سەرەکی » زانست » تەنها ئۆتۆمبێلە ژینگە دۆستەكان تۆمار دەكرێن

تەنها ئۆتۆمبێلە ژینگە دۆستەكان تۆمار دەكرێن

گۆڕانی ئاوو هەواو پیسبونی ژینگە وا خەریكە كارەساتی مرۆیی گەورەی لێدەكەوێتەوە، زریان و باوو بۆران و لافاوی وێرانكەر لەئەنجامی گەرمبونی ژینگەوە دروستبون و پیسبونیش ساڵانە هەزاران كەس دەكوژێت یان توشی نەخۆشی كوشندەی دەكات..

بۆ چارەسەركردنی ئەو دۆخە نەخوازراوەی مرۆڤایەتی وڵاتان خەریكی دۆزینەوەی رێگاو جێگایەكی شیاون، یەكێك لەوانە كەمكردنەوەی یان نەهێشتنی ئەو ئۆتۆمبێلانەیە كە ژینگە پیس دەكەن، لەجیاتی ئەوانیش دروستكردنی ئۆتۆمبێلی ژینگە دۆست ئەوانەی كە لە ئەگزۆزەكانیانەوە دوكەڵی ڕەش فڕی نادەن و نابەنە هۆی پیسبون ، كۆمسیۆنی یەكێتی ئەوروپا لەم رۆژانە ئاشكرایكرد كە قۆناغەكانی ئەو هەڵمەتە دەستپێكردوەو ئێستا ئەو ئۆتۆمبێلانەی كە دوكەڵی زۆر فڕێدەدەن و بەگازو دیزل كاردەكەن بۆ 55٪ كەمكراونەتەوەو لەجیاتی ئەوان هی تازەو ژینگە دۆست خراونەتە بازاڕەوە.

پلان وایە تاساڵی 2035 هەموو ئەو ئۆتۆمبێلانەی كە لەلایەن كۆمپانیاكانەوە دروست دەكرێن و بەو سوتەمەنیانە كاردەكەن كە زیان بە ژینگە دەگەیەنن تۆمار نەكرێن و تابلۆ وەرنەگرن، لەبەرامبەریشدا هەڵمەتێكی گشتگیر دەستیپێكردوە بۆ خستنەكاری ئۆتۆمبێلی كارەبایی واتە لەجیاتی بەنزین و گاز بە كارەبا كار دەكات و پاتریەكەی پڕدەكرێتەوە و تا سەدان كیلۆمەتر بڕدەكاو ئینجا جارێكی تر سەر لە نوێ پڕدەكرێتەوە، ئەم جۆرە ئۆتۆمبێلە زیانی بۆ ژینگە و سروشت نیە و ئێستا حكومەتەكان هەوڵ دەدەن هاوڵاتیانیان هان بدەن كە ئەم جۆرانە بكڕن، حكومەتی ئەڵمانیا بۆهاندانی هاووڵاتیان جۆرێك لە هاوكاری مادیش پێشكەش بەوانە دەكات كە كۆنەكانی خۆیان بەجۆری تازە دەگۆڕنەوە، لەپلانە درێژخایەنەكەی یەكێتی ئەوروپاشدا كە تا 2050 دەخایەنێت هاتووە كە نابێت هیج ئۆتۆمبێلێكی ژینگە پیسكەر بەسەر شەقامەكانی وڵاتە ئەندامەكانیدا بڕوات ، بەپێچەوانەشەوە توندترین سزای دارایی سەرپێچیكاران دەدرێت.

سەرچاوە: Deutschland.de, dpa

 196 جار بینراوە