سەرەکی » راپۆرت » ئامادەکردنی:بورهان ئەمین » شەڕی فەلەستین-ئیسرائیل لە دیدی میدیای ئەڵمانیاوەپەڕە 27

شەڕی فەلەستین-ئیسرائیل لە دیدی میدیای ئەڵمانیاوە

شەڕ و پێكدادانەكانی نێوان ئیسرائیل و فەلەستین ماوەی هەفتەیەكە دەستیپێكردووە و تادێت گەرمتر دەبێت، مووشەكبارانی هەردوولا بۆ سەر یەكتر خەستتر بۆتەوە و شەڕ و پێكدادانەكان لە كەرتی غەزە و قودس و تەلئەبیب و چەند ناوچەیەكی تر بەردەوامە.

ئەو دۆخە ئاڵۆزەی ناوچەكە و مووشەكبارانەكانی سەر هاووڵاتیانی مەدەنی، بۆتە مانشێتی هەواڵە گرنگەكانی میدیای ئەڵمانیا و رۆژانە باسی پێشهاتە تازەكانی دەكەن، بەگشتی رەخنە لە هەردوولا دەگرن كە رەچاوی ژیان و گوزەران و سەلامەتی هاووڵاتیان ناكەن.

״ئاماژەیەكی خراپمان نیشان دەدەن״
رۆژنامەی FRANKFURTER ALLGEMEINE ZEITUNG نووسیویەتی «توندتربوونی شەڕەكان ئاماژەیەكی خراپمان نیشان دەدەن بەوەی كە روودانی شەڕی نێوخۆیی نزیكبۆتەوە، گەرچی هەوڵی دانوستان و ئاشتی هەیە، بەڵام مەحاڵە پڕۆسەی ئاشتی لەنێوان ئیسرائیل و بزووتنەوەی حەماس سەر بگرێت».

هەورەها رۆژنامەی DIE RHEINPFALZ باسی ئەوەی كردووە كە «فەلەستینییەكانی ناو ئیسرائیل نزیكەی 20 ٪ی كۆمەڵگەی ئیسرائیلی پێكدەهێنن، بوونەتە قوربانی سیاسەتی ئەو وڵاتە و بزووتنەوەی حەماس، ئەوان هەمیشە بەهۆی نەتەوە و ئاینەكەیانەوە لەلایەن ئەمن و ئاسایشی وڵاتەوە راو دەنرێن و ئازاریان دەدەن، كەچی لەملاشەوە سەركردایەتیی بزووتنەوەكە و حكومەتی فەلەستین وەك كارتی فشار بۆ كۆكردنەوەی پشتیوانییەكان بۆ خۆی بەكاریان دێنن»، رۆژنامەكە داوا لە كۆمەڵگەی نێودەوڵەتی دەكات كەئەو گەمەیە راگرن.

هەروەها SDDEUTSCHE ZEITUN نووسیویەتی «ئەو ناوچەیە و بەتایبەتیش ئەو وڵاتە لەمێژە شەڕی لێیە، بەڵام وەك ئەمجارە توند نەبووە و بەمجۆرە مووشەكبارانی خەستی تێدا بەكار نەهاتووە، هەرگیز وەك ئەمجارە ناكۆكی لەنێوان عەرەب و ئیسرائیل بەرپانەبووە، تادێت لایەن و وڵات و گروپی تر تێوەدەگلێن، نووسەری راپۆرتەكە پێیوایە كە «هەوڵە ناوخۆیی و ناوچەییەكان ناتوان ئەو ئاگرە دابمركێننەوە، تا لایەنە بەهێز و نێودەوڵەتییەكان سنوری بۆ دانەنێن».

مەترسی شەڕی ناوخۆ هەیە
رۆژنامەی VOLKSSTEMME لە راپۆرتێكیدا نووسیویەتی «گەورەترین زیانلێكەوتووانی ئەوشەڕە خەڵكی مەدەنی و بێتاوانن كە دەبنە قوربانی سیاسەتی هەردوولا و ئەو مووشەكبارانانە كە ژن و منداڵ و پیروپەككەوتەی پێوەدەبێت، جگە لە زیانی گیانی وەك گرفت و گرێكوێرەیەك لەنێوان نەوەكانی داهاتووی هەردوولادا دەمێنێتەوە»، ئەو رۆژنامەیە پێیوایە «بە درێژایی مێژووی ناكۆكییەكان هەردوولا خەتابار بوون، حكومەتی ئیسرائیل لەمدواییەدا زیاد لە پێویست فشارەكانی زیاتر كردبوو، لە بەرامبەریشدا ئاڕاستەی حەماس و لایەنەكانی دی و حكومەتی فەلەستنیش رووە و ئاشتی نەبووە و توندوتیژتر لە جاران هەڵسوكەوتیان كردووە و سەرەنجام ئەو بارە نەخوازراوەی ئێستایان دروستكرد كە چارەسەرەكەی ئەستەم بووە».

پێگەی تەلەفزیۆنی NTV لە راپۆرتێكیدا دەڵێت «جگە لە شەڕە مووشەك لەنێوان هەردوولادا، لەو ناوچانەی ئیسرائیلیش گرژی و ئاڵۆزی هەیە كە عەرەبی تێدا دەژین، هەرچەندە بڕیاری قەدەغەی هاتوچۆ دراوە، لەگەڵ ئەوەشدا پێكدادان لەنێوان خەڵكی مەدەنی و هێزە ئەمنییەكانی ئیسرائیل درێژەی هەیە و قوربانی زۆر هەن و خەڵكێكی زۆریش دەستگیركراون، ئێستا وا چەكی تێدا بەكار دێ و فراوانتریش بووە، وای لێهاتووە خەڵكی مەدەنی لەهەردوولا هەڵدەكوتنەسەر یەك و خەریكە دەبێتە شەڕی ناوخۆ».

چارەسەری نێودەوڵەتی پێویستە
رۆژنامەی TAGESSPIEGEL پێشبینی دەستەبەربوونی ئاشتی ناكات و دەنووسێت «هەرچەندە هەوڵی ئاشتی هەیە، بەڵام لەوەناچێت بەم زووانە ئەو شەڕە دابمركێتەوە، چونكە گەیشتۆتە ترۆپك و دوژمنداری حەماس و حكومەتی فەلەستین لەلایەك لە دژی حكومەتی ئیسرائیل و لەلایەكی تریش شەڕەكە دابەزیووەتە نێو زۆر بواری ژیانی كۆمەڵایەتی خەڵكی و كۆمەڵگەی كردۆتە دوو بەش و دوو دوژمنی سەرسەختی یەكتر».

پێگەی T-ONLINE دەڵێت «كێشەی نێوان ئەو دوو لایەنە ساڵ بەساڵ تازەتر دەبێتەوە و فۆرمێكی تر بەخۆیەوە دەبینێت، ئیسرائیل خۆی بە دیموكرات و دوژمنەكەشی كە حەماسە بە تیرۆریست وەسف دەكات، هەمان كات حەماس ئەوان بە تیرۆریست و خۆی بە دیموكراتخواز ناودەبات، بۆیە ئەو كێشەیە لە چوارچێوەی ناوخۆیی دەرچووە و بۆتە كێشەیەكی نێودەوڵەتی و هەر لەسەر دەستی وڵاتانیش چارەسەردەكرێت».

سەرچاوە: كەناڵەكانی میدیای ئەڵمانیا

 1,169 جار بینراوە