردی بەسەریەكدا سووتا و بووە سووتە مەرۆ.

لە گردی كوڵێنجەڕێڕێ و دەشتی دەسماڵ حەریرەوە، لە بێتواتە و چیای بەنی هەریرەوە، لە گەرمیانەوە تا كوێستان، سنوورەكانت تێكشكان، بوویتە هەڵۆ لە رۆژهەڵاتی نیشتمان، لە باشوور هەتا رۆژهەڵات، یەك نیشتمانەو یەك وڵات، لای تۆ هەر بێشەی خەبات بوو، داگیركەر لە هەر كوێ بووبێت، تۆ لەوێ بوویت، لە هەر كوێیەك رەگی چەوساندنەوە هەبووبێت، ئامادەبوویت لەسەرپێبوویت، لە فەلەستیندا زامدار بوویت، بێ جیاوازیی نەتەوە و خاك، پشتیوانی گەلی چەوساوە و هەژار بوویت.

لەو گەرمیانە رەشتاڵەدا، بوویتە داستانی سەردەم و هەستانەوە، بوویتە هێمای كۆڵنەدان و ژیانەوە، بوویتە داستانی نوێی سەردەم، بوویتە هەناری گوڵ بە دەم، بە سەرشان و ملی ئەو پێدەشتانەی گەرمیاندا شۆڕبوویتەوە و بوویتە پەرچەم.

لەگەڵ سەردار و موحسین-دا؛ گڕو بڵێسەی ئاگر بوون، لە قەڵای سەختی زۆرداردا، سێ پڵنگی چنگ بە گڕبوون لە هەڵمەت و پەلاماردا لە سەرجادەی كەركوك-بەغدا لەسەر جادەی وەك رەشماردا، بە دەروازەی كەركوكەوە سێ گوڵ ئەستێرەی شەوانن، ریزە فیشەكی گڕداری بان مەقانن، تا هەتایە سێ میدالی ئازایەتیی مل و گەردنی گەرمیانن.

هەموو ساڵێك لەم وەرزەدا، ئێوە دێنەوە ناو دیدە و پێڵووی چاوان، كە چۆن لە بۆسەی غەدردا لەپەنا سفرەی كوردانە شەهید كران نامەردانە.

هەموو ساڵێك لەم وەرزەدا، دەبن بە تریفەی مانگ و هەڵۆی بەرزەفڕی شاخان، خائینانیش بۆ سەرەنوێلكی مێژوو بۆ زبڵدان.

 182 جار بینراوە