سەرەکی » وتار » گۆران فه‌تحی » هەڵاتنێك هاوشێوەی فیلمە ئەكشنەكان

هەڵاتنێك هاوشێوەی فیلمە ئەكشنەكان

گۆران فەتحی 

دوای هەڵاتنی چەند زیندانییەكی فەلەستینی لەیەكێك لە زیندانە پتەو قورسەكانی ئەو وڵاتە، ئیسرائیل تووشی شۆك بوو خودی رووداوەكەش رەخنەی زۆری دروستكرد لەسەر هێزە ئەمنیەكانی ئیسرائیل، بەكاربەرانی پێگەكانی ئەنتەرنێتیش رووداوەكەیان كرد بە هەلێك بۆ گاڵتەجاڕی، لەبەر ئەوەش هێزە ئەمنییەكانی ئەو وڵاتە هەموو هەوڵەكانی خستۆتەگەڕ بۆ دەستگیركردنەوەی زیندانییە هەڵاتووەكان، توانیویەتی چەند كەسێكیان دەستگیربكاتەوە.

دوای ساڵێك تونێل دروستكردن
رۆژی دووشەممەی رابردوو، شەش زیندانی فەلەستینی، كە لەنێویاندا زەكەریا زوبەیدی سەركردەی بالای سەربازی لە بزوتنەوەی فەتحی فەلەستینی، توانییان دوای ساڵێك هەوڵدان بۆ خۆدەربازكردن، لەرێگەی كەوچكی چێشتەوە تونێلێك دروست بكەن و هەڵبێن بۆ دەرەوەی زیندانی «جەلبوع» كە دەكەوێتە باكووری ئیسرائیلەوە و لەنێوان هەردوو شاری جەلیل و جەنیندایە.

بەپێی رێكخراوێكی داكۆكیكار لەزیندانیان فەلەستین ئەوا زەكەریا زوبەیدی و پێنج زیندانی تر كە لەبزوتنەوەی جیهادی ئیسلامین توانیویانە هەڵبێن لەو زیندانەی ئیسرائیل.

دەزگا راگەیاندنەكانی ئیسرائیل هەرزوو ووردەكاری هەڵاتنەكەیان بڵاوكردەوە كە لەرێگەی تونێلێكەوە بووە، هەروەها گرتەیەكی ڤیدیۆییش لەسەر تۆڕە كۆمەڵایەتییەكانی ئەنتەرنێت، ساتی دەرچوونی زیندانییەكان لەدیوی دەرەوەی تونێلەكە نیشان دەدات.

رەخنەی توند لەدەزگا ئەمنییەكان
بەهۆی رووداوەكەوە رەخنەی توند ئاراستەی دەزگا و هێزە ئەمنیەكانی ئیسرائیل كرا، لەناوخۆی ئەو وڵاتەو بەشێكی هاوڵاتیانی ئیسرائیل و هەروەها عەرەبیش بابەتەكانی كردە ماددەیەك بۆ گاڵتەكردن بەتوانای زیندانەكە و هێزە ئەمنیەكانی ئیسرائیل..

خودی رووداوەكەش ئیحراجییەكی زۆری بۆ دەزگا ئەمنییەكانی ئیسرائیل دروستكرد و بووە مایەی نیگەرانی هاووڵاتیانی ئیسرائیل، لەبەرامبەردا فەلەستینیەكان لە غەزەو هەندێ شاری تر رووداوەكەیان بە كارێكی ئازایانە وەسفكرد و خۆشی خۆیان دەربری لە رێگەی دابەشكردنی شیرینی لەسەر شەقامەكان.

نەفتالی بینیتی سەرۆك وەزیران و هەروەها عومر بارلیفی وەزیری ناوخۆی ئیسرائیل راكردن و هەڵاتنی ئەو زیندانیانەیان بەرووداوێكی مەترسیدار وەسفكرد، لای خۆیەوە بەڕێوەبەرایەتی پۆلیس ئەوەی روونكردەوە، كە دەزگای هەواڵگری ئیسرائیلی شاباك و هەروەها سوپای ئیسرائیل بەشداری هەڵمەتێكی پۆلیسی ئەو وڵاتە دەكەن، بۆ دووبارە دەستگیركردنەوەی زیندانییە هەڵاتووەكان و ئاماژەی بەوەشكرد فرۆكەی درۆن لەپرۆسەكەدا بەكاردەهێنرێت.

لای خۆیەوە یانەی «دیلی فەلەستینی» ووردەكاری و هەروەها ناوی هەر شەش زیندانییە هەڵاتووەكەی بڵاوكردەوە كە ئەوانیش هەریەك لە «زەكەریا زوبەیدی، مەحمود عەبدوڵا كە لە 1996ەوە زیندانی هەتا هەتاییە، محەمەد قاسم لە 2002ەوە زیندانی هەتاهەتاییە، یەعقوب محەمەد قادری لە 2003ەوە زیندانی هەتا هەتاییە، ئەیهەم نیاف كە زیندانی هەتا هەتاییە، مونازیل یەعقوب كە لە 2019ەوە گیراوەو زیندانی هەتا هەتاییە.

دەستگیركردنەوەی چوار لە هەڵاتووەكان
دوای ئەو رەخنە زۆرەی كرایە سەر هێزە ئەمنییەكانی ئیسرائیل، ئەو هێزانە هەموو هەوڵەكانی خۆیان خستەگەڕ بۆ دەستگیركردنەوەی ئەو شەش زیندانییەی لە زیندانی جەلبوع هەڵاتبوون، ئەوەبوو رۆژی هەینی دووان لەزیندانییەكانیان لە گەراجێك لەباكووری ئیسرائیل دەستگیركرد، رۆژی شەممەش دوو زیندانی تریان دەستگیركرد، كە ئەوانیش هەر یەك لە عەلی زەكریا زوبەیدی و محەمەد عاریزە بوون لە گوندی ئوم ئەلغەنەم.
بەوەش چوار لە كۆی شەش زیندانی هەڵاتووی زیندانی جەلبوع دەستگیركراونەتەوە.

نموونەی زۆری لەجیهاندا هەیە
رووداوی هەڵاتنی ئەو زیندانیانەی فەلەستین، دەرخەری ئەوەیە، چەندە زیندانەكان پتەو قایم دروستبكرێن، بەڵام هەندێكجار كەسی زیندانی بەتایبەت ئەوانەی شارەزایی و هەروەها حوكمی قورسیان لەسەرە، هەوڵی زاڵبوون بەسەر زیندانەكەدا بدەن و دەرفەت بۆ خۆدەربازكردن بدۆزنەوە، مێژوو چەندین حاڵەتی لەو جۆرەی تێدایە و لەزۆربەی ناوچەكانی جیهان، دەرهێنەرانی فیلمیش بەتایبەت ئەكشن، زۆرجار سوودیان لەو رووداوانە بینیوە بۆ دەرهێنانی فیلمەكانیان، زنجیرەی تەلەفزیۆنی بەناوبانگیش لەسەر هەڵاتن لەزیندان هەیە، لە نموونەی زنجیرەی (شكاندنی زیندان- prison break) كە بینەرێكی زۆری لەجیهاندا هەبوو.

 143 جار بینراوە