سەرەکی » وتار » جەمال ئارێز » پەندە هەڵێنجراوەكان لە كۆڕەوپەڕە 25

پەندە هەڵێنجراوەكان لە كۆڕەو

دەچینەوە سەر هەمان دروشمی نان و ئازادیی پێكەوە، چونكە زۆرن لەوانەی ئێستا ئیدیعای باشی و چاكیی بەر لە راپەڕین و خاسیەتەكانی بوونی هەموو شتێك لەو سەردەمەدا دەكەن، جگە لەئازادی، ئەگەرچی بۆ ئەو هەبوونی هەموو شتەش ئێمەمانان ئەو نەوەیەی هەردوو سەردەمەكەمان بینیووە، باش دەزانین كە هەموو شتێك نەبوو، سەرەڕای نەبوونی ئازادیش، بەڵام بابزانین كۆڕەوی دوای راپەڕین و راپەڕینەكانی دووەم و سێیەم چ پەیامێكیان دا بەگوێی رژێم و ناوچەكە و جیهانیشدا.

راستە پەلاماردانەوەی شارە راپەڕیوەكانی عیراق و كوردستان لەلایەن هێزەكانی رژێمی بەعس و شكستی راپەڕین شێوازی مامەڵەی هێزەكانی رژێم مەترسییەكی گەورەی لەسەر خەڵك دروستكرد و هەر ئەوەش بووە مایەی ئەوەی خەڵك بەگشتی ماڵوحاڵی خۆیان بەجێ بهێڵن و هەموو ئەوەی بە چەندین ساڵ بنیاتیان نابوو بكەنە قوربانی سەر و گیانی خۆیان، بەڵام كۆڕەو هەر بەتەنیا ترس نەبوو، چونكە كۆڕەو و چۆڵكردنی شارە گەورەكان و دروستبوونی لۆدێكی گەورە لەسەر سنوورەكانی ئێران و توركیا بۆخۆی بووە جێگەی سەرنجی میدیاكان و بۆ زیاتر ریسوانەبوونی، رژێم لێبوردنی گشتیی دەركرد، بەڵام سەرباری لێبووردنەكەش خەڵك هۆكاری خۆی هەبوو بۆ نەگەڕانەوە كە ئەویش دووبارە نەگەڕانەوە بوو بۆ ژێردەستەیی و دەستەمۆیی و زەوتكردنی ئازادییەكانی كە تەنها لە 20-25 رۆژی راپەڕیندا مومارەسەی كردبوو.

هەربۆیە مانەوەی خەڵك لە سنوورەكان و ناوچە سوتماك و وێرانكراوەكاندا، بووە دیپلۆماسییەتێكی دەستە جەمعی و گوشارێكی گەورە لەسەر رای گشتیی جیهان و كۆمەڵی نێودەوڵەتی و لەوێوە هەموویان لەوە تێگەیشتن كە ئەو خەڵكە چیتر ئامادەی گەڕانەوە نییە بۆ ژێردەستەیی و ئامادەیە لەبرساندا بمرێت و لەسەرماندا رەق بێتەوە، بەڵام ناچێتەوە ژێر باری زەوتكردنی ئازادییەكانەوە.

لێرەدا پرسیارێك دێتەگۆڕێ كە ئەویش ئەوەیە ئەگەر وەك هەندێك ئیدیعای دەكەن كە گوایە هەموو خەڵك لە راپەڕین پەشیمانە، ئەدی بۆچی هەر لەساڵی 1991 تا دانوستانی بەرەی كوردستانیش لە 11/4 دەستیپێكرد، كەس ئامادە نەبوو بگەڕێتەوە، یان بۆچی دوای گەڕانەوەیان و دوای ئەوەی رژێم وردە وردە دەیویست بەهەمان شێوازی جاران پێگەی خۆی لە ناو شارەكاندا قایم بكاتەوە و دەست بباتەوە بۆ شێوازەكانی مامەڵەی جارانی، لە مانگی تەمموز و تشرینی یەكەمی 1991 دا راپەڕینی دووەم و سێیەم بەرپاكرا تا رژێمی ناچاركرد بۆ دواجار بە خواستی خۆی شارە گەورەكانی سلێمانی و هەولێر و دهۆك بەجێ بهێڵێت؟

ناشێت نەوەی تازە پێگەیشتوو بەوە چەواشە بكرێن كە گوایە «لە سەردەمی رژێمدا هەموو شتێك هەبووە جگە لە ئازادیی»، بابزانین وابووە؟ دیارە لێرەدا مەبەستم هەموو عیراق نییە، بەڵكو مەبەستم لە كوردستانە ئەوەی ناونرابوو ناوچەی ئۆتۆنۆمی! ئەرێ هەموو ئەو نەوەیەی كە لە كۆتایی هەشتاكاندا ژیاون، لەبیرتان نییە هەمیشە لە كوردستاندا قەیرانی نەوت و غاز هەبوو؟ لەبیرتان نییە لە هەموو شارەكانی عیراق خۆراك و كاڵاكانی خواردەمەنیی وەك برنج و رۆن و ئارد و … فری بوو، تەنها لە «ناوچەی ئۆتۆنۆمی» بە كۆپۆن بوو؟ ئەمە سەبارەت بە شارەكان و قەزاو ناحییەكان، بەڵام بۆ گوندەكان بردنی بابەتی خۆراكی بە ئاشكرا قەدەغە بوو و دەبوو بە قاچاخ كەلوپەل لە بازگەكان رەت بكرێت؟ ئەوە سەرباری نەبوونی ئازادییەكان.

كۆڕە و بۆ ئەوە بوو كورد بە جیهان بڵێت هەموو شتێك دەكەم بە قوربانی ئازادیی و سەربەستی، بەڵام ناڕەزاییەكانی ئەمڕۆی خەڵكانی دڵسۆز و پەرۆشی ئایندەی كورد و كوردستان بۆ ئەوە نییە كە پێمانوابێت خەڵك نانی دەوێت ئیدی چش لە ئازادیی، نەخێر خەڵكی كوردستان هەردووكیانی پێكەوە دەوێت و خەبات بۆ هەردووكیان دەكات، ئەوان نایانەوێت تەنها لەپێناوی ناندا ئازادییەكەیان لەدەستبدەن و ناشیانەوێت لە پێناوی خەبات بۆ ئازادیی برسی بكرێن، نەخێر چونكە ئەوان خەباتیان كردووە بۆ كوردستانێكی ئازادی خۆشگوزەران، بەڵام مخابن ئێستا هەندێك دەنگی نەشاز پەیدابوون دەیانەوێت خۆڵ بكەنە چاوی نەوەی تازە پێگەیشتووەوە كە ئاگاداری پێش راپەڕین نین، بۆیە ئەركی ئێمەی نەوەی موخەزرەمە سووربین لەسەر خەبات و بەدەستێك خەبات بۆ چەسپاندنی پایەكانی ئازادیی دوای راپەڕین بكەین و بەدەستێكیش خەبات بۆ بەدیهێنانی وڵاتێكی پڕ نان و خۆشگوزەرانی و دادپەروەر بكەین بۆ خۆمان و ئەو نەوەیەش كە ئێستا پێدەگەن تا هەمیشە لەبیریان بێت و بەقسەی كەس غافڵگیر نەبن و ئەوانیش بۆ نەوەكانی دوای خۆیان دەست بە چەمكەكانی نان و ئازادییەوە بگرن.

 359 جار بینراوە