سەرەکی » دۆسێ » ئەمریكا: وەزیری دادی ئێران مافی مرۆڤی پێشێل كردووەپەڕە 19

داوای دەستگیركردنی دەكرێت

ئەمریكا: وەزیری دادی ئێران مافی مرۆڤی پێشێل كردووە

ئەمریكا، وەزیری دادی ئێرانی پێشێلكاریی مافی مرۆڤ و زۆرێك لە سەرپێچییەكان دادەنێت، ئۆپۆزسیۆنی ئێرانیش داوا دەكات ئەو وەزیرە دەستگیربكرێت.
نیكی هایلی باڵێوزی ولایەتە یەكگرتووەكانی ئەمریكا لە نەتەوە یەكگترتووەكان لە 25ی شوباتی 2018، لە بەیاننامەیەكدا راگەیاندبوو»پێویستە ئەنجومەنی مافی مرۆڤی سەر بە نەتەوە یەكگرتووەكان هەست بە شەرمەزاریی بكات كە رێگەیداوە لە هەفتەی رابردوودا، سەید عەلی رەزا ئاوایی وەزیری دادی ئێران لە ئەنجومەنەكە وتار پێشكەش بكات»، ئۆپۆزسیۆنی ئێرانیش لای خۆیەوە داوای دەستگیركردنی ئاوایی و دادگایی كردنی كردبوو.
هایلی لە بەیاننامەكەیدا رایگەیاندبوو:»ئاوایی بەرپرسە لە بەشێك لە خراپترین پێشێلكارییەكانی مافی مرۆڤ لە ئێران، بە رێگرتن لە پێدانی ئازادییە سیاسییەكان و بەگەڕخستنی هەوڵەكانی سەركوتكاریی و توندوتیژی و كاریی كوشتن لە دەرەوەی چوارچێوەی یاسا كە زیندانییە سیاسییەكان لەو وڵاتەدا رووبەڕووی دەبنەوە».
باڵێوزی ئەمریكا لە نەتەوە یەكگرتووەكان، بەپێویستی زانیبوو، «ئەنجومەنی مافی مرۆڤ هەست بە شەرمەزاریی بكات كە رێگەی داوە ئاوایی وتارەكەی پێشكەش بە ئەندامەكانی بكات»،ئەوەش بە گوتەی هایلی»جارێكی ترە ئەنجومەنەكە متمانەی خۆی لەدەستدەدات كە رێگە بە پێشێلكارێكی مافی مرۆڤ دەدات، كارەكانی بڕفێنێت و سوكایەتی بە پێگەی بكات لەڕووی پتەوكردنی مافی مرۆڤی جیهانی»،داوایشی كردبوو ئەنجومەنەكە گوێ‌ بۆ بانگهێشتەكانی واشنتۆن بگرێت تا «كات و داراییەكانی بە باشی وەبەربهێنێت».
ماوەیەك لەمەوبەر، رێكخراوی موجاهیدنی خەلقی ئێرانی ئۆپۆزسیۆن، بەیاننامەیەكی داركردبوو كە تێیدا داوای هەڵوەشاندنەوەی وتارەكەی وەزیری دادی ئێرانی كردبوو لە ئەنجومەنی مافی مرۆڤی سەر بە نەتەوە یەكگرتووەكان لە جنێف، ئۆباڵی «كوشتارەكەی ساڵی 1988»یشی لە دژی نەیارانی ئێرانی خستبووە ئەستۆی ئەو پیاوە.
موجاهدینی خەلق، داوای دەستگیركردن و دادگایی كردنی عەلی رەزا ئاوایی وەزیری دادی ئێرانی كردبوو، بەو هۆیەی دەستی لە «تاوانەكانی دژ بە مرۆڤایەتیدا هەیە و ئەندامی لیژنەیەك بووە كە بڕیاری لەسێدارەدانی بۆ زۆرێك لە زیندانییە سیاسییەكان دەركردووە، لەنێوان ساڵانی 1979 و 1988 لە پۆستی داواكاریی گشتی و دادگای شۆڕشدا بووە لە دەیزەفول و ئەهواز».
گروپی «موجاهیدینی خەلق» دەڵێت، ناوی ئاوایی لە لیستی ئەو كەسانەدا بوو كە لەلایەن یەكێتی ئەوروپا لە ساڵی 2011 دەركرا، بەو هۆیەی «پێشێلكاریی لە مافی مرۆڤدا كردووە، و بەشداریی راستەوخۆی هەبووە لە ئەشكەنجەدانی زیندانییە سیاسییەكان و كوشتارگەكان لە دژیان».
ئەو گروپە پێیوایە»لە روانگەی تۆماریی ئەو پیاوەوە كە پڕە لە تاوانی دژ بە مرۆڤایەتی، تاكە مینبەر لە ئەوروپا كە پێویستە وتاری تێدا بدات، دادگای نێودەوڵەتی تاوانەكانە».
لە هەنگاوێكی دەگمەندا، ئایەتوڵڵا عەلی خامنەیی رابەری باڵای كۆماری ئیسلامی ئێران داوای لێبوردنی لە گەلەكەی كردبوو، ئاماژەی بە بوونی ئەو كەموكوڕییانەش كردبوو كە لە «بواری دادوەریی»دا هەن لە وڵاتەكەی.
خامنەیی لە 18ی شوباتی 2018 و لە وتارێكیدا لە تاران كە لەڕێی ماڵپەڕی تایبەتی خۆیەوە بڵاوكرابۆوە، بەپێویستی زانیبوو پێشكەوتن لە «بواری دادوەریی»دا بكرێت، لە هەمان كاتدا دانی بەو رەخنە فراوانەشدا نابوو كە لە سیستمی حوكمڕانی گیراوە لەماوەی چەند هەفتەی رابردوو.
رابەری باڵای كۆماری ئیسلامی ئێران، بەپێویستی زانیبوو داوای لێبوردن لە گەلی ئێرانی بكرێت لەبەرانبەر ئەو كەموكوڕییانەدا.
ئەو لێدوانانەی خامنەیی لە یادی چل ساڵەی راپەڕینی شاری تەبرێز بوو كە ساتێكی گرنگی بۆ هەڵایسانی شۆڕشی ئیسلامی لە ساڵی 1979دا پێكهێنا.
خامنەیی دانی نابوو بە خۆیشاندانەكانی ناڕەزایی و پشێوییەكانی كۆتایی ساڵی رابردوو كە لە ساڵی نوێیشدا بۆ ماوەی هەفتەیەك لە ناوچە جیاجیاكانی ئێران بەردەوام بوون، بەڵام لەگەڵ ئەوەشدا رایگەیاندبوو كە تائێستاش گەل بە نەبەردییەوە پشتیوانی لە شۆڕشی ئیسلامی دەكات و «كاتێك رووداوەكان پەیوەندییان بە شۆڕش و سیستمی وڵاتەوە دەبێت، خەڵكی دێنەپێش و بەرگری لێدەكەن».
رابەری باڵای كۆماری ئیسلامی ئێران لەگەڵ ئەو قسانەشدا، ئاماژەی بە رەخنەكانی خەڵك كردبوو بۆ هەندێك لە پرسەكان لە وڵاتەكەی كە بە گوتەی ئەو «ئاگاداری تەواوی هەموو ئەو سكاڵاو گلەییانەن».
لە خۆپیشاندانەكانی ئەم دواییەی ئێران كە لە كۆتایی ساڵی 2017وە دەستیانپێكرد، دەیان كەس كوژراون و سەدان كەسیش دەستگیركران، خۆپیشاندەران لەبەرانبەر خراپی دۆخی گوزەران، ناڕەزاییان بەرانبەر بە حكومەت دەربڕیبوو، بەڵام بە گوتەی چاودێران، زۆرێك لەوانەی لەلایەن دەسەڵاتدارانی ئێرانەوە لەپاش خۆپیشاندانەكان دەستگیركرابوون، بەشێوەیەكی نەشیاو مامەڵەیان لەگەڵدا كراوە و هەندێكیشیان لە دەرەوەی چوارچێوەی یاسا نێودەوڵەتی و ناوخۆییەكان، مامەڵەیان لەگەڵدا كراوە و لە كونجی زیندانەكاندا قایم كراون.
تەوژمەكانی خۆپیشاندانی ئەمجارە لە ئێران بە گەورەترین دانران، ئەوەش دوای خۆپیشاندانەكانی ناڕەزایی لە دژی هەڵبژاردنەوەی مەحمود ئەحمەدی نەژاد لە ساڵی 2009 كە لەلایەن دەسەڵاتدارانەوە سەركوتكران و تێیاندا بەپێی ئامارە رەسمییەكان، 36 كەس كوژرابوون، ئۆپۆزسیۆنیش «ریفۆرمخوازەكان» ئاماژەی بە كوژرانی 72 كەس كردبوو.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*